Read Mousgoum Markus 1 Bible Online

Markus 1 - Mousgoum bible

Markus 1

¹Pi zi tiki na wiini labar na pɗem na midini Yesu Kristu Ahini Alaw.

²Maini n’aŋ gaini ɗû war ɗû na wiini ɗif na mini Alaw Esaya ɗa nɵa: Mu na ɵinaɗi ɵeŋŋa wuzaku, kapai a ɓisitiku futiku

³A ni n’a ɗuula edi warni basga na kaɗataŋ ɓa: ziziniti futi na wiini Epiɗ-ɗai ɗiyi futini n’agogoi cir cir.

⁴Yohana si Baptisme a luɓasi edi warni basga na kaɗataŋ, a ɓaka midini baptisme na wiini bindi na gamai, buri ni na wiini tuwur lai.

⁵Ɗai na Yudia gaiɗi na Yeruzalem paŋ, e hili edi sini, e nivi baptisme tini par war Yurdan, won hlai n’e siɗi tuwurɗi wuzaɗi ɗai doogo.

⁶Yohana sapa na sini ɗa a za gaini ayirni ɵigini, santir z'amur wuzani ɓak lai, a suma ɗa ayuwi gaini emelni ami na buza.

⁷A ɓaka maini nɵa: Ni n’a na halasi asakala par spakni a suwaŋa ta, mu dai dai na mu kiɗa aŋ goɓo azumai aŋ pla sogom na midini harabakni edi kai.

⁸Ta mu siki baptisme gaini yem, Ni ɗa aga a siki baptisme gaini Seze sɗik.

⁹War mefeŋ ni ɗa, Yesu a halasi a Nazaret war Galileya par, a nava baptisme tini Yohana par agoɗom warni Yurdan.

¹⁰Won hlai n’a niyasi agoɗom arni yem par tar, a tala hlai n’amai ɗa a ɓasa, Seze a yorosi amai par midini maini dere nɵa.

¹¹Wule a halasi amai par a muɗa: Tuku k’Ahiya zi diri gara, ku vaŋa firyiŋa amai ku tuku.

¹²Won hlai ni tizaw, Seze a kaŋ edi war buza, a fana mefeŋ doogo doogo puɗu edi war basga na kaɗataŋ, Satan a tanaŋ. A nafu gaini wazagai n’edi buza, ɗai zi ɵeŋ na war fuŋ-n’Alaw e zini pini.

¹⁴Asakal na e ɵi Yohana war daŋgai li, Yesu a halasi a Galileya, a ɓaka labar na pɗem na wiini Alaw,

¹⁵a muɗa: Hlai a va li, pai n’Alaw, te cosi li, ki bindi, ki yimi pini labar na pɗem.

¹⁶Won hlai n’a vuga wulani yem-ra n’abai na Galileya, a tala Simun gaini Andre e ɗa agoɗom war yem-ra n’abai aŋ ɵi ava, buri nagai e ɗi ɗai zi yimi hilif.

¹⁷Yesu a miɗiɗi: Hilisi pa, aga mu bindiki aŋ ɗai zi tûmi ɗai.

¹⁸Tizaw tar, e hinisi avaɗi edi, e tipi pini.

¹⁹A hala wuzani sek agwi, a nava Yakob n’ahini Zebedewus gaini Yohana na tawalni. E ɗifu warni hulumɗi ca aŋ zizini avaɗi.

²⁰Won hlai ni tizaw a yikiɗi, e hini Zebedewus n’epiɗi warni hulum n’abai gaiɗi ɗai zi sda, e tipi pini.

²¹E niyi aha war Kapernahum, war mefeŋ ni Sabbat ɗa e hili amlai warni sinagogne, a tika pini aŋ hitriɗi ɗai.

²²E bindi hiyak burini hitri n’a hitriɗi ɗa, buri a hitra maini ɗif n’aŋ gaini spak nɵa, maiɗi ɗai zi ɗû wazagai ɗa nɵa kai.

²³Amlai warni sinagogne hanɗa, ɗif na ksalai aŋ midini a nafu, a ɗuula a muɗa:

²⁴N'a tupuku gaya ɗa a ma ɗa? Yesu na Nazaret par? Ku halasi ɗa aŋ vidiyi edi ɗi? Ta mu suɗuku edi gaglai.

²⁵Amma Yesu a ɓaraŋ a muɗa: Ba muku, niyasi edi warni ɗif hanɗa par;

²⁶Ksalai a bulaŋ azumai, a gidiyaŋ gdaŋ, a niyasi edi sini par, a ɗuula gaini gdaŋni.

²⁷Ɗai paŋ hunai te yimiɗi, e miɗi arbaɗi marɗi: Wala hanɗa a maɗa? A hitri na hehe, zaw a spak na maɵa? A muɗa sini ksalai, a ɵina pini lai ɗa!

²⁸Tizaw, yikini a wa edi mini afti na Galileya paŋ.

²⁹Won hlai n’e niyisi warni sinagogne par, gaini Yakob lai, Yohana lai e hili ahani Simun gaini Andre.

³⁰Suwulni Simun te nafu azumai waŋ, siɗi a sawa, tizaw e miɗini wiini Yesu gaiɗi.

³¹A hala siɗi gobi, a yimiti tiɗi, a siniti amai, siɗi zi sûwi a hiniti, te faka amai te zina piɗi.

³²Koskoi, asakal na futi te nawa li ɗa, e kiɗinisi ɗai zi veglek ɗa paŋ sini, gaiɗi na ksalai aŋ midiɗi lai.

³³Ɗai na war fuŋ n’abai ɗa paŋ e tipisi mini magala paŋ. A zuula pinzibani veglek viya, a birga ksalai midiɗi ɗai par viya lai, a hina ksalai a muɗa kai buri ksalai a sɗaŋ ya.

³⁵Gorof, won hlai na hlai a na gegeŋ hai, a faka amai a hala edi war baŋa, woni a tika pini aŋ siiwa.

³⁶Simun gaiɗi marni na gaini e hili aŋ piyiŋ.

³⁷Won hlai n’e niviŋ, e miɗini: ɗai paŋ e ɗa piyuku.

³⁸A wiyiɗi seŋ a muɗa: Hulumu warni hlai zamai, war fuŋ na ɵimani ɗa kapai mu ɓaka seŋ woni lai, mu niyasi edi burini sda hanɗa.

³⁹A hala midini afti na Galileya paŋ, a ɓaka seŋ warni Sinagogneɗi, a birga ksalai edi lai.

⁴⁰Ɗif zi duggum ktai a halasi sini, a pa kurnaini azumai, a siiwaŋ a muɗa: Na ɓa ku dara, bundaŋa hilu pla kai ɗi!

⁴¹Hiinini-haw a yimaŋ, a wa tini, a tetemaŋ a muɗa: Mu dara, bunda hilu.

⁴²Tizaw, veglek zi duggum a hinaŋ, a bunda hilu.

⁴³Yesu a gidini mini gdaŋ a muɗa: Ku za hangal kapai ɗif a ɵina hanɗa muku par kai. Hala, ku siŋka suku arɗi paakai n’abakai zi ɓaka ɗa, za wazagai na Musus a gada midini buri bindiku na hilu ɗa. Hanɗa aga a za aŋ wala zi zaida buriku.

⁴⁵Amma hlai n’a hala ɗa, a tika pini aŋ ɓaka labar hanɗa edi gaini wulani amai, gaini gdaŋ lai, haa Yesu a bunda a niya aha war fuŋ n’abai papɗak kir kai, a bunda a sumna edi warni hlai na baŋa, e kiɗinisi ɗai zi veglek na war hlai paŋ par sini.