Read Mousgoum Markus 10 Bible Online

Markus 10 - Mousgoum bible

Markus 10

¹A faka amai woni par, a hala midini afti na Yudia gaini afti n’aŋene duɓani Yurdan par.

²Firiɗi ɗai e tipisi sini pra, maini n’a na zaŋ kûreɗ-kûreɗ nɵa, a tika pini aŋ hitriɗi pra.

³A waya seŋ a miɗiɗi: Musus a gidiki maɵa ɗa?

⁴E miɗi: Musus, a sa futi aŋ ɗo maktuɓ zi bidi buri e siŋɗi tiɗi muni ta, a biditi lai.

⁵Yesu a miɗiɗi: Musus a ɗo seŋ zi gadai hanɗa burini agulki na gdaŋ.

⁶Amma war pi zi tiki, won hlai n’Alaw a za wazagai paŋ ɗa, a rgiɗi wus gaiɗi muni.

⁷Nɵa wus aga a hina epini gaiɗi emini edi, a tapa gaiɗi munini,

⁸nagai gaini suliɗi e ɗi si ktai.

⁹Buri wala n’Alaw a tapaŋ li ɗa, ɗif aga a ɓurwaŋ edi kai.

¹⁰Won hlai n’e cû war dalam ɗa, ɗaini zi hiri e zilbiŋ midini seŋ hanɗa pra.

¹¹A miɗiɗi: Asiya ɗi paŋ n’a biditi munini edi, a tikiti na zamai ɗa, a za maɵara siɗi munini n’avut ɗa.

¹²Na ɓa, muni te baada pini mofaɗi par bud, te hala te tika wus zamai, te za ɗa a maɵara lai.

¹³Ɗai e kiɗinisi aliyagoi kapai a tikiti tini siɗi, amma ɗai zi hitri e ɓiriɗi.

¹⁴Won hlai na Yesu a tala hanɗa, a za hiy, a miɗiɗi: Hiniɗisi aliyagoi e hilisi sa, ki ɗiliɗi kai, buri paini fuŋ-n’Alaw te na buriɗi nagai na maiɗi nɵa ɗa.

¹⁵Jre, mu miɗiki: Asiya ɗi paŋ n’a yimiti pai n’Alaw maini ahiyagwi nɵa kai ɗa, aga a niya warɗi kai zaŋ.

¹⁶Asakal par a miliɗi amai tini, a tika pini a ɓikiɗi, a tika tini midiɗi lai.

¹⁷Ɗif ktai a lawasi mini, a hurga azumai wuzani a zilbaŋ: Api zi hitri na pɗem, na mu za ɗa a ma ɗa? Kapai mu nava suŋfa n’a vada kai aŋ bulum ɗa?

¹⁸Yesu a miɗini: Ku yikaŋa na pɗem buri ma ɗa? Ɗif na pɗem aŋ kai; sai a Alaw ktai.

¹⁹Seŋ zi gadai n’a muɗa ɓa: Ku ɵiɓa belek kai, ku za maɵara kai, ku hala wala kai, ku za eles pini maiku kai, ku zini meefeŋ wiini ɗif kai, ku tika walani ɗif kai, apuku gaiɗi amuku ku kûliɗi amai; gadai hanɗa, ku sɗaŋ ya kai ɗi?

²⁰A miɗini: Api zi hitri, wazagai hanɗa paŋ mu yimaŋ mada war agwiyeŋeŋa par.

²¹Won hlai na Yesu a talaŋ, a daraŋ, a miɗini: Wala a hina puku ktai, hala, ku wura wazagaiku paŋ edi, ku siŋɗi wiiɗi na murgakai, aga ku nava godai warni fuŋ-n’Alaw, asakal par ku halasi, ku tapasi pa.

²²Arni a yirɓaɗi amai par buri seŋ n’a ɵinaŋ ɗa, a hala gaini kwimi burini buri faraini a nafu viya gara.

²³Yesu a ɵa arni ɵimani a muɗa wiiɗi ɗaini zi hitri: A gir gara buriɗi ɗai zi farai e niyi warɗi pai n’Alaw.

²⁴Ɗaini zi hitri e bindi hiyak burini seŋni ɗa, amma Yesu a waya a miɗiɗi pra: Aliya, niyi na warɗi pai n’Alaw ɗa a wala na caŋ gara.

²⁵Zligini a niya warni baŋani lepre gop a suwa ɗif zi farai n’a niya warɗi pai n’Alaw.

²⁶Ɗai zi hitri e bindi hiyak a suwa pra, e miɗi arbaɗi marɗi: Na ɓa ɵa ɗa, a sɗa aŋ kora ɗa asiya ɗa?

²⁷Yesu a tiliɗi a muɗa: Wala n’a za gaini ɗif kai ɗa, Alaw a kiɗa a zaŋ, buri Alaw a za wala paŋ.

²⁸Peter a tika seŋ a muɗa: Tala, tiyi mi hinisi wazagaiyi edi paŋ aŋ tipi puku.

²⁹Yesu a waya seŋ a muɗa: Jre, mu miɗiki: Ɗif n’a hinasi dalamni edi, zaw tawalakaini na maɵagai, zaw tawalakaini na falakai, zaw epini, zaw emini, zaw ali, zaw vuwaini buriya, zaw burini labar na pɗem ɗa,

³⁰n’aga a navaŋ a suwa hanɗa azi miya kai ɗa aŋ kai, war mefeŋ na tiyana. Aga a nava dalam gaiɗi tawalakai na maɵagai, gaiɗi tawalakai na falakai, gaiɗi tamai na falakai, gaiɗi ali, gaini vuwai, gaini siɗini gir, war simni na wuzamu aga a nava suŋfa n’a vada kai lai.

³¹Amma n’avut aga e bindi aŋ asakal, n’asakal aga e bindi aŋ avut.

³²E ɗifu warɗi futi yaw aŋ hili warɗi Yeruzalem sek, Yesu a nafu wuzaɗi su, ɗai zi hiri hunai te yimiɗi gara, ɗai n’e hili piɗi e hûni lai. Yesu a yikiɗi na doogo pi sulu sini pra, a tika pini aŋ miɗiɗi midini wazagai n’aga a za sini.

³³Mu hulumu na ɗa a Yeruzalem, Ahini-ɗif aga a sa edi tiɗi paakai n’abakai gaiɗi ɗai zi ɗû wazagai, aga e kûti sariya zi mri midini, aga e siŋ war tiɗi pinzibaɗi ɗai n’edi par lai.

³⁴Aga e zini yewere, e pûrfini teenek sini, aga e ɵiɓiŋ gaini daɓala e fiɗiŋ edi lai, mefeŋ hu asakal par aga a ɵiyasi amai.

³⁵Alini Zebedewus na sulu, Yakob gaini Yohana e hilisi sini e miɗini: Api zi hitri, tiyi mi firiyi ɓa, wala na mi zulbuku midini na ɗa, ku zaŋ buriyi ta.

³⁶A miɗiɗi: Ki firiyi mu za buriki ɗa a maɗa?

³⁷E miɗini: Hiniyi aŋ simni ɵimaku warɗi abaiku, na ktai war galku na wus par, na ktai war galku na muni par lai.

³⁸Yesu a miɗiɗi: Wala na ki zilbiŋ na ɗa, tiki ki sɗiŋ kai, aga ki ci gir n’aŋ warɗi kup n’aga mu caŋ ɗa ɗi? Zaw, ki kiɗi aŋ nivi gir na ta mu navaŋ ɗi?

³⁹E wiyi seŋ e miɗini: Tiyi mi kiɗi, Yesu a miɗiɗi: Kup na wiini gir n’aga mu caŋ ɗa, ki kiɗi ki ciŋ sme, aga ki nivi baptisme na mu navaŋ lai.

⁴⁰Amma simni na ki simni war graŋŋa na wus, zaw na muni ɗa, mu saŋ ɗa muta kai, hlai ni ɗa a wiiɗi nagai n’a zizina buriɗi.

⁴¹Nagai na doogo won hlai n’e ɵini seŋ hanɗa, e tiki piɗi aŋ zi hiy sini Yakob gaini Yohana.

⁴²Yesu a yikiɗi sini a miɗiɗi: Tiki ki siɗi ɓa, nagai n’e ɗa e ŋi midiɗi ɗai ɗa, e ŋi na ɗa maiɗi paakai ɵa, n’abakai e siŋki spakɗi edi siɗi lai.

⁴³Arbaki tiki ɗa, aga a za maini hanɗa ɵa kai, asiya ɗi paŋ n’a dara a bunda aŋ n’abai n’arbaki ɗa, aga a za aŋ ɵeŋ na wiiki gaini hlaiki.

⁴⁴Asiya ɗi paŋ n’a dara a bunda aŋ n’avut ɗa, aga a za aŋ bege na wiiki gaini hlaiki lai.

⁴⁵Buri Ahini-ɗif a halasi buri ɓa ɗif a za aŋ ɵeŋni kai, amma buri Ni gaini midini dama a za aŋ ɵeŋ na wiiɗi ɗai, aŋ sa suŋfani edi, aŋ piliɗisi ɗai viya edi lai.

⁴⁶E cû a Yeriko, won hlai n’a niyasi edi a Yeriko par gaiɗi ɗaini zi hitri gaini vok n’abai pini lai, ɗif na melveŋ ktai, Bartimewus ahini Timewus a nafu ɵimaɗi futi dam aŋ siiwa.

⁴⁷A ɵina ɓa a vuga na ɗa a Yesu na Nazaret ɗa, a tika pini a ɗuula a muɗa: Yesu, ahini David, hiina haw buriya.

⁴⁸Ɗai viya e ɓiriŋ kapai a ɓa, amma a ɗuula a suwa pra ɓa: Ahini David, hiina haw buriya.

⁴⁹Yesu a ɗiya a muɗa: Yikiŋsi; e yikisi ɗif na melveŋ e miɗini: Pa arku, a na yukuku.

⁵⁰A foko sapa na sini edi, a faka amai kot, a halasi sini Yesu.

⁵¹Yesu a zilbaŋ a muɗa: Ku dara ɓa mu za suku ɗa a ma ɗa? Ɗif na melveŋ a miɗini: Rabbuni, mu firiya ara ɗa a tala.

⁵²Yesu a miɗini: Hala, yimiku a zuuluku li, tizaw tar arni a mala edi, a ɵa pini Yesu warɗi futi lai.