Read Mousgoum Markus 11 Bible Online

Markus 11 - Mousgoum bible

Markus 11

¹Won hlai n’e ɗisi gobi gaiɗi Yeruzalem, siɗi Betfage gaiɗi Betaniya gobi siɗi huwuŋ zi luwuŋ olive ɗa, Yesu, a ɵiniɗi ɗaini zi hitri sulu,

²a miɗiɗi: Hili warni fuŋ n’aŋ wuzaki na ɗa, ki niyi aha tar ɗa aga ki nivi ahini ablehö gaini nigi ɓak, na ɗif a sumna ka midini kai gaini rgi ɓak, pliŋsi, kiŋŋasi.

³Na ɓa ɗif a miɗiki li ɓa: Ki zi nɵa buri maɗi ɗa? Ki wiyini seŋ ɓa: Epiɗ-ɗai a firyaŋ, aga a wayaŋɗi tiyana.

⁴E hili e nivi ahini ablehö gaini niggi anene ɓak ɵimani mini hlai, warɗi futi, e piliŋsi amai.

⁵Ɗai zamai n’e ɗifu woni ɗa, e zilbiɗi e miɗiɗi: Ki zi na ɗa a ma ɗa? Ki pili ahini ablehö buri ma ɗa?

⁶E wiyiɗi seŋ maini na Yesu a miɗiŋɗisi ɗa nɵa, ɗai e hiniɗi e hili gaini lai.

⁷E kinisi ahini ablehö n’e biri sapaɗi duɓani, Yesu a sumna midini.

⁸Viya e biri sapaɗi azumai warɗi futi wuzani, na zamai e biri ɗa a ɵimani luwuŋ n’e biliŋsi edi basga par.

⁹Nagai n’e ɗa edi wuzani gaiɗi nagai n’e ɗa asakalni par ɗa, e ɗûûli e miɗi: Hozana! Hozana! Kol sini Ni n’a na halasi war yikini Epiɗ-ɗai.

¹⁰Kol siɗi pai na te na halalsi, siɗi pai na wiini David n’apumu, Hozana war hlai n’amai.

¹¹Yesu a niya aha warɗi Yeruzalem, amlai warni tempel, won hlai n’a tala wazagai ɗa paŋ li, hlai ɗe a vuga vig lai ɗa, a niyasi edi a Betaniya gaiɗi na doogo pi sulu.

¹²Dawaini, won hlai n’e niyisi a Betaniya par ɗa, wiyamai te zaŋ.

¹³Won hlai n’a tala luwuŋ Fige edi gaigai par gaini gûɗi ɗa, a hala sini aŋ talaŋ, ablaŋtaŋkai nava ali sini ɗi ɗa. Amma won hlai n’a co sini ɗa, a nava ɗa a sugoi kadai, buri ɓa a sarti na wiini luwuŋ Fige zi wi ɗa kai.

¹⁴Nɵa a muɗa sini luwuŋ Fige: ɗif aga a suma aliku kir kai gamai; ɗaini zi hitri e ɵini ɓa.

¹⁵E cû a Yeruzalem, won hlai n’a niya amlai warni tempel ɗa, a tika pini aŋ birgiɗi nagai n’e cikili wazagai edi gaiɗi nagai n’e wûri wazagai amlai warni tempel ɗa lai edi, a hogo tabel na wiiɗi ɗai zi bindi farai ɗa azumai, gaini tubla na wiiɗi ɗai zi cikili dere ɗa lai.

¹⁶A hina ɗif aŋ tika wala tini ɗaw, aŋ vuga gaini amlai warni tempel kai.

¹⁷A hitriɗi a muɗa: Aŋ gaini ɗû ɓa: Dalamŋa aga a yika ɓa: Dalam zi siiwa buriɗi pinzibaɗi ɗai paŋ, amma tiki ki bindiŋ aŋ waŋɗi gorɓolokai.

¹⁸Paakai n’abakai zi ɓaka gaiɗi ɗai zi ɗû wazagai e ɵini hanɗa e piyi futi buri e fiɗiŋ edi. Amma hunai piɗi wuzani ta, buri ɓa firiɗi ɗai paŋ e bindi hiyak burini hitrini.

¹⁹Futi koskoi, Yesu a niya edi war fuŋ n’abai ɗa par.

²⁰Dawai-par won hlai n’e ɗa vigi ɗa, ɗai zi hitri e tili luwuŋ Fige ɗa gaini siiti siyat, haa azumai sini sirdaini ta.

²¹Peter midini a kɵa gaini wala n’a za ɗa, a miɗini: Rabbi tala haw, luwuŋ Fige na ku tuusaŋ ɗa a siita li.

²²Yesu a miɗiɗi: Yimi war Alaw. Jre mu miɗiki, ni n’aga a muɗa siɗi huwuŋ hanɗa ɓa: Hurɗasi woni par, hala ɵiŋka suku agoɗom war yem-ra n’abai, gaini giriŋi warɗi agulni kai, amma a yima ɓa wala n’a muɗaŋ ɗa aga a za ɗa, hanɗa aga a za lai.

²⁴Buri nɵa, mu miɗiki: Wala paŋ na ki zilbiŋ war siiwa ɗa, yimi ɓa ki niviŋ ya, hanɗa aga a za lai.

²⁵Won hlai na ki hili li amai aŋ siiwi, na ɓa seŋ a na arbaki gaini ɗif ɗa, ki hiniŋni, kapai epiki na war fuŋ-n’Alaw a hiniki meefeŋki lai.

²⁶Amma na ɓa, ki hiniŋni kai ɗa, Epiki na war fuŋ-n’Alaw aga a hiniki meefeŋki kaalai.

²⁷E wiyisi a Yeruzalem, won hlai n’a na guna warni tempel ɗa, paakai n’abakai zi ɓaka, ɗai zi ɗû wazagai gaiɗi ɗai n’abakai n’arbaɗi ɗai lai, e hilisi sini.

²⁸E zilbiŋ ɓa: Ku za na ɗa gaini spak na maɵa ɗa? Na a suku spak aŋ za hanɗa asiya ɗa?

²⁹Yesu a miɗiɗi: Aga mu siki zilbi ktai pal, ki wiyiŋa seŋ pini, kapai mu siŋkiki spak na mu za gaini ɗa.

³⁰Baptisme na wiini Yohana ɗa, a halasi amai par zaw, a na siɗi ɗai par ɗi? Wiyiŋa seŋ.

³¹E kitiŋ arbaɗi marɗi haa e miɗi: Na ɓa mu muɗumu li ɓa: A na amai par ɗa, aga a muɗumu ɓa: Tiki ki yimi pini kai buri ma ɗa?

³²Na ɓa, mu muɗumu li ɓa: A na siɗi ɗai par, firiɗi ɗai aga e hunumu kaalai, buri paŋ e yimi ɓa Yohana ɗa a ɗif na mini Alaw jre.

³³Nɵa, e wiyi seŋ wiini Yesu, e miɗi: Mi siɗi kai. Yesu a miɗiɗi: Ta ɗe, mu siŋkiki spak na mu za gaini ɗa kaalai.