Read Mousgoum Markus 12 Bible Online

Markus 12 - Mousgoum bible

Markus 12

¹Yesu a tika pini aŋ muɗa siɗi gaini seŋ zi siŋka maini, a muɗa: Ɗif ktai a za zardeŋ zi luwuŋ zi vin, a gunaŋ azumai gaini ɵaɓ, a zizina hlai n’e cipiɗi ali luwuŋ zi vin warni ta, a rga poriyo warni ɓak lai. Asakal par a sa vuwaini tiɗi ɗai zi sda ta, a hala wiini morkoi midini afti zamai.

²Sarti na rûwini alini luwuŋ zi vin a cosi li ɗa, a ɵina bege ktai siɗi ɗai zi sda aŋ piyisi ali luwuŋ zi vin tiɗi par.

³E yimiŋ, e ɵiɓiŋ, e ɵiŋsi kadai blaŋ.

⁴A ɵina bege zamai siɗi pra, e ɵiɓiŋ midini, e tikini siyer lai.

⁵A ɵina ktai pra, e fiɗiŋ, asakal par a ɵina na zamai viya, zamai arbaɗi ɗai ɗa e ɵiɓiɗi, na zamai ɗa e fiɗiɗi edi lai.

⁶A hina tini ɗa a Ahini n’a daraŋ gara ɗa pal, a ɵinaŋ siɗi asakal war hiini na ɓa, aga e sini hormo wiini Ahiya ɗa.

⁷Amma ɗai zi sda e miɗi arbaɗi marɗi: Hanɗa a ni n’aga a mula bulum ɗa, hulumu fuɗuŋmu edi, kapai bulum ɗa a hina aŋ wiimu.

⁸E yimiŋ e fiɗiŋ edi, e ɵiŋkiŋ anene duɓani zardeŋ zi luwuŋ zi vin.

⁹Epini zardeŋ zi luwuŋ zi vin ɗa, aga a za ɗa a ma ɗa? Aga a halasi a fiɗiɗi ɗai zi sda ɗa edi, a sa zardeŋ zi luwuŋ zi vin ɗa tiɗi na zamai.

¹⁰Ki tili ka ɗû hanɗa duk kai ɗi? N'a muɗa ɓa: Ahi fuŋ na ɗai zi rgi dalam e biliŋ edi ɗa, a bunda aŋ ahi-fuŋ n’a tika ɗa war koŋni dalam,

¹¹hanɗa a na sini Epiɗ-ɗai par, a wala n’a bundumu hiyak lai.

¹²E piyi futi aŋ yimiŋ, amma e hûni wuzani firiɗi ɗai buri e siɗi ɓa, a muɗa seŋ zi siŋka maini na ɗa midiɗi. E hiniŋ, e hili wiiɗi.

¹³E Sliniɗi zamai arbaɗi Farisekai gaiɗi Herodiyakai par lai sini, kapai e yimiŋ war seŋ.

¹⁴Nagai e hili sini e miɗini: Api zi hitri, tiyi mi siɗi ɓa, tuku ku ɗif na jre, ku za ɓraw arɗi ɗai kai, ku hitriti futini Alaw ɗa war jre lai. Pini seŋ zi gadai ɗa, sini tar na wiini Sezar ɗa a za, zaw a za kai ɗi?

¹⁵A sɗa rhaiɗi ba, a miɗiɗi: Ki tiniŋa buri ma ɗa? Kiŋasi sulai zi arzaŋ ktai mu talaŋ haw.

¹⁶E kinisi ktai, a zilbiɗi a muɗa: N'aŋ warni na ɗa a fotoni asiya ɗa? Ɗû n’aŋ midini na ɗa a wiini asiya ɗa? E miɗini: A wiini Sezar.

¹⁷NɵaYesu a miɗiɗi: Ki sini wazagaini Sezar wiini Sezar, wazagaini Alaw, wiini Alaw lai. E bindi hiyak gara burini.

¹⁸Zamai arbaɗi Sadusekai n’e miɗi ɓa: Zliyi n’amai aŋ kai ɗa, e hilisi sini Yesu e zilbiŋ e miɗi:

¹⁹Api zi hitri, Musus a ɗo siyi maini nɵa: na ɓa ɗif a mra li, a hiniti ka li munini gaini ahi kai ɗa, tawalni aga a yimiti sini, kapai a zini seyem wiini tawalni n’a mra ɗa.

²⁰Nɵa tawalakaiɗi marɗi e ɗifu muguzak, n’abai a tikiti muni ɗaw, a mra, a hina seyem kai.

²¹Na wulani ɗa, a yimiti sini kaai, a mra a hina seyem kai, n’ag'aŋ hu nɵa lai.

²²Ktai n’arbaɗi na muguzak n’a hina seyem nɵa aŋ kai, asakalɗi nagai par, muni te mra su lai.

²³Won hlai n’e ɵiyisi li amai ɗa, aga te za ɗa aŋ munini asiya ɗa? Buri nagai muguzak paŋ e tikiti aŋ muni paŋ?

²⁴Yesu a waya seŋ siɗi: Ki wili edi na ɗa buri hanɗa, buri ki siɗi ɗû kaalai, ki siɗi spakni Alaw kaalai;

²⁵Buri won hlai n’aga e ɵiyisi amai war mri par ɗa, aga e mili falakai kaalai, falakai e mili maɵagai kaalai. Aga e bindi maiɗi ɗai zi ɵeŋ na war fuŋ-n’Alaw nɵa.

²⁶Amma burini ɵiyi n’amai na wiiɗi ɗai zi mri ɗa, ki tili warni maktuɓ na wiini Musus ɗa kai ɗi? Wala n’Alaw a miɗiŋni won hlai n’a na ɵimani luwuŋ zi hedek ɗa, a miɗini ɓa: Ta m’Alaw na wiini Abraham, m’Alaw na wiini Isaak, m’Alaw na wiini Yakob nɵa kai ɗi?

²⁷Ni a Alaw na wiiɗi zi mri kai, amma a Alaw na wiiɗi na karɗi, ki wili wili n’abai gara.

²⁸Ktai arbaɗi ɗai zi ɗû wazagai a tala sispai n’a nafu arbaɗi gaini wiyini seŋ na gaini futini na Yesu a wiyiŋɗi lai ɗa, a halasi sini a zilbaŋ, a muɗa: Seŋ zi gadai n’abai a suwa paŋ ɗa a na wata ɗa?

²⁹Yesu a waya seŋ a muɗa: N'abai a suwa paŋ ɗa a na ɓa: Izrayel, ki ɵini pɗem, Epiɗ-ɗai Alaw na wimu, Epiɗ-ɗai a ktai.

³⁰Aga ku dara Epiɗ-ɗai Alaw na wiiku gaiɗi agulku paŋ, gaini sunfaɗi-agulku paŋ, gaini siɗiku paŋ gaini gdaŋku paŋ lai.

³¹Na wulani a na ɓa: Aga ku dara maiku maini suku dama nɵa, gadai zamai n’abai n’a suwa hanɗa aŋ kir kai.

³²Ɗif zi ɗû wazagai a miɗini: Api zi hitri, ku muɗa ɓa a na ɗa ktai, na zamai aŋ kai ɗa a jre.

³³Na ɓa ɗif a daraŋ gaiɗi agulni paŋ, gaini siɗini paŋ, gaini gdaŋni paŋ lai, a dara maini maini sini dama nɵa lai ɗa, a suwa ɓaka zi yi gaini ɓaka paŋ.

³⁴Won hlai na Yesu a tala ɓa a waya seŋ warɗi futini ɗa, a miɗini: Ku na gaigai gaiɗi pai n’Alaw kai. Ɗif zamai n’a ɵa de aŋ zilbaŋ ɵa aŋ kir kai.

³⁵Won hlai na Yesu a na hitra warni tempel ɗa, a tika seŋ a muɗa: Ɗai zi ɗû wazagai ɗa e miɗi ɓa Kristu ɗa, a ahini David ɗa maɵa maɵa ɗa?

³⁶David gaini midini dama a muɗa pini hûgûni seze sɗik ɓa: Epiɗ-ɗai a muɗa sini EPIƊ-ƊAIŊA, sumna war galŋa na wus, haa mu miliɗi gawku azumai pini buburni azuku.

³⁷Na ɓa David gaini midini dama a yikaŋ ɓa Epiɗ-ɗai ɗa, a kiɗa aŋ za aŋ ahini maɵa maɵa ɗa? Firiɗi ɗai e ziɓiri seŋ na wiini gaini futini.

³⁸Won hlai n’a na hitriɗi ɗai, a miɗiɗi: Ki giɗimi siki pɗem buriɗi ɗai n’e ɗa ɗû wazagai ɗa, e firiyi e piyi gaini sapa na mogokai, e firiyi ɓa e ɵiɓiɗi wuti war hlai na ɗai e tipi woni ta ta ɗa lai.

³⁹E firiyi ɗa a hlai n’amai avut amlai warni Sinagogne gaini hlai na wiiɗi ɗai n’abakai, wuzani simi na mini fet ɗa lai.

⁴⁰Nagai e simi wazagaiɗi falakai na war greŋ ɗa, e siiwi siiwa na mogo kapai ɗai e tiliɗi. Nagai aga e niviti sariya na guma na te suwa paŋ.

⁴¹A sumna azumai wuzani zunduk n’e mili farai warni par dam, a tiliɗi ɗai e ɗa mili farai azumai warni, ɗai zi farai viya e mili farai warni viya viya.

⁴²Muni na war greŋ na murga ktai te halasi, te mula sulai n’agogoi sulu azumai warni lai, n’a nafa wala ktai kai.

⁴³A yikiɗi ɗaini zi hitri sini a miɗiɗi: Jre, mu miɗiki: Muni na war greŋ na murga hanɗa, te sa te sûwiɗi nagai n’e mili farai warni zunduk hanɗa paŋ.

⁴⁴Buri nagai e si na ɗa burini faraiɗi na viya, amma te sa ɗa pini murgaɗi, a walaɗi n’a na ɗa ta, na te giɗima siɗi gaini ɗa lai.