Read Mousgoum Markus 13 Bible Online

Markus 13 - Mousgoum bible

Markus 13

¹Won hlai n’a na niyasi amlai warni tempel par, ktai arbaɗi ɗaini zi hitri a miɗini: Api zi hitri, tala ali-fuŋ hanɗa haw, tala rgi n’e rgiŋ gaini haw.

²Yesu a waya seŋ a miɗiɗi: Dalamai na ki tiliŋ na paŋ ɗa, ahi-fuŋ ktai n’aga a hina gaini tiki amai midini maini ta n’aga a kɵa azumai kai aŋ kai.

³Won hlai n’a sumna amai midiɗi huwuŋ zi luwuŋ olive dam, wuzani tempel ɗa par ɗa, Peter gaini Yakob gaini Yohana gaini Andreya e tiki piɗi e zilbiŋ edi kiiɗi, e miɗi:

⁴Miɗiyi haw, wazagai hanɗa aga a za ɗa kaswata ɗa? Wala n’aga a siŋkiyi ɓa hanɗa paŋ aga a vada ɗa a maɗa?

⁵Yesu a tika pini a miɗiɗi: Ki zi hangal kapai ɗif a wiliki edi kai.

⁶Viya aga e hilisi war yikiŋa aŋ miɗi: Ta mu Ni, aga e wûliɗi ɗai viya edi.

⁷Won hlai n’aga ki ɵini labarni gaw na gaigai gaini na gop ɗa, ki hûni kai, hanɗa aga a za, amma a dibini hlai kai hai.

⁸Afti ktai aga a faka amai sini afti na zamai, aftini pai ktai aga a faka amai sini aftini pai na zamai, afti aga a ziriya war hlai zamai zamai, wiyamai aga te za midiɗi yai lai, hanɗa a na maini pi zi tiki na wiini gir na wiini pûkû nɵa.

⁹Ki zi hangal buri ɗai aga e siki edi miɗi sariya, aga e ɵiɓiki war sinagogne lai, aga e ɗiyiki wuzaɗi lawanai gaiɗi paakai lai buriya, hanɗa aga a za aŋ zaida na siɗi lai.

¹⁰Labar na pɗem aga a ɓaka edi sini pinzibaɗi ɗai paŋ haw.

¹¹Won hlai n’aga e kiki aŋ siki edi ɗa, ki giriŋi burini wala n’aga ki miɗiŋ ɗa wuzani hlai kai, amma aga ki miɗi seŋ n’aga a sa siki war hlai ni dama, buri ɓa aga ki miɗi ɗa ki ɗi tiki kai, a seze.

¹²Tawal aga a sa tawalni edi mini mri, api aga a sa ahini edi lai, aliyagoi aga e fiki amai siɗi tamaiɗi, aga e fiɗiɗi edi lai.

¹³Ɗai paŋ aga e bili gaw siki burini yikiŋa, amma ni n’a siika ɗa, haa sini dibini, aga a kora.

¹⁴Won hlai n’aga ki tili ni n’e yikiŋ ɓa ɓilki n’edi na hi-hir gaini ɗiyi war hlai n’a sɗa aŋ ɗiya warni kai ɗa, a zuva ɓa ɗif n’a ŋa wala ɗa a ɵinaŋ, nɵa nagai n’e ɗa war Yudia ɗa, a pɗem ɓa e pri amai midini huwuŋ.

¹⁵Ni n’a na amai midini daba zi mili ɗa, a pɗem ɓa a niyasi azumai kai, a wayasi aha aŋ tika wala aha war dalamni par kai.

¹⁶Ni n’a na edi war vuwai ɗa, aga a wayasi aha aŋ mula sapani kaalai.

¹⁷Gir gara buriɗi falakai n’e ziyi gaiɗi nagai n’e si fiyaw wiiɗi aliɗi warni mefeŋ hanɗa.

¹⁸Ki siiwi buri wala hanɗa aga a za ɗa amsai kai.

¹⁹Buri mefeŋ ni ɗa a mefeŋ zi gir, gir na maini hanɗa ɵa ɗa, a za ka duk kai, haa war pi zi tiki n’Alaw a rgiti yai ɗa par haa girna, aga a za pra kir kaalai.

²⁰Na ɓa Epiɗ-ɗai a ɗiya fu mefeŋ gulai kai ɗa, ɗif a sɗa aŋ kora kai. Amma buriɗi zi viri n’edi na wiini ɗa, a ɗiya mefeŋ hanɗa gulai ta.

²¹Na ɓa a miɗiki ɓa: Tili Kristu an na, zaw aŋsi na, ki yimi pini kai.

²²Buri kristukai na jrekai kai gaiɗi ɗai na mini Alaw na jrekai kai lai aga e fikisi amai, aga e zi wazagai zi siŋki gaini zi hiila viya, haa zi viri n’edi maa e diri e wili edi piɗi, a nafu ɓa a sɗa aŋ za ɗa.

²³Ki zi hangal, buri mu miɗiki ya.

²⁴Amma war mefeŋ ni ɗa, asakalni gir hanɗa par, futi aga te bunda gegeŋ, tile aga a za gaglai kai.

²⁵Meeɵek aga a yakasi azumai war hlai n’amai par, spak n’arbani hlai n’amai ɗa aga a ziriya.

²⁶Nɵa aga e tili Ahini-ɗif a halasi warni ɗugul gaini spak n’abai gara gaiɗi abai lai.

²⁷Nɵa aga a ɵiniɗisi ɗai zi ɵeŋ edi, aga a tipiɗisi zi viri n’edi na wiini edi mini koŋɗi yai na puɗu paŋ par, mini koŋni afti ktai par haa sini na zamai ta.

²⁸Ki hitri seŋ zi siŋka maini sini luwuŋ Fige par, won hlai na ɵimani a bunda li kekefuɗ, a tika pini li aŋ goɗa lai ɗa, ki siɗi ɓa piya te ŋasi gobi.

²⁹Tiki nɵa lai, won hlai n’aga ki tili wazagai hanɗa a za ɗa, yimi ɓa Ahini- ɗif a na gobi, a na mini hlai.

³⁰Jre mu miɗiki: Pinziba hanɗa aga a vada edi paŋ kai, haa wazagai hanɗa a za.

³¹Hlai n’amai gaiɗi yai lai aga a vada edi, amma seŋ na wiya aga a vada edi kai zaŋ.

³²Mefeŋ ni gaini ler ni ɗa ɗif a sɗaŋ kai, ɗai zi ɵeŋ na war fuŋ-n’Alaw maa e sɗiŋ kai, Ahi maa a sɗaŋ kaalai, sai a sɗaŋ ɗa a Api ktai.

³³Ki zi hangal, ki simni karki, buri tiki ki siɗi mefeŋ ni kai.

³⁴Aga a za maini ɗif ktai n’a hala morkoi, a hina ka sdani tiɗi bagakaini, ɗif paŋ gaini sdani, sdani, a muɗa sini ɗif n’a giɗima magala buri a sumna karni.

³⁵Buri nɵa, ki simni karki, buri ki siɗi mefeŋ n’epini dalam a waisi warni kai, a waisi na ɗa koskoi par ɗi? Duvuk n’arba ɗi? Gorof na yogorai a yika ɗi? Zaw hlai gaini siɗi edi ɓa ɗi? Ki sɗiŋ kai.

³⁶Kapai won hlai n’a luɓasi miɗiki, a nivikisi weseŋ kai.

³⁷Na mu miɗiŋki na ɗa, mu muɗaŋ na ɗa wiiɗi ɗai paŋ, ki simni karki.