Read Mousgoum Markus 14 Bible Online

Markus 14 - Mousgoum bible

Markus 14

¹Mefeŋ aŋ kai sulu kapai fet na wiini Paska gaini peŋ na is arni kai a za ɗa, paakai n’abakai zi ɓaka e piyi yel n’e yimi Yesu gaini aŋ fiɗiŋ edi.

²Amma e miɗi: Warɗi fet ɗa kai, kapai dûrgûzi a faka amai arbaɗi ɗai kai.

³Won hlai n’a na a Betaniya ahani Simun na duggum ɗa, won hlai n’a na suma ɗa, muni ktai te niyasi amlai siɗi gaiɗi gagazai albastre gaini yitir na gai futini na wûrini caŋ gara lai, te rɗa mini edi, te miŋni midini Yesu.

⁴Zamai arbaɗi e zi hiy, e miɗi: Yitir zi tûûri hanɗa!

⁵Yitir hanɗa, e wûriŋ fu edi ɗa, a suwa sulai zi arzaŋ miya hu. Farai hanɗa e zini fu na pini murgakai gaini a suwa kai ɗi? E zi hiy siɗi gara.

⁶Amma Yesu a muɗa: Hiniti mak, ki hûwiyiti buri maɗa? Te za na ɗa a sda na pɗem buriya.

⁷Buri na murgakai e ɗa arbaki kûreɗ-kûreɗ, hlai na ki diri paŋ ki kiɗi ki zi pɗem siɗi, amma Ta ɗa mu hina fu arbaki ɵa kureɗ kai.

⁸Wala na te kiɗa aŋ zaŋ ta ɗa, te zaŋ ya. Te halasi aŋ zaŋa yitir na wuzani piŋa sa.

⁹Jre, mu miɗiki, woɗi paŋ na labar na pɗem aga a ɓaka midiɗi yai paŋ, wala na te kiɗa te zaŋ hanɗa aga a muɗa edi lai, kapai midiki a kɵa gaiɗi.

¹⁰Yudas Iskariyot, ktai arbarɗi na doogo pi sulu, a hala siɗi paakai n’abakai zi ɓaka buri a saŋ war tiɗi.

¹¹Won hlai n’e ɵini hanɗa e firiyi, e miɗi ɓa aga e sini farai. A paya futi buri a saŋ war tiɗi.

¹²War mefeŋ n’avut na wiini fet na wiini peŋ na is arni kai, war mefeŋ na ɗai e fiɗi alini adumai na miɗi fet na wiini Paska, ɗaini zi hiri e miɗi: Ku firiya ɓa mi hili mi zizini hlai n’aga ku suma simi na miɗi fet na wiini Paska ɗa woni, wata ɗa?

¹³A ɵina ɗai sulu arbaɗi ɗaini zi hitri par, a miɗiɗi: Hili warni fuŋ n’abai ɗa, woni aga ki nivi gaini ɗif na gaiɗi argini zi yem wulani ta a halasi arki sek, ki hili pini.

¹⁴Hlai n’aga a niya aha warni ɗa, ki miɗini wiini epini dalam ɗa ɓa, Api zi hitri ɓa: Dilimi n’aga mu suma ahiɗi adumi na wiini Paska ɗa warɗi gaiɗi ɗaiŋa zi hitri ɗa, t'aŋ wata ɗa?

¹⁵Aga a siŋkitiki dilimi n’amai n’amai gaini zizini ta, wazagai na jaaki aŋ sini paŋ aŋ warɗi, aga ki zizini simi na wiiɗi fet hanɗa woni.

¹⁶Ɗai zi hitri e hili, e cû warni fuŋ n’abai ɗa, e nivi wazagai paŋ maini na Yesu a miɗiŋɗi nɵa. E zizini simi na wiini Ahiɗi adumi na wiini Paska ɗa lai.

¹⁷Won hlai na futi te za li koskoi, a halasi gaiɗi na doogo pi sulu pini.

¹⁸Won hlai n’e simni azumai ca aŋ simi ɗa, Yesu a muɗa: Jre mu miɗiki, ktai arbaki n’a na suma gaya, aga a saŋa edi.

¹⁹E tiki piɗi e kwimi, e zilbi ktai ktai paŋ e miɗi: Mu ta ɗi?

²⁰A miɗiɗi: A ktai arbaɗi na doogo pi sulu, Ni n’a na wa tini gaya warni tasa ɗa.

²¹Ahini-ɗif aga a hala maini n’a ɗosi midini ɗa nɵa, amma haw burini ɗif n’aga a sa Ahini-ɗif edi ɗa, ɗif hanɗa a wa fu edi kai ɗa, pɗem a suwa.

²²Won hlai n’e simni aŋ simi, a tika peŋ ktai, a sa tese, a ɓurwaŋ, a siŋɗi a muɗa: Miliŋ, hanɗa a sa.

²³Asakal par a tika kup ktai na gaini vin warɗi, a sa tese, a sitiɗi, nagai paŋ e ci warɗi kup hanɗa.

²⁴A miɗiɗi: Hanɗa a felŋa, a fel zi bonu na hehe n’a ma edi buriɗi ɗai viya,

²⁵Aga mu ca siyemni alini luwuŋ zi vin ɗa kir kai, haa sini mefeŋ n’aga mu caŋ zamai warɗi pai n’Alaw.

²⁶Asakal n’e vidi gaini yama zi tese ya, e hili edi siɗi huwuŋ zi luwuŋ olive sek.

²⁷Yesu a miɗiɗi: Aga mu za aŋ wala zi dibi azi buriki paŋ, buri a ɗosi nɵa: Aga mu fuɗa ɗif zi giɗimi ɗa edi; adumai aga a hina bar.

²⁸Amma won hlai na mu ɵiya li amai ɗa, aga mu halaɗi wuzaki a Galeliya.

²⁹Peter a miɗini: Na ɓa ku za aŋ wala zi dibini azi buriɗi na paŋ tekeɗeɗi ɗa, aga ku za aŋ wala zi dibini azi buriya ta kai zaŋ.

³⁰Yesu a miɗini: Jre mu muɗuku: Girna haa, war duvuk hanɗa dama, wuzani hlai na yugur a yika azi sulu, aga ku ɓuɓura muku buriya azi hu.

³¹Amma Peter a siika wuzani sek a muɗa: Koo ɓa mu mra gaiku ɗi, aga mu ɓuɓura ma buriku kai zaŋ. Nagai paŋ e miɗi nɵa lai.

³²E cû war hlai na yikini ɓa Getsemane, a miɗiɗi wiiɗi ɗaini zi hitri: Simni ka na ca, mu hala mu siiwasi ta.

³³A yima Peter gaini Yakob gaini Yohana lai pini, a tika pini a huna, a kwima gara lai.

³⁴A miɗiɗi: suŋfaɗi-agula a kwima haa sini mri ta, ki simni ka na ca, ki simni karki.

³⁵A toro wuzani sek agwi, a hurga azumai midini afti, a siiwa burini hlai hanɗa, a siiwa ɓa: Na ɓa a sɗa aŋ za ɗa, hlai zi gir hanɗa a vuga edi midini par.

³⁶A muɗa: Abba, Apa, wala n’a sɗa aŋ za gaiku kai aŋ kai, kup na wiini gir hanɗa ku vugaŋ edi mada par. Amma hinaŋ a za maini na ta mu firyaŋ ɵa kai, amma maini na tuku ku firyaŋ ɵa.

³⁷A halasi a niviɗisi weseŋ, nɵa a miɗini wiini Peter: Simun, ku na weseŋ? Ku kiɗa aŋ sumna karku burini ler ɗaw kaw kai!

³⁸Simni karki, siiwi, kapai ki niyi war tanai kai. Seze a kurfuk, amma neŋ-si a muhuruf.

³⁹A yima sini edi aŋ siiwa pra, a muɗa a seŋ n’avut ɗa dama.

⁴⁰A wayasi katawai, a niviɗisi weseŋ pra, arɗi a yima amai kai, e siɗi seŋ n’e wiyiŋni kai.

⁴¹A wayasi azi n’ag'aŋ hu, a miɗiɗi: Sai ki kili ɗa a weseŋ bas, siki amla lai ka; siiwi, ler a cosi li, Ahini-ɗif a sa li tiɗi na tuwarai.

⁴²Fiki amai hulumu, ni n’a saŋa edi a cosi ya.

⁴³Tizaw tar, a ɵa mini maa edi kai, Yudas, ktai n’arbaɗi na doogo pi sulu a halasi gaiɗi pini viya, gaini kaɵkar gaini amaraŋa lai tiɗi, e ɵiniɗisi e ɗi paakai n’abakai zi ɓaka gaiɗi ɗai zi ɗû wazagai gaiɗi n’abakai n’arbaɗi ɗai lai.

⁴⁴Ni n’aga a saŋ edi a siɗi wala zi siŋki ktai ɓa: Ni n’aga mu kɵa amai wulani aŋ ɵiɓini wuti ɗa, hanɗa a ni, ki yimiŋ, ki hili gaini, ki giɗimiŋ pɗem.

⁴⁵Hlai n’e cûsi sini ɗa, a muɗa: Rabbi, a kɵa amai wulani lai.

⁴⁶Nagai e yimiŋ.

⁴⁷Ktai arbaɗi n’e ɗa gaini, a rɗa kaɵkarni edi, a bla ɵeŋ na wiini pai n’abai zi ɓaka ɗa, a pirta ɵimani edi.

⁴⁸Yesu a miɗiɗi: Ki hilisi aŋ yimiŋa gaini kaɵkar gaini amaraŋa maini na ɓa mu gorɓolo ɵa buri maɗa?

⁴⁹Mefeŋ paŋ mu nafu arbaki kureɗ, aŋ hitra warni tempel, ki yimiŋa kai koo. Amma a za nɵa kapai ɗû a va amai.

⁵⁰Nagai paŋ e hiniŋ, e pri edi.

⁵¹Gawla ktai a hala pini, gaini sapa sini ɵew, ɗai e yimiŋ.

⁵²Amma ni a hina sapani, a pra edi ganala.

⁵³E ki Yesu wuzani pai n’abai zi ɓaka, paakai n’abakai zi ɓaka paŋ, gaiɗi n’abakai n’e ɵi wuze gaiɗi zi ɗû wazagai ɗa paŋ e diŋgisi.

⁵⁴Peter a hala pini, amma edi gaigai par blaŋ, haa e cû aha warni dalam na wiini pai n’abai zi ɓaka, aha warɗi pakataini ɗa. A sumna azumai arbaɗi ɗai zi giɗimi na wiini aŋ kopa sini mini afu.

⁵⁵Paakai n’abakai zi ɓaka gaiɗi ɗai zi ɗûkliti sariya paŋ, e piyi miɗi ktai n’e piŋ midini Yesu kapai e fiɗiŋ edi pini, amma e nivi wala kai.

⁵⁶Buri viya e miɗi seŋ sini, amma a ɵa pini marni kai.

⁵⁷Zamai e fikisi amai aŋ miɗi zaida z'eles midini maini nɵa:

⁵⁸Tiyi, mi ɵini mini par ɓa: Aga mu tuura hlai na sɗik n’a zizina gaini tiɗi ɗai hanɗa edi, war mefeŋ hu aga mu rga na zamai, n’a rga gaini tiɗi ɗai kai.

⁵⁹War hanɗa kaw seŋɗi a ɵa piɗi marɗi kai ɗaai.

⁶⁰Nɵa pai n’abai zi ɓaka a ɗiya amai arbaɗi zaw a zilba Yesu, a muɗa: Ku muɗa seŋ kai ɗi? Seŋ n’e ɗa e miɗiŋ suku na ɗa, tuku ku muɗa maɵa ɗa?

⁶¹A ba mini liyik a waya seŋ kai, pai n’abai zi ɓaka a zilbaŋ pra: Tuku ku Kristu, Ahini Alaw zi ɓiki ɗi?

⁶²Yesu a waya seŋ: Muta, tiki aga ki tili Ahini-ɗif gaini simni azumai dam war gal na wus na wiini Alaw zi spak paŋ. Aga a halasi warni ɗugul na war hlai n’amai lai.

⁶³Nɵa pai n’abai zi ɓaka a ɓasa sapa na sini edi a muɗa: Mu zumu gaiɗi zaidakai zamai ɗa a ma ɗa?

⁶⁴Ki ɵini tirki n’a tirka Alaw li, ki miɗi maɵa ɗa? Nagai paŋ e kûtini sariya midini, e miɗi: A sɗa aŋ nava fiɗi n’edi.

⁶⁵Zamai e tiki piɗi aŋ pûrfini teenek sini, e biri sapa arni, e ɵiɓiŋ gaini kutupa lai, e miɗini: Za sdaku zi ɗif na mini Alaw haw ɗa? Ɗai zi giɗimi e ɵiɓiŋ gaini pupur lai.

⁶⁶Won hlai na Peter a nafu azumai warɗi pakatai, ktai arbaɗi bagakai na falakai na wiini pai n’abai zi ɓaka te halasi,

⁶⁷Won hlai na te tala Peter a na kopa sini, te talaŋ te muɗa: Tuku lai ku nafu gaini Yesu na Nazaret.

⁶⁸Peter a ɓuɓura mini a muɗa: Mu sɗa kai, na ku firiya ku muɗaŋ na ɗa mu sɗa futini kai.

⁶⁹Bagai te talaŋ, te tika piɗi aŋ muɗa wiiɗi nagai n’e ɗifu ca ɗa ɓa: A ktai n’arbaɗi par.

⁷⁰A ɓuɓura mini katawai pra, asakal par agwi, nagai n’e ɗifu ca ɗa e miɗini pra: A jre, ku ɗif na gaiɗi ɗai hanɗa par, buri tuku lai ku ɗif na Galileya.

⁷¹A tika pini a ha wala mini aŋ tusa sini dama a muɗa: Alaw a tikaŋa gir maɗa, na ɓa mu za ɗa a eles ɗa? Mu sɗa ɗif na ki miɗi gaini na ɗa kai.

⁷²War hlai ni dama, yugur a yika azi n’ag'aŋ sulu. Peter midini a kɵa gaini seŋ na Yesu a miɗiŋni ɓa: Wuzani hlai na yugur a yika azi sulu ɗa, aga ku ɓuɓura muku buriya azi hu. Nɵa a tika pini a tuwa.