Read Mousgoum Markus 15 Bible Online

Markus 15 - Mousgoum bible

Markus 15

¹Gorof par cup, pakaai n’abakai zi ɓaka gaiɗi n’abakai n’arbaɗi ɗai, gaiɗi ɗai zi ɗû wazagai, gaiɗi ɗai zi ɗûkliti sariya lai, e diŋgi buri e kiti miɗi. Asakal na e niggi Yesu ya, e kiŋ, e siŋ tini Pilatus.

²Pilatus a zilbaŋ, a muɗa: Tuku ku paiɗi Yudeyakai ɗi? A waya seŋ a miɗini: Ku muɗaŋ li.

³Paakai n’abakai zi ɓaka e kisi seŋ viya midini.

⁴Pilatus a zilbaŋ katawai pra: Ku waya seŋ agwi kai zaŋ ɗi? Tala seŋ n’e ɗa e piŋ muduku na ɗa haw!

⁵Amma Yesu a waya seŋ kir kai; wala hanɗa a bunda Pilatus hiyak.

⁶Miɗi fet paŋ ɗa, e ɵiɗisi ɗif zi daŋgai ktai suuwa suuwa, ni na ɗai e piyiŋ ɗa.

⁷Ɗif ktai yikini Barabbas, a nafu warɗi daŋgai gaiɗi ɗai n’e fiki dûrgûzi amai, buri e fiɗi ɗif war dûrgûziɗi su.

⁸Firiɗi ɗai e hilisi sini Pilatus aŋ zilbiŋ buri a za siɗi maini n’a na zaŋ siɗi kûreɗ-kûreɗ ɵa.

⁹Pilatus a wiyiɗi seŋ: Ki diri ɓa mu ɵikisi paiɗi Yudeyakai edi ɗi?

¹⁰Buri a siɗa ya ɓa, paakai n’abakai zi ɓaka e siŋ war tini aŋ sile

¹¹Amma paakai n’abakai zi ɓaka, e ziɗi piɗi firiɗi ɗai, buri e zilbi ɓa a ɵiɗisi ɗa a Barabbas.

¹²Pilatus a zilbiɗi: Ni na ki yikiŋ ɓa paiɗi Yudeyakai ɗa, mu zaŋ ɗa maɵa ɗa?

¹³E tiki piɗi e ɗûûli e miɗi: Tûkiŋ amai sini luwuŋ zi dagra. Pilatus a miɗiɗi: Meefeŋ n’a zaŋ ɗa a na wata ɗa? Amma e ɗûûli a suwa pra: Tokoŋ amai sini luwuŋ zi dagra.

¹⁴

¹⁵Pilatus a rga warni aŋ va firyiɗi ɗai amai, a ɵiɗisi Barabbas su, amma a siɗi Yesu aŋ ɵiɓi gaini daɓala, asakal par a siŋɗi buri e tûkûŋ amai sini dagra lai.

¹⁶Askarai e kiŋ aha warɗi pakatai na wiini Lawan n’e yikiti ɓa: Pretoriyom. A yikiɗisi vokɗi askarai paŋ sini.

¹⁷E wiini sapa na mekele n’e ɵiŋɗi siɗi paakai sini, e pitini bogorai n’e hiti gaini hedek midini.

¹⁸Asakal par, e tiki piɗi e ɵiɓini wuti e miɗi: Mi ɗa ɵuɓuku wuti, paiɗi Yudeyakai.

¹⁹E ɵiɓi midini gaini vayai, e pi kurnaiɗi azumai aŋ hûrgi azumai wuzani.

²⁰Asakal na e zini yewere ya, e wûti sapai na makalai na sini ɗa edi, e wiini sapani sini. Asakal par e hili gaini aŋ tûkûŋ amai sini luwuŋ zi dagra

²¹E yimi ɗif ktai gaini gdaŋ n’a na vuga, a halasi edi a basga par aŋ liba dagrani, yikini Simun na Kirene, n’apini Alekzandre gaini Rufus.

²²E ki Yesu war hlai n’e yikiŋ ɓa: Golgota, a dara a muɗa: Hlai zi keɵke na humok.

²³E firiyi e sini vin n’e jilniŋ gaini mir, amma Yesu a caŋ kai.

²⁴E tûkûŋ amai sini luwuŋ zi dagra, e ɓûrwi sapani arbaɗi pini wala zi vili kapai e siɗi wala na ɗif paŋ a navaŋ ɗa.

²⁵E tûkûŋ amai sini luwuŋ zi dagra ɗa a za sa ɵeeŋe ta.

²⁶Wala na sariya te ko midini burini ɗa, gaini ɗû amai par midini maini nɵa: "Paiɗi Yudeyakai"

²⁷E tûkû gorɓolokai sulu amai sini dagra gaini, na ktai war galni na wus par lai, na ktai war galni na muni par lai.

²⁸Kapai ɗû na a muɗa ɓa: E piɵiŋ arbaɗi ɗai na tuwarai ɗa a va amai.

²⁹Nagai n’e vigi ɗa e tirkiŋ, e kikiyi midiɗi e miɗi: Tuku na ku haɗa tempel azumai, ku rgaŋ amai warni mefeŋ hu lai ɗa,

³⁰kora suku tuku dama lai, niyasi azumai sini luwuŋ zi dagra par lai haw kir ka!

³¹Paakai n’abakai zi ɓaka gaiɗi ɗai zi ɗû wazagai lai, e zini yewere arbaɗi marni dama e miɗi: A kurɗa ɗai zamai kir ka, sini ni dama a kurɗa gaini kai ɗe!

³²Kristu na paiɗi Izrayel ɗa, a niyasi azumai amai sini dagra par tiyana, kapai tiyi mi tiliŋ, mi yimi lai. Nagai n’e tûkûɗi amai sini luwuŋ zi dagra gaini ɗa e tirkiŋ ɵa lai.

³³Girvudi n’arba par ta ɗa, gegeŋ a za midini afti paŋ, haa sini sa hu ta.

³⁴Sini sa hu ɗa, Yesu a ɗûûla a muɗa: Eloyi, Eloyi Lama sabaktani? A dara a muɗa: Alaw Alaw wiya, ku hinaŋa edi buri maɗa?

³⁵Zamai arbaɗi ɗai n’e ɗifu woni ɗa, e ɵini hanɗa e miɗi: Tili haw, a na yika Eliyas.

³⁶Ktai arbaɗi a lawa, a tika tipeɵ, a jiibaŋ arni vin na hahayaŋ, a hag'aŋ mini vayai a siŋni aŋ ci a muɗa: Hiniŋ mu tuluŋmu haw, na ɓa Eliyas aga a halasi a tikaŋ azumai ɗi ɗa.

³⁷Amma Yesu a ɗuula gaini gdaŋni pra, suŋfani a wa edi.

³⁸Sapa n’a ɓurwa arni hlai na sɗik ɗa a ɓasa amai par haa azumai ta.

³⁹Abaiɗi askarai, na askarai pini miya ɗaw n’aŋsi wuzani par zaw, won hlai n’a tala mrini n’a mra ɗa, a muɗa: Ɗif hanɗa a Ahini Alaw jre jre.

⁴⁰Falakai zamai e ɗifu aŋ tilisi edi gaigai par, maiɗi Mariya Magdalene, Mariya n’emini Yakob n’agwi gaiɗi Yoses gaiɗi Salome lai.

⁴¹N'e tipisi pini, n’e ɗika e zini pini won hlai n’aŋsi a Galileya, gaiɗi na zamai viya n’e hilisi amai a Yeruzalem gaiɗi lai.

⁴²Won hlai na futi te zali koskoi, a mefeŋ na wiini zizinini-si, te yivai na wuzani Sabbat par tar lai ɗa,

⁴³Yosef na Arimateya, ktai n’abai arbaɗi ɗai zi kiti seŋ, n’a nafu aŋ biyiti pai n’Alaw lai, a cosi. A pa arni aŋ hala sini Pilatus aŋ zilba kopoŋni Yesu.

⁴⁴Pilatus a bunda hiyak, won hlai n’a ɵina ɓa Yesu a mra ya ɗa, a ɵina pini abaiɗi askarai na askarai pini miya ɗaw ɗa, a zilbaŋ ɓa: a mra a yafa bok ɗi?

⁴⁵Won hlai na abaiɗi askarai a sini labar ya, a sa kopoŋni Yesu wiini Yosef.

⁴⁶Yosef a wura sapa na muɗukwi, a tikasi Yesu azumai amai sini dagra par, a tikaŋ azumai war waŋ n’e ɓiliŋ sini huwuŋ. Asakal par e likititisi fukuni, e dûgûti mini waŋ ɗa lai.

⁴⁷Mariya Magdalene gaiɗi Mariya emini Yoses e tili hlai n’e fini Yesu woni.