Read Mousgoum Markus 16 Bible Online

Markus 16 - Mousgoum bible

Markus 16

¹Won hlai na Sabbat a vuga vug, Mariya Magdalene gaiɗi Mariya emini Yakob gaiɗi Salome lai e wûri wazagai zi ɗûgûdi zi lûgûzi tiɗi kapai e hili e ziŋ sini.

²War mefeŋ n’avut na wiini kosku ɗa, e hilisi mini waŋ gorof par, war sarti na futi te diyasi ɗa.

³E miɗi arbaɗi marɗi: N'aga a likititumu funi ɗa edi mini waŋ par ɗa, asiya ɗa?

⁴Won hlai n’e yimi arɗi amai ɗa, e tiliti, funi n’amai ɗa gaini likiti edi likat.

⁵Won hlai n’e niyi amlai warni waŋ, e tili gawla ktai gaini simni warni gal na wus ɗa dam, gaini sapa na muɗukwi sini ca, hunai n’abai a yimiɗi.

⁶A miɗiɗi: Ki hûni kai, ki piyi na ɗa a Yesu na Nazaret, n’e tûkûŋ amai sini dagra kai ɗi?

⁷Amma ki hili ki miɗiɗi wiiɗi ɗaini zi hitri gaini Peter lai ɓa, a halaɗi a na wuzaki a Galileya, aga ki tiliŋ ɗa woni, maini n’a miɗiŋki ɗa nɵa.

⁸E niyisi edi warni waŋ par, e liwi haa siɗi paŋ a yima ɵig ɵig ɵig, e hi amai marwai. E miɗi seŋ ktai wiini ɗif kai, buri hunai piɗi ta.

⁹Asakal n’a ɵiyasi amai ya, gorof na wiini mefeŋ n’avut na wiini kosku ɗa, a siŋka sini avut arɗi Mariya Magdalene n’a birga ksalai edi midiɗi par muguzak ɗa.

¹⁰Te ka labar hanɗa wiiɗi nagai n’e ɗika gaini won hlai n’e ɗa war kwimi, war tuwi lai ɗa.

¹¹Won hlai n’e ɵini ɓa, a na karni, ɓa te talaŋsi ya lai ɗa, e diri e yimi seŋ hanɗa kai.

¹²Asakal hanɗa a siŋka sini arɗi war si zamai, arɗi marɗi zamai sulu, n’e hiliɗi a Yeruzalem par edi sek.

¹³Nagai lai e wiyisi e si labar wiiɗi marɗi ɗa, amma e diri e yimi kai ɗaai.

¹⁴Asakal tar, a siŋka sini arɗi na doogo pi ktai war hlai n’e ɗa e simi. A ɓiriɗi gara burini yimi-kai na wiiɗi gaini hriŋ na wiiɗi lai. Buri ɓa e yimi piɗi nagai n’e tiliŋ asakalni ɵiyini n’amai ɗa kai.

¹⁵Asakal par a miɗiɗi: Hili edi midiɗi yai paŋ, ki ɓiki labar na pɗem sini wazagai zi rgi paŋ,

¹⁶ɗif n’a yima, a nava baptisme lai aga a kora; amma ni n’a yima kai, sariya aga te ko midini.

¹⁷Wazagai zi siŋki na ɗai n’e yimi aga e ziŋ ɗa, a na maini nɵa: War yikiŋa aga e birgi ksalai edi, aga e miɗi gaini meme na hehe,

¹⁸aga e yimi wala-meefeŋ gaini tiɗi lai, na ɓa e ci wala zi fiɗi ɗai tekeɗeɗi, koo a na wata ɗi, aga a za wala ktai na meefeŋ siɗi kai, aga e tiki tiɗi midiɗi zi veglek, zi veglek aga e zûûli.

¹⁹Epiɗ-ɗai Yesu, asakal n’a miɗiɗi seŋ hanɗa paŋ, a yima amai war fuŋ-n’Alaw. A sumna warni hlai zi hormo na wiini Alaw.

²⁰E hili edi e ɓiki seŋ warni hlai paŋ, Epiɗ-ɗai a za sda gaiɗi, a siŋka spakni seŋɗi edi gaini wazagai zi siŋki n’a za pini ɗa.