Read Mousgoum Markus 4 Bible Online

Markus 4 - Mousgoum bible

Markus 4

¹A niya warni hulum a sumna warni edi arni yem par dam. Ɗai e simni amai gdaŋ par wulani daŋ ca ca.

²A hitriɗi wazagai viya war seŋ zi siŋka maini, a miɗiɗi war hitri ni ɓa:

³ɵini pɗem, ɗif zi sûûɗi a hala edi aŋ suuɗa.

⁴Won hlai n’a na suuɗaŋ, zamai a yaka ɵimaɗi futi, wala zi ɗifli a halasi a sumaŋ.

⁵Na zamai a yaka midini hlai zi kriyit, afti woni gara kai, a diya amai witaw tar buri aftini a na hulum kai.

⁶Amma won hlai na futi te yimasi li amai te yaŋ edi, a ya edi buri sirdaini a ruva azumai kai.

⁷Na zamai ɗa a yaka arbani hedek, hedek a wula amai, a rozoŋ, a wa ali kai.

⁸Na zamai ɗa a yaka midini afti na pɗem, a wula, a za abakai, a wa ali, ktai a wa doogo doogo hu, ktai a wa doogo doogo ɵaara, zamai ɗa miya lai.

⁹A miɗiɗi: Ni na ɵimani zi ɵeŋ a na ɗa, pɗem ɓa a ɵina.

¹⁰Won hlai n’e cû edi warni baŋa ɗa, nagai n’e ɗi pini gaiɗi na doogo pi sulu lai ɗa, e zilbiŋ midini seŋ zi siŋka maini hanɗa.

¹¹A miɗiɗi: A sa siki tiki aŋ siɗi wala zi ŋoyai na wiiɗi pai n’Alaw, amma buriɗi nagai n’edi par ɗa, wazagai paŋ a sa siɗi war seŋ zi siŋka maini.

¹²Kapai won hlai n’e tili ɗa, e tili wala ktai kai, won hlai n’e ɵini ɗa, e ɵini ezini edi kaalai, ɵa kai ɗa aga e wiyisi hiiniɗi sini Alaw, aga e nivi ni burini tuwurɗi lai.

¹³A miɗiɗi: Seŋ zi siŋka maini hanɗa, ki ɵini ezini edi kai ɗi? Seŋ zi siŋka maini na gaini abaini paŋ aga ki ɵini ezini edi maɵa maɵa ɗa?

¹⁴Ɗif si sûûɗi seyem a suuɗa ɗa a seŋ.

¹⁵Seyem n’a suuɗa ɵimaɗi futi ɗa e ɗi nagai na seŋ a suuɗa warɗi, won hlai n’e ɵini seŋ li tar ɗa, Satan a halasi a tika seŋ n’aŋ warɗi ɗa edi.

¹⁶N'a suuɗa midini hlai zi kriyit ɗa, e ɗi nagai n’e ɵini seŋ li e yimiŋ gaini firiyi tar,

¹⁷amma sirdaini warɗi kai, e cifi viya kaalai, won hlai na gir, zaw zini gir burini seŋni Alaw a fakasi li ɗa, e wi siɗi edi tar lai.

¹⁸Zamai n’a suuɗa arni hedek ɗa, e ɗi nagai n’e ɵini seŋ,

¹⁹amma hiini na wiiɗi duniya gaini tanai na wiini farai, gaini melew na pini wazagai zamai zamai ɗa lai, a niya warɗi, a rozoŋ, a kiɗa a wa ali kir kai.

²⁰Na zamai n’a suuɗa midini afti na pɗem ɗa, e ɗi nagai n’e ɵini seŋ li ɗa, e yimiŋ a wa ali lai, zamai a wa doogo doogo hu, zamai doogo doogo ɵaara, na zamai miya lai.

²¹A miɗiɗi pra: Lampa ɗa, e piti azumai piɗi wulai, zaw e tikiti azumai pini li ɗi? E tikiti ɗa amai midini wala n’e higi lampa sini kai ɗi?

²²Wala zi ŋoyai n’aga a siŋka edi kai aŋ kai, wala n’a za war kuɗuhai n’aga a siŋka edi gaglai kai ɗa aŋ kaalai.

²³Na ɵimani zi ɵini a na ɗa a pɗem ɓa a ɵina.

²⁴A miɗiɗi pra: ki zi hangal gaini seŋ na ki ɗa ɵiniŋ ɗa, daram na ki ɗa ŋi gaiɗi ɗa, aga e ŋi siki gaiɗi lai, aga a sa siki ɗa a suwa pra.

²⁵Buri ni na wiini a na, aga a sa sini pra, amma ni na wiini aŋ kai ɗa, n’aŋ tini par maa aga a yimasi edi.

²⁶A muɗa pra: Paini fuŋ-n’Alaw te na maini ɗif n’a suuɗa seyem arni afti nɵa.

²⁷Koo ɓa a kala weseŋ, koo ɓa a kala kai, seyem ɗa a diya, a wula amai lai, a za maɵa ɗi a sɗaŋ kai.

²⁸Afti gaini midini dama a sa seyem, dai ɗa a zilamatak, asakal par ɗa a midini wai na gaini nihi kai, sini vidini ɗa a seyem na gaini nihi ta lai.

²⁹Won hlai na seyem a naha li, a hina a maharam buri hlai zi hiɗi a za li.

³⁰Paini Alaw aga mu kututumu gaini a ma ɗa? Seŋ zi siŋka maini na mu muɗutumu edi gaini a na wata ɗa?

³¹Te na maini seyemni seneve na won hlai n’a suuɗa azumai arni afti sek ɗa a n’agwi n’arbani seyem na midini afti paŋ,

³²amma won hlai n’a suuɗa li, a wula amai li lai, a bunda abai a suwa sugoi paŋ, a wa graŋni edi abai, haa wala ɗifli n’arbani hlai n’amai a zizina gutni amai sini sezeni.

³³A miɗiɗi seŋ war seŋ zi siŋka maini viya maini ɵa, na nagai e kiɗi aŋ ɵini ezini edi ta ta ɗa.

³⁴A miɗiɗi seŋ paŋ sai war seŋ zi siŋka maini, won hlai n’e hini li kiiɗi ɗa, a siŋka ezini wiiɗi ɗai zi hitri ɗa.

³⁵Mefeŋ ni dama, futi te za li koskoi ɗa, Yesu a miɗiɗi: Bundumu anene kata.

³⁶Asakal n’a tikiɗi pini firiɗi ɗai li ɗa, e kiŋ gaini hulum n’a nafu warni dam ɗa; hulamai n’abakai zamai a tapa gaini lai.

³⁷Ber-ber n’abai a fakasi, mayaw a tika pini a ɵiɓa amai warni hulum n’abai ɗa, haa hulum n’abai a dara a va.

³⁸Ni a nafu aŋ kala weseŋ edi giɗerni hulum n’abai ɗa, tubla midini ta. E ɵiyiŋsi amai e miɗini: Api zi hitri, mu buɗuhumu na ɗa a biɗihi, a fuɗuku suku kai ɗi?

³⁹Won hlai n’a ɵiyasi amai ɗa a ɓara smer, a muɗa sini yem-ra n’abai ɗa maini nɵa: ba, ɗiya suuraku ɗa. Smer a tika azumai, hlai a ɗiya ɗiŋ lai.

⁴⁰Asakal par a miɗiɗi: Ki ɗi na muhunakai na maɵa ɗa? Ki simni gaini yimi kai nɵa maɵa ɗa?

⁴¹Hunai n’amai te yimiɗi, e miɗi arbaɗi marɗi: Ni hanɗa asiya ɵa ɗa, na smer gaini yem-ra n’abai e ɵini pini ɗa?