Read Mousgoum Markus 5 Bible Online

Markus 5 - Mousgoum bible

Markus 5

¹E cû anene kata duɓani yem-ra n’abai midini afti na wiiɗi Gerasenekai.

²Pri n’a praɗi agoɗom par war hulum n’abai tar ɗa, ɗif ktai a niyasi warni yeɵ par na ksalai aŋ midini a halasi sini sek.

³Simnini a nafu warni yeɵ, ɗif a sɗa aŋ naggaŋ kir kai koo gaini jaɓ tekeɗeɗi a rga kai.

⁴Buri e rgiŋ ka azi viya, e wiini pokolom ezini, e rgiŋ gaini jaɓ lai, amma a haɗa jaɓ ɗa edi, a haɗa pokolom lai, ɗif n’a kiɗa a cakaŋ azumai aŋ kai.

⁵Duvuk gaini girvudi paŋ a sumna sai warni yeɵ, amai midini huwuŋ lai, a ɗuula gaini ɗûûli sal, a ɓasa sini gaini ali-fuŋ.

⁶Won hlai n’a tala Yesu edi gaigai par, a lawa mini, a hurga azumai wuzani,

⁷a ɗuula a muɗa: N'a tupuku gaya ɗa a ma ɗa, Yesu n’Ahini Alaw n’Amai, mu huku maa gaini Alaw zaŋ, ku turlaŋa kai.

⁸Buri Yesu a miɗini ɓa: niyasi edi sini ɗif hanɗa par, tuku seze na meefeŋ.

⁹A zilbaŋ ɓa yikuku maɵa ɗa? A miɗini: Yikiɗa ɓa: Legiyon, buri tiyi mi ɗa viya.

¹⁰Ksalai a siika mini buri a birgaŋ edi midini afti par kai.

¹¹Farani hoho a nafu gobi ɵimaɗi huwuŋ aŋ suma.

¹²Ksalai a siiwa Yesu a muɗa: Hiniyi, mi hilisi sini hoho hanɗa aŋ niyi warni.

¹³A siɗi futi lai, ksalai a niyasi edi, a niya warni hoho, farani hoho a fakasi amai siɗi huwuŋ par gaini luwi, a yaka agoɗom warni yem-ra n’abai ɗa kafa.

¹⁴Nagai n’e giɗimiŋ ɗa, e liwi, e ki labar aha war fuŋ n’abai gaini n’agogoi na ɵimani paŋ lai, ɗai e hilisi edi aŋ tili wala n’a za ɗa.

¹⁵E cû sini Yesu, e tili ɗif na ksalai midini ɗa azumai dam, sapa sini ca, gaini hangal lai, a ni n’a naka gaini Legiyon midini ɗa, hunai te yimiɗi.

¹⁶Nagai na wala a za wuzani arɗi ɗa, e miɗiɗi midini wala n’a za sini ɗif na gaini ksalai midini gaini hoho ɗa lai.

¹⁷Ɗai e tiki piɗi e siiwiŋ buri a yima sini edi midini afiɗi par.

¹⁸Won hlai n’a na niya warni hulum, ni n’a naka gaini ksalai a siiwaŋ buri a hinaŋ a hala gaini.

¹⁹A hinaŋ aŋ hala gaini kai, amma a midini: Hala aha siɗi tamaiku, ku miɗiɗi gaini wazagai n’EPIƊ-ƊAI a zaŋ suku paŋ gaini hiinini-haw n’a hiinaŋ buriku lai.

²⁰A hala a tika pini aŋ sa labar edi warɗi Dekapolis midini wazagai na Yesu a zaŋ sini paŋ, ɗai paŋ e bindi hiyak.

²¹A waya anene kata gaini hulum n’abai, firiɗi ɗai n’abai e tipi sini, a nafu agoɗom wulani yem-ra n’abai.

²²Ktai arbaɗi n’abakai na warni sinagogne a halasi, yikini Yairus. Won hlai n’a tala Yesu, a hurga azumai ezini.

²³A siika mini aŋ siiwa a muɗa: Ahiya t'aŋsi veglek, te ŋa ta aŋ mri. Mu siiwuku, halasi tika tuku siɗi ta, kapai te zuula, te sumna karɗi lai.

²⁴A hala gaini, ɗai viya e hili pini lai, e hiɵiŋ amai.

²⁵Muni zi veglek na fel a ka gaiɗi, te za gaini buza gobi doogo pi sulu, te nafu woni.

²⁶Te siɗa gir gara tiɗi doktor zamai zamai viya, faraiɗi paŋ a ba edi li, te nava pɗem gaini agwi kai zaŋ, veglekɗi a riya amai, a riya amai a suwa pra.

²⁷Won hlai na te ɵina labarni Yesu, te halasi arbaɗi ɗai, te tetema sapani Yesu duɓani par.

²⁸Buri te hiina warɗi ɓa: Koo na ɓa mu tetema ɗa a sapani tekeɗeɗi, aga mu zuula.

²⁹Tizaw tar, felɗi n’a ka ɗa a ɗiya, te sɗa war siɗi ɓa te zuula war gir par ya.

³⁰Yesu a sɗa tizaw ɓa gdaŋ a niyasi edi sini par, a bunda arni duɓani arbani firi, a muɗa: N'a tetema sapaŋa asiya ɗa?

³¹Ɗai zi hitri e miɗini: Firiɗi ɗai n’a na hiɵiku na ɗa, ku zilba ɓa: a tetema sapaŋa asiya ɗi ɗa, maɵa maɵa ɗa?

³²A ɵa arni sini, a tiliti na na te za hanɗa.

³³Muni te sɗa wala n’a za siɗi, te halasi te hurga azumai ezini, te miɗini jreni seŋ ɗa paŋ edi.

³⁴A miɗiɗi: Ahiya, yimiku a zuuluku li, hala jam, pla edi mini veglekku par.

³⁵A ɵa mini maa edi kai, ɗai zamai e hilisi ahani ɗif n’abai na war Sinagogne e miɗi: Ahiku te mra su ya, ku huwya Api zi hitri katawai pra ɗa buri ma ɗa?

³⁶Yesu a ɵina seŋɗi ba, a miɗini wiini ɗif n’abai na war Sinagogne ɗa: Ku huna kai, yima bas.

³⁷A hina ɗif zamai a hala gaini kai, a hala gaini ɗa a Peter gaini Yakob gaini Yohana na tawalni.

³⁸E cû aha war dalamni ɗif n’abai na war Sinagogne ɗa, a tala firiɗi ɗai n’e ɗa sûûri, e tûwi, e ɗûûli gaini gdaŋɗi lai.

³⁹A niya aha, a miɗiɗi wiiɗi ɗai: Ki sûûri lai, ki tûwi lai nɵa buri ma ɗa? Ahiyagoi te mra kai koo! te kala na ɗa a weseŋ.

⁴⁰Nagai e riyi pini. A ɵimiɗi anene paŋ kafa, a yika epiɗi ahiyagoi gaiɗi emiɗi gaiɗi nagai n’e hilisi gaini lai e niyi amlai warni hlai na ahiyagoi te na woni ɗa.

⁴¹A yima tiɗi ahiyagoi a miɗiɗi: Talita, kum! A waya edi ɓa: Ɓulumi, mu na muɗuku, faka amai!

⁴²Tizaw tar, ɓulumi te fakasi amai, te tika piɗi te hala, buri buzaɗi a za doogo pi sulu, e bindi hiyak gara.

⁴³A gidiɗi gdaŋ gara buri e miɗi edi wiini ɗif gaini wala n’a za ɗa kai. Asakal par a miɗiɗi buri e siɗi wala zi simi.