Read Mousgoum Markus 6 Bible Online

Markus 6 - Mousgoum bible

Markus 6

¹A fakasi woni par, a halasi midini aftini, ɗaini zi hitri e tipisi pini lai.

²Won hlai na Sabbat a gizi li, a tika pini aŋ hitira warni sinagogne. Ɗai viya n’e ɵini seŋni e bindi hiyak e zilbi siɗi ɓa: Ɗif hanɗa, sda na maini hanɗa ɵa a navaŋ wata par ɗa?

³Hanɗa a ɗif zi kilɗi luwuŋ kai ɗi? Ahiɗi Mariya kai ɗi? A tawalɗi miɗi Yakob gaini Yoses gaini Yudas gaini Simun ɗa kai ɗi? Tawalakaini na falakai e ɗa arbamu na ca ca kai ɗi? A bunda aŋ wala zi dibi buriɗi.

⁴Yesu a miɗiɗi: Ɗif na mini Alaw ɗa, e miisiŋ war hlai zamai kai, sai midini aftini, arbaɗi zagalakaini lai, aha war dalamni lai.

⁵Yesu a kiɗa aŋ za wala zi hiila woni kai, sai a tika tini midiɗi ɗai zi veglek ktai ktai kadai aŋ zûûliɗi.

⁶A bunda hiyak burini yimi-kai na wiiɗi. A paya war fuŋ n’agogoi na ɵimaɗi paŋ aŋ hitriɗi ɗai.

⁷A yikiɗisi na doogo pi sulu sini, a tika pini aŋ ɵiniɗi sulu sulu, a siɗi spak midini ksalai,

⁸A gidiɗi buri e tiki wala ktai tiɗi buri morkoiɗi kai, sai a amaraŋa tar. E tiki wala zi simi tiɗi kai, guɓo tiɗi kai, sulai zi kiiya tiɗi kaalai,

⁹amma ki wi harabak eziki, ki wi sapa siki sulu kai.

¹⁰A miɗiɗi pra: Won hlai na ki niyi li aha war fuŋ ktai ɗa, ki simni warni ɵa haa ki vidi warni hlai ni par.

¹¹Na ɓa, ki cû li war hlai ktai na ɗai e diri e yimiki siɗi kai, e ɵini seŋki kaalai ɗa, ki fiki woni par ɗa ki ɵiɓi alogodo n’eziki edi tiɓ tiɓ, kapai a hina aŋ zaida siɗi.

¹²E hili edi e ɓiki seŋ buri ɗai e bindi payaiɗi.

¹³E birgi ksalai edi viya, e girdi emel siɗi ɗai zi veglek viya, e zûûliɗi lai.

¹⁴Pai Herod a ɵina hanɗa, buri yikini Yesu a tikapini a wa gara. Ɗai e miɗi ɓa: Yohana zi Baptisme a ɵiya li amai arbaɗi zi mri par, spak a sa sini aŋ za wazagai zi hiila na ɗa burini hanɗa.

¹⁵Amma na zamai e miɗi ɓa a Eliyas, na zamai pra ɓa, a ɗif na mini Alaw ktai maiɗi marni na zamai ɗa ɵa.

¹⁶Herod, won hlai n’a ɵina hanɗa, a muɗa: Yohana na mu ɗukla wulani edi ɗa, a ɵiyasi amai na ɗa a ni.

¹⁷Buri Herod gaini midini dama a ɵiniɗi ɗai aŋ yimi Yohana, e yimiŋ, e rgiŋ warɗi daŋgai lai buri seŋ na wiiɗi Herodiyas na munini Filip, na Herod a tikiti aŋ munini.

¹⁸Buri Yohana a miɗini ɓa: Futi burini aŋ tikiti munini tawalni kai.

¹⁹Herodiyas te bla gaw sini, te dara aŋ fuɗaŋ lai, amma te kiɗa aŋ za hanɗa kai.

²⁰Buri Herod a huna Yohana, buri a sɗa ɓa, a ɗif na jre-ɗikat, na sɗik lai. A hina wala na meefeŋ a za sini kai. Won hlai na Herod a ɵina seŋ hanɗa, a sɗa wala n’a za ɗa kai, paŋ ktai a firiya a zuɓura seŋ na Yohana a muɗaŋ ɗa gaini firiyi gara.

²¹Te niviti futi na te na piyiti ɗa, war mefeŋ na Herod a za fet na wiini wiini, war mefeŋ ni ɗa, a zizina simi buriɗi ɗaini n’abakai gaiɗi abakaiɗi askarai, gaiɗi n’abakai na war Galileya ɗa paŋ lai.

²²Ahiɗi Herodiyas te niya amlai te didima, te yima arni Herod gaiɗi n’a yikiɗisi ɗa. Pai a miɗiɗi wiiɗi ahiyagoi ɗa ɓa: Zilba wala na ku firyaŋ paŋ aga mu suŋku.

²³A ha wala mini a miɗiɗi: Wala na ku zilbaŋ ɗa aga mu suŋku, koo ɓa a galɗi paiŋa tekeɗeɗi.

²⁴Te niya anene te miɗiɗi wiiɗi emiɗi: Aga mu zilba ɗa a ma ɗa? Emiɗi te miɗiɗi: Ku zilba ɗa a humokni Yohana zi baptisme.

²⁵Te purmasi witaw aŋ niya amlai sini pai buri te zilbaŋ, te muɗa: Mu dara ɓa ku saŋasi humokni Yohana zi baptisme tiyana warni tasa ta.

²⁶Pai a kwima gara, amma burini wala n’a haŋ mini, gaiɗi ɗai n’a yikiɗisi lai ɗa, a dara a bla edi siɗi kai.

²⁷Tizaw tar pai a ɵina askarni zi gɗam ktai buri a hala a kasi humokni Yohana zi baptisme. Ɗif zi gɗam a hala, a ɗuklasi humokni Yohana amlai warɗi daŋgai par.

²⁸A kasi humokni warni tasa ta, a siŋɗi wiiɗi Ahiyagoi, ahiyagoi te siŋɗi wiiɗi emiɗi.

²⁹Won hlai na ɗai zi hitri na wiini Yohana e ɵini labar hanɗa, e tiki sini e hili e piŋ.

³⁰Apostelai e tipi sini Yesu, e miɗini gaini wazagai n’e ziŋsi ɗa paŋ, n’e hitriŋɗi wiiɗi ɗai lai.

³¹A miɗiɗi: Yumumu sumu edi warni baŋa, kapai siki amla agwi. Buri ɗai e hilisi e wiyi, e hilisi e wiyi haa hlai n’e niviŋ agwi buri simi maa aŋ kai.

³²E niyi warni hulum, e yimi siɗi edi kiiɗi war hlai na baŋa.

³³Ɗai n’e tiliɗi e ɗa hili ɗa viya, ɗai na war fuŋ n’abai paŋ par e liwisi gaini eziɗi, e cû wuzaɗi lai.

³⁴Won hlai n’a niyasi amai warni yem-ra n’abai ɗa par, a tala firiɗi ɗai n’abai, e bindi arni haw, buri nagai e ɗa arni maini adumai na ɗifni zi gɗam aŋ kai nɵa. A tika pini aŋ hitriɗi wazagai viya.

³⁵Won hlai n’e tili ɓa futi te vuga vug ɗa, ɗaini zi hitri e hilisi sini e miɗini: Hlai hanɗa a baŋa, futi ɗe te hala ɗaw lai,

³⁶ku tikiɗi piɗi ɗai ta kapai e hili e piyi wala zi simi miɗi war fuŋ n’agogoi n’aŋ ɵimani hlai na ɗa.

³⁷A waya seŋ a miɗiɗi: Tiki dama ki siɗi simi. Nagai e miɗini: kapai mi hili mi wûrisi wala zi simi gaini sulai na miya mi siŋɗi aŋ simi ɗi?

³⁸Amma a zilbiɗi: Peŋ aŋ tiki gama ɗa? Hili tiliŋ haw, e hili e zilbiɗisi, e miɗini: peŋ a na ɵim gaini hilif sulu lai.

³⁹Nɵa Yesu a muɗa buri e miliɗi azumai midini evek na hirnaŋ war vok ta ta.

⁴⁰E simni azumai ca ca, war vok na miya miya, na doogo doogo ɵim ɵim lai.

⁴¹A mula peŋ na ɵim gaini hilif na sulu lai a bunda arni amai war fuŋ-n’Alaw, a sa tese, asakal par a ɗukla peŋ ɗa a siŋɗi wiiɗi ɗaini zi hitri kapai e ɓûrwiŋ edi, a ɓurwa hilif na sulu lai.

⁴²E simi haa e vi paŋ,

⁴³e mili pini n’a hina ɗa amai, a va dologo doogo pi sulu gaini hilif lai.

⁴⁴Nagai n’e simi ɗa, pɵaɗi maɵagai taaha ɗa dubu ɵim.

⁴⁵Asakal par agwi, a pa piɗi ɗaini zi hitri buri e niyi gaini amai warni hulum n’abai, e bindiɗi ka anene kata wuzaɗi Betsaida sek, Ni gaini midini dama a hina ka aŋ tikiɗi piɗi ɗai ɗa.

⁴⁶A hiniɗi ka ca, a niya amai midiɗi huwuŋ buri a siiwa.

⁴⁷Futi te za li koskoi ɗa, hulum n’abai ɗa a ɓata edi arbani yem-ra n’abai, Ni ɗa a hina ka amai gdaŋ kiini zaw.

⁴⁸Won hlai n’e tiliɗi e ɗa siɗi gir war vilini hulum, buri smer a pasi arɗi tiɓ, war gorof n’abai ɗa, a halaɗi siɗi sek amai midini yem-ra blaŋ, a ka sini aŋ niya ɵimaɗi.

⁴⁹Won hlai n’e tiliŋ a hala midini yem ɗa, e hiini ɓa a ksalai, e ɗûûli.

⁵⁰Nagai paŋ e tiliŋ, paŋ e hûni lai. Amma Ni a muɗa siɗi: Hanɗa muta, ki hûni kai.

⁵¹A niya amai piɗi war hulum, smer a tika azumai, e bindi hiyak griŋ gara.

⁵²Buri sda n’a za gaini peŋ ɗa, e ɵiniŋ kai, hiiniɗi a nafu gaini dûgû duk.

⁵³Won hlai n’e gi anene kata li ɗa, e cû a Genezaret e yimi amai wulani daŋ.

⁵⁴Won hlai n’e niyisi agoɗom warni hulum par tar ɗa, ɗai e siɗi Yesu tar.

⁵⁵Ɗai e gûni midini afti paŋ, e tiki piɗi aŋ kiɗiŋsi ɗai zi veglek midini walaɗi zi feŋ, woɗi paŋ n’e ɵini li ɓa aŋ woni ɗa.

⁵⁶Hlai paŋ n’a hala li woni ɗa, koo ɓa a fuŋ n’abai, koo ɓa a fuŋ n’agogoi, e kiɗi ɗai zi veglek ɗa won hlai na ɗai e tipi woni ta ta ɗa. E siiwiŋ buri a hiniɗi e tiki tiɗi koo sini mini sapani tekeɗeɗi; nagai paŋ n’e tiki tiɗi sini ɗa e zûûli paŋ.