Read Mousgoum Markus 7 Bible Online

Markus 7 - Mousgoum bible

Markus 7

¹Farisekai gaiɗi ɗai zi ɗû wazagai n’e hilisi a Yeruzalem par e tipisi sini Yesu.

²E tili ɓa zamai arbaɗi ɗaini zi hitri ɗa e simi gaini tiɗi hi-hir, a dara a muɗa e mi tiɗi edi kai.

³Buri pin de na wiiɗi Farisekai gaiɗi Yudeyakai paŋ, e simi ɗa sai e mi tiɗi edi pɗem yok haw, pini de na wiiɗi tamaiɗi a na ɗa maini nɵa.

⁴Won hlai n’e wiyisi li war hlai na ɗai e tipi warni ta ta ɗa paŋ ɗa, e zi siɗi edi hilu kai ɗa, e simi wala kai. De zamai viya n’e zi pini a na lai, maini mini kup, gaini grak, gaini argiŋ, gaini tasa zi kiya, gaini tabel lai.

⁵Farisekai gaiɗi ɗai zi ɗû wazagai ɗa e zilbiŋ e miɗi: Ɗaiku zi hitrai e zi pini deɗi tamaiɗi kai ɗa buri ma ɗa? E simi gaini tiɗi hi-hir buri ma ɗa?

⁶A miɗiɗi: Esaya a muɗa seŋ na wuze buriki woɗi futini, tiki ki ɗi zi rhai maini n’a ɗosi ɗa nɵa: Ɗai hanɗa e kûliŋa na ɗa gaini miɗi, amma agulɗi t'aŋ gaigai gaya.

⁷E hûrgi azumai wuza na ɗa kadai meere, hitri na wiiɗi ɗa, a gadai na ɗai e rgiŋ ɗa.

⁸Tiki ki hini gadai na wiini Alaw ɗa edi ta, ki zi pini de na wiiɗi ɗai gaini gdaŋki,

⁹A miɗiɗi: Ki hini edi na ɗa, a gadai na wiini Alaw mal mal aŋ zi pini de na wiiki ɗa.

¹⁰Buri Musus a muɗa ɓa: Apuku gaiɗi amuku ku kûliɗi midiɗi amai, ni n’a muɗa meefeŋ sini epini, zaw siɗi emini ɗi ɗa, ni aga a nava fiɗi n’edi.

¹¹Tiki ki miɗi ɓa: Na ɓa ɗif a muɗa li sini epini, zaw siɗi emini ɓa: wala na mu hiinaŋ ɓa mu zina puku gaini ɗa a na korbaŋ, a dara a muɗa: A like n’a sa edi ta burini Alaw.

¹²Ki hiniŋ aŋ za pɗem sini epini gaiɗi emini kai,

¹³Nɵa tiki ki bindi seŋ na wiini Alaw edi aŋ kadai gaini deki na ki hitriŋɗi wiiɗi ɗai ɗa, ki zi wazagai zamai maini hanɗa ɵa lai.

¹⁴A yikiɗi ɗai paŋ sini pra a tika pini aŋ miɗiɗi: Slini pɗem, ki yimiŋ miɗiki lai.

¹⁵Wala n’aŋene sini ɗif par n’a niya amlai warni sek ɗa, a kiɗa a bundaŋ hi-hir kai, a bundaŋ hi-hir ɗa a wala n’a niya edi sini par ɗa.

¹⁶Ni na ɵimani zi ɵeŋ a na ɗa a pɗem ɓa a ɵina.

¹⁷Won hlai n’a wayasi li aha, aŋ siɗi ɗai gobi kir kai ɗa, ɗaini zi hitri e zilbiŋ midini seŋ zi siŋka maini hanɗa,

¹⁸A miɗiɗi: Tiki lai, ki ɗi na siɗi miɗiki kaalai ɗi? Wala n’a niya warni ɗif a sɗa aŋ bundaŋ hi-hir kai, ki ɵini hanɗa kai ɗi?

¹⁹Buri a niya ɗa warɗi agulni kai, amma warni aruni kadai, safai agwi a hala edi warni waŋ zi flai lai. Gaini miɗi hanɗa a dara a muɗa ɓa, wala zi simi paŋ ɗa a hilu.

²⁰A muɗa: Wala n’a niyasi edi sini ɗif par a bundaŋ hi-hir.

²¹Buri hiini na maafanai paŋ a niyasi amlai warɗi agulni ɗif par, de na hi-hir, hill, fiɗini humok,

²²maɵara, melew na pini wazagai, zini meefeŋ siɗi na zamai, payai zi siyer, yel na meefeŋ, zaida na meefeŋ, kûlini-si, miɗi zi giɵibi,

²³Wazagai na maafanai hanɗa paŋ a niyasi warni ɗif par, a bunda ɗif hi-hir lai.

²⁴A fakaɗi woni par, a hala midini afti na Tirus gaiɗi Sidon, a niya aha warni dalam ktai dak, a firiya ɓa ɗai e siɗi hanɗa kai, paŋ ktai a kiɗa aŋ ŋoya kai.

²⁵Buri muni ktai na ahiɗi ksalai aŋ midiɗi, te ɵinasi labarni ba, te halasi te hurga azumai ezini.

²⁶Amma muni hanɗa te grek, war pinzibaɗi Serofenesai, te siiwaŋ buri a birga ksalai na hi hir edi siɗi ahiɗi par.

²⁷A miɗiɗi: Hiniɗi aliyagoi ɗa e vi ca haw, buri ɓa ku mula simi na wiiɗi aliyagoi yaw, ku pokoŋ edi wiini hirgakai ɗa, a sɗa aŋ za kai kai ɗi?

²⁸Amma te wiyini seŋ te miɗini: A jre, Epiɗ-ɗai, hirgakai azumai pini Abel ɗa, a suma ɗa a kolkoɗai n’a yakasi piɗi aliyagoi par kai ɗi?

²⁹A miɗiɗi: Pin miɗiku hanɗa, hala wiiku, ksalai a niya edi siɗi ahiku par ya.

³⁰Won hlai te co aha ɗa, te niviti ahiyagoi azumai midini li gaini fini waŋ, ksalai a niya edi dak.

³¹A halaɗi midini afti na Tirus ɗa par, a vugasi a Sidon ɗaw midini afti na Dekapolis ɗaw a hala sini yem-ra n’abai na Galileya sek.

³²E kinisi ɗif ktai na ganiŋ sini, na alesini gaini pi duk, e siiwiŋ buri a tikiti tini sini.

³³Yesu a yimaŋ edi kiini, a wa tini ɵimani, a purfa teenek tini, a tetimiti alesini gaini teenek na mini par ɗa.

³⁴Asakal par a bunda arni amai war hlai n’amai a suŋfa a muɗa: Effata, a dara a muɗa: Mala edi.

³⁵Tizaw, ɵimani a mala edi, alesini na gaini pi duk ɗa te pla edi lai, a tika pini aŋ muɗa seŋ gaglai.

³⁶Yesu a gidiɗi buri e miɗi hanɗa wiini ɗif kai, a gidiɗi ɵa lai, amma nagai e miɗiŋ edi wuzaɗi sek a suwa a suwa lai.

³⁷E bindi hiyak gara e miɗi: A za ɗa a wazagai na pɗamai sal koo, a bindiɗi na ganaŋai e ɵini, na ɓurtum ɗa e miɗi lai.