Read Mousgoum Lukas 10 Bible Online

Lukas 10 - Mousgoum bible

Lukas 10

¹A Asakal hanɗa Epiɗ-ɗai a vara ɗai zamai doogo doogo muguzak pi sulu, a ɵiniɗi sulu sulu wuzani war fuŋ n’abakai paŋ gaini hlaini paŋ na Ni gaini midini dama a dara a hala woni ta ta ɗa.

²A miɗiɗi: Hiɗi a na abai, amma ɗai zi sda ɗa e ɗa agwi, buri nɵa ki siiwi Epin-gezani hiɗi buri a ɵinasi ɗai zi sda war hiɗini.

³Hili, mu ɵiniki na ɗa, maini alini adumai n’arbani belemke nɵa;

⁴Ki mili guɓo zi farai tiki kai, sak kaalai, harabak eziki kaalai, ki ɵiɓini wuti wiini ɗif kaalai.

⁵Dalam paŋ na ki niyi li aha warni ɗa, ki miɗi avut tar ɗa ɓa: Sleɗ a sumna midini dalam hanɗa.

⁶Na ɓa ɗif zi ɵeɗ a na aha war dalam hanɗa, ɵeɗki aga a sumna midini, na ɓa nɵa kai, ɵeɗki aga a wayasi siki.

⁷Simni warni dalam hanɗa, ki simi simi na e siŋki ɗa, ki ci wala zi ci na e siŋki ɗa lai, buri ɗif zi sda paŋ sai a nava vrakni, ki zûgûwarni dalam yaw yaw kai.

⁸War fuŋ n’abai paŋ na ki niyi li woni ɗa, na ɓa e yimiki li siɗi ɗa, aga ki simi simi n’e tikiŋ wuzaki paŋ.

⁹Ki zûûliɗi zi veglek na woni, ki miɗiɗi wiiɗi ɗai ɓa: Paini Alaw t'aŋ ɵimaki gobi.

¹⁰Amma war fuŋ n’abai paŋ n’aga ki niyi aha woni, na ɗai e diri e yimiki siɗi kai ɗa, ki hili edi warni futini n’abakai ɗa ki miɗi:

¹¹Alogodo na warni fuɗki par n’a duɓuga eziyi kaw, mi ɗa ɵiɓiɗkiɗi edi. Amma ki yimiŋ miɗiki pɗem ɓa: Paini Alaw te halasi siki ya.

¹²Mu miɗiki, war mefeŋ ni ɗa, fuŋ n’abai hanɗa aga a sɗa gir a siwiti Sodoma.

¹³Haw gara buriku Korazin, haw gara buriku Betsaida, buri ɓa wazagai zi hiila n’abakai n’a za warki ɗa, a za fu na ɗa warɗi Tirus gaiɗi Sidon ɗa, aŋ a ɗa e wi sak zi ziiɗai siɗi ya, e simni arni bono ya lai.

¹⁴Buri hanɗa warni mefeŋ zi sariya ɗa, tiki aga ki siɗi gir ki siiwiɗi ɗai na Tirus gaiɗi na Sidon.

¹⁵Tuku Kapernahum, ku hiina ɓa Alaw aga a riyuku amai war hlai n’amai ɗa ɗi? Zaw kai aga a husukusi haa azumai warni hlaiɗi ɗai zi mri.

¹⁶Ni n’a ɵina piki a ɵina pa, ni n’a ɵina piki kai, a ɵina kai na ɗa pa, ni n’a bla edi siki, a bla edi sa ta, ni n’a bla edi sa ta ɗa, a bla edi na ɗa sini Ni n’a ɵinaŋasi ɗa lai.

¹⁷Na doogo doogo muguzak pi sulu e wiyisi aha gaini firiyi e miɗi: Epiɗ-ɗai, war yikuku ksalai a gada piyi.

¹⁸Amma a miɗiɗi: Mu tala Satan a kɵasi azumai war hlai n’amai par maini wilɗi nɵa,

¹⁹mu siki spak aŋ kirpi wala meefeŋ gaini hurdi lai azumai pini eziki, midini spakni gawki lai, wala ktai n’aga a kiɗa a ziki meefeŋ aŋ kai.

²⁰Gaini hanɗa paŋ ɗa, ki firiyi burini na ɓa ksalai a gada piki kai, amma ki firiyi burini na ɓa, yikiki aŋ gaini ɗû warni fuŋ-n’Alaw.

²¹Won hlai ni Yesu a va gaini firiyi pini spakni Seze-sɗik, a muɗa: Mu zuku tese, Epin-gezani hlai n’amai gaiɗi yai lai, buri ku ŋoya wazagai hanɗa arɗi na yalakai gaiɗi zi siɗi, amma ku siŋkaŋ edi arɗi akoɗokokai, nkam, Apa, buri a tala arku pɗem aŋ za nɵa.

²²Wazagai paŋ a sasi ta sini Apa par, ɗif n’a sɗa Ahi aŋ kai, sai Api tar, ɗif a sɗa Api aŋ sai Ahi tar, gaini ni na Ahi a rga warni aŋ siɗkiɗni edi lai.

²³A bunda arni siɗi ɗaini zi hitri a miɗiɗi wiiɗi nagai kiiɗi ta ɓa: Sleɗ midiɗi nagai n’e ɗa tili wazagai na ki ɗa tiliŋ ɗa.

²⁴Buri mu miɗiki: ɗai na mini Alaw viya gaiɗi paakai viya lai e piyi aŋ tili wazagai na ki ɗa tiliŋ na ɗa, amma e tiliŋ kai. E piyi aŋ ɵini seŋ na ki ɗa ɵiniŋ na ɗa, amma e ɵiniŋ kai.

²⁵Tili, ɗif n’a sɗa gadai gara ktai, a fakasi buri a tetemaŋ a muɗa: Api zi hitri, aga mu za ɗa a maɗa kapai mu nava suŋfa n’a vada kai aŋ bulum ɗa?

²⁶A miɗini: Aŋ gaini ɗû warni gadai ɗa ɓa maɵa ɗa? Ku ɵinaŋ na ɗa maɵa maɵa ɗa?

²⁷A waya seŋ a muɗa: Aga ku dara Epiɗ-ɗai Alaw na wiiku gaiɗi agulku paŋ, gaini sunfaɗi-agulku paŋ, gaini gadaɗku paŋ, gaini siɗiku paŋ. Ku dara maiku maini suku nɵa lai.

²⁸Yesu a miɗini: Ku waya seŋ gaini futini, za hanɗa aga ku sumna karku lai.

²⁹Amma ni a firiya, a siŋka edi ɓa, zilbi na wiini ɗa te na gaiɗi futini, a muɗa sini Yesu: Maya ɗa asiya ɗa?

³⁰Yesu a waya seŋ a muɗa: Ɗif ktai a halasi azumai a Yeruzalem par a Yeriko sek, gorɓolokai e yimiŋ, e mili wazagaini paŋ, e ɵiɓiŋ, e hili wiiɗi, e hiniŋ gobi a mra.

³¹Wala a za nɵa, pai zi ɓaka ktai a vugasi warɗi futi na ɗa, a talaŋ waŋ, a vuga edi ɵimani ɗaw.

³²Levit ktai a za nɵa lai, a cosi warni hlai ni ɗa a talaŋ waŋ, a vuga edi ɵimani ɗaw,

³³Amma ɗif na Samariya ktai, warni morkoini a cosi warni hlai n’aŋ warni ɗa, won hlai n’a talaŋ, a bunda arni haw.

³⁴A hala sini, a ma mini wurukni edi gaini emel gaini vin lai, asakal par a faɗa mini wuruk lai. A tikaŋ amai midini ablehöni ta, a kaŋ war dalam na morkokoi e yimiŋ aŋ haaya ɗa ta, a tika hangalni sini lai.

³⁵Dawaini, won hlai na hlai a sɗasi li edi, a mula sulai sulu a siŋni wiini epin-gezani dalam zi haaya ɗa ca, a miɗini: Ku tika hangalku sini pɗem, na ɓa farai a ɓa a suwa hanɗa li ɗa, mu wayasi li ɗa aga mu vurguŋku.

³⁶Arbaɗi na hu hanɗa, ku hiina ɓa, n’a siŋka edi aŋ maini ɗif n’a kɵa war tiɗi gorɓolokai ɗa asiya ɗa?

³⁷A muɗa: A ni n’a za pɗem sini ɗa. Yesu a miɗini: Hala, ku za nɵa lai.

³⁸Won hlai n’e ɗa warni morkoiɗi, a co warni fuŋ ktai, muni ktai yikiɗi Marta te yimaŋ siɗi,

³⁹Mariya, na tawalɗi te sumna azumai ezini Yesu aŋ ɵina seŋ n’a na hitraŋ ɗa.

⁴⁰Amma Marta te huwya siɗi gaini sda viya burini, te halasi sini te miɗini: Epiɗ-ɗai, tawala te hinaŋa blaŋ mini sda ɗa, ku miɗiɗi ta te halasi te zina pa agwi lai kai ɗi?

⁴¹Amma Yesu a waya seŋ a miɗiɗi: Marta, Marta, tuku ku huwya suku gaini wazagai viya, ku sumna azumai kaalai na ɗa meere,

⁴²Wala na pɗem ɗa a na ktai, Mariya te vara ɗa a gal na pɗem n’a suwa paŋ ɗa, aga a yima edi tiɗi par kaalai.