Read Mousgoum Lukas 11 Bible Online

Lukas 11 - Mousgoum bible

Lukas 11

¹Mefeŋ ktai, Yesu a nafu warni hlai ktai aŋ siiwa, won hlai n’a vada li, ktai arbaɗi ɗaini zi hitri a miɗini: Epiɗ-ɗai, hitriyi lai maini na Yohana a hitriɗi ɗaini zi hitri aŋ siiwi nɵa.

²A miɗiɗi: Won hlai na ki diri ki siiwi, ki miɗi maini nɵa: Api A zuva ɓa, ɗai paŋ e siɗi ɓa ku na sɗik a zuva ɓa, paiku te halasi

³siyi simiyi na war yuvai kûreɗ-kûreɗ.

⁴Hiniyi tuwuryi, buri tiyi lai mi hinini wiini asiya asiya ɗi paŋ tumuɗni n’aŋ midini ɗa, ku hina tanai a yimiyi kai.

⁵A miɗiɗi pra: Asiya asiya paŋ n’arbaki, na marmaini a na, a hala sini duvuk na marba aŋ miɗini ɓa: Marmaya, tufaɗa peŋ hu,

⁶buri marmaya ktai a cosi ahaya aŋ morkoi, wala ktai na mu sini aŋ kai.

⁷Amlai par, a wiyinisi seŋ ɓa: Huwyaŋa kai, mini hlaiŋa mu ɵaŋ ka, gaiɗi aliya mi fini azumai gulo, mu kiɗa mu fakaɗi amai a ŋ suku peŋ kai, a sɗa aŋ za ɵa ɗi?

⁸Mu miɗiki, koo ɓa, a faka amai aŋ siŋni buri ɓa ni a marmaini kai kaw ɗa, aga a fakasi amai buri siiki n’a na siika mini ɗa, aga a sini wala na jaani aŋ sini ɗa lai.

⁹Nɵa mu miɗiki: Siiwi, aga a sa siki, piyi aga ki nivi, ɵiɓi, mini hlai aga a mala edi buriki lai.

¹⁰Buri asiya asiya paŋ n’a siiwa a sa sini, n’a paya a nava lai, n’a ɵiɓa, mini hlai aga a mala edi burini lai.

¹¹Arbaki ɗa, na ɓa ahi a zilba api gaini hilif, a sini wala meefeŋ warni balamni ɗi?

¹²Zaw na ɓa, a siiwaŋ midini eɵe, a sini hurdi ɗi?

¹³Na ɓa tiki na maafanai, ki siɗi wiiɗi aliki wazagai na pɗamai ɗa, azi gama ɗa, Api na war fuŋ-n’Alaw aga a sa Seze-sɗik wiiɗi nagai n’e ɗa zilbiŋ tini par ɗa!

¹⁴A birga ksalai na numul edi, won hlai na ksalai a niyasi edi, ɗif na ɓurtum a muɗa seŋ, ɗai e bindi hiyak.

¹⁵Amma zamai arbaɗi e miɗi: A birga ksalai na ɗa gaini Belzebul na paiɗi ksalai.

¹⁶Zamai aŋ tetemiŋ ɗa, e zilbiŋ buri a ziɗi wala zi siŋki na war fuŋ-n’Alaw par.

¹⁷Won hlai n’a sɗa hiiniɗi ɓa ya ɗa, a miɗiɗi: Pay paŋ na ɗai na warɗi e hitimi marɗi ɗa, pai hanɗa aga te tuura edi, dalamai na warɗi lai aga a ho azumai midini marni.

¹⁸Nɵa ɗa, na ɓa, paini Satan t'aŋ gaini ɓraw ɗa, aga te ɗiya gdeɗi maɵa maɵa ɗa? Na ɓa ki miɗi ɓa mu birga ksalai na ɗa gaini belzebul ɗa.

¹⁹Na ɓa ta mu birga ksalai gaini Belzebul ɗa, aliki e birgiŋ na ɗa gaini asiya lai ɗa? Buri nɵa nagai dama aga e zi aŋ ɗai n’e zitiki sariya.

²⁰Amma na ɓa mu birga ksalai edi gaini spakni Alaw ɗa, a siŋka ɓa pai n’Alaw te na arbaki ya.

²¹Won hlai na ɗif na gdaŋ na gaini wazagai zi hatam na gaini futini tini a na giɗima dalamni ɗa, wazagaini ɗa wala a kiɗa aŋ tetemaŋ kai.

²²Amma na ɓa, ɗif na gdaŋ a suwaŋ a cosi li, a rɗa li amai midini ɗa, aga a mula wazagaini zi hatam n’a na pɵa midini, n’aŋ tini ɗa edi, wazagaini n’a na ɗa a ɓurwaŋ edi wiiɗi ɗai lai.

²³Ni na warni aŋ gaya kai ɗa, a gawɗa. Ni n’a zina pa aŋ tapa fara amai kai ɗa, a ɵaraŋ gaini ɵiri edi.

²⁴Won hlai na ksalai a niyasi li edi sini ɗif par ɗa, a gunasi warni hlai z'alak ta ta ɗa paŋ, aŋ paya hlai zi si n’amla, na ɓa a navaŋ kir kai ɗa, a muɗa gaini warni ɓa: Mu waya wiyi warɗi delemiɗa, na mu nasi warɗi par ɗa.

²⁵Won hlai n’a co ɗa a niviti gaini dûgû edi selak gaini zizini ta lai.

²⁶Nɵa a hala a payasi ksalai zamai muguzak, na maafanai e sûwiŋ, e niyi amlai, e zizini siɗi azumai, meefeŋni ɗif hanɗa a bunda meefeŋ a suwa n’avut ɗa pra.

²⁷Won hlai n’a na muɗa hanɗa, wulaɗi muni ktai a wasi arbani firiɗi ɗai par a muɗa: Sleɗ midiɗi na na te ziyuku warɗi, na ku ca fiyawɗi lai.

²⁸Amma a waya seŋ a muɗa: Sleɗ ɗa aŋ midiɗi nagai n’e ɵini seŋni Alaw, e zi pini lai ɗa.

²⁹Won hlai na ɗai e tipisi li viya, a tika pini aŋ maini nɵa: Vuna hanɗa, a vuna na meefeŋ, a paya ɗa a wala zi siŋki. Amma wala zi siŋki na zamai aga a za sini kai, sai na wiini Yunas ɗa tar.

³⁰Buri ɓa maini na Yunas a za aŋ wala zi siŋki buriɗi ɗai na Ninive, nɵa lai Ahini-ɗif aga a za aŋ wala zi siŋki burini vuna hanɗa lai.

³¹Muni zi pai na war gal n’amai par aga te ɵiyasi amai war mefeŋ zi sariya gaiɗi ɗai na war vuna ni lai, aga te kûti sariya midiɗi buri ɓa na te halasi edi mini koŋni afti par a ɵina yel na wiini Salmun, paŋ ktai n’abai n’a suwa Salmun a na woni na.

³²Ɗai na Ninive aga e ɵiyi amai war mefeŋ zi sariya wuzaɗi vuna hanɗa par, aga e pi seŋ midiɗi lai buri e bindi payaiɗi gamai pini ɓikini seŋ na wiini Yunas, paŋ ktai ɗif n’a suwa Yunas aŋ woni na.

³³Ɗif n’a tika afu warɗi lampa buri a ɗûyiti azumai pini wala, zaw azumai piɗi wulai aŋ kai, amma a hikiti ɗa amai sini wala n’e higi lampa sini kapai nagai n’e niyisi amlai e tili gaglai ɗa.

³⁴Arku ɗa a lampa na wiini si, won hlai na arku a na pɗamai ɗa, suku paŋ aŋ war gaglai, na ɓa a na maafanai ɗa, suku paŋ aŋ war gegeŋ lai.

³⁵Ku za hangal kapai gaglai n’aŋ warku ɗa a bunda aŋ gegeŋ kai.

³⁶Na ɓa suku paŋ aŋ war gaglai, hlai n’agwi kaw aŋ war gegeŋ kai ɗa, aga a sumna war gaglai, maini na lampa a za gaglaini suku ɗa nɵa.

³⁷Won hlai na Yesu a vada gaini seŋni zi miɗi ya, ɗif na Farise ktai a yikaŋ buri a halaɗi ahani aŋ suma gaini.

³⁸Amma ɗif na Farise, a tala Yesu a ma tini wuzani simi maini pini de nɵa kai ɗa, a bunda.

³⁹Amma Epiɗ-ɗai a miɗini: Tiki Farisekai na ki mi duɓani kup gaini sufra lai, amma warki n’amlai a va gaini suuna na pini wazagai gaini meefeŋ lai.

⁴⁰Tiki ɗai na tatalakai, Ni n’a za duɓani wala ɗa, a za warni lai kai ɗi?

⁴¹Ki si aŋ like zi hiinini-haw wiiɗi na murgakai ɗa a wala n’aŋ warni ɗa, nɵa wazagai paŋ aga a za edi hilu buriki.

⁴²Haw gara buriki tiki Farisekai, tiki ki si doogoni manta gaini ru wiini Alaw, gaini na wiini sugoi zamai zamai paŋ lai, amma ki wili miɗiki gaini jre, gaini diri na sini Alaw sek ɗa, kadai tiɓ, ki zi ɗa a hanɗa haw, wazagai n’aŋ tiki na ɗa, miɗiki a wula gaini kaalai.

⁴³Haw gara buriki tiki Farisekai, tiki ki firiyi hlai zi simni n’edi avut na war sinagogne, war hlai na ɗai e tipi woni ta ta ɗa, ki firiyi ɓa e ɵiɓiki wuti zi hormo lai.

⁴⁴Haw gara buriki, buri tiki ki ɗa maini yeɵ na gaini hûsi hos na ɗai e hili midini e sɗiŋ kai ɗa nɵa.

⁴⁵Ɗif ktai n’a sɗa gadai gara a ɗuula a muɗa: Api zi hitri, seŋ na ku muɗaŋ na ɗa, ku tirkiyi na ɗa mi ɗi tiyi lai koo.

⁴⁶A waya seŋ a miɗiɗi: Haw gara buriki, ɗai na ki siɗi gadai gara, tiki ki mili zak na guma midiɗi ɗai aŋ libiŋ, amma tiki ɗa, ahi tiki maa te tika sini kai.

⁴⁷Haw gara buriki, buri tiki ki rgi yeɵ na wiiɗi ɗai na mini Alaw, na tamaiki e fiɗiɗi edi ɗa amai.

⁴⁸Tiki ki ɗi zaida buri sda na tamaiki e ziŋ ɗa, buri nagai e fiɗiɗi ɗai na mini Alaw edi, tiki ki rgi yeɵɗi lai.

⁴⁹Buri nɵa Alaw war yelni a muɗa: Aga mu ɵina ɗai na mini Alaw gaiɗi Apostelai siɗi, nagai aga e fiɗi piɗi, e ziɗi gir arɗi na zamai ɗa lai.

⁵⁰Kapai felɗi ɗai na mini Alaw n’a ma edi haa war piɗi yai zi tiki par ɗa, a zilba war tiɗi vuna hanɗa.

⁵¹Sini fel na Abel par haa sini fel na wiini Sakariyas n’e fiɗiŋ arbani gûwiŋ zi ɓaka gaini hlai na sɗik ɗa. Jre, mu miɗiki, aga a zilba tiɗi vuna hanɗa.

⁵²Haw gara buriki, tiki na ki siɗi gadai gara ɗa, tiki ki tiki lakle na wiini siɗi edi ɗaw, tiki dama ki niyi amlai kai, nagai n’e diri e niyi amlai ɗa, ki hiniɗi kaalai.

⁵³Won hlai n’a niyasi edi woni par, ɗai n’e siɗi ɗû gara gaiɗi Farisekai e tiki piɗi aŋ pirɵiŋ, aŋ zilbiŋ midini wazagai viya viya lai.

⁵⁴E firiyi e yimiŋ warni seŋ n’a niyasi edi mini par lai.