Read Mousgoum Lukas 12 Bible Online

Lukas 12 - Mousgoum bible

Lukas 12

¹Won hlai ni ɗa, ɗai dubu dubu e firi haa e ɗiyi maa midini eziɗi marɗi. Yesu a tika pini aŋ muɗa siɗi ɗaini zi hitri: Abai paŋ ɗa ki zi hangal burini is na wiiɗi Farisekai, a dara a muɗa rhai na wiiɗi Farisekai.

²Wala zi ŋoyai n’aga a siŋka edi kai aŋ kai, wala n’a za war kuɗuhai n’aga a siɗa edi kai aŋ kaalai.

³Buri nɵa, na ki miɗiŋ war gegeŋ paŋ aga a ɵina edi war gaglai. Na ki miɗiŋ war helek amlai warni dalam amlai ɗa, aga a wa edi amai midini daba zi mili.

⁴Mu miɗiki tiki marmakaya, ki hûniɗi nagai n’e fiɗi si edi, na asakal par e kiɗi e zi wala ktai sini kir kai ɗa kai.

⁵Mu dara mu siɗkiki Ni n’aga ki hûniŋ ɗa, ki hûni Ni n spakni a na buri a fuɗa si edi lai, asakal par a ɵiŋkaŋ warɗi avai z'afu lai ɗa, nkam mu miɗiki, ki hûni ɗa a Ni ɗa.

⁶Zezek ɵim a suma sulai sulu kai ɗi, amma ktai n’arbani n’Alaw midini a wula gaini aŋ kai.

⁷Ayir na miɗiki maa aŋ gaini piɵi tini ta, nɵa ki hûni kai, buri tiki ki nifi a suwa zezek na viya.

⁸Mu miɗiki: Asiya ɗi paŋ n’a sɗa sini ɓa a wiya arɗi ɗai ɗa, Ta n’Ahini-ɗif aga mu sɗaŋ ɓa a na wiya wuzaɗi ɗai zi ɵeŋ na wiini Alaw lai.

⁹Amma ni n’aga a ɓuɓura mini buriya arɗi ɗai, Ta lai aga mu ɓuɓura ma burini wuzaɗi ɗai zi ɵeŋ na war fuŋ-n’Alaw.

¹⁰Asiya ɗi paŋ n’a muɗa seŋ na meefeŋ sini Ahini-ɗif, Alaw aga a hinini meefeŋni ɗa, amma ni n’a tirka Seze-sɗik ɗa, Alaw aga a hinini meefeŋni kai.

¹¹Won hlai n’aga e kiki wuzani sinagogne, wuzaɗi paakai gaiɗi n’abakai ɗa, ki giriŋi midini n’aga ki wiyiŋ gaini n’aga ki miɗiŋ ɗa kai aŋ pili siki edi ɗa kai,

¹²buri Seze-sɗik aga a hitriki warni hlai ni dama burini wala n’aga ki miɗiŋ.

¹³Ɗif ktai arbani firi par a miɗini: Api zi hitri, miɗini wiini tawala buri a ɓurwa bulum ɗa gaya.

¹⁴A wiyini seŋ a muɗa: Ɗif n’a tikaɗa arbaki aŋ ɗif zi ɗûkliti sariya, zaw aŋ ɗif zi ɓûrwi wazagaiki ɗa asiya ɗa?

¹⁵Asakal par a miɗiɗi: Ki zi hangal, ki giɗimi siki burini suuna na pini wazagai, buri ɓa suŋfani ɗif a za mogo ɗa burini wazagaini na viya kai, koo ɓa faraini viya tekeɗeɗi.

¹⁶A miɗiɗi seŋ zi siŋka maini ktai maini nɵa: Ɗif zi farai ktai vuwaini a za gaini futini gara,

¹⁷a hiina gaini warni a muɗa: Kapai mu za maɵa buri hlai na mu mula seyemɗa woni aŋ kai?

¹⁸A muɗa: Yawwa, aga mu ho vrekaiɗa na walakai ɗa azumai, mu rga zamai n’abakai a suwa kapai mu ɵapa algama na wiya gaini wazagaiɗa paŋ woni lai.

¹⁹Aga mu muɗa sini suŋfaɗi-agula ɓa: Suŋfaɗi-agula, wazagaiku viya, a tapa li amai, a kiɗa buri buza viya, fana wiiku waŋ, ku suma gaini simi, ku ca lai, ku ɵa dawaŋ muku lai.

²⁰Amma Alaw a miɗini: Tuku ɗif na tatala, duvuk ɗa haa, sunfaku aga a tika edi, wazagai na ku tapaŋ amai ɗa aga ku hinaŋ wiini asiya ɗa?

²¹Ni n’a tapa godai amai burini sini dama, amma a zi farai burini Alaw kai ɗa aga a za sini maini nɵa.

²²Asakal par a miɗiɗi wiiɗi ɗaini zi hitri: Mu miɗiki nɵa buri ɓa aga ki giriŋi burini suŋfaki kai, burini wala n’aga ki simiŋ ɗa kai, burini siki ɗa kai, burini sapa n’aga ki wiŋ siki ɗa kaalai.

²³Buri ɓa suŋfa a suwa simi, si a suwa sapa ɗa lai.

²⁴Tili sini zeleke, a suuɗa kai, a haɗa kaalai, magaziɗni n’a mula wazagaini warni aŋ kai, vreni aŋ kaalai, amma Alaw a sini simi, nɵa tiki ɗa ki sûwi wala zi ɗifli, ki siiwiŋ azi viya.

²⁵Arbaki ɗa, n’a kiɗa a riya mogoni suŋfani edi agwi gaini giriɗini ɗa asiya ɗa?

²⁶Na ɓa wala n’agwi hanɗa ki kiɗi midini kai ɗa, ki giriŋi burini wazagai na zamai ɗa buri maɗa?

²⁷Tili sini miye n’edi buza, a wula ɗa a za sda kaalai, a duɓura aduzi kaalai; Salmun warɗi abaini tekeɗeɗi a wa sapa sini maini ktai arbaɗi nɵa kai.

²⁸Na ɓa girna Alaw a gana evek n’a na edi warni basga maini hanɗa ɵa, paŋ ktai dawai aga a ɵiŋka arni afu ɗa, aga a za hanɗa siki tiki a suwa hanɗa kai ɗi? Tiki na gaini yimi n’agwi!

²⁹Tiki ɗa, ki piyi wala n’aga ki simiŋ ɗa kai, n’aga ki ciŋ ɗa kaalai, ki hiwiyi siki kai

³⁰buri wazagai hanɗa paŋ, ɗai n’e siɗi Alaw kai na warɗi yai hanɗa e piyiŋ wuzaɗi sek sek, amma tiki Epiki a sɗa ɓa jaaki aŋ sini wazagai hanɗa lai.

³¹Ki piyiti te pai n’Alaw ɗa, wazagai hanɗa paŋ ɗa aga a sa siki aŋ beste.

³²Ki hûni kai fara n’agwi, buri a tala arni Epiki pɗem aŋ sitiki pai.

³³Ki wûri wazagaiki edi, ki si faraini edi aŋ like wiiɗi na murgakai, ki zizini guɓa n’a tuura kai, ki tiki godai n’a vada edi kaalai, amai warni fuŋ-n’Alaw mihill a kiɗa woni kai, bumi a lumaŋ kaalai.

³⁴Hlai na godaiku t'aŋ woni ɗa agulku t'aŋ woni lai.

³⁵Ki simni gaini zizini, wuzaki gaini rgi, lampaki gaini afu warni ta ta lai.

³⁶Tiki lai, ki simni maiɗi ɗai n’e ɗa biyi Epin-gezaɗi n’aŋsi miɗi fet na wiini tiki ɗa nɵa, kapai hlai n’a cosi, a ɵiɓa li mini hlai ɗa, e miliɗni edi tar.

³⁷Sleɗ midiɗi ɗai zi sda n’Epin-gezaɗi a niviɗisi karɗi won hlai n’a wayasi. Jre, mu miɗiki: Epin-gezaɗi aga a wa sapani zi sda sini, a miliɗi azumai aŋ simi, ni dama aga a kiɗisi simii ɗa lai.

³⁸Koo ɓa a wayasi duvuk n’arba, koo ɓa gorof n’abai sek, na ɓa a niviɗisi li maini hanɗa ɵa ɗa, ɵeɗ midiɗi.

³⁹Ki ɵini pɗem, na ɓa epini dalam a sɗa fu ler na ɗif zi mihill a halasi woni ɗa, aga a sumna karni, a hinaŋ a co dalamni kai.

⁴⁰Tiki nɵa lai, ki simni gaini zizini, buri Ahini-ɗif aga a wayasi warni ler na ki hiiniŋ kai.

⁴¹Peter a miɗini: Epiɗ-ɗai, seŋ zi siŋka maini hanɗa, ku muɗaŋ na ɗa buriyi tiyi taaha, zaw buriɗi ɗai paŋ ɗi?

⁴²Epiɗ-ɗai a muɗa: Ɗif zi giɗimi wazagai, zi yel n’epin-gezani a pɵa midini, n’a kiɗa a tikaŋ aŋ abai midiɗi ɗaini zi sda kapai a siɗi simiɗi war hlaini ɗa asiya ɗa?

⁴³Sleɗ midini ɗif zi sda na epin-gezani won hlai n’a wayasi ɗa a navaɗsi aŋ za maini nɵa.

⁴⁴Jre, mu miɗiki: Aga a tikaŋ amai midini wazagaini paŋ.

⁴⁵Amma na ɓa ɗif zi sda hanɗa, a muɗa warɗi agulni ɓa: Epin-geza a zi wiyisi tiyina kai, a tika pini a ɵiɓiɗi ɗai zi sda na maɵagai gaiɗi na falakai lai, a tika pini a suma, a ca a siina lai ɗa,

⁴⁶Epin-gezani ɗif zi sda hanɗa aga a wayasi warni mefeŋ n’a hiinaŋ kai, war ler n’a sɗaŋ kaalai. Aga a zini gir abai, a sini buri na wiini gaiɗi nagai n’e ɵini mini Alaw kai ɗa.

⁴⁷Ɗif zi sda a sɗa dirini epin-gezani ya, amma a zizina wala ktai kai, a za wala n’a kaata pini diri hanɗa kaalai ɗa, epin-gezani aga a ɵeɓaŋ viya.

⁴⁸Amma ni n’a sɗa dirini kai, a za wala n’a kiɗa a nava ɵiɓi pini ɗa, ni epin-gezani aga a ɵiɓaŋ viya kai. Ni n’a sa tini viya ɗa, aga a zilba tini viya lai, ni na sda a sa li tini viya ɗa, aga a zilba tini a suwa pra.

⁴⁹Mu kasi midiɗi yai ɗa a afu, mu firiya ɓa a yima amai tiyana,

⁵⁰baptisme ktai aŋ mada n’aga mu navaŋ, aŋ mada guma gara. A zuva ɓa a za wiini ta.

⁵¹Ki hiini ɓa, mu halasi ɗa aŋ kasi ɵeɗ midiɗi yai ɗi? Zaw kai, mu miɗiki, mu kasi ɗa a ɓraw.

⁵²Tiyana par, pakatai na ɗai warɗi ɵim ɗa, aga te ɓurwa, ɗai hu war gal ktai, sulu war gal ktai lai.

⁵³Api aga a faka amai sini ahi, ahini sini api lai, ami siɗi ahiɗi na muni lai, ahi na muni siɗi ami, suwul siɗi munini ahi, munini ahi siɗi suwulɗi.

⁵⁴A miɗiɗi wiiɗi ɗai pra maini nɵa: Hlai na ki tili li ɗugul a rga amai piɗi futi na koskoi par ɗa, tizaw ki miɗi ɓa: Faŋ aga a ɵa, a za ɵa lai,

⁵⁵hlai na ki tili li smer a vuvuwasi war gal n’amai par ɗa, ki miɗi ɓa: Hlai ɗa aga a za afu, a za ɵa lai.

⁵⁶Tiki zi rhai, ki siɗi aŋ miɗi edi midini wazagai na ki ɗa tiliŋ midiɗi yai gaini n’arbani hlai n’amai, amma ki siɗi aŋ miɗi edi midini hlai na girna kai ɗa buri maɗa?

⁵⁷Tiki gaini miɗiki dama lai ki siɗi aŋ hiini kai buri wala n’a na woɗi futini kai ɗa buri maɗa?

⁵⁸Won hlai na ku na hala gaini gawku sini Komanda ɗa, ku paya aŋ toya gaini warɗi futi par, kapai a kuku wuzani ɗif n’a ɗûkliti sariya ɗa kai, kapai ɗif n’a ɗûkliti sariya ɗa a suku tini ɗif zi giɗimiti daŋgai ɗa kai, kapai zi giɗimiti daŋgai a ɵuku warɗi daŋgai kaalai.

⁵⁹Mu muɗuku: Aga ku niya edi kai warɗi par kai, haa ku vurga tumuŋ n’aŋ muduku paŋ, wala ktai maa a hina kai.