Read Mousgoum Lukas 14 Bible Online

Lukas 14 - Mousgoum bible

Lukas 14

¹War mefeŋni Sabbat, a halasi aŋ suma ahani ktai arbaɗi abaiɗi Farisekai, nagai e tiki hangalɗi sini ta.

²Ɗif na azi gaini hitili a nafu mini zaw, Yesu a zilbiɗi ɗai n’e siɗi gadai gara gaiɗi Farisekai lai a muɗa: Gadai na wimu ɗa a sa futi ɓa ku zuula ɗif war Sabbat, zawku zuula kai ɗi?

⁴E bi miɗi liyik, asakal par a yima ɗif zi veglek, a zuulaŋ a tikini pini lai.

⁵Asakal par a miɗini: Arbaki ɗa, ɗif na ahini zaw, ahini garini zaw, a kɵa li war kalaŋ war mefeŋ na wiini Sabbat ɗa, aga a yimaŋsi amai tizaw kai a na ɗi?

⁶E kiɗi e wiyini midini hanɗa kai.

⁷Yesu a muɗa seŋ zi siŋka maini siɗi ɗai n’e yikisi miɗi fet, buri a tiliɗi ɗa, e piyi ɗa a hlai n’amai avut, a miɗiɗi:

⁸Won hlai na ɗif a yukuku li miɗi fet na wiini tiki ɗa, ku hala ku sumna amai avut kai, buri ɓa, ɵa kai ɗa, ɗif na hormani a suwuku a za ɗi.

⁹Nɵa ɗif n’a yikikisi ɗa, a halasi a muɗuku ɓa; hinini balamku wiini ɗif ɗi ɗa, nɵa wiyi na e wiyikusi asakal ɗa aga ku tika siyer.

¹⁰Amma won hlai na e yikuku li miɗi fet ɗa, ku hala ku sumnasi edi asakal par kapai ni n’a yikukusi a halasi li ɗa, aga a muɗuku ɓa: Mariya halasi amai avut sek. Nɵa aga ku nava kol wuzani arɗi nagai n’e ɗa e simi gaiku paŋ.

¹¹Buri nɵa asiya ɗi paŋ n’a kola sini amai aga a hosa azumai, asiya ɗi paŋ n’a hosa sini azumai ɗa aga a kola amai lai.

¹²A miɗini wiini ni n’a yikaŋsi ɗa ɓa: Won hlai na ku da simi n’abai li mini fet ɗa, koo ɓa girvudi, koo ɓa koskoi, ku yikiɗisi mini fet ɗa e ɗi marmakaiku gaiɗi tawalakaiku gaiɗi zagalakaiku gaiɗi ɗai na ɵimaku zi farai ɗa kai, ɵa kai ɗa nagai lai aga e yukuku mini fet kapai ku nava vrakku lai.

¹³Amma won hlai na ku da simi li miɗi fet ɗa, ku yikiɗiɗi ɗa, e ɗi na murgakai, na gaɓaramai, na höyökai gaiɗi na malvanai lai.

¹⁴Sleɗ muduku buri wala n’e vurguŋku gaini aŋ kai, nɵa aga ku nava vrakku war ɵiyi n’amai na wiiɗi na jre ɗikat.

¹⁵Asakal n’a ɵina seŋ hanɗa ya, ktai arbaɗi nagai n’e ɗifu aŋ simi gaini a miɗini: Sleɗ midini ni n’aga a suma warɗi pau na wiini Alaw.

¹⁶A wiyini seŋ a muɗa: Ɗif ktai a da simi n’abai miɗi fet, a yikasi ɗai viya lai,

¹⁷war sarti na wiini simi ɗa, a ɵina ɗifni zi sda aŋ muɗa wiiɗi ɗai n’e yikiɗisi ɗa ɓa: Hilisi paŋ, a zizina li.

¹⁸Amma nagai paŋ maini ɗif ktai ɵa, e tiki piɗi e miɗi ɓa: Aga e kiɗiɗi kai. N'avut a miɗini: Mu wura vuwai kaai, tiyana mu hala na ɗa aŋ talaŋ, za barka yima seŋŋa ɗa.

¹⁹Na zamai a muɗa: Mu wura garakai jaɓ jaɓ ɵim, mu hala fu aŋ tetemaŋ, za barka yima seŋŋa ɗa.

²⁰Na zamai a muɗa: Mu tikiti muniya na ɗa gobi na, mu kiɗa mu halaɗi kai.

²¹Ɗifni zi sda won hlai n’a wayasi ɗa, a miɗini seŋ hanɗa paŋ wiini epin-gezani, nɵa epin-gezani a za hiy, a miɗini wiini ɗifni zi sda: Witaw, hala warni futi n’abakai na war fuŋ n’abai ɗa gaini n’agogoi lai, ku yikiɗisi na murgakai, na geɓeremai, na malvanai, na höyökai lai woni na.

²²Ɗifni zi sda a muɗa: Epin-geza, na ku muɗa gaini ɗa, mu zaŋ ya, hlai a va kai ɗaai.

²³Epin-gezani a miɗini: Hala edi kawye, edi ezini zalagakai lai ku siika miɗi ɗai buri e hilisi kapai dalamɗa a va gaiɗi ɗai.

²⁴Buri mu miɗiki: Nagai na mu yikiɗisi avut ɗa paŋ ɗa, ktai n’arbaɗi n’aga a tika simiɗa mini aŋ kai.

²⁵Firiɗi ɗai viya e tipi pini woɗi futi, a bunda arni duɓani a miɗiɗi:

²⁶Na ɓa ɗif a dara a halasi sa, amma a bula gaw sini epini, zaw emini, siɗi munini, zaw siɗi alini, siɗi tawakaini na maɵagai gaiɗi na falaka, zaw sini suŋfani dama kai ɗa, a kiɗa aŋ za aŋ ɗif zi hitri na wiya kai.

²⁷Asiya ɗi paŋ n’a luba dagrani aŋ halasi pa kai ɗa, a kiɗa a za aŋ ɗif zi hitri na wiya kai.

²⁸Buri ɓa, arbaki ɗa, ɗif n’a dara a rga poriyo n’a sumna azumai aŋ tala gdaɗni haw kai ɗa asiya ɗa? Na ɓa a kiɗa a vadaŋ, zaw a vadaŋ kai ɗi ɗa?

²⁹Kapai won hlai n’a tora eziɗi dilimi li azumai, na ɓa gdaɗni a kiɗa a vada sda kai ɗa, nagai n’e tiliŋ paŋ e zini yewere, e miɗi kai ɓa:

³⁰Ɗif hanɗa a tika pini aŋ rga, amma sda ɗa a ɵa edi gaini kai ɗa kai.

³¹Pai na ɗai pini dubu doogo, n’a dara a hala aŋ hitima gaini pai na ɗai pini dubu caaɓa, n’a sumna azumai aŋ talagdaɗni wuzani hlai kai ɗa, a pai na wata ɗa?

³²Na ɓa, a tala gdaɗni a kiɗa kai ɗa, a ɵina ɗai sini maini won hlai n’aŋsi gaigai par hai aŋ paya ɵeɗ gaini.

³³Nɵa lai, asiya asiya ɗi paŋ n’arbaki, n’a bula edi sini wazagaini n’a na ɗa kai ɗa, a kiɗa a za aŋ ɗif zi hitri na wiya kai.

³⁴Humu ɗa a wala na pɗem, amma na ɓa a ɓa lemni edi li ɗa, aga a bunda pɗem zamai ɗa gaini a maɗa?

³⁵A kiɗa a zina pini afti kir kai, a zina pini zilgit kaalai, e pûkûŋ ɗa edi. Ni na ɵimani zi ɵeŋ a na, a pɗem ɓa a ɵina.