Read Mousgoum Lukas 15 Bible Online

Lukas 15 - Mousgoum bible

Lukas 15

¹Ɗai zi tar gaiɗi na tuwarai e tûûrisi sini aŋ ɵini mini.

²Farisekai gaiɗi ɗai n’e ɗû wazagai ɗa e ŋûriyi e miɗi: A yimiɗi na tuwarai sini a suma gaiɗi lai.

³A miɗiɗi seŋ zi siŋka maini hanɗa, a muɗa: Arbaki ɗa, ɗif na adumaini miya ɗaw, ktai arbani te ɓa edi ta, a hina na doogo doogo ɵeeɗe pi ɵeeɗe ɗa edi war basga, a hala a piyiti na te ɓa edi ɗa, haa a nivitisi kai ɗa asiya ɗa?

⁵Won hlai n’a niviti li, a tikiti amai wulani, a waya aha war dalamni gaini firiyi.

⁶A yikiɗi marmakaini gaiɗi ɗai na ɵimani paŋ a miɗiɗi ɓa: Ki firiyi gaya, buri mu niviti adumiŋa na te ɓa edi zek.

⁷Nɵa lai, mu miɗiki: Firiyi n’abai aga a za war fuŋ-n’Alaw burini ɗif na tuwur ktai n’a bunda payaini gamai a sûwiɗi na doogo doogo ɵeeɗe pi ɵeeɗe na jaaɗi sini bindi na gamai kai ɗa.

⁸Muni, sulai doogo, na ktai arbani par te ɓa ta, te tika afu warni lampa, te doogo hlai edi, te piyiti gaini hangal haa te niviti kai ɗa, te muni na wata ɗa?

⁹Won hlai na te niviti li ɗa, te yikiɗisi marmakaiɗi gaiɗi nagai na ɵimani paŋ ahaɗi, te miɗiɗi ɓa: Ki firiyi gaya buri mu niviti sulai na te ɓa edi zek.

¹⁰Nɵa lai mu miɗiki, firiyi n’abai aga a za wuzaɗi ɗai zi ɵeŋ na war fuŋ-n’Alaw burini ɗif na tuwur na ktai n’a bunda payaini gamai ɗa.

¹¹A muɗa pra: Ɗif ktai alini na maɵagai sulu, n’agwi a miɗini wiini epini nɵa: Apa, ku saŋa galni farai n’a sa aŋ wiya ɗa, api a ɓurwa faraini arbaɗi.

¹³Mefeŋ agwi asakal par, ahini n’agwi a wura wazagaini edi, a tika morkoi midini afti na gaigai, woni a ɓa faraini paŋ edi war vilimi.

¹⁴Won hlai n’a ɓa faraini paŋ edi li, wiyamai n’amai te za midini afti ni ɗa, a bunda, wala n’a sumaŋ maa aŋ kai.

¹⁵A hala sini ɗif ktai na midini afti ni ɗa aŋ paya sda, ɗif a ɵinaŋ edi war basga aŋ giɗima hohoni,

¹⁶a paya futi aŋ va warni gaini wazagai na hoho a sumaŋ ɗa, amma ɗif a siŋni kai.

¹⁷Won hlai na hiinini a wayasi sini li ɗa, a muɗa gaini warni maini nɵa: Ahani apa ɗa, ɗai zi sda simi a sûwiɗi gaini suwai, amma ta woni na dam, wiyamai a fuɗaɗa ɗa maɵa maɵa ɗa?

¹⁸Aga mu hala, mu hala sini apa mu miɗini ɓa: Apa mu za tuwur sini Alaw, suku tuku lai.

¹⁹Mu kiɗa mu yika aŋ ahiku kir kai, yimaŋ maini ktai n’arbaɗi ɗaiku zi sda nɵa.

²⁰A faka amai aŋ hala sini epini, won hlai n’aŋsi warɗi futi par gaigai hai, epini a talaŋ, hiinini-haw a yimaŋ burini, a lawa mini, a kɵa amai wulani, a sisiɓa mini lai.

²¹Ahi a miɗini wiini epini: Apa, mu za tuwur sini Alaw, suku tuku lai, mu kiɗa mu yika aŋ ahiku kir kai.

²²Amma api a miɗiɗi wiiɗi ɗaini zi sda: witaw hili kinisi dawra na pɗem gara ɗa, wiɗni sini, wiini adoŋo tini, harabak ezini lai.

²³Hili, kisi ahi ɵeŋ na nur nur, ki fiɗiŋ, mu lumuɗmu, mu zumu fet.

²⁴Buri ahiya hanɗa a nafu gaini mri su, tiyana a ɵiya ɵiya, a nafu gaini bi ta, tiyana a nava li. E tiki piɗi aŋ zi fet.

²⁵Ahini n’abai ɗa a nasi fu edi warni vuwai, won hlai n’a wayasi edi par, a ŋasi gobi aha sini fuŋ ɗa, a tala a tuwa ɗa, a yama gaini didimi.

²⁶A yika ktai arbaɗi ɗai zi sda a zilbaŋ burini wala n’a za ɗa.

²⁷Ni a miɗini: Tawalku a wayasi aha wai, apuku a fuɗa ahi ɵeŋ na nur nur buri a wayasi sini nga.

²⁸Nɵa a za hiy, a dara a niya aha kai. Epini a niyasi anene mini aŋ siiwaŋ buri a niyaɗi aha.

²⁹Nɵa a wiyini seŋ wiini epini a muɗa: Buza viya mu na zuku sda maini bege ɵa, mu ha amai midini gadaiku duk kai, amma ku saɗaka ahini hek ktai nɵa buri mu firiya gaiɗi mara nɵa duk kai.

³⁰Amma ahiku na aniŋ ɗa, won hlai n’a cosi ɗa, ni n’a ɓa faraiku paŋ edi piɗi zawarai; burini ni ɗa, ku fuɗa ahi ɵeŋ na nur nur su.

³¹Epini a miɗini: Ahiya, ku na gaya kureɗ, wazagaya paŋ ɗa a wiiku,

³²amma na mu zumu fet, mu firiyumu lai na ɗa a futini, buri awalku hanɗa a nafu gaini mri su, tiyana a ɵiya ɵi. A nafu gaini bi ta, tiyana a nava zek.