Read Mousgoum Lukas 16 Bible Online

Lukas 16 - Mousgoum bible

Lukas 16

¹A muɗa siɗi ɗaini zi hitri ɓa: Ɗif zi farai ktai, ɗifni n’abai na midini wazagaini a nafu, amma seŋ a pa sini ɓa a na ɓa wazagai ɗa edi.

²A yikaŋ a miɗini: Mu ɵina labar na meefeŋ muduku koo, zaŋa gaglai midini sda na mu saŋ war tuku ɗa, wuzamu sek ɗa aga ku za sda hanɗa kir kai.

³Abai na midini wazagai a hiina a muɗa: Aga mu za ɗa a maɗa, epiɗgeza a firiya a tikaɗa edi warni sdaɗa par, hirim ɗe gdaŋŋa a ɵaŋ kai, siiwi ɗe a tala siyer.

⁴Yawwa, mu nava hiini n’aga mu za gaini li kiɗi; kapai won hlai n’a wa ɗa li edi war sdaɗa par ɗa, ɗai zamai e yimiɗa siɗi.

⁵Nɵa, a yikiɗi ɗai na tumuɗni epin-gezani aŋ midiɗi ɗa ktai ktai paŋ, a miɗini wiini n’avut: Tumuɗni epiɗgeza aŋ muduku ɗa gama ɗa?

⁶A wiyini seŋ: Tuntuli miya ɗaw na wiini emel, a miɗini: Tika maktuɓ zi tumuŋ ɗa, sumna azumai, ku ɗo ɓa: doogo doogo ɵim.

⁷A miɗini wiini na zamai: Na wiiku gama ɗa? A miɗini: Algama sak miya ɗaw. A miɗini: Tika maktuɓ ɗa, ɗo doogo doogo mitwis.

⁸Epin-gezani abai na midini wazagai na meefeŋ ɗa a kolaŋ buri a za sda maini ɗif zi yel ɵa. Buri ɗai na warɗi yai hanɗa yalakai war sdaɗi na gaiɗi marɗi ɗa e sûwiɗi aliɗi gaglai ɗa.

⁹Ta mu miɗiki ɓa, ki zi marmai gaiɗi ɗai gaini farai na wiiɗi yai hanɗa, kapai won hlai n’a mula li tiki par ɗa, Alaw a kiɗa a yimiki sini war hlai si simni n’a vada kai.

¹⁰Ni n’a kiɗa a giɗima wazagai n’agogoi woɗi futini ɗa, a kiɗa a giɗima n’abakai woɗi futini lai. Amma ni n’a kiɗa a giɗima wazagai n’agogoi woɗi futini kai ɗa, a kiɗa a giɗima wazagai n’abakai woɗi futini kaalai.

¹¹Na ɓa tiki ki ɗa jrekai warni sda na ki ziŋ gaini farai na wiiɗi yai hanɗa kai ɗa, n’aga a siki farai na gaini futini ɗa asiya ɗa?

¹²Na ɓa tiki ki kiɗi aŋ giɗimi wazagai n’a sa gaini si war tiki kai ɗa, n’aga a siki na wiiki mal ɗa asiya ɗa?

¹³Bege n’a sɗa aŋ za sda piɗi epiɗgezakai sulu aŋ kai, aga a bla gaw sini na ktai, a firiya na zamai ɗa. Sla kai ɗa a tapa gaini na ktai a miisa na zamai ɗa. Ki kiɗi aŋ zi aŋ bagakai na wiini Alaw gaini Mamun lai kai.

¹⁴Farisekai n’e diri farai gara e ɵini seŋni paŋ, e yimi seŋni aŋ wala zi dawaŋ.

¹⁵A miɗiɗi: Tiki, ki yiki siki aŋ ɗai na jre kai, amma Alaw a siɗiti t'agul. Wala n’a tala arɗi ɗai kol gara ɗa, arni Alaw a wala na hi-hir.

¹⁶Haa sini mefeŋ na wiini Yohana ta, a suma ɗa a gadai gaini seŋ na wiiɗi ɗai na mini Alaw. Won hlai ni par, labar na pɗem na wiiɗi pai n’Alaw a na ɓaka, ɗif paŋ a ɓurta aŋ niya aha gaini gdaŋ.

¹⁷Hlai n’zamai gaiɗi yai ɗa aga a vada edi, amma wala na ɗef na war gadai na wiini Musus aga a vada edi kai.

¹⁸Asiya ɗi paŋ n’a biditi munini aŋ tikiti na zamai ɗa, a za maɵara; Asiya ɗi paŋ n’a tikiti muni na te badasi pini mafaɗi par ɗa a za maɵara lai.

¹⁹Ɗif ktai a naka a ɗif zi farai, A wa sini ɗa a sapa na faraini abai gaini zi leŋ na gaini futini lai. Mefeŋ paŋ ɗa, aŋ war firiyi, a suma gaini futini lai.

²⁰Ɗif na murga ktai na sini paŋ a wuruk, a nafu mini magalani waŋ, e yikiŋ ɓa: Lasarus.

²¹A firiya ɓa a va warni gaini kolkoɗai n’a yakasi sini tabelni ɗif zi farai ɗa par, amma hirgakai n’arbani hlai yaw ɗa, a halasi a hana ɗa a mini wuruk na sini ɗa.

²²Mefeŋ ktai ɗif na murga a mra, ɗai zi ɵeŋ na war fuŋ-n’Alaw e tikiŋ, e kiŋ e simniŋ ɵimani Abraham war hlai n’amai. Ɗif zi farai ɗa a mra lai, e piŋ.

²³A mala arni edi ɗa, a sɗa sini war hlai zi simni na wiiɗi ɗai zi mri, war gir pra. A tala Abraham edi gaigai par gaini Lasarus ɵimani dam.

²⁴A ɗuula a muɗa: Apa Abraham, ku hiina haw buriya, ku ɵinasi Lasarus aŋ jiba tini arni yem kapai a tikitiɗa midiɗi alsiɗa ta, kapai sa a ɵaɗa, buri mu na sɗa gir arni afu gara.

²⁵Amma Abraham a waya seŋ: Ahiya, hina muduku a kɵa ɓa, tuku ku nivitisi pɗemiku ya midiɗi yai, amma Lasarus ɗa a sɗasi gir viya, tiyana woni na ɗa, ni a nava arai zi pi, amma tuku k’aŋ war gir.

²⁶Pra, waŋ n’abai a na arbamu, kapai a hiniɗi nagai na e diri woni na par e hiliɗi siki sek ɗa kai, na siki par e hilisi siyi sek kaalai.

²⁷Ɗif zi farai a muɗa: Nɵa mu siiwuku, apa, buri ku ɵina Lasarus aha war dalam na wiini apa,

²⁸buri tawalakaya na maɵagai e ɗa ɵim, a hala a za zaida siɗi buri nagai lai e hilisi woni hlai hanɗa kai.

²⁹Abraham a waya seŋ: Musus gaiɗi ɗai na mini Alawe ɗasi arbaɗi, pɗem ɓa e ɵini miɗi.

³⁰Ɗif zi farai a miɗini pra: Apa Abraham, na ɓa ktai arbaɗi ɗai zi mri par a hala siɗi ɗa, aga e bindi payaiɗi gamai.

³¹Abraham a miɗini: Na ɓa e ɵini mini Musus gaiɗi ɗai na mini Alaw kai ɗa, koo ɓa ɗif a ɵiyasi amai arbaɗi zi mri par tekeɗeɗi aga e yimi seŋni kai.