Read Mousgoum Lukas 18 Bible Online

Lukas 18 - Mousgoum bible

Lukas 18

¹A miɗiɗi seŋ zi siŋka maini ktai, buri a hitriɗi ɓa aga e siiwi kûreɗ-kûreɗ, e kiyi kai.

²A muɗa: War fuŋ n’abai ktai, ɗif zi ɗûkliti sariya a nafu, a huna Alaw kai, jaani gaini ɗif kaalai.

³Muni na war greŋ ktai te nafu war fuɗn’abai hanɗa lai, te halasi sini kureɗ te miɗini ɓa: Zna pa war sariya n’arba gaiɗi gawɗa ta.

⁴Azi viya a ɗiya siɗi kai, amma asakal par a hiina a muɗa: Ta ɗa, mu huna kai, jaaɗa gaini ɗif kaalai sme,

⁵amma burini hûwyi na muni hanɗa te na huwyaŋa ɗa, pɗem ɓa mu zitiɗi sariya ɗa ta, kapai siɗi maa ɵa blaŋ yuvai paŋ aŋ kayaɗa mada kir kai.

⁶Epiɗ-ɗai a muɗa: Slini wala na ɗif zi ɗûkliti sariya na jre kai ɗa, a na muɗaŋ ɗa.

⁷Alaw aga a zitiɗi sariya wiiɗi nagai n’a viriɗi, n’e ɗa e ɗûûli amai sini duvuk gaini girvudi paŋ ɗa kai ɗi? Aga a hiniɗi ca aŋ bayai ɗi?

⁸Aga a ziɗi sariya witaw tar. Amma won hlai na Ahini-ɗif aga a halasi ɗa, aga a navasi yimi midiɗi yai tiɓ hek ɗi?

⁹Yesu a muɗa seŋ zi siŋka maini hanɗa siɗi nagai n’e tili siɗi ɓa e ɗa jre gara arni Alaw, n’e miisiɗi na zamai.

¹⁰Ɗai sulu e hili amai warni tempel aŋ siiwi, na ktai ɗa a Farise, ktai ɗa a ɗif zi tar lai.

¹¹Farise ɗa a ɗiya amai zaw a siiwa gaini warni maini hanɗa nɵa: Alaw, mu zuku tese, buri mu na maiɗi ɗai na gaŋ ɗa nɵa kai, n’e hili wala, na jrekai kai, na maɵarakai, zaw maini ɗif hanɗa nɵa kai.

¹²Mu tika say azi sulu war kosku, mu sa doogoni wazagaiɗa paŋ edi lai.

¹³Ɗif zi tar ɗa, ni a ɗiyasi edi gaigai par, a dara a yima arni amai war hlai n’amai ɗa kai, amma a ɵawa tini didikni a muɗa: Alaw, hiina haw buriya ta na tuwur gara ɗa.

¹⁴Nɵa mu miɗiki: Ɗif hanɗa, a waya aha warni dalamni sek ɗa, a za aŋ ɗif na jre ta a suwa ɗif na Farise ɗa. Buri asiya ɗi paŋ na kola sini amai ɗa aga a hosa azumai, n’a hosa sini azumai ɗa aga akola amai.

¹⁵Ɗai e kiɗinisi aliyagoi n’agogoi gaiɗi akoɗokokai paŋ kapaia a tika tini midiɗi aŋ ɓikiɗi, ɗaini zi hitri won hlai n’e tili hanɗa e ɓiriɗi.

¹⁶Amma Yesu a sa miɗi buri e kiɗinisi, a muɗa: Hiniɗi aliyagoi n’agogoi e hilisi sa, ki ɗiliɗi kai, buri pai n’Alaw te wiiɗi ɗai na maiɗi nagai nɵa ɗa.

¹⁷Jre mu miɗiki: Asiya ɗi paŋ n’aga a yimiti pai n’Alaw maini Ahiyagwi n’agwi ɵa kai ɗa, aga a niya warɗi kai zaŋ.

¹⁸Ɗif n’abai ktai a zilbaŋ a muɗa: Api zihitri na pɗem, aga mu za ɗa a maɗa, kapai mu nava suŋfa n’a vada kai ɗa?

¹⁹Yesu a miɗini: Ku yikaɗa na pɗem buri maɗa? Ɗif na pɗem aŋ kai, sai Alaw ktai.

²⁰Ku sɗa seŋ zi gadai n’a muɗa ɓa: Ku za maɵara kai, ku fuɗa ɗif kai, ku hala wala kai, ku muɗa zaida z'eles kai, apuku gaiɗi amuku ku kûliɗi amai lai ɗa, ku sɗaŋ ya ɗi?

²¹A waya seŋ a muɗa: Mu zaŋ warni gawlaɗa par.

²²Won hlai na Yesu a ɵina hanɗa a miɗini: Wala a hina muku ktai pal, hala ku wura wazagaiku paŋ edi, ku ɓirwiɗi faraini wiiɗi na murgakai, nɵa aga ku nava godai amai warni fuŋ-n’Alaw, asakal par ku halasi ku tapasi pa.

²³Won hlai n’a ɵina hanɗa, a kwima gara buri faraini a nafu abai gara.

²⁴Won hlai na Yesu a talaŋ gaini kwimi a muɗa: A gir gara buriɗi ɗai zi farai aŋ niyi warɗi pai n’Alaw.

²⁵Buri ɓa niyi na war baŋani lepre ɗa a wala zi gir burini ɵigini, amma niyini ɗif zi farai warɗi pai n’Alaw ɗa a wala zi gir a suwa pra.

²⁶Nagai n’e ɗa e ziɓiri seŋni ɗa e miɗi: Na ɓa ɵa ɗa aga a kora ɗa asiya ɗa?

²⁷Yesu a wiyiɗi seŋ: Wala n’a za gaini ɗif kai ɗa, Alaw a kiɗa a zaŋ.

²⁸Peter a muɗa: Tiyi ɗa, mi hinisi wazagaiyi paŋ edi aŋ tipi puku.

²⁹Yesu a miɗiɗi: Jre mu miɗiki, ɗif a hinasi dalamni, zaw munini, zaw tawalakaini, zaw tamaini, zaw alini edi buriɗi pai n’Alaw,

³⁰n’aga a nava viya a suwa warni mefeŋ na girna kai ɗa aŋ kai, war mefeŋ na wuzamu ɗa a suŋfa n’a vada kai lai.

³¹A yikiɗi na doogo pi sulu sini a miɗiɗi: Mu ɗuma hulumu amai a Yeruzalem, wala paŋ na ɗai na mini Alaw e ɗûŋ midini Ahini-ɗif paŋ ɗa aga a va amai.

³²Buri aga a sa edi war tiɗi pinzibaɗi ɗai na kdai, aga e zini yewere, aga e zini gir, aga e pûrfini teenek sini,

³³aga e ɵiɓiŋ gaini daɓala, asakal par aga e fiɗiŋ edi, amma war mefeŋ n’ag'aŋ hu ɗa, aga a ɵiyasi amai.

³⁴Amma e ɵini seŋ n’a muɗaŋ ɗa kai, buri ɓa ezini a nafu wuzani arɗi gaini ŋûyi cok, e siɗi wala na Yesu a muɗa midini kai.

³⁵Won hlai n’a halasi gobi siɗi Yeriko, ɗif ktai na melveŋ a nafu ɵimani futi dam aŋ siiwa.

³⁶Won hlai n’a ɵina vugumni eziɗi ɗai n’e ɗa vigi ɗa, a zilba ɓa: A za na ɗa a maɗa?

³⁷Ɗai e wiyini seŋ: A vuga na ɗa a Yesu na Nazaret par ɗa.

³⁸A ɗuula a muɗa: Yesu, tuku na war pinzibani David, ku hiina haw buriya.

³⁹Nagai n’e ɗa edi avut ɗa, e ɓiriŋ kapai a ɓa, amma a ɗuula gaini gdaɗni a suwa pra a muɗa: Tuku na war pinzibani David, ku hiina haw buriya.

⁴⁰Yesu a ɗiya zaw, a sa miɗi buri e kiŋnisi, won hlai n’a cosi sini gobi a zilbaŋ a muɗa:

⁴¹ku dara ɓa mu za suku ɗa a ma ɗa? A waya seŋ a muɗa: Epiɗ-ɗai, mu firiya ɓa mu tala.

⁴²Yesu a miɗini: Arku ɗa a mala edi, yimiku ɗa a zuuluku li.

⁴³Tizaw tar arni a mala edi, a hala pini Yesu, a kola Alaw lai. Ɗai paŋ hlai n’e tili hanɗa e tiki piɗi e kûli Alaw lai.