Read Mousgoum Lukas 19 Bible Online

Lukas 19 - Mousgoum bible

Lukas 19

¹Yesu a niya war Yeriko, a vuga warni fuŋ n’abai ɗa ɗaw.

²Ɗif ktai, yikini Sakewus, a abaiɗi ɗai zi tar, faraini viya gara lai.

³A paya aŋ tala Yesu, amma burini firiɗi ɗai, a kiɗa a talaŋ kai buri a wula gulai.

⁴Alawa edi avut, a niya amai sini luwuŋ Sikomor buri a talaŋ, buri aga a vugasi woni ɗaw.

⁵Won hlai na Yesu a co woni hlai hanɗa, a tala arni amai a miɗini: Sakewus, niyasi azumai witaw, girna sai mu yiva ahaku.

⁶Sakewus a niyasi azumai witaw aŋ yimaŋ sini gaini firiyi.

⁷Won hlai n’e tili hanɗa, ɗai paŋ e ŋûriyi: A hala a sumna ahani ɗif na tuwur.

⁸Amma Sakewus a fakasi amai a miɗini wiini Epiɗ-ɗai: Epiɗ-ɗai, galni faraiŋa ɗa, mu siŋɗi wiiɗi na murgakai, na ɓa mu tika walani ɗif li gaini gdaŋ ɗa, mu wiyiŋni ɵa ta ta azi puɗu.

⁹Yesu a miɗini: Girna kûri a niyasi li warni dalam hanɗa, buri ni a na warni pinzibani Abraham lai.

¹⁰Ahini-ɗif a halasi aŋ paya, aŋ kurɗa wala n’a ɓa edi.

¹¹Won hlai n’e ɗa ziɓiri seŋ hanɗa, a muɗa seŋ zi siŋka maini zamai ktai pra, buri ɓa a nafu gobi gaiɗi Yeruzalem, ɗai e hiini ɓa, Alaw aga a siŋkiɗi paini edi arbaɗi.

¹²Won hlai ni tizaw, a miɗiɗi maini nɵa: Ɗif ktai na war pinzibaɗi pai a hala midini afti na gaigai buri e tikiŋ aŋ pai midini aftini, kapai asakal par a wayasi lai.

¹³A yika ɗaini zi sda doogo, a siɗi sulai zi or doogo lai a miɗiɗi: Ki cikili gaini haa sini mefeŋ na mu wayasi ɗa ta.

¹⁴Amma ɗai na midini aftini ɗa e diri sini kai, e ɵini ɗai pini par aŋ miɗini wiini ni n’a tikaŋ aŋ pai ɗa ɓa: Tiyi mi firiyi ɓa ɗif hanɗa a suma pai midiyi kai.

¹⁵Won hlai n’e tikiŋsi aŋ pai ta ɗa, a wayasi, a yikiɗi ɗaini zi sda n’a siɗi farai ɗa kapai e miɗini midini sdani n’e ziŋ ɗa.

¹⁶N'avut a halasi wuzani a muɗa: Epin-geza, sulaiku zi or ɗa te wayasi piɗi doogo.

¹⁷A miɗini, pɗem gara, tuku ku ɗif zi sda na pɗem, tuku ku kiɗa aŋ za sda gaini wala n’agwi, tiyana aga ku ɗa midini fuŋ n’abakai doogo.

¹⁸N'ag'aŋ sulu a halasi a muɗa: Epin-geza, sulaiku te wa piɗi ɵim.

¹⁹A miɗini: Tuku nɵa lai, aga ku ɗa midini fuŋ n’abakai ɵim.

²⁰Zamai ktai a halasi a muɗa: Epin-geza, sulaiku zi or t'aŋ na, mu giɗimiti gaini fiɗi warni sapa tka.

²¹Mu hunuku gara, buri ɓa tuku ku ɗif na maswar, hlai na ku tika wala warni kai ɗa maa, ku tikasi woni par, na ku suuɗaŋ kai ɗa, ku haɗaŋ lai.

²²A miɗini: Aga mu zutuku sariya ɗa pini miɗiku tuku dama, tuku ku ɗif zi sda na meefeŋ, ku sɗa ya ɓa, ta mu ɗif na maswar, ku sɗa ɓa hlai na mu tika wala woni kai maa mu tikasi woni par, na mu suuɗaŋ kai maa mu haɗaŋ lai,

²³nɵa, ku sa faraiŋa edi tiɗi ɗai zi sakala kai ɗa buri maɗa? Mu wayasi an na ta ɗa, mu navaŋ fu na gaini riba pini.

²⁴Asakal par a miɗiɗi wiiɗi nagai n’e ɗa ɵimani ɗa: Tikiti sulai zi or ɗa edi tini par, sitini wiini ni na wiini doogo ɗa.

²⁵E miɗini: Wiini a na doogo ɗa koo.

²⁶Mu miɗiki: Ni na wiini a na ɗa, aga a sa sini pra. Na wiini aŋ kai ɗa, na tini par maa aga a yima edi.

²⁷Gawŋa n’e firiyi ɓa, mu suma pai midiɗi kai ɗa, kiɗisi, ɵi wulaɗi azumai wuzani ara na.

²⁸Asakal n’a muɗa maini hanɗa ɵa ya, a hala wuzani amai a Yeruzalem sek.

²⁹Won hlai n’a ŋasi gobi gaiɗi Betfage, gaiɗi Betaniya lai siɗi huwuŋ na yikiɗi ɓa: Huwuŋ zi luwuŋ olive ɗa, Yesu a ɵiniɗi ɗaini zi hitri sulu wuzani,

³⁰A muɗa: Ki hili warni fuŋ n’aŋ wuzaki na ɗa, ki cû li woni ɗa, aga ki nivi ahini ablehö gaini nigi ɓak, na ɗif a sumna ka midini duk kai, piliŋsi, kiŋsi.

³¹Na ɓa, ɗif a zilbiki li ɓa, ki piliŋ amai buri maɗi ɗa? Ki miɗini ɓa: Epiɗ-ɗai hazani aŋ gaini.

³²Nagai n’a ɵiniɗi e hili, e nivi wazagai maini na Ni a miɗiŋɗi nɵa.

³³Won hlai n’e ɗa pili ahini ablehö amai ɗa, tamaini e miɗiɗi: Ki pili ahini ablehö ɗa amai buri maɗa?

³⁴Nagai e wiyi seŋ e miɗi: Epiɗ-ɗai, hazani aŋ gaini.

³⁵E kiŋnisi wiini Yesu, e biri sapaɗi duɓani, e tiki Yesu amai midini.

³⁶Won hlai n’a na hala wuzani sek, ɗai e biri sapaɗi azumai midini afti.

³⁷Won hlai n’a torosi gobi gaini hlai n’e niyisi azumai midiɗi huwuŋ zi luwuŋ olive par warni ɗa, firiɗi ɗai zi hitri paŋ e tiki piɗi e kûli Alaw burini hiila n’abakai paŋ na e tiliŋ.

³⁸E miɗi: Kol sini Ni n’a na halasi, n’a pai war yikini Epiɗ-ɗai, ɵeɗ war hlai n’amai, abai war hlai na haa amai lai.

³⁹Farisekai zamai arbaɗi firiɗi ɗai par e miɗini: Api zi hitri, ɓiriɗi ɗaiku zi hitri ɗa.

⁴⁰Yesu a waya seŋ a muɗa: Koo ɓa nagai e bi ɓa ɗi, ali-fuŋ ɗa aga a ɗuula.

⁴¹Won hlai n’a ŋasi gobi, a tala fuŋ n’abai ɗa a tuwa midini, a muɗa:

⁴²Na ɓa, tuku, war mefeŋ ni ku sɗa piyini ɵeɗ ya ɗa! Amma tiyana ɗa aŋ gaini ŋûyi arku cok.

⁴³Buri mefeŋ aga a gizi muduku, na gawku aga e gunuku azumai gaini ɵaɓ, aga e pirɵuku war gal paŋ par,

⁴⁴aga e siriku edi, tuku gaiɗi ɗai na warku paŋ, aga e hini ahi-fuŋ ktai amai midini maini kai, buri ku sɗa mefeŋ n’Alaw a luwuku ɗuwal warni ɗa kai.

⁴⁵Won hlai n’a niya amlai warni tempel ɗa, a tika pini aŋ birgiɗi ɗai zi sakala.

⁴⁶A miɗiɗi: Aŋ gaini ɗû maini nɵa: Dalamŋa ɗa aga a za aŋ dalam n’e siiwi woni, amma tiki ki bindiŋ aŋ hlai zi simni na wiiɗi gorɓolokai.

⁴⁷A hitra mefeŋ paŋ amlai warni tempel, paakai n’abakai zi ɓaka gaiɗi ɗai zi ɗû wazagai, gaiɗi n’abakai n’arbaɗi ɗai lai, e piyi aŋ fiɗiŋ edi.

⁴⁸Amma e siɗi wala n’e ziŋ ɗa kai, buri ɗai paŋ e firiyi e ɵini seŋ na mini par.