Read Mousgoum Lukas 2 Bible Online

Lukas 2 - Mousgoum bible

Lukas 2

¹War mefeŋ ni ɗa, miɗi a halasi sini Sezar Ogustus par buri e piɵiɗi ɗai na midiɗi yai ɗa paŋ,

²Piɵi n’avut hanɗa, a za woni hlai na Kiriniyus a na aŋ lawaŋ war Siriya.

³Ɗai paŋ e hili mini pɵi hanɗa, asiya asiya paŋ war fuŋni n’abai n’a wa woni, a wa woni.

⁴Yosef lai a halasi a Galileya par war fuŋni n’abai na Nazaret aŋ hala amai a Yudia war fuŋ n’abai na wiini David, na yikini ɓa: Betlehem, buri ni a na war pinzibani David lai.

⁵A hala kapai yikini a ɗo azumai gaiɗi Maria, munini n’a giɓiti ɗa, na te nafu aŋ ziya.

⁶Won hlai n’e ɗa aŋ biyi ɗa, sartiɗi zi pûkû a cosi,

⁷Te wa ahiɗi n’avut, te faadaŋ war sapa, te fanaŋ warni hlai n’e si simi mini farai woni, buri dalam na buri morkokai n’e simni woni aŋ kai.

⁸Ɗai si giɗimi farai e ɗifu midini afti hanɗa lai, nagai e fini ɗa edi war basga aŋ giɗimi faraiɗi duvuk duvuk.

⁹Ɗif zi ɵeŋ na war fuŋ-n’Alaw na wiini Epiɗ-ɗai a ɗiya wuzaɗi zaw, abai na wiini Epiɗ-ɗai, te ŋala, woni hlai n’e ɗa woni gaini na ɵimani paŋ, nagai e hûni gara.

¹⁰Amma ɗif zi ɵeŋ na war fuŋ-n’Alaw a miɗiɗi: Ki hûni kai, buri mu kikisi ɗa a labar na pɗem na firiyi abai pini, n’aga a za siɗi ɗaiki paŋ.

¹¹Girna, warni fuŋ n’abai na wiini David, ɗif zi kûri a wa li buriki, hanɗa a Kristu Epiɗ-ɗai.

¹²Wala n’aga a siŋkiŋki ɗa a hanɗa: Aga ki nivi arwagwi gaini fiɗi gaini fini warni hlai n’e si simi wiini farai woni.

¹³War hlai ni tizaw, firi n’abai na wiiɗi ɗai zi ɵeŋ na war fuŋ-n’Alaw par e tipi sini ɗif zi ɵeŋ na war fuŋ-n’Alaw, e kûli Alaw e miɗi:

¹⁴Kol sini Alaw warni Hlai n’Amai azumai midini afti ɗa, Sleɗ midiɗi ɗai n’a diriɗi gara ɗa lai.

¹⁵Won hlai na ɗai zi ɵeŋ na warni fuŋ-n’Alaw e hiniɗi, e wiyi amai warni fuŋ-n’Alaw li, ɗai zi giɗimi e miɗi arbaɗi marɗi: Hulumu a Betlehem tiyana, aŋ tulumu wala n’a za ɗa, wala n’EPIƊ-ƊAI a suŋkuŋmu armu ɗa,

¹⁶E hili witaw, e gi woni, e niviti Mariya gaini Yosef gaini arwagwi gaini fini warni hlai n’e si simi wiini farai warni woni ɗa.

¹⁷Won hlai n’e tili arwagwi ɗa, nagai e miɗiɗi seŋ na e miɗiŋɗisi burini arwagwi hanɗa.

¹⁸Nagai paŋ n’e ɵini hanɗa e bindi hiyak burini wala na ɗai zi giɗimi farai e miɗiŋ ɗa.

¹⁹Amma Mariya te yima seŋ hanɗa paŋ, te hiina midini warɗi agulɗi.

²⁰Ɗai zi giɗimi farai ɗa e wiyi, e si kol sini Alaw, e kûliŋ gaini yama lai, buri wazagai paŋ n’e ɵiniŋ, n’e tiliŋ lai, maini n’a muɗasi siɗi ɗa nɵa.

²¹Won hlai na mefeŋ mitwis a vada li, hlai n’e diri e ɵini gûrgle wiini arwagwi, e sini yiki ɓa: Yesu. Yiki na ɗif zi ɵeŋ na war fuŋ-n’Alaw a siŋni, hlai n’emini maa te tika felni kai hai.

²²Won hlai na mefeŋ na wiini zi n’edi hilu na wiiɗi Mariya gaini Yosef a cosi li, pini gadai na wiini Musus a za li ɗa, e hili gaini Yesu gaini Yesu a Yeruzalem buri e kiŋ wuzani Epiɗ-ɗai.

²³Maini n’aŋ gaini ɗû war seŋ zi gadai na wiini Epiɗ-ɗai nɵa, ahi na wus paŋ n’emini te waŋ avut aga a sa edi aŋ wiini Epiɗ-ɗai.

²⁴Aŋ zi ɓaka gaini muguɵuwi sulu, zaw dere sulu, pini wala n’a muɗa war gadai na wiini Epiɗ-ɗai ɗa.

²⁵Ɗif ktai a nafu a Yeruzalem yikini Simeyon, ɗif hanɗa jre gara, a huna Alaw lai, a nafu aŋ baya n’Alaw aga a kûrɗiɗi Izrayel edi ɗa, seze sɗik a nafu midini lai.

²⁶Alaw a zini zaida gaini Seze sɗik ya ɓa aga a tala mri kai, haa a tala Kristu na wiini Epiɗ-ɗai gaini arni.

²⁷Seze a hogoŋsi amlai warni tempel, won hlai ni tamaini akoɗokoi Yesu e kiŋsi amlai buri e zi sini gaini pini de na wiini gadai zi ɗû.

²⁸Simeyon a tikaŋ amai war tini a kola Alaw a muɗa:

²⁹Tiyana ɗa, Epin-geza, ku hina begeku a hala edi warɗi yai par gaini ɵeɗ pini seŋku

³⁰buri ara a tala kûri na wiiku li,

³¹na tuku ku zizinaŋ wuzani arɗi ɗai paŋ;

³²a gaglai n’a siŋka wala zi ŋoyai edi siɗi ɗai na kadai, kol na wiiɗi Izrayel na wiiku lai.

³³Epini gaiɗi emini e bindi hiyak burini wazagai na ɗai e ɗa miɗiŋ midini ɗa.

³⁴Simeyon a ɓikiɗi a muɗa siɗi Mariya n’emini: Arwagwi hanɗa a na burini kɵi-n’azumai gaini fiki-n’amai na wiiɗi ɗai viya war Izrayel, a wala zi siŋki n’aga a glasi sispai.

³⁵Tuku lai, kaɵkar aga a bula suŋfaɗi-agulku, nɵa hiini na warɗi agulɗi ɗai viya aga a siŋkasi edi.

³⁶Muni na mini Alaw ktai te nafu lai, yikiɗi ɓa: Anna, t'ahini Fanuwel, war pinzibani Azer, te za amai gara ta, e tikiti ɗaw ɗa, te sumna gaini mafaɗi buza muguzak.

³⁷Asakal hanɗa te hina warni greŋ haa te za buza doogo doogo mitwis pi puɗu, te ɓurwa gaini tempel kai zaŋ, te hala warni hlai zi siiwa duvuk gaini girvudi paŋ te tika sai lai, te siiwa lai.

³⁸Na lai te cosi warni sarti ni ɗa te kola Alaw, te muɗa gaini arwagwi wiiɗi nagai paŋ n’e ɗa biyi pili n’edi na wiiɗi Yeruzalem ɗa.

³⁹Won hlai n’e zi wazagai na gadai na wiini Epiɗ-ɗai a muɗa midini paŋ li ɗa, e wiyi a Galileya war fuŋɗi n’abai na yikini ɓa: Nazsaret.

⁴⁰Amma arwwagwi a wula amai sek sek, a bunda gdaŋ lai, a va gaini yel, yum na wiini Alaw a sumna midini lai.

⁴¹Buza buza paŋ ɗa, tamaini e a Yeruzalem miɗi fet na wiini Paska.

⁴²Won hlai na Yesu a za buza doogo pi sulu ɗa, e hili amai woni maini n’e ɗa ziŋ mini fet kûreɗ-kûreɗ nɵa;

⁴³Won hlai na mefeŋɗi fet a vada li, e ɗa wiyisi aha ɗa, arwagwi Yesu a hinasika a Yeruzalem, amma tamaini e siɗi ɵa kai.

⁴⁴Nagai e hiini ɓa a na gaiɗi marni zi morkoi ɗa; e hili haa yuvai dam, e tiki piɗi aŋ piyiŋ arbaɗi zagalakaiɗi gaiɗi nagai n’e siɗiɗi ɗa,

⁴⁵amma e niviŋ kai, e wiyisi a Yeruzalem aŋ piyiŋ.

⁴⁶War mefeŋ n’ag'aŋ hu ɗa, e niviŋsi amlai warni tempel arbaɗi n’abakai zi hitri gadai ɗa dam, a zibiriɗi lai, a zilbiɗi lai.

⁴⁷Nagai n’e ɵini seŋni paŋ ɗa, e bindi hiyak buri yelni gaini wiyini seŋ n’a siŋɗi ɗa.

⁴⁸Won hlai n’e tiliŋ, e bindi hiyak, emini te miɗini: Ahiya, ku ziyi ɵa ɗa a ma ɗa? Ta gaini apuku mi piyuku na ɗa gaini hunai gara.

⁴⁹A waya seŋ a miɗiɗi: Ki piyiŋa buri ma ɗa? Ki siɗi ɓa m’aŋ gaini sda ta war Dalam na wiini apa, ki siɗi hanɗa kai ɗi?

⁵⁰Amma e ɵini ezini n’a miɗiŋɗi kai.

⁵¹Asakal par, a fakasi gaiɗi, e hilisi a Nazaret, a gada piɗi gara. Emini te ŋoya seŋ hanɗa warɗi agulɗi.

⁵²Yesu a wula amai wuzani warni yel, warni wili ɗa, a nava yum gara arni Alaw, arɗi ɗai lai.