Read Mousgoum Lukas 20 Bible Online

Lukas 20 - Mousgoum bible

Lukas 20

¹Mefeŋ ktai, Yesu won hlai n’a na hitriɗi ɗai warni tempel, a na muɗa labar na pɗem edi lai ɗa, paakai n’abakai zi ɓaka gaiɗi ɗai n’e ɗû wazagai, gaiɗi n’abakai n’arbaɗi ɗai e liɓisi,

²e zilbiŋ e miɗi: Miɗiyi haw: Ku za na ɗa gaini spak na maɵa ɗa? Na a suku spak hanɗa asiya ɗa?

³A waya seŋ a muɗa: Ta lai mu dara mu zilbiki ktai, wiyiɗa seŋ.

⁴Baptisme na wiini Yohana ɗa, a na sini Alaw par, zaw siɗi ɗai par ɗi?

⁵E kitiŋ arbaɗi e miɗi: Na ɓa, mu wuyumu seŋ li ɓa: Sini Alaw par ɗa; aga a muɗa ɓa, ki yimi warni kai buri maɗa?

⁶Na ɓa, mu wuyumu seŋ li ɓa: Siɗi ɗai par ɗa; ɗai paŋ aga e fuɗumu edi, buri e yimi jre ɓa, Yohana ɗa a ɗif na mini Alaw.

⁷Nɵa e wiyi seŋ ɓa: E siɗi hlai n’a sasi woni par kai.

⁸Nɵa Yesu a miɗiɗi: Ta lai mu sɗa spak na mu za gaini na ɗa kaalai.

⁹A tika pini aŋ muɗa seŋ zi siŋka maini hanɗa siɗi ɗai maini nɵa: Ɗif ktai a pa luwuŋ zi viŋ war zardeɗni, A zag'aŋ edi tiɗi ɗai zi sda, a hala wiini a morkoi midini afti na gaigai.

¹⁰Won hlai na mefeŋni luwuŋ zi wi a cosi li ɗa, a ɵina ɗif zi sda ktai siɗi ɗai n’e zigi zardeɗni, e sinisi galni alini luwuŋ zi vin n’a na aŋ wiini ɗa. Ɗai zi zigi zardeŋ ɗa, e ɵiɓiŋ haa e wiyiŋsi kadai blaŋ.

¹¹A ɵina ɗif zi sda na zamai pra, e ɵiɓiŋ, e tirkiŋ haa, e wiyiŋsi kadai blaŋ.

¹²A ɵina ɗif zi sda n’ag'aŋ hu, e zini wuruk, e birgiŋsi lai.

¹³Epin-gezani zardeŋ zi luwuŋ zi vin ɗa, a hiina a muɗa: Kapai mu za ɗa a maɗa? Aga mu ɵina ahiya na mu daraŋ siɗi, ablaŋtaŋkai aga e sini hormo ɗi ɗa.

¹⁴Amma won na ɗai zi zigi zardeŋ zi luwuŋ zi vin, e tiliŋ a na halasi ɗa, e kiti seŋ arbaɗi e miɗi: Hanɗa a ni n’a mula bulum ɗa, fuɗuɗmu edi kapai bulum ɗa a hina aŋ wimu.

¹⁵E birgiŋ edi war zardeŋ zi luwuŋ zi vin ɗa par, e fiɗiŋ edi. Epin-gezani zardeŋ zi luwuŋ zi vin ɗa aga a ziɗi maɵa maɵa ɗa?

¹⁶Aga a vidiɗi ɗai zi zigi zardeŋ zi luwuŋ zi vin hanɗa edi. Aga a sa zardeɗni tiɗi ɗai zamai. Won hlai n’e ɵini hanɗa, e miɗi: Kaai, aga a sɗa aŋ za maini hanɗa ɵa kai.

¹⁷A tiliɗi a muɗa: Seŋ n’a ɗo ɓa: Ahi fuŋ na ɗai zi rgi dalam e biliŋ edi ɗa, a bunda aŋ ahi-fuŋ na gaini futini n’a tika edi war koŋni dalam ɗa.

¹⁸Asiya ɗi paŋ n’a kɵa li midini ahi-fuŋ hanɗa, aga a haɗa, ni na ahi-fuŋ hanɗa a kɵa li midini ɗa, aga a saraŋ edi.

¹⁹War sarti ni ɗa, ɗai zi ɗû wazagai gaiɗi paakai n’abakai zi ɓaka, e piyiŋ aŋ yimiŋ, amma e hûniɗi ɗai ɗa ta, e siɗi ya ɓa a muɗa seŋ zi siŋka maini na ɗa buriɗi nagai.

²⁰E tiki piɗi aŋ tiki hangalɗi sini, e ɵini ɗai zamai n’e zi siɗi maiɗi ɗai na jre ɵa kapai e nivi seŋ ktai mini par n’e yimiŋ gaini kapai e siɗi tiɗi n’abakai gaini Lawan.

²¹Ɗai hanɗa e zilbiŋ e miɗi: Api zi hitri, tiyi mi siɗi ɓa, tuku ku muɗa pɗem, ku hitra pɗem lai. Ku za ɓraw arɗi ɗai kai, amma ku hitriti futi na wiini Alaw war jre.

²²Pini gadai ɗa, mi kiɗi mi si tar sini Sezar, zaw mi si kai ɗi?

²³Won hlai na Yesu a sɗa yelɗi ɓa, a wiyiɗi seŋ a muɗa: Kiŋasi denariyus ktai haw,

²⁴foto na midini gaini ɗû n’aŋ midini ɗa, a wiini asiya ɗa? E wiyi seŋ, e miɗini: A wiini Sezar.

²⁵Nɵa a miɗiɗi: Ki sini walani Sezar wiini Sezar, na wiini Alaw wiini Alaw lai.

²⁶E kiɗi aŋ nivi seŋ n’e yimiŋ gaini war mini par wuzaɗi ɗai kai, e bindi hiyak burini seŋ n’a wiyiɗɗi ɗa, e bi miɗi liyik.

²⁷Zamai arbaɗi Sadusekai n’e yimi ɓa ɵiyi n’amai aŋ kai ɗa, e hilisi sini Yesu e zilbiŋ, e miɗi:

²⁸Api zi hitri, Musus a ɗo siyi maini nɵa: Na ɓa ɗif a mra, a hinitika munini li, seyemni kai ɗa, tawalni a yimiti muni ɗa kapai a za seyem wiini tawalni n’a mra ɗa.

²⁹Nɵa, tawalakai e ɗifu muguzak, n’abai ɗa a tikiti muni ɗaw, a mra ɗa a hina seyem kai.

³⁰N'aga wulani a tikiti,

³¹n’ag'aŋ hu a tikiti pra, haa na muguzak paŋ e tikiti paŋ, e mri e hini ka seyem kaalai.

³²Asakal par, muni te mra lai.

³³War ɵiyi n’amai ɗa, aga te za ɗa aŋ munini asiya ɗa, buri nagai muguzak paŋ e tikiti aŋ muniɗi paŋ.

³⁴Yesu a waya seŋ a miɗiɗi: Falakai gaiɗi maɵagai na warɗi yai hanɗa e tiki marɗi,

³⁵nagai n’e kiɗi aŋ niyi warɗi yai na t'aŋ wuzamu war ɵiyi n’amai n’arbaɗi zi mri par ɗa, nagai aga e tiki falakai kaalai, e tiki maɵagai kaalai.

³⁶E kiɗi e mri zamai kir kai, buri e ɗa kal kal maiɗi ɗai zi ɵeŋ na war fuŋ-n’Alaw nɵa, nagai e ɗi alini Alaw buri a ɵiyiɗisi amai war mri par ya.

³⁷Buri ɵiyi na ɗai zi mri aga e ɵiyisi amai ɗa, hanɗa a wala na Musus a muɗa edi midini, won hlai n’a muɗa midini luwuŋ zi hedek ɗa a yika Epiɗ-ɗai ɓa a Alaw na wiini Abraham, Alaw na wiini Isaak, Alaw na wiini Yakob lai.

³⁸Ni ɗa a Alaw na wiiɗi zi mri kai, amma Alaw na wiiɗi na karɗi, buri nagai na wiini ɗa e ɗa karɗi.

³⁹Zamai arbaɗi ɗai n’e ɗû wazagai e wiyi seŋ e miɗi: Api zi hitri, ku waya seŋ pɗem gara.

⁴⁰E kiɗi aŋ zilbiŋ midini seŋ zamai kai.

⁴¹A miɗiɗi: Mu kuɗumu aŋ miɗi ɓa: Kristu a ahini David ɗa, maɵa maɵa ɗa?

⁴²David gaini midini dama a muɗa war maktuɓ zi yama maini nɵa: Epiɗ-ɗai a muɗa sini Epɗ-ɗaɗa ɓa: Ku sumnasi ɵima warni hlai zi hormo na wiya,

⁴³haa mu bindiɗi gawku aŋ ɓok na ku ha amai sek midini.

⁴⁴Na ɓa Ɗavid a yikaŋ ɓa a Epiɗ-ɗai ɗa, a kiɗa aŋ za ɓa a ahini maɵa maɵa ɗa?

⁴⁵Won hlai na ɗai paŋ e ɗa ziɓiri ɗa, a miɗiɗi wiiɗi ɗaini zi hitri:

⁴⁶Ki zi hangal gaiɗi ɗai n’e ɗû wazagai ɗa, e firiyi e piyi ɗa gaini sapa na mogokai, kapai e siŋki edi ɓa e ɗi n’abakai, e diri ɓa ɗai e ɵiɓiɗi wuti warni hlai na ɗai e tipi woni ta ta ɗa, e firiyi ɓa amlai warni sinagogne ɗa, e simni ɗa amai avut, sini simi ɗa e simni woni hlai na wiiɗi ɗai n’abakai lai.

⁴⁷E simi wazagaiɗi falakai na war greŋ ɗa, pini arɗi ɗai ɗa, e siiwi siiwa na mogo lai, nagai aga e niviti kûɗi sariya na gdaŋ.