Read Mousgoum Lukas 21 Bible Online

Lukas 21 - Mousgoum bible

Lukas 21

¹A yima arni amai, a tiliɗi zi farai e ɗa si farai war kes n’e yimi farai warni ɗa,

²A tiliti muni na war greŋ na haw te mula sulai sulu woni lai.

³Nɵa a muɗa: Jre, mu miɗiki: Muni na war greŋ na murga hanɗa te sa te suwa ɗai paŋ,

⁴buri nagai hanɗa paŋ e si likeɗi na ɗa pini abaini faraiɗi, amma na ɗa te sa na pini kiɗi kai na wiiɗi, an na aŋ tiɗi na te suma gaini a ni ta.

⁵Won hlai na ɗai zamai e ɗa miɗi gaini ɗa ɓa: A rga gaini ali-fuŋ na zafai gain like zamai zamai na ɗai e siɗi sini Alaw, n’e zûvi tempel gaini lai ɗa, a muɗa:

⁶Mefeŋ aga a cosi, war mefeŋ ni ɗa, alini fuŋ n’aga ki tiliŋ na ɗa, ktai aga a hina gaini tiki amai midini maini kai.

⁷E zilbiŋ e miɗi: Api zi hitri, wazagai hanɗa aga a za kaswata ɗa? Wala n’aga a siɗkiyi midini wazagai hanɗa a maɗa?

⁸Yesu a waya seŋ a miɗiɗi: Ki hini ɗif a wiliki edi kai, buri viya aga e hilisi siki war yikiŋa aŋ miɗi: Ta, mu ni. Pra, hlai a va li, ki tiɓi piɗi kai.

⁹Won hlai n’aga ki ɵini gaw gaini dûrgûzi, ki hiini kai, a dewele ɓa wazagai hanɗa a za avut, amma dibini hlai ɗa aŋsi hai.

¹⁰Nɵa a miɗiɗi: Afti ktai aga a faka amai sini afti na zamai, aftini pai ktai sini afti na wiini pai na zamai.

¹¹Ziriyini afti n’abakai aga a za war hlai zamai zamai ɗa, vlak gaini wiyamai aga a za lai, wazagai zi mili hunai viya aga a za gaini wazagai zi siŋki n’abakai na war hlai n’amai.

¹²Amma wuzani hanɗa, ɗa aga e yimiki, e zigi gir, aga e siki edi war sinagogne aŋ zigi sariya. Aga e miliki warni daŋgai, aga e kiki wuzaɗi paakai gaiɗi lawaŋai lai buriya.

¹³Hanɗa aga a hûgûki aŋ zi zaida maɗa

¹⁴Ki yimi miɗiki ɓa: Aga ki zizini siki wuzani hlai gaini seŋ n’aga ki pili siki edi gaini kai.

¹⁵Buri Ta aga mu siki yel, na gawki na gawki e siɗi aŋ bili edi sini kai, e kiɗi aŋ miɗi seŋ zamai siɗi kaalai.

¹⁶Aga e siki edi ɗa e ɗi tamaiki, gaiɗi tawalakaiki, gaiɗi zagalakaiki, gaiɗi marmakaiki, aga e fiɗi zamai viya arbaki par.

¹⁷Ɗai paŋ aga e bili gaw siki buriya,

¹⁸Amma ayir na miɗiki ktai kaw aga te ɓa edi kai.

¹⁹Siiki, aga ki nivi suŋfa.

²⁰won hlai na ki tiliɗi vokɗi askarai e gûniti li Yeruzalem azumai ɗa, aga ki siɗi ɓa: Ɓilki n’edi na wiiɗi a ŋasi gobi.

²¹Nɵa ɗai n’e ɗa war Yudia aga e rivi amai midini huwuŋ, nagai n’e ɗa aha warɗi Yeruzalem ɗa, aga e yimi siɗi edi, nagai n’e ɗa edi par ɵimani Yeruzalem ɗa, e niyi aha warni fuŋ n’abai ɗa kai.

²²Buri mefeŋ ni ɗa, Epiɗ-ɗai aga a ziti sariya na jre, kapai wala n’aŋ gaini ɗû ɗa a va amai.

²³Haw gara buriɗi falakai n’e ziyi gaiɗi nagai n’e siɗi fiyaw wiiɗi aliɗi war mefeŋ ni ɗa, gir n’abai aga a za midini afti, suwar n’abai aga a za buriɗi ɗai hanɗa lai.

²⁴Aga e fiɗiɗi edi gaini kaɵkar, aga e kiɗi edi aŋ bege arbaɗi pinzibaɗi ɗai, ɗai n’edi par aga e kirpiti Yeruzalem azumai pini eziɗi haa mefeŋ n’a sa ta buri ɓa ɗai n’edi par e ziɗi gir wiiɗi Yeruzalem ɗa a va amai.

²⁵Wala zi siŋki aga a za siɗi futi gaini tile, gaini meeɵek lai. Ɗai na midiɗi yai dai paŋ hunai n’abai aga a yimiɗi haa e siɗi wala n’e ziŋ ɗa kai, won hlai n’aga e ɵini suurani yem-ra n’abai na gaini mayaw lai.

²⁶Ɗai aga e mri tini hunai, won hlai n’aga e hiini midini wazagai n’aga a halasi midiɗi yai. Wazagai zi rgi n’arbani hlai n’amai ɗa aga a gigiɗa amai.

²⁷Won hlai ni ɗai aga e tili Ahini-ɗif a halasi arni ɗugul gaini sipak warɗi abai.

²⁸Amma won hlai na wazagai hanɗa a tika pini li aŋ za maini hanɗa ɵa ɗa, ki ɗiyi amai midini eziki, ki yimi arki amai buri pili n’edi na wiiki a ŋasi gobi.

²⁹A muɗa seŋ zi siŋka maini zamai ktai pra siɗi maini nɵa: Ki tili sini luwuŋ Fige gaini luwoɗao zamai ɗa paŋ,

³⁰Won hlai na ki tili sugoini a faka li aŋ guɗa ɗa, ki siɗi ɓa guɵur te ŋasi gobi.

³¹Nɵa, tili lai won hlai na ki tili wazagai hanɗa, aga ki siɗi ɓa, pai n’Alaw te ŋasi gobi.

³²Jre, mu miɗiki: Vuna hanɗa aga a vada kai, haa wazagai hanɗa paŋ a za li.

³³Hlai n’amai gaiɗi yai aga a vada edi, amma seŋ na wiya aga a vada edi kai.

³⁴Ki giɗimi siki pɗem kapai agulki a bunda guma pini gorom na wiini simi gaini ciini, gaini hiini zi giriŋi na wiiɗi duniya ɗa kai, kapai mefeŋ hanɗa, won hlai n’a luɓasi miɗiki a nivikisi ɓurgum kai.

³⁵Maini ava nɵa kai, buri aga a halasi midiɗi nagai paŋ n’e ɗa midiɗi yai.

³⁶Nɵa, ki simni karki, ki siiwi kûreɗ-kûreɗ, kapai ki nivi gdaŋ, aŋ kûrɗi siki edi mini wazagai n’aga a za ɗa paŋ.

³⁷Girvudi ɗa, a hitra amlai warni tempel, duvuk ɗa a hala a fana amai midiɗi huwuŋ zi luwuŋ olive ɗa,

³⁸Gorof par ɗai e hilisi warni tempel aŋ ziɓiri hitrai na wiini.