Read Mousgoum Lukas 23 Bible Online

Lukas 23 - Mousgoum bible

Lukas 23

¹E fiki amai gaini hlaiɗi, e kiŋ wuzani Pilatus.

²E tiki piɗi aŋ pi seŋ midini e miɗi: Ɗif hanɗa, tiyi mi niviŋsi aŋ ziɗi piɗi ɗai buri e fiki dûrgûzi amai, a ɗala tar na sini Sezar, a yika sini ɓa a Kristu, a pai.

³Pilatus a zilbaŋ a muɗa: Tuku ku paiɗi Yudeyakai kai ɗi? A waya seŋ a muɗa: Ku muɗaŋ na ɗa ku tuku.

⁴Pilatus a muɗa siɗi paakai n’abakai zi ɓaka gaini firiɗi ɗai lai maini nɵa: Mu nava seŋ na meefeŋ sini ɗif hanɗa kai, na kapai a nava rgi burini.

⁵Amma e siiyi mini e miɗi: A na faka ɗai amai, gaini hitrini midini afti na Yudia paŋ, a tikasi pini war Galeliya par haa woni na.

⁶Hlai na Pilatus a ɵina hanɗa, a zilba ɓa ɗif hanɗa a na war Galeliya par ɗi?

⁷Won hlai n’a sɗa ɓa, ni a na midini afti na wiini Herod par ɗa, a ɵinaŋ sini Herod. Herod, a nafu a Yeruzalem warni mefeŋ ni ɗa.

⁸Won hlai na Herod a tala Yesu ɗa a firiya gara, buri a fana yaw a dara a talaŋ, buri labar n’a na ɵinaŋ midini ɗa, a hiina ɓa aga a za wala zi siŋki ktai wuzani arni ɗi?

⁹A zilbaŋ midini wazagai viya, amma Yesu a wiyini seŋ kai sam.

¹⁰Paakai n’abakai zi ɓaka gaiɗi ɗai n’e siɗi gara, e ɗifu ca aŋ pi seŋ midini gdaŋ gara.

¹¹Herod gaiɗi ɗai zi gɗam na wiini lai, e tirkiŋ, e zini yewere, won hlai n’e vidi li gaini Yewere ɗi, n’e wiini sapa n’a ŋala gara sini li lai, e wiyiŋni wiini Pilatus.

¹²War mefeŋ ni ɗa, Herod gaini Pilatus e bindi aŋ marmakai, wuzani hanɗa e ɗifu gaw gaiɗi marɗi.

¹³Pilatus a yikiɗisi paakai n’abakai zi ɓaka gaiɗi n’abakai gaiɗi ɗai paŋ lai sini.

¹⁴A miɗiɗi: Tiki ki kiŋasi ɗif hanɗa, ɓa a n’a faka ɗai amai, mu zilbaŋ wuzani arki, amma mu nava wala ktai na meefeŋ sini na kapai mu rgaŋ burini kai. Seŋ na ki piɗni midini na ɗa, mu navaŋ ɵa kaalai.

¹⁵Herod ɗe a navasi seŋ sini kaalai, buri a wuyuŋmusi wai. Nɵa ɗa a za wala ktai n’a kiɗa a nava mri burini kai zaŋ.

¹⁶Aga mu ɵini daɓala pini su su lai, mu hinaŋ a hala wiini.

¹⁷Miɗi fet na wiini Paska paŋ sai, Pilatus a ɵiɗisi ɗif zi daŋgai ktai edi suuwa suuwa.

¹⁸E ɗûûli gaini hlaiɗi e miɗi: Fuɗa ɗif hanɗa edi, amma ku ɵiyisi Barabbas edi su.

¹⁹Barabbas ni ɗa, e ɵiŋ warɗi daŋgai buri a faka dûrgûzi amai warni fuŋ n’abai, buri ɵiɓini belek lai.

²⁰Pilatus a waya a zilbiɗi pra: Buri a firiya ɓa a ɵa Yesu ɗa.

²¹Nagai e ɗûûli e miɗi: Tokoŋ amai sini luwuŋ zi dagra.

²²A miɗiɗi azi n’ag'aŋ hu: Ɗif hanɗa a za zi meefeŋ ɗa a maɗa? Mu nava wala ktai sini par n’a kiɗa a nava mri burini aŋ kai. Mu ɵini li daɓala pini su su ɗa, mu hinaŋ a hala wiini.

²³Amma e siiki, e ɗûûli gara, e piyi ɓa sai a tokoŋ amai sini luwuŋ zi dagra, ɗuwalɗi a nava rɗi n’amai.

²⁴Pilatus a sa futi buri a za maini na ɗai e firyiŋ ɗa nɵa.

²⁵A ɵa ni n’e ɵiŋ warɗi daŋgai burini fikini dûrgûzi n’amai gaini ɵiɓini belek ɗa su, amma ni n’e ɗa piyiŋ ɗa, a saŋ war tiɗi aŋ zi sini main n’e diri nɵa.

²⁶Won hlai n’e ɗa hili gaini, e yimi ɗif ktai, Simun na Kirine par, n’a na waisi edi warni vuwaini par. E tikini dagra wulani buri a libaŋ pini Yesu.

²⁷Firiɗi ɗai viya gaiɗi falakai lai e hili pini. Falakai e tûwi, e ɵi marava siɗi lai burini.

²⁸Yesu a bunda arni siɗi, a muɗa: Tiki ɗai na Yeruzalem, ki tûwi buriya kai, amma ki tûwi buriki tiki dama, gaiɗi aliki lai.

²⁹Buri mefeŋ a na gizi, na ɗai aga e miɗi ɓa: Sleɗ midiɗi falakai muɗaŋai, ɵeɗ midini gut n’a wa duk kai gaini fiyaw n’e ciŋ ka duk kaalai.

³⁰Ɗai aga e miɗi sini luwoŋai ɓa: Kɵisi midiyi, sini boŋorai ɓa: Ŋûyiyi cok.

³¹Na ɓa e zi sini luwuŋ na hirnaŋ maini hanɗa ɵa ɗa, n’aga a za sini luwuŋ na huleŋ ɗa aga a suwa hanɗa pra kai ɗi.

³²War sarti ni dama, e kisi ɗai zamai sulu, ɗai na maafanai kapai e tûkûɗi amai gaini.

³³Won hlai n’e cûwar hlai n’e yikiŋ ɓa: Keɵkeni humok, e tûkûŋ amai woni gaiɗi ɗai na sulu na maafanai lai, na ktai war galni hanɗa par, na ktai war galni hanɗa par lai.

³⁴Yesu a muɗa: Apa, ku pɵa meefeɗɗi hanɗa midiɗi kai, buri e siɗi wala n’e ɗa e ziŋ ɗa kai. E ɓûrwi sapani arbaɗi pini wala zi vili.

³⁵Ɗai e ɗiyi ca ca e tili, amma n’abakai ɗa e zini yewere e miɗi: A kurɗa ɗai zamai kir ka, a kurɗa sini dama haw le, na ɓa a Kristu na wiini Alaw zi viri edi ɗa.

³⁶Askarai lai e zini yewere, e hilisi wuzani gaini vin na hahayaŋ,

³⁷e miɗi: Na ɓa ku paiɗi Yudeyakai ɗa, kurɗa suku dama edi.

³⁸Ɗû a nafu amai par midini maini nɵa: Ɗif hanɗa a paiɗi Yudeyakai.

³⁹Ktai arbaɗi ɗai na maafanai n’e ɗa amai sini luwuŋ zi dagra gaini a tirkaŋ a muɗa: Ku Kristu ɗa kir kai! Kurɗa suku dama lai, kûrɗiyi tiyi lai.

⁴⁰Amma, maini a ɓaraŋ a muɗa: Ku huna Alaw kai ɗi? Sariya zi mri te ɗukla muduku maini Ni ɵa lai kai ɗi?

⁴¹Tumu ɗa, n’a za sumu ɗa a jre, buri a za sumu na ɗa pini sdamu na mu zuŋmu, amma ni ɗa a za wala ktai na meefeŋ kai koo!

⁴²A muɗa: Yesu, hina muduku a kɵa buriya won hlai n’aga ku niya warɗi paiku ɗa.

⁴³Yesu a waya seŋ a miɗini: Jre mu muɗuku: Girna haa, aga ku sumna gaya war paradis.

⁴⁴Futi gobi girvudi ɗa, gegeŋ a za midini afti paŋ haa sini sa hu na koskoi ta.

⁴⁵Futi te doogo duk, sapa na e giŋiŋ amai amlai warni hlai na sɗik ɗa a ɓasa arba kal kal.

⁴⁶Yesu a ɗuula a muɗa: Api, mu hina suŋfaɗi agula war tuku. Asakal n’a muɗa hanɗa ya, suŋfani a wa edi.

⁴⁷Won hlai n’abaiɗi askarai na ɗai pini miya ɗaw a tala hanɗa, a sa tese sini Alaw a muɗa: Ɗif hanɗa a ɗif na jre fakat.

⁴⁸Firiɗi ɗai n’e tipisi aŋ tili wala hanɗa, asakal n’e tili wala n’a za ɗa ya ɗa, e wiyi aha sek ɗa war marava.

⁴⁹Nagai n’e siɗiŋ gaiɗi falakai n’e hilisi pini haa a Galeliya par ɗa, e ɗiyisi edi gaigai par e tili wala n’a na za ɗa.

⁵⁰Ktai arbaɗi ɗai zi kiti seŋ, n’e yikiŋ ɓa Yosef, a ɗif na pɗem, na jre lai,

⁵¹seŋ na marni e rgiŋ warɗi, n’e ziŋ lai ɗa, ni a ɗiya warni kai, a ɗif na Arimatiya, fuŋ n’abai na wiiɗi Yudeyakai par, a nafu aŋ biyiti pai na wiini Alaw lai.

⁵²A hala sini Pilatus a zilbaŋ midini kopoŋni Yesu.

⁵³A tikasi kopoŋni azumai amai sini dagra par, a faɗaŋ warni sapa, a fanaŋ warni waŋ n’e ɓiliŋ sini huwuŋ, n’e tiki ɗif warni duk kai hai.

⁵⁴A za na ɗa war mefeŋ na wiini zizinini-si, Sabbat ɗa, a nafu gobi aŋ tika pini lai.

⁵⁵Falakai n’e hilisi gaini a Galeliya par e tiki futi pini, e tili waŋ ɗa, e tili hlai n’e finiŋ woni lai.

⁵⁶E wiyi aha aŋ zizinisi siɗi gaini wazagai zi ɗûgûdi zi lûgûzi, gaini emel lai. War Sabbat ɗa e yivi siɗi amla maini n’aŋ warni seŋ zi gadai ɗa nɵa.