Read Mousgoum Lukas 3 Bible Online

Lukas 3 - Mousgoum bible

Lukas 3

¹War buza n’ag'aŋ doogo pi ɵim, na Sezar Tiberiyus, aŋ warɗi pai ɗa, Pontiyus Pilatus a nafu aŋ Lawan na Yudia, Herod a na aŋ abai midini galni aftiɗi pai n’ag'aŋ puɗu, a dara a muɗa midini afti na Galileya. Filip na tawalni n’abai na tamaiɗi na falakai kiiɗi kiiɗi ɗa, a nafu aŋ abai na midini galni aftiɗi n’ag'aŋ puɗu, a dara a muɗa midiɗi Itureya gaini afti na Trakonitide. Lizaniyas a na aŋ abai na midini galni aftiɗi pai n’ag'aŋ puɗu, a dara a muɗa, Abilene.

²Hlai na Annas gaini Kaifas e ɗa aŋ paakai n’abakai zi ɓaka lai ɗa, seŋ na wiini Alaw a muɗa sini Yohana n’ahini Sakariyas edi warni basga na kaɗataŋ.

³A hala midini afti na ɵimani Yurdan ɗa paŋ, a ɓaka midini baptisme na wiini bindi na gamai na wiini hiini, na pini hanɗa Alaw a haza tuwur edi ɗa.

⁴Maini n’a ɗosi warni maktuɓ na wiini seŋ na wiini ɗif na mini Alaw Esaya ɗa nɵa: Hanɗa a ni n’a ɗuula edi warni basga, ziziniti futi na wiini Epiɗ-ɗai, ɗûpi futini n’agogoi.

⁵Hudokai paŋ aga a ŋaɗa amai, huwoŋai gaini boŋorai paŋ aga a yima azumai, futi na gaini viyɗi pek pek paŋ aga a ɗopa cir cir futi zi darɓazilai aga a kata azumai.

⁶Ɗai paŋ aga e tili kûri na wiini Alaw.

⁷A miɗiɗi wiiɗi ɗai n’e hilisi edi mini aŋ nivi baptisme tini par ɗa ɓa: Pinzibani hiɓe, a hitriki aŋ pri edi wuzani hiy n’aga a halasi ɗa asiya ɗa?

⁸Buri nɵa ki wi ali n’a kata pini bindi na gamai na wiini hiiniki. Ki miɗi kai ɓa: Epiyi a Abraham, buri mu miɗiki: Alaw a kiɗa aŋ mula arbani alini fuŋ hanɗa par, a bundaŋ aŋ alini Abraham.

⁹Tiyana par, beŋel ɗa aŋ gaini zizini ta, aŋ bula luwoŋai azumai sini sirdaini par, nɵa luwuŋ paŋ n’a wa ali na pɗamai kai ɗa aga a ɗukla azumai, a ɵiŋka arni afu.

¹⁰Ɗai e zilbiŋ e miɗi: Aga mi zi ɗa a ma ɗa?

¹¹A waya seŋ a miɗiɗi: ɗif na dawrani a na sulu ɗa, aga ɓurwaŋ gaini ni na wiini aŋ kai ɗa, ɗif na walani zi simi a na ɗa, a za nɵa lai.

¹²Ɗai zi tar e hilisi sini lai aŋ nivi baptisme, e zilbiŋ e miɗi: Api-zi- hitri, tiyi aga mi zi ɗa a ma lai ɗa?

¹³A waya seŋ a miɗiɗi: Ki yimi farai tiɗi ɗai a suwa na futi te sa siki aŋ yimiŋ ɗa kai.

¹⁴Askarai lai e zilbiŋ e miɗi: Tiyi ɗa, aga mi zi ɗa a ma lai ɗa? A miɗiɗi: Ki mili wazagai tiɗi ɗai gaini gdaŋ kai. Ki pi seŋ midini ɗif aŋ blaŋ kaalai, ki zi gaini vrakki n’a na ɗa.

¹⁵Ɗai paŋ e ɗifu war bayai, nɵa won hlai n’e tili Yohana ɗa, e zilbi siɗi ɓa: Hanɗa a Kristu ɗa ɗi kaai!

¹⁶Yohana a waya seŋ wiiɗi ɗai paŋ, a muɗa: Ta mu siki baptisme gaini yem, amma ni na spak a suwaŋa, a na halasi, ni ɗa sogom na midini harabakni tekeɗeɗi mu kiɗa midini aŋ plaŋ edi kai, ni aga a ziki edi sɗik gaini Seze-sɗik, gaini afu na wiiɗi sariya lai maini gaini yem nɵa.

¹⁷Wulai zi fili t'aŋ tini, aga a zizina lulufni, aga a mula algama war vreni, amma bra ɗa aga a yaŋ edi arni afu n’a mra kai.

¹⁸Yohana a ɓaka labar na pɗem siɗi ɗai gaini arai zi pi zamai zamai viya lai.

¹⁹Herod, abai na midini galni aftiɗi pai n’ag'aŋ puɗu, na Yohana a na gadaŋ midini midini seŋ na wiiɗi Herodiyas na munini tawalni, gaini wazagai na maafanai n’a na zaŋ ɗa lai.

²⁰Midini meefeŋ hanɗa paŋ, a ɵa ka Yohana warɗi daŋgai su pra.

²¹Won hlai na ɗai paŋ e ɗa nivi baptisme ɗa, Yesu a nava lai, hlai n’a na siiwa ɗa, hlai n’amai ɗa a mala edi.

²²Seze-sɗik a yorosi azumai midini, a tala maini dere nɵa, wûle a wasi amai war hlai n’amai par ɓa: Tuku k’Ahiya n’a gula te firiya muduku gara, mu vuruku ɗa ku tuku.

²³Yesu, won hlai n’a tika pini gaini sdani, buzani a za doogo doogo hu ta, maini na ɗai e hiini midini nɵa ɗa: A ahini Yosef, n’ahini Eli,

²⁴n’ahini Matat, n’ahini Levi, n’ahini Melki, n’ahini Yanai, n’ahini Yosef,

²⁵n’ahini Matatiyas, n’ahini Amos, n’ahini Nahum, n’ahini Esili, n’ahini Nagai,

²⁶n’ahini Maat, n’ahini Matatiyas, n’ahini Semeyin, n’ahini Yosek, n’ahini Yuda,

²⁷n’ahini Yohanan, n’ahini Resa, n’ahini Zorobabel, n’ahini Seyaltiyel, n’ahini Neri,

²⁸n’ahini Melki, n’ahini Addi, n’ahini Kosam, n’ahini Elmadam, n’ahini Er,

²⁹n’ahini Yesu, n’ahini Eliyezer, n’ahini Yorim, n’ahini Matat, n’ahini Levi,

³⁰n’ahini Simeyon, n’ahini Yuda, n’ahini Yosef, n’ahini Yonam, n’ahini Eliyakim,

³¹n’ahini Meliya, n’ahini Menna, n’ahini Matata, n’ahini Natan, n’ahini David,

³²n’ahini Yesai, n’ahini Obed, n’ahini Bowas, n’ahini Sala, n’ahini Nason,

³³n’ahini Aminadab, n’ahini Admin, n’ahini Arni, n’ahini Hesron, n’ahini Peres, n’ahini Yuda,

³⁴n’ahini Yakob, n’ahini Isaak, n’ahini Abraham, n’ahini Tarah, n’ahini Nakor,

³⁵n’ahini Seruk, n’ahini Regaw, n’ahini Peleg, n’ahini Eber, n’ahini Salah,

³⁶n’ahini Kenan, n’ahini Arpaksad, n’ahini Sem, n’ahini Nowa, n’ahini Lamek,

³⁷n’ahini Metuselah, n’ahini Enok, n’ahini Yared, n’ahini Maleleel, n’ahini Kainam,

³⁸n’ahini Enos, n’ahini Set, n’ahini Adam, n’ahini Alaw.