Read Mousgoum Lukas 4 Bible Online

Lukas 4 - Mousgoum bible

Lukas 4

¹Yesu, won hlai n’a va li gaini Seze-sɗik, a waisi warni Yurdan par, Seze a kaŋ edi warni basga na kaɗataŋ.

²Woni, Mat a tetemaŋ haa mefeŋ doogo doogo puɗu. War mefeŋ doogo doogo puɗu hanɗa, a suma wala kai, hlai na mefeŋ hanɗa a va li ɗa, wiyamai te yimaŋ.

³Nɵa, Mat a miɗini: Na ɓa k’Ahini Alaw fakat ɗa, muɗa sini ahi-fuŋ hanɗa kapai a bunda aŋ ɓuk.

⁴Yesu a wiyini seŋ, a muɗa: Aŋ gaini ɗû ɓa: Ɗif a sumna karni ɗa gaini ɓuk kiini kai.

⁵Mat a kaŋ amai midini hlai n’amai mogo, gaini yafai kai a siŋkitini aftiɗi paakai na midiɗi yai ɗa paŋ,

⁶a midini: Aga mu suku spak gaini der paŋ n’a na midini afiɗi paakai hanɗa, buri a sasi ta, nɵa aga mu siŋni wiini asiya na mu dara mu siŋni lai.

⁷Buri nɵa, na ɓa, ku hurga li azumai wuza ɗa, aga mu suku hanɗa paŋ aŋ wiiku.

⁸Yesu a waya seŋ a miɗini: Aŋ gaini ɗû ɓa: Aga ku hurga azumai wuzani Epiɗ-ɗai Alaw na wiiku, Aga ku siiwa ɗa tini Ni ktai.

⁹Mat a kaŋ a Yeruzalem pra, a tikaŋ amai merfeŋni tempel amai, a miɗini: Ɓa k’Ahini Alaw fakat ɗa, blaɗi suku azumai woni na par.

¹⁰Buri aŋ gaini ɗû ɓa: Aga a sa miɗi wiiɗi ɗai zi ɵeŋ na war fuŋ-n’Alaw buriku, kapai e giɗimuku.

¹¹Nagai aga e libuku amai tiɗi ɗaw, kapai azuku a daba sini ahi-fuŋ kai zaŋ.

¹²Yesu a waya seŋ a miɗini: Aŋ gaini ɗû ɓa: Aga ku tetema Epiɗ-ɗai Alaw na wiiku kai.

¹³Won hlai n’a vada gaini tetemini paŋ li, Mat a yima sini edi sini par buri hlai n’agwi.

¹⁴Yesu a waya war Galileya gaini vi gaini spak na wiini Seze-sɗik, labarni a wa edi midini hlai n’aŋ warni paŋ.

¹⁵A hitra amlai warni sinagogne na wiiɗi ɗa, ɗai paŋ e kûliŋ paŋ.

¹⁶A halasi a Nazaret, war hlai n’a wula amai woni. Warni mefeŋni Sabbat ɗa, a hala amlai warni sinagogne maini n’a na zaŋ kûreɗ-kûreɗ nɵa, a faka amai buri a ŋa ɗû na wiini Alaw edi wuzaɗi ɗai.

¹⁷E kinisi maktuɓ na wiini ɗif na mini Alaw Ezaya, a badaŋ edi, a nava hlai n’a muɗa maini nɵa:

¹⁸Seze na wiini Epiɗ-ɗai aŋ mada, buri a maŋa emel n’e tiki ɗai warni sda gaini mada, kapai mu ɓaka labar na pɗem siɗi na murgakai, a ɵinaŋa aŋ muɗa midini pili n’edi siɗi ɗai na war daŋgai, midini arai-zi-mili n’edi na wiiɗi na malvanai, aŋ piliɗi nagai n’e ɗa siɗi gir tiɗi ɗai ɗa edi.

¹⁹Aŋ muɗa midini buza n’EPIƊ-ƊAI aga a siŋka yimini edi siɗi ɗai na warni.

²⁰Asakal par a faɗa maktuɓ ɗa amai, a siŋni wiini ɗif n’a kaŋsi ɗa, a hala a sumna azumai dam, arɗi ɗai na war sinagogne paŋ a hiɗika sini sek.

²¹Nɵa a tika pini aŋ miɗiɗi: Girna ɗa, seŋ na ki ɵiniŋ hanɗa a va amai li.

²²Ɗai paŋ e zi zaida midini, e bindi hiyak buri seŋ na pɗamai n’a niyasi edi mini par ɗa, e miɗi: Hanɗa a Ahini Yosef ɗa kai ɗi?

²³A miɗiɗi: A futini, aga ki miɗiŋa seŋ zi siŋka maini n’a muɗa ɓa: tuku dokor, zuula suku tuku dama, wazagai n’a zasi war Kapernahum maini na ki ɵiniŋ na ɵa ɗa, zaŋ midini aftiku woni na lai.

²⁴A miɗiɗi pra: Jre, mu miɗiki, ɗif na mini Alaw ktai n’e yimiŋ midini aftini aŋ kai.

²⁵Jre, mu miɗiki, war mefeŋ na wiini ɗif na mini Alaw Eliyas ɗa, falakai na war greŋ e ɗifu war Izrayel viya. Won hlai na faŋ a ɵa kai haa buza hu gaini gal, won hlai na wiyamai n’amai te za midini afti lai ɗa,

²⁶gaini hanɗa paŋ ɗa, Alaw a ɵina Eliyas sini ktai arbaɗi kai, amma a ɵinaŋ siɗi muni na war greŋ na Sarepta, midini afti na Sidon.

²⁷War mefeŋ na wiini ɗif na mini Alaw Eliza, ɗai na duggomai e ɗifu viya aha warɗi Izrayel, amma gaini hanɗa paŋ, ktai n’arbaɗi n’a bunda hilu aŋ kai, sai Naaman na Siriya par tar.

²⁸Won hlai n’e ɵini seŋ hanɗa, ɗai na war sinagogne paŋ e bindi gaini hiy n’abai.

²⁹E fiki amai sini e birgiŋsi edi war fuŋ n’abai ɗa par, e kiŋ edi mini hlai na gaini zigi zak siɗi huwuŋ, na fuŋɗi n’abai a rga midiɗi ɗa kapai e hûgiŋ azumai.

³⁰Amma a vugasi arbaɗi ɗaw, a hala wiini.

³¹Yesu a hala a Kapernahum, fuŋ n’abai na Galileya, a hitriɗi ɗai war mefeŋ na wiini Sabbat.

³²Hitri n’a hitriɗi ɗa, a bindiɗi hiyak buri seŋni ɗa a muɗaŋ gaini spak pini.

³³Ɗif na gaini ksalai na hi-hir midini a nafu amlai warni sinagogne, a ɗuula a muɗa:

³⁴Yesu na Nazaret, n’a tupuku gaiyi ɗa a ma ɗa? Ku halasi ɗa aŋ tûûrliyi edi ɗe? Mu suɗuku ya, tuku ku na sɗik na ku halasi sini Alaw par,

³⁵Yesu a ɓaraŋ a muɗa: Ba muku! A niya edi sini ɗif par, a zini wala ktai na meefeŋ kai.

³⁶Ɗai paŋ hunai te yimiɗi, e zilbi siɗi arbaɗi marɗi, e miɗi: A miɗi na maɵa maɵa ɗa? A muɗa sini seze na haharai gaini spak, gaini gdaŋ, a niya edi lai ɗa!

³⁷Labar na midini a wa edi midini hlai n’aŋ woni paŋ.

³⁸A fakasi war sinagogne par a halasi ahani Simun. Suwulni Simun te nafu siɗi gaini sûwi gara, e siiwiŋ buri a zina piɗi ta.

³⁹A goɓo azumai midiɗi, a ɓara si zi sûwi ɗa, si zi sûwi ɗa a hiniti. Won hlai ni tizaw, te faka amai te tika piɗi aŋ zina piɗi.

⁴⁰Won hlai na futi te nawa li, ɗai na ɗai ɗi zi veglek e ɗa, na veglek na maɗi maɗi paŋ aŋ siɗi ɗa, e kiɗinisi, a tika tini midiɗi, a zûûliɗi.

⁴¹Ksalai lai a niyasi edi siɗi ɗai viya par, a ɗuula a muɗa: Tuku ɗa k’Ahini Alaw. A ɓiriɗi, a hiniɗi aŋ miɗi seŋ kai buri e siɗi ya ɓa ni a Kristu.

⁴²Won hlai na hlai a sɗa li edi ɗa, a hala warni hlai na baŋa, ɗai ɗa e tiki piɗi e piyiŋ, e hilisi haa pini ta, e firiyi ɓa e hiniŋ a hala kai, a sumna gaiɗi.

⁴³Amma a miɗiɗi: A dewele buriya ɓa mu ɓaka labar na pɗem na ɓa Alaw aga a ɗa aŋ pai midiɗi duniya paŋ ɗa, sini fuŋ n’abakai na zamai ɗa lai, buri Alaw a ɵinaŋasi burini hanɗa.

⁴⁴A ɓaka seŋ warni sinagogne na war Yudia.