Read Mousgoum Lukas 5 Bible Online

Lukas 5 - Mousgoum bible

Lukas 5

¹Mefeŋ ktai, Yesu a ɗiya ɵimani bal na Genezaret, firiɗi ɗai e tipisi sini buri e ɵini seŋ na wiini Alaw,

²A tala hulamai sulu amai wulani bal ca, ɗai zi tum na warni ɗa e niyi azumai yaw, e ɗa mi avaɗi edi.

³A niya warni ktai arbani hulum n’abakai hanɗa, a hulum n’abai na wiini Simun. A miɗini buri a torasi edi arba sek agwi. Asakal par a sumnasi warni hulum par dam a hitrasi firiɗi ɗai ɗa.

⁴Hlai n’a vada gaini seŋ zi miɗi ya, a miɗini wiini Simun: Toroɗi edi warni yem na hulum sek, ɵi avaki ɗa kapai ki yimi hilif.

⁵Simun a wiyini seŋ a miɗini: Epin-geza, tiyi mi fini na ɗa aŋ tum ɵa, mi yimi wala kai, amma pini seŋku ɗa, aga mu ɵa ava ɗa,

⁶won hlai n’e ɵiŋ li ɗa, e yimi hilif viya haa avaɗi a dara a ɓasa edi.

⁷E hûwdiɗi marɗi na gaiɗi n’e ɗa war hulum n’abai na zamai ɗa buri e hilisi e zini piɗi. Nagai e hilisi e vi hulamai n’abakai na sulu paŋ haa a dara a buɗuha.

⁸Won hlai n’a tala hanɗa, Simun Peter a hurga azumai wuzani Yesu a muɗa: Epiɗ-ɗai, yimaɗi warku edi sa par kaai, ta mu ɗif na tuwur.

⁹Buri hunai te yimiɗi, ni gaiɗi nagai n’e ɗa gaini paŋ lai burini hilif n’e yimiŋ ɗa.

¹⁰Yakob gaini Yohana n’alini Zebedewus na marni Simun ɗa, hunai te yimiɗi nɵa lai. Yesu a miɗini wiini Simun: Ku huna kai, wuzamu sek aga ku tuma ɗa e ɗi ɗai.

¹¹Nɵa, e wiyisi hulamaiɗi n’abakai ɗa amai wulani daŋ, e wiyisi e tipi pini.

¹²Mefeŋ ktai, Yesu a nafu warni fuŋ n’abai ktai, ɗif na gaini veglek zi dugum sini a luɓasi, won hlai n’a tala Yesu, a bula sini azumai, a pa arni azumai midini afti, a siiwaŋ maini a muɗa: Epiɗ-ɗai, na ɓa ku dara ku bundaŋa hilu pla kai ɗi!

¹³Yesu a wûti tini edi, a tikiti sini a muɗa: Mu dara, bunda hilu, tizaw, veglek zi duggum ɗa a hinaŋ.

¹⁴Asakal par a gidini mini buri a muɗa hanɗa wiini ɗif kai, amma a miɗini: Ku hala, ku siŋka suku arni pai zi ɓaka, ku za ɓaka burini zi n’edi aŋ hilu maini na Musus a ɗoŋ ɗa nɵa, hanɗa aga a za aŋ zaida buriɗi.

¹⁵Ɗai e miɗi gaini ɗa a suwa pra, a suwa pra, kûreɗ ɗai ɗa e diŋgisi viya viya, e ɵini seŋ n’a hitraŋ ɗa aŋ piyi zûûli na war veglekɗi par lai.

¹⁶Amma Ni a yima sini edi warni baŋa a siiwa.

¹⁷Mefeŋ ktai ɗa, Yesu a nafu aŋ hitriɗi Farisekai gaiɗi tamai zi gadai e ɗifu ca ca, e hilisi war fuŋ n’agogoi na war Galeliya gaini na war Yudia gaini na war Yeruzalem par ɗa lai, spakni Alaw a nafu midini buri a zuula veglek.

¹⁸Ɗai e cûsi gaini ɗif na galni gaini mri sun tiɗi kaai midini wala n’e libiŋ gaini ta. E piyiŋ futi aŋ kiŋ amlai, aŋ tikiŋ azumai wuzani Yesu.

¹⁹Won hlai n’e nivi baŋa tiɗi ɗai buri e kiŋ amlai kai buri firiɗi ɗai ɗa, e niyi amai midini dalam, e miili baŋa edi agwi, e wiɗsi azumai warni ɗaw gaini sogom midini wala n’e libiɗsi gaini waŋ. E tikiŋ azumai arbaɗi ɗai wuzani Yesu.

²⁰Won hlai na Yesu a tala yimiɗi a muɗa: Mu hunuku tuwurku li.

²¹Ɗai zi ɗû wazagai gaiɗi Farisekai e tiki piɗi e hiini e miɗi: Ɗif hanɗa ni asiya ɗa? Na kapai a tirka Alaw maini hanɗa ɵa ɗa! Na a kiɗa aŋ hina tuwur ɗa asiya, Alaw kiini ktai kai ɗi?

²²Yesu a sɗa hiiniɗi ɓa, zilbiɗi a miɗiɗi: Tiki ki hiini nɵa buri ma ɗa?

²³Na gop ɗa a na wata ɗa? Aŋ muɗa ɓa: Mu hunuku tuwurku li ɗa, zaw aŋ muɗa ɓa: Faka amai, hala ɗi?

²⁴Hanɗa, a za kapai a yima miɗiki ɓa: Ahini-ɗif spakni a na midiɗi yai buri a hina tuwur, a muɗa sini ɗif na galni gaini mri, mu na muɗuku: Faka amai, a tika wala n’e libiɗsi gaini ɗa, a hala aha.

²⁵Won hlai ni tizaw, ɗif a faka amai wuzani arɗi, a tika walani n’e libiɗsi gaini ɗa, a hala aha, a sa kol sini Alaw.

²⁶Nagai paŋ e bindi hiyak, e kûli Alaw, hunai te yimiɗi gara, e miɗi: Girna mu tulumu na ɗa a wala n’a za duk kai.

²⁷Asakal hanɗa a niya anene, a nava ɗif zi tar ktai yikini ɓa Levi, gaini simni mini bro na wiini tar ɗa dam, a miɗini: Tapasi pa.

²⁸Ɗif a fakasi amai, a hinasi wazagaini paŋ, a tapa pini Yesu.

²⁹Levi a ziti fet n’amai burini ahani, ɗai zi tar e diŋgisi viya gaiɗi na maafanai zamai viya lai e simni aŋ simi gaiɗi.

³⁰Farisekai gaiɗi ɗai zi ɗû wazagai ɗa, eɗûriyi, e miɗiɗi wiiɗi ɗaini zi hitri: Tiki, ki simi lai, ki ci lai gaiɗi ɗai zi tar, gaiɗi ɗai na tuwarai lai ɗa buri maɗa?

³¹Yesu a wiyiɗi seŋ a muɗa: N'e piyi doktor ɗa, e ɗi ɗai n’e ɗa nga ɗa kai, amma e ɗi zi veglek.

³²Mu halasi aŋ yikiɗi sini bindi na gamai ɗa, e ɗi na jre ɗikat kai, amma na tuwarai.

³³E miɗini: ɗai zi hitri na wiini Yohana, gaiɗi na wiiɗi Farisekai e tiki sai kûreɗ-kûreɗ, a siiwi lai, amma na wiiku ɗa e simi gaini simi sal, e ci lai ɗa buri ma ɗa?

³⁴Yesu a miɗiɗi: Ki siɗi aŋ ziɗi dewele wiiɗi marmakaini Epiɗi drai aŋ tiki sai won hlai na ni a na gaiɗi ɗi?

³⁵Mefeŋ aga a gizi, n’Epiɗ-drai aga a yima edi arbaɗi par, nɵa aga e tiki sai war mefeŋni ɗa,

³⁶A miɗiɗi seŋ zi siŋka maini ktai: Ɗif a sɗa aŋ ɓasasi sini sapa na hehe par aŋ tikaŋ arni sapa na wel kai, na ɓa a za li ɵa ɗa, a ɓasasi sapa na hehe na ɗa kadai meere, a kiɗa a dinga gaini sapa na wel n’e tikiŋ arni kir kaalai.

³⁷E mi vin na hehe warni galon na wel kai, na ɓa a za li ɵa ɗa, vin na hehe aga a luɓa galon ɗa edi, a ma azumai lai, galon ɗa aga a tuura edi lai.

³⁸Vin na hehe ɗa, a ma warni galon na hehe lai,

³⁹asiya ɗi paŋ n’a ca li vin na wel ɗa, a firiya vin na hehe kai, buri a muɗa: Na wel ɗa a pɗem.