Read Mousgoum Lukas 6 Bible Online

Lukas 6 - Mousgoum bible

Lukas 6

¹Won hlai n’e ɗa vigi warni vuwai war mefeŋ na wiini Sabbat ɗa, ɗaini zi hitri e hiɗi midini seyem, e fiŋkiŋ war tiɗi e limiŋ.

²Zamai arbaɗi Farisekai e miɗi: ki zi wala n’aŋ gaini ɗili warni Sabbat ɗal ɗa buri ma ɗa?

³Yesu a waya seŋ a miɗiɗi: Ki tili warni ɗû kai ɗi? Wala na David a zaŋ won hlai na wiyamai te zaŋ gaiɗi na pini paŋ ɗa, ki tiliŋ warni ɗû kai ɗi?

⁴Niyi n’a niya amlai warni dalamni Alaw a mulasi peŋ n’a sa sini Alaw, a lumaŋ, a sa wiiɗi nagai na gaini lai, paŋ ktai futi te sa siɗi buri e miliŋ kai, e limiŋ ɗa sai e ɗi paakai zi ɓaka kiiɗi ta. Ki tili hanɗa kai ɗi?

⁵A miɗiɗi: Ahini-ɗif ɗa abai midini Sabbat lai.

⁶War Sabbat zamai ɗa, a hala war sinagogne aŋ hitra, ɗif ktai a nafu woni na tini na wus gaini mri pini su.

⁷Ɗai zi ɗû wazagai gaiɗi Farisekai e tiki hangalɗi sini Yesu aŋ tiliŋ haw n’aga a zuula ɗif war Sabba ɗi ɗa kapai e nivi wala n’e pi seŋ midini gaini.

⁸Amma a sɗa hiiniɗi ɓa, a miɗini wiini ɗif na tini gaini mri ɓa: Faka amai, ɗiya amai arɗi zaw.

⁹Yesu a miɗiɗi: Mu zilbiki ɓa: Wala na ɗif a sɗa aŋ zaŋ war Sabbat ɗa a ma ɗa? E zi ɗa a pɗem, zaw e zi ɗa a meefeŋ ɗi? A kurɗa suŋfa; zaw aŋ baŋ ɗi?

¹⁰Nɵa, a guna arni a tiliɗi paŋ, a muɗa wiini ɗif ɗa: Yimitisi tuku edi, a za nɵa lai, tini te zuula.

¹¹E bûvi gaini hiy, e sispi arbaɗi marɗi midini wala n’aga e ziŋ sini Yesu ɗa.

¹²War mefeŋ ni ɗa, Yesu a hala aŋ siiwi amai midiɗi huwuŋ, a fana ɵa talal aŋ siiwa Alaw.

¹³Won hlai na hlai a sɗasi li edi ɗa, a yikiɗi ɗaini zi hitri, a vara arbaɗi par doogo pi sulu, a siɗi yikiɗi ɓa: Apostelai.

¹⁴Hanɗa a Simun n’a sini yiki zamai ɓa: Peter, gaini Andreya na tawalni, Yakob gaini Yohana, Filip gaini Bartelemi,

¹⁵Matewus gaini Tumas, Yakob n’ahini Alfewus, gaini Simun na e yikiŋ ɓa: Zelotus, a dara a muɗa: N'a firiya ɓa gawni a ɗa midini aftini kai.

¹⁶Yudas n’ahini Yakob, gaini Yudas Iskariyot, n’a bunda aŋ ɗif n’a sa Yesu edi tiɗi gawni.

¹⁷A niya azumai gaiɗi, a halasi a ɗiya warni hlai na plas, na firiɗi ɗai n’abai gaiɗi ɗai zi hitri, gaini faraɗi ɗai viya e hilisi a Yudia par, a Yeruzalem par, agoɗom wulani Tirus gaiɗi Sidon par lai.

¹⁸E hilisi buri e ɵini hitrini, buri e zûûli warni veglekɗi par lai. Nagai na ksalai a naka a hûwiyiɗi lai e nivi zûûli paŋ.

¹⁹Firiɗi ɗai e piyi futi aŋ tikiti tiɗi sini buri spak ktai a niyasi edi sini par, a zuula ɗai.

²⁰Nɵa won hlai n’a yima arni amai a tiliɗi ɗaini zi hitri a muɗa: ɵeɗ ɗa miɗiki tiki na murgakai, buri pai n’Alaw ɗa te wiiki.

²¹Sleɗ ɗa aŋ miɗiki, tiki na wiyamai te ziki tiyana, buri ɓa aga ki vi.

²²Sleɗ ɗa aŋ miɗiki won hlai na ɗai e diriki kai, won hlai n’e tikiki arki edi arbaɗi par, e tirkiki, e biliki edi arbaɗi par maiɗi ɗai na maafanai nɵa, burini Ahini-ɗif.

²³Ki firiyi war mefeŋ ni ɗa, ki pri amai gaini firiyi, buri ɓa vrakki a na abai war fuŋ-n’Alaw, buri ɓa tamaiɗi e ɗika e zi siɗi ɗai na mini Alaw ɗa maini hanɗa ɵa lai.

²⁴Amma gir gara buriki tiki zi farai, buri tiki ki nivi muluk na wiiki ya.

²⁵Gir gara buriki tiki na ki ɗa gaini vi tiyana, wiyamai aga te ziki, gir gara buriki tiki na ki ɗa riyi tiyana, aga ki hini warni kwimi, warni tuwi lai.

²⁶Gir gara buriki won hlai na ɗai paŋ e miɗi miɗiki ɗa a pɗem; tamaiɗi e ɗika e zi siɗi ɗai na mini Alaw na jre kai kai ɗa maini hanɗa nɵa.

²⁷Amma tiki na ki ɗa ɵini na ɗa, mu miɗiki ɓa: Ki diriɗi gawki, ki zi pɗem siɗi nagai n’e diriki kai ɗa.

²⁸Ki ɓikiɗi nagai n’e tûsiki ɗa, siiwi buriɗi nagai n’e miɗi meefeŋ miɗiki ɗa.

²⁹Ɓa ɗif a ɵiɓuku war galaiku na ktai, k bindinisi na hanɗa lai, ɓa ɗif a mula dawraku li gaini gdaŋ ɗa, ku hinaŋ a militi jaɗfaku lai.

³⁰Asiya ɗi paŋ n’a zulbuku ɗa, sini; n’a mula wazagai gaini gdaŋ ɗa, ku zilbaŋ tini par kir kai.

³¹Na ki diri ɓa ɗai e ziŋ siki ɗa, ki zi siɗi nagai nɵa lai.

³²Na ɓa ki diriɗi ɗa e ɗi nagai n’e diriki ɗa, pɗem na ki ziŋ na kapai ɗai e kûliki burini ɗa a na wata ɗa? Ɗai na tuwarai lai e diriɗi ɗa e ɗi nagai n’e diriɗi lai kai ɗi?

³³Na ɓa ki zi pɗem siɗi nagai n’e ziki pɗem ɗa, pɗem na ki ziŋ na kapai ɗai e kûliki burini ɗa, a na wata ɗa? Ɗai na tuwarai e zi na ɗa ɵa lai kai ɗi?

³⁴Na ɓa ki tifi wazagai ɗa wiiɗi ɗai na ki hiini ɓa aga e wiyiŋkisi ɗa, pɗem na ki ziŋ na kapai e kûliki burini ɗaa na wata ɗa? Ɗai na jaaɗi gaini Alaw kai ɗa maa e tûfi wazagai wiiɗi marɗi, e wiyiŋ gaini riba kaalai.

³⁵Amma ki diriɗi gawki, ki zi pɗem siɗi, ki tifi gaini hiini na midini vrakni kai, vrakki a za abai, aga ki bindi aŋ alini Alaw n’amai n’amai, buri Ni a za pɗem siɗi nagai na tese warɗi kai, gaiɗi na maafanai lai.

³⁶Ki zi siki malkakai maini n’Epiki na war fuŋ-n’Alaw a na melke ɗa nɵa.

³⁷Ki ɗûkliti sariya midiɗi na zamai ɗa kai, kapai Alaw a ɗûkliti sariya miɗiki kai, ki kûti sariya midiɗi na zamai ɗa kai, nɵa Alaw aga a kûti sariya miɗiki kaalai. Ki hini tuwurɗi marki kapai Alaw a hiniki na wiiki lai.

³⁸Si tiki edi, Alaw aga a siki lai, daram na gaini futini, na gaini vi gaini futini, na gaini didigi dak, na gaini pi amai haa a yaka azumai siɗi zuɗuɗu, aga a mula warni ɵubiki n’abai n’aŋ sini sapaki. Buri daram na ki ŋi gaiɗi, aga a ɗa siki gaiɗi lai.

³⁹A muɗa seŋ zi siŋka maini zamai pra: Ɗif na melveŋ ɗa a kiɗa a ɵa wuzani maini na melveŋ ɗi? Nagai sulu paŋ aga e yiki warni waŋ kai ɗi?

⁴⁰Ɗif zi hitri ɗa, a suwa Api zi hitri n’a hitraŋ ɗa kai. Amma asiya asiya ɗi paŋ n’a hitra li gaini futini aga a bunda maini api zi hitri n’a hitraŋ ɗa nɵa.

⁴¹Tuku ku tala evek n’a na arni maiku ɗa, amma voɗok n’a na arku tuku ɗa, ku sɗaŋ kai ɗa buri ma ɗa?

⁴²Ku miɗini wiini maiku ɓa: Maya, hinaŋa mu tikasi evek n’arku ɗa edi, amma voɗok n’a na arku ɗa, tuku ku sɗaŋ kai ɗa maɵa maɵa ɗa? Tuku zi rhai, tika voɗok n’a na arku tuku ɗa edi ɗaw haw, kapai ku paya futi aŋ tikasi evek n’arni tawalku edi ɵa.

⁴³Luwuŋ na pɗem a wa ali na gaini hûfi kai, luwuŋ zi veglek ɗa a wa ali na pɗamai kaalai.

⁴⁴Buri luwuŋ paŋ ɗa a sɗa sini alini n’a waŋ. E riwisi alini luwuŋ Fige sini hedek par kai, e riwisi alini luwuŋ zi vin sini duvuɗvuɗ par kaalai.

⁴⁵Ɗif na pɗem ɗa, warɗi godai na pɗem na warɗi agulni par ɗa, a kasi wala na pɗem edi; amma na meefeŋ ɗa, warni godai na meefeŋ par, a kasi wala na meefeŋ edi lai. Buri a niyasi edi mini ɗif par ɗa a wala na agulni a va gaini gara ɗa.

⁴⁶Tiki ki yikiŋa Epiɗ-ɗai, Epiɗ-ɗai, amma wala na mu miɗiki li ɓa ki ziŋ ɗa, ki ziŋ kai ɗa buri ma ɗa?

⁴⁷Asiya ɗi paŋ n’a halasi sa, n’a ɵina seŋŋa, n’a za pini lai ɗa, mu dara mu siŋkiki ɗif n’a kata gaini ɗa.

⁴⁸A na maini ɗif n’a dara a rga dalam, n’a huda ezini azumai hulum, a torosi ezini azumai par midini huwuŋ; Yem a suma, a ɵiɓa amai sini dalam, amma a kiɗa a muguzaŋ kai buri a ɗiya gaini futini.

⁴⁹Amma ni n’a ɵina seŋ a za pini kai ɗa, a na maini ɗif n’a dara a rga dalam midini afti na kadai, a huda ezini, yem a ɵiɓa amai sini, tizaw a ho azumai, hûni ɗa a za abai.