Read Mousgoum Lukas 8 Bible Online

Lukas 8 - Mousgoum bible

Lukas 8

¹Asakal par a tika pini a hala warni fuŋ n’abakai paŋ paŋ, war fuŋ n’agogoi lai, a ɓaka, a muɗa labar na pɗem na midiɗi pai n’Alaw edi lai, na doogo pi sulu e ɗifu gaini lai.

²Gaiɗi falakai zamai n’e zûûli mini ksalai par, mini veglek par lai, maiɗi: Mariya n’e yikiti ɓa magdalene na ksalai muguzak a niyasi edi midiɗi par,

³gaiɗi Yowana na munini Kuza, n’abai na midini wazagaini Herod, gaiɗi Susana, gaiɗi na zamai viya lai, e zini piɗi gaini wazagai.

⁴Firiɗi ɗai n’abai a tapasi sini, ɗai na war fuŋ n’abai paŋ par, a miɗiɗi seŋ zi siŋka maini hanɗa:

⁵Ɗif zi sûûɗi seyem a hala edi aŋ suuɗa seyemni. Won hlai n’a na suuɗaŋ ɗa, galni seyem zamai ɗa a yaka ɵimaɗi futi, a kirpa azumai pini eziɗi ɗai, wala zi ɗifli n’arbani hlai n’amai a sumaŋ.

⁶Zamai a yaka midini afti zi kriyit, won hlai n’a diya amai ɗa, a siita edi buri ɓa alam aŋ kai.

⁷Galni zamai a yaka arni hedek, hedek a diya amai gaini aŋ bonu, a rozoŋ lai.

⁸Gal na zamai a yaka midini afti na pɗem, won hlai n’a diya amai ɗa, a wa ali haa miya miya; won hlai n’a muɗa hanɗa a ɗuula a muɗa: Ni na ɵimani zi ɵini a na aga a ɵina.

⁹Ɗaini zi hiri e zilbiŋ ɓa seŋ zi siŋka maini hanɗa a siŋka ɗa a ma ɗa?

¹⁰A waya seŋ a muɗa: A sa siki tiki buri ki siɗi wazagai zi ŋoyai na wiiɗi pai na wiini Alaw, amma siɗi na zamai ɗa, a sa siɗi war seŋ zi siŋka maini, -kapai won hlai n’e tili ɗa, e tili wala ktai kai, won hlai n’e ɵini ɗa, e ɵini ezini edi kaalai.

¹¹Seŋ zi siŋka maini hanɗa a muɗa na ɗa maini nɵa: Seyem ɗa a seŋni Alaw,

¹²Nagai na ɵimani futi e ɗi nagai n’e ɵini seŋ, asakal par, Mat a halasi a mula seŋ hanɗa edi warɗi agulɗi par, kapai e yimi aŋ nivi kûri kai.

¹³Nagai na midini afti zi kriyit ɗa, e ɗi nagai na won hlai n’e ɵini seŋ li, e yimiŋ gaini firiyi, amma sirdaini warɗi kai. E yimi burini hlai n’agwi, amma won hlai na titimi a cosi li ɗa, e yimi warɗi edi.

¹⁴Ni n’a yaka arbani hedek ɗa, e ɗi nagai n’e ɵini seŋ li ɗa, e yimi, hiini gaini farai gaini diriɗi duniya lai a rozoŋ warɗi war payaiɗi, a kiɗa a wa ali n’a naya kai.

¹⁵Amma ni n’a yaka midini afti na pɗem ɗa, e ɗi nagai n’e ɵini seŋ ɗa gaini hangal na gaini tiki pɗem ta, e yimiŋ warɗi agulɗi lai, e siiki haa e wi ali.

¹⁶Won hlai n’e tiki afu li warni lampa ɗa, ɗif n’a pa wala midini aŋ kai, n’e wûti azumai pini dunu aŋ kaalai, amma e higiti amai sini wala n’e higi lampa sini, kapai nagai n’e niyisi amlai paŋ e tili gaglai ɗa.

¹⁷Buri wala zi ŋoyai n’aga a siŋka edi kai aŋ kai, wala zi kuɗuhai n’aga a sɗa edi warni gaglai kai ɗa aŋ kaalai.

¹⁸Buri nɵa, ki zi hangal gaini ɵeŋ na ki ɵini seŋ ɗa, buri ɓa ni n a wiini a na ɗa, aga a sa sini, amma ni na wiini aŋ kai ɗa, na hiina ɓa aŋ tini ɗa aga a yima edi.

¹⁹Emini gaiɗi tawalakaini e cûsi, amma e kiɗi amlai sini kai buri firiɗi ɗai.

²⁰E miɗini ɓa: Amuku gaiɗi tawalakaiku e ɗa anene, e diri e nivi gaiku.

²¹Amma a wiyiɗi seŋ a miɗiɗi: Ama gaiɗi tawalakaya e ɗi nagai n’e ɵini seŋni Alaw, e zi pini lai ɗa.

²²Mefeŋ ktai ɗa a niya war hulum n’abai gaiɗi ɗaini zi hitri, a miɗiɗi: Hulumu bundumu anene kata, e ɵi hulum edi.

²³Amma won hlai n’e ɗa ɵiki ɗa, Ni a kala weseŋ, berber n’abai a tikasi midini bal ɗa, hulum n’abai a tika pini a va gaini yem, e siɗi wala n’e zi ɗa kai.

²⁴E hili sini, e ɵiyiŋ amai e miɗini: Api zi hitri, Api zi hitri, mu bumu li. Won hlai n’a ɵiyasi amai, a ɓara smer gaini mayaw lai, a tika azumai, hlai paŋ a bunda ɗiŋ.

²⁵Asakal par a miɗiɗi: Yimiki aŋ wata ɗa? Hunai te yimiɗi e bindi hiyak, e miɗi arbaɗi marɗi: Na hanɗa asiya ɵa ɗa? A muɗa sini smer gaini yem, nagai e gidi pini lai ɗa?

²⁶E yimi amai mini afti na wiiɗi Gerazenekai n’a na ɗikat Galeliya ɗa.

²⁷Won hlai n’a pra amai tar ɗa, ɗif ktai na warni fuŋ n’abai par na gaini ksalai midini a halasi wuzani. A fana yaw, a wa sapa sini kaalai, a fana aha war dalam kaalai, amma a fana warni yeɵ.

²⁸Won hlai n’a tala Yesu a ɗuula, a kɵa azumai ezini a muɗa gaini wulani amai, a muɗa: Wala n’a tupuku gaya ɗa a maɗa, Yesu Ahini Alaw n’amai, mu siiwuku, ku turlaɗa kai.

²⁹Yesu a miɗini wiini ksalai buri a niyasi edi sini ɗif n’a sumna midini haa ɗi par ɗa par. Hlai zamai viya, ksalai a sini arni edi war basga sek, nɵa e rgiŋ gaini jaɓ, e wiini polokom ezini lai, gaini hanɗa paŋ a haɗaŋ edi.

³⁰Yesu a zilbaŋ, e yikuku maɵa ɗa? A wiyini seŋ a muɗa: Legiyon, buri ksalai a niya warni viya.

³¹Ksalai a siiwaŋ buri a ɵiniɗi war huduk na wuɗɗa kai.

³²Farani hoho n’abai a nafu woni aŋ suma amai midiɗi huwuŋ, ksalai a siiwa Yesu buri a hinaŋ a niya warni, asitiɗi futi hanɗa.

³³Ksalai a niyasi edi warni ɗif par, a niya warni hoho ɗa, farani hoho a fakasi amai par midini huwuŋ gaini rûvi, a niya agoɗom bal, a mra agoɗom kafa.

³⁴Won hlai n’e tili wala n’a za ɗa, nagai n’e giɗimi hoho ɗa e pri edi, e ki labar war fuŋ n’abai gaini fuŋ n’agogoi na ɵimani lai.

³⁵Ɗai e niyisi edi aŋ tili wala n’a za ɗa, e cûsi sini Yesu ɗa, e nivisi ɗif na ksalai a niyasi edi sini par ɗa azumai ezini Yesu dam gaini sapa sini ca gaini hangalni, hunai te yimiɗi.

³⁶Nagai n’e tili wala n’a za ɗa, e miɗiŋɗi wiiɗi marɗi gaini zûûli na ɗif zi ksalai a zuula gaini lai.

³⁷Ɗai na midini afti na wiiɗi Gerazenekai paŋ e siiwi Yesu buri a yima sini edi midini aftiɗi par, buri e ɗifu warni hunai n’abai. A niya warni hulum n’abai, a hiniɗi a hala.

³⁸Ɗif na ksalai a niyasi edi sini par a siiwaŋ buri a yimaŋ pini; Yesu a hinaŋ aŋ hala gaini kai, a miɗini:

³⁹Waya aha, muɗa wala n’Alaw a zaŋ suku paŋ wiiɗi ɗai. A hala a ɓaka warni fuŋ n’abakai ɗa paŋ midini wala na Yesu a zaŋ sini ɗa.

⁴⁰Won hlai na Yesu a wayasi ɗa, firiɗi ɗai a yimaŋ gaini firiyi buri nagai paŋ e ɗifu aŋ biyiŋ.

⁴¹Ɗif ktai yikini Yerus a cosi, ni a abai na war sinagogne, a hurga azumai ezini Yesu, a siiwaŋ buri a halaɗi ahani.

⁴²Buri Ahini ketekeɗik, te za buza doogo pi sulu, te ɗa ta aŋ mri. Won hlai n’a na hala ɗa, firiɗi ɗai e hiɵiŋ haa suŋfani a dara aŋ wula.

⁴³Muni ktai te nafu, fel a ka gaiɗi a za gobi buza doogo pi sulu, te ɓa faraiɗi paŋ edi piɗi doktorai, amma ɗif a kiɗa aŋ zûûliti kai.

⁴⁴Te suɓukasi duɓani par, te tetema mini sapani Yesu, war hlai ni tizaw, felɗi zi ki ɗa a ɗiya.

⁴⁵Yesu a muɗa: A tetemaɗa ɗa asiya ɗa? Amma won hlai na ɗif paŋ, a muɗa ɓa: a ni a ni ɗa, Peter a miɗini: Api zi hitri, firiɗi ɗai a hiɵiku, e pirɵuku gara.

⁴⁶Amma Yesu a Waya a waya seŋ: Ɗif a tetemaɗa, mu sɗa ɵa buri spak ktai a niyasi edi sa par.

⁴⁷Muni, won hlai na te tala ɓa, wala na te zaŋ ɗa azi ŋoyai kir kai ɗa, te halasi, te ziriya lai, te bula siɗi azumai wuzani Yesu, wuzani arɗi ɗai paŋ, te muɗa edi gaglai midini wala n’a kiti aŋ tika tiɗi sini pini ɗa, zûûli na te zuula woni hlai ni ɗa lai.

⁴⁸Amma a miɗiɗi: Ahiya, yimiku a zuuluku li, hala jam.

⁴⁹A nafu aŋ muɗa hai, a tala ɗa ɗif ktai na ahani abai na war sinagogne par a halasi a miɗini: Ahiku te mra su, ku huwya Api zi hitri kai.

⁵⁰Amma Yesu a ɵina seŋ hanɗa, a miɗini wiini abai na war sinagogne: Ku huna kai, yima bas, nɵa aga ku zuula.

⁵¹Won hlai n’a co aha ɗa, a hina ɗif zamai a niya amlai gaini kai, sai Peter gaini Yohana gaini Yakob, gaini epiɗi ahiyagoi gaiɗi emiɗi lai.

⁵²Ɗai paŋ e tûwi, e ɵi marava siɗi buriɗi, amma Yesu a muɗa: Ki tûwi kai, te mra kai, te kala ɗa a weseŋ.

⁵³Nagai e riyi pini buri e siɗi ɓa, te mra su ya.

⁵⁴Amma a yimiti a muɗa gaini wulani amai a muɗa: Ahiya ku faka amai.

⁵⁵Sunfaɗi a wayasi warɗi, war hlai ni tizaw te faka amai, a miɗiɗi buri e siɗi simi.

⁵⁶Tamaiɗi ahiyagoi e bindi hiyak gara; Yesu a gidiɗi miɗi buri e miɗi wala n’a za ɗa wiini ɗif kai.