Read Mousgoum Lukas 9 Bible Online

Lukas 9 - Mousgoum bible

Lukas 9

¹A yikiɗi na doogo pi sulu, a siɗi spak midini ksalai paŋ, aŋ zûûli veglek lai.

²E ɵiniɗi edi buri e ɓikiti pai na wiini Alaw, aŋ zûûliɗi nagai zi veglek.

³A miɗiɗi: ki tiki wala ktai tiki buriɗi morkoiki kaalai, amaraŋa kaalai, guɓo kaalai, wala zi simi kaalai, arzaŋ kaalai; ɗif a mula sapa sini sulu kaalai.

⁴Dalam na ki niyi li aha warni paŋ ɗa, ki simni woni ɵa, na ɓa ki hili a hili ɗa, ki fiki ɗa woni par.

⁵Woɗi paŋ na ɗai e diri e yimiki siɗi kai ɗa, won hlai na ki niyi edi warni fuŋ n’abai hanɗa par, ki ɵiɓi alogodo n’eziki ɗa edi aŋ zaida siɗi.

⁶E hili, e tiki piɗi e vigi warni fuŋ n’agogoi agogoi paŋ, e ɓiki labar na pɗem, e zûûliɗi ɗai zi veglek war hlai paŋ lai.

⁷Herod a abai na midini galni afti na wiiɗi pai n’ag'aŋ puɗu, a ɵina labarni wazagai n’a na ɗa paŋ, a tika pini a huna buri zamai e miɗi: Yohana a ɵiyasi amai arbaɗi zi mri par ɵiya.

⁸Zamai ɗa ɓa a siɗkasi sini na ɗa a Eliyas, na zamai pra ɓa, a ɵiyasi amai na ɗa, a ktai arbaɗi ɗai na mini Alaw na ɗipar.

⁹Herod a zilba sini ɓa: Yohana ɗa, mu ɗukla midini edi muta, ni na mu ɵina labar midini maini hanɗa ɵa ɗa, ni asiya ɗa? A paya futi aŋ talaŋ.

¹⁰Apostelai, won hlai n’e wiyisi edi par ɗa, e miɗini wiini Yesu gaini wazagai n’e ziŋsi ɗa paŋ. A miliɗi pini, a yima sini edi war baŋa gaiɗi ɵimani fuŋ n’abai ktai na yikini ɓa: Betsaida.

¹¹Firiɗi ɗai e siɗi hanɗa, e hili pini, a yimiɗi gaini firiyi a miɗiɗi midiɗi pai n’Alaw, a zûûliɗi nagai n’e ɗa piyi zûûli lai.

¹²Won hlai n’e tiliti futi te hala li ɗa, na doogo pi sulu e hilisi sini Yesu e miɗini: Ku tikiɗi piɗi ɗai ta kapai e hili e piyi hlai zi feŋ, e piyi wala zi simi war fuŋ na agogoi n’aŋ ɵimani hlai, buri mu ɗumu na ɗa edi warni basga.

¹³Amma a miɗiɗi: Tiki dama siɗi simi. E miɗini: Peŋ n’aŋ tiyi ɗa a suwa ɵim kai, hilif ɗe a suwa sulu kaalai, sna na ɓa tiyi dama mi hili li aŋ wirisi wala zi simi buriɗi ɗai hanɗa paŋ.

¹⁴Ɗai ɗa e zi dubu ɵim, a miɗiɗi wiiɗi ɗaini zi hitri buri e miliɗi azumai midiɗi marɗi doogo doogo ɵim-ɵim.

¹⁵E ziŋ maini hanɗa nɵa, e miliɗi azumai paŋ.

¹⁶A mula peŋ na ɵim gaini hilif na sulu lai, a bunda arni amai war hlai n’amai, a sa tese sini Alaw burini wazagai hanɗa. Asakal par a ɓurwaŋ, a tika pini a siŋɗi wiiɗi ɗaini zi hitri kapai e ɓûrwiŋ wiiɗi ɗai.

¹⁷Ɗai paŋ e simi, e vi. Pini n’a hina, e tipiŋ amai ɗa a va dologo doogo pi sulu.

¹⁸Mefeŋ ktai, won hlai n’a na siiwa edi warni baŋa, ɗaini zi hitri e ɗa gaini lai, a zilbiɗi a muɗa: Ɗai e miɗi ɗa ɓa, Ta mu asiya ɗa?

¹⁹E wiyi seŋ e miɗi: Na zamai ɗa ɓa ku Yohana zi baptisme, na zamai ɗa ɓa, ku Eliyas, na zamai pra ɓa, ku ktai arbaɗi ɗai na mini Alaw na ɗipar n’a ɵiyasi amai arbaɗi zi mri par.

²⁰A miɗiɗi: Tiki koo, ta mu siya lai ɗa? Peter a waya seŋ a muɗa: Ku Kristu na wiini Alaw.

²¹A ɓiriɗi, a gidiɗi miɗi buri e miɗi hanɗa wiini ɗif kai.

²²A muɗa pra: Ahini-ɗif ɗa aga a sɗa gir viya, n’abakai n’arbaɗi gaiɗi paakai na abakai zi ɓaka gaiɗi ɗai di ɗû wazagai aga e biliŋ edi arbaɗi par, e fiɗiŋ edi lai, war mefeŋ n’ag'aŋ hu ɗa aga a ɵiya amai.

²³A miɗiɗi wiiɗi ɗai paŋ ɓa: Na ɓa ɗif a firiya a halasi pa ɗa, a bla gaw siɗi sini dama, a tika dagrani wulani mefeŋ paŋ kapai a hala pa.

²⁴Buri asiya ɗi paŋ n’a dara a kurɗa suŋfani aga a baŋ, amma asiya ɗi paŋ n’aga a ɓa suŋfani aga a kurɗaŋ.

²⁵Na ɓa ɗif a niviti yai gaini abaiɗi paŋ, amma a ɓa sini edi, zaw a tuura sini edi ɗa, pɗem na wiini aŋ waa ɗa?

²⁶Buri nɵa asiya ɗi paŋ n’aga a za siyer buriya, burini seŋŋa lai ɗa, Ta Ahini-ɗif aga a za siyer burini lai won hlai n’aga mu wayasi warɗi abai ɗa, warɗi abai na wiini Apa, gaiɗi na wiiɗi ɗai zi ɵeŋ na war fuŋ-n’Alaw na sɗik lai.

²⁷Mu na miɗiki a jre, zamai arbaɗi nagai n’e ɗiyi woni na ɗa, aga e siɗi mri kai haa e tiliti pai n’Alaw.

²⁸Mefeŋ mitwis asakal n’a muɗa hanɗa ya, Yesu a yima Peter gaini Yohana gaini Yakob lai gaini, a niya amai midiɗi huwuŋ aŋ siiwa.

²⁹Won hlai n’a na siiwa, wuzani arni a bunda, sapa na sini a bunda muɗukwi tal.

³⁰Ɗai sulu e ɗifu gaini ca aŋ hiɗi kalaŋ, hanɗa a Musus gaini Eliyas.

³¹Nagai e siŋki siɗi edi warɗi na sini Alaw par, e miɗi midini yimini n’edi n’aga a va amai war Yeruzalem.

³²Peter gaiɗi marni weseŋ a suwa gdaŋɗi gara, won hlai n’e ɵiyi amai ɗa, e tiliti abai na wiini gaiɗi ɗai na sulu n’e ɗa gaini.

³³Won hlai na ɗai e diri e yimi siɗi edi sini Yesu par ɗa, Peter a miɗiɗi: Api zi hitri, simnumu na woni na ɗa pɗem, mu zuzunumu gumu hu, na ktai buriku, ktai burini Musus, na ktai burini Eliyas lai. Wala n’a niyasi mini par na ɗa a sɗaŋ kai.

³⁴Won hlai n’a na muɗa hanɗa, ɗugul a halasi a dûgûɗi, hunai a yimiɗi gara, won hlai n’e niyi warni ɗugul.

³⁵Arni ɗugul par, wûle a wasi a muɗa: Hanɗa a ahiya na mu varaŋ edi ɗa, ki ɵini pini.

³⁶Won hlai na wûle a wa li ɗa, Yesu a hina kiini zaw, ɗai zi hitri e wi piɗi liyik; wala na e tiliŋ ɗa, e miɗi gaini wiini ɗif kai war mefeŋ ni ɗa.

³⁷Dawaini, won hlai n’a niyasi azumai amai midiɗi huwuŋ par li, ɗai viya e hilisi sini.

³⁸Arbani firi par ɗif ktai a ɗuula a muɗa: Api zi hitri, za barka, talaŋa ahiya haw, buri ahiya ɗa a ni ketekeɗik.

³⁹Seze ktai a na sini, a yimaŋ li ɗa, tizaw a ɗuula, a gidiyaŋ gdaŋ, mini a ha meɵeɵepe, a hinaŋ gaini gir, gaini kayai gaini wuruk.

⁴⁰Mu siiwiɗi ɗaiku zi hitri buri e birgiŋ edi, amma e kiɗi kai.

⁴¹Yesu a muɗa: Pinziba na gaini yimi kai, na maafanai, aga mu sumna gaiki ɵa haa kaswata ɗa ta? Aga mu libiki ɵa haa kaswata ɗa? Kasi ahiku woni na.

⁴²Won hlai n’a na halasi sini sek ɗa, ksalai a blaŋ azumai, a gidiyaŋ gdaŋ. Amma Yesu a ɓara ksalai, a zuula arwagwi ɗa, a siŋni wiini epini ɗa lai.

⁴³Nagai paŋ e bindi hiyak buriɗi abai na wiini Alaw. Won hlai na ɗai paŋ e bindi hiyak burini wazagai paŋ n’a na zaŋ ɗa, a muɗa siɗi ɗaini zi hitri:

⁴⁴Tiki ɗa ki ɵini seŋ hanɗa pɗem, Ahini-ɗif aga a sa edi tiɗi ɗai.

⁴⁵Amma e ɵini ezini seŋ hanɗa edi kai, a nafu gaini ŋûyi cok wuzani arɗi, kapai e ɵini ezini kai; E hûni buri e zilbiŋ burini seŋ hanɗa.

⁴⁶Ɗai zi hitri e tiki piɗi e zilbi arbaɗi marɗi: Aga a za aŋ abai arbamu ɗa asiya ɗa?

⁴⁷Won hlai na Yesu a sɗa hiiniɗi, a yima arwagwi ktai a tikaŋ ɵimani ta,

⁴⁸a miɗiɗi: Asiya ɗi paŋ n’a yima arwagwi hanɗa sini war yikiŋa ɗa, a yimaŋ Muta. Asiya ɗi paŋ n’a yimaŋ Ta ɗa a yima ɗa A ni n’a ɵinaŋasi, buri ni n’a na agwi arbaki paŋ ɗa, a na abai n’arbaki.

⁴⁹Yohana a waya seŋ a muɗa: Api zi hitri, mi nivisi ɗif ktai a na birga ksalai edi war yikuku, mi piyi futi aŋ ɗiliŋ buri ni aŋ puku gaiyi kai.

⁵⁰Yesu a miɗini: Ki ɗiliŋ kai, ɗif n’a na aŋ gawki kai ɗa, a na gaiki.

⁵¹Won hlai na mefeŋni n’aga a yima amai woni a ŋasi gobi ɗa, a rga warni buri a hala a Yeruzalem.

⁵²A ɵina ɗai wuzani, nagai e fiki e hili e niyi warni fuŋ ktai na wiiɗi ɗai na Samariya buri e zizini hlai woni.

⁵³E yimiŋ siɗi kai, buri a hala na ɗa a Yeruzalem sek.

⁵⁴Won hlai na ɗaini zi hitri: Yakob gaini Yohana e tili hanɗa, e miɗi: Epiɗ-ɗai, ku dara ɓa mi yikisi afu war hlai n’amai par a halasi a yiɗi edi ɗi?

⁵⁵A bunda arni siɗi, a ɓiriɗi;

⁵⁶E hili warni fuŋ zamai.

⁵⁷Won hlai n’e ɗa warɗi futi yaw, ɗif ktai a miɗini: Mu dara mu tapa puku woɗi paŋ na ku dara ku hala.

⁵⁸Yesu a miɗini: Wuɗi ɗa, waŋni a na, wala zi ɗifli n’arbani hlai n’amai gutni a na lai. Amma Ahini-ɗif ɗa, hlai n’a sumna woni buri sini amla maa aŋ kai.

⁵⁹A miɗini wiini na zamai: Tapasi pa. Amma ɗif a miɗini: Epiɗ-ɗai, hinaŋa mu hala mu pasi apa tiɓ haw.

⁶⁰Yesu a miɗini: Hiniɗi zi mri e pi ɗai ɗi zi mri, tuku ɗa, hala aŋ ɓikiti pai n’Alaw ɗa edi.

⁶¹Ɗif zamai a miɗini: Epiɗ-ɗai, mu firiya mu tapa puku, amma ku hinaŋa mu miɗiɗisi wiiɗi ɗai n’ahaya ta haw.

⁶²Yesu a miɗini: Asiya ɗi paŋ n’a faka li aŋ hirma gaini saret, na ɓa a tala arni duɓani sek ɗa, a nafa warɗi pai na wiini Alaw kai.