Read Mousgoum Wiyi na midini gadai 1 Bible Online

Wiyi na midini gadai 1 - Mousgoum bible

Wiyi na midini gadai 1

¹Tili hanɗa a seŋ na Musus a siŋɗi wiiɗi aliɗi Izrayel paŋ, anene a kata tini Yurdan par, piɗi futi na dawai par, war baŋa na wiini basga na taɗak, gobi gaiɗi fuŋ n’abai na Suf. Baŋa zi basga na taɗak a na arbaɗi fuŋ n’abai na Paran gaini vilkai zamai: Tofel, Lavan, Hacerot gaiɗi Di-Zahab.

²Mogoni hili na war Horeb par haa a Kades-Barneya a za mefeŋ -pi kitai war futi na te hala direk siɗi huwuŋ na Siyir ɗaw ɗa.

³Buza doogo doogo puɗu, asakal niyi n’edi na wiiɗi aliɗi Izrayel warɗi Egipte par, war mefeŋ n’avut na wiini tile n’ag'aŋ -pi kitai, Musus a muɗa edi wiiɗi aliɗi Izrayel gadai na wiini EPIƊ-ƊAI na siŋni aŋ miɗiŋɗi.

⁴Won hlai na Musus a riɗa amai midini Sihon, pai na wiiɗi Amoritekai, n’e ɗifu aŋ fuŋ war Hesbon, asakal par a riɗa amai midini Og, pai na wiiɗi Bazaŋ, n’a za simnini a Astarot war Edre.

⁵War galni Yurdan na piɗi futi na dawai par, warɗi yai na wiiɗi Mowab, Musus a tika pini aŋ siŋkiɗi edi gadai na wiini Alaw hanɗa.

⁶Epiɗ-ɗai Alaw na wiimu, a muɗumu a Horeb, a muɗa: ki simni mefin viya, aziɗi huwuŋ hanɗa.

⁷Wiyi, tikiti futi aŋ niyi arbani huwaŋai na wiiɗi Amoritekai, ahaɗi ɗai zi fuŋ na ɵimaɗi lai, na Kananiyakai: war baŋa na wiini Yurdan, won hlai zi huwaŋai, war gal hlai n’amai sek, haa mini daŋ na wiini yem-ra n’abai: Mediteraneya, hili haa sini huwaŋai na wiiɗi Liban, haa sini ra n’abai, n’e yikiŋ ɓa Efrat.

⁸Tili mu sitiki yai hanɗa, niyi warɗi, tikiti yai hanɗa, EPIƊ-ƊAI a ha mini buri a sitiɗi wiiɗi tamaiki: Abraham, Isak gaini Yakob gaini pinzibaɗi lai.

⁹Musus a muɗa won hlai na mu ɗumusi ka war Horeb, mu miɗiki ɓa: ta ktai mu kiɗa kai zaŋ aŋ liba gimaki, aŋ ɵa wuzaki lai.

¹⁰Epiɗ-ɗai Alaw na wiiki a sisɗiki viya, tiyana ki bindi viya maini meɵek n’amai war fuŋ n’Alaw nɵa.

¹¹A dara ɓa Alaw na wiiɗi tamaiki a sisɗiki azi dubu viya pra, a ɓikiki maini a za nkam nɵa.

¹²Mu kiɗa kai ta kiya ktaiaŋ liba gima na wiini seŋki, zizini seŋ n’arbaki gaini sispai lai.

¹³Amma ki viri ɗai marbaki war pinzibaki paŋ, ɗai na yalakai, na karɗi n’e siɗi seŋ, aga mu miliɗi miɗiki aŋ ɗai zi ziti sariya.

¹⁴Amma tiki lai ki wiyiŋa seŋ ɓa: seŋ na ku miɗiŋyi hanɗa a pɗem.

¹⁵Nɵa mu viriɗi ɗai war pinzibaki par paŋ, ɗai na yalakai, ɗai na karɗi, mu tikɗi aŋ paakai miɗiki: paakai na wiiɗi ɗai dubu ɗaw, paakai na wiiɗi ɗai na miya, paakai na wiiɗi ɗai na doogo-doogo-ɵim, paakai na wiiɗi ɗai na.

¹⁶Nɵa mu siɗi gadai wiiɗi paakaiki zi ziti sariya maini nɵa: aga ki tili seŋ arbaɗi tawala kaiki won hlai na seŋ a na arbaɗi gaiɗi marɗi, aga ki zitiɗi sariya war jre, ahiɗi Izrayel gaini tawalni zaw gaini ɗi na morkoi na n’aŋ war dalamni.

¹⁷Warɗi ziɗi sariya aga ki ɓirwiɗi arɗi ɗai kai, aga ki ɵini mini na murga kalkal maini ɗif n’abai nɵa lai. Aga ki hûni arni ɗif kai, buri sariya te wiini Alaw. Seŋ na ki ziziniŋ ɓa ki tiliŋ aga gdaŋ, ki kiŋsi wuza, aga mu ɵinaŋ aga mu talaŋ lai.

¹⁸Buri nɵa mu siki gadai paŋ midini wala n’aga ki ziŋ.

¹⁹Asakal hanɗa pini miɗi na wiini EPIƊ-ƊAI alau na wiimu, a sumu futi buri ɓa, mu fukumu edi eziɗi huwuŋ na Horeb par, nɵa mu vugumusi basga n’abai taɗak na gir woni gara na ki siɗiŋ ya. Asakal par mu hulumu siɗi huwuŋ na woni, Amoritekaieɗa woni aŋ fuŋ, nɵa mi sumnumu lai a Kades-Barneya.

²⁰Won hlai ni mu miɗiki: ki sûsili gobi gaiɗi yai zi huwaŋai na wiiɗi Amoritekai, na Epiɗ-ɗai Alaw na wiimu a sitimu.

²¹Tili Epiɗ-ɗai Alaw na wiiki, a sitiki wuzaki yai hanɗa, fiki amai tikiti aŋ bulum maini Epiɗ-ɗai Alaw na wiiki a za nkam nɵa. Ki hûni kai, ki ɗiyi gdaŋai.

²²Nɵa tiki gaini hlaiki ki hilisi sa ki miɗiŋa: ɵinimu ɗai wuzamu aŋ tiliti yai hanɗa haw kapai e kumusi seŋ midiɗi, nɵa aga mu siɗumu hilimu n’aga mu hiliŋmu, sini vilkai na wataɗa aga mu dubumu lai.

²³Nɵa hiiniki a tala wuzani ara pɗem, mu vara ɗai -pi-sulu war pinziba paŋ ɗif ktai ktai.

²⁴E hili, e niyi midiɗi huwuŋ ɗaw, e cû haa wulaɗi avai na Eskol ɗa, e tilitisi ba ba.

²⁵E riwisi alini luwoŋai na midini afti ni par tiɗi, e kiŋsi, e zumu zaida lai, e miɗi: Afti na EPIƊ-ƊAI na wiimu aga a suŋmu na ɗa, a afti na pɗem gara.

²⁶Amma ki diri kai ki fiki amai sini gadai na wiini EPIƊ-ƊAI na wiiki

²⁷Ki ŋûriyi amlai par warni dugokaiki, aŋ miɗi maini nɵa: EPIƊ-ƊAI a firiya a zumu meefeŋ, won hlai n’a mulumusi edi war Egipte par. A firiya a sumu edi tiɗi gawmu na Amoritekai ɗa, kapai e fuɗumu edi.

²⁸Buri ma ɗa mu hulumu woni ɗa? Tawala kaimu e mulumu hunai pumu sa, buri tawala kaimu e zimu zaida midiɗi ɗai na warɗi yai hanɗa ɓa e ɗi ɗai na abakai gara, mogokai, viya lai, e suwumu, vilkaiɗi lai abakai gaini ɵaga sini gdaŋ lai, mogokai, e niviɗi ziba woni pra, zibani Anak.

²⁹Mi wiyiki seŋ ɓa ki ziriyi kai, ki hûniɗi kaalai.

³⁰Epiɗ-ɗai Alaw na wiiki na hala wuzaki, ni gaini midini dama aga a hitima buriki, kalkal maini a zaŋ buriki warɗi Egipte wuzani arki nɵa.

³¹Warni basga na taɗak lai, woni ki siɗi Epiɗ-ɗai Alaw na wiiki, a libiki maini ɗif n’a liba ahini nɵa warɗi futi na muguwi zi hili na te kikisi woni hlai hanɗa.

³²Gaini hanɗa paŋ tiki ki biyi tini EPIƊ-ƊAI na wiiki kai.

³³Ni n’a paya wuzaki blaŋ warɗi futi gaiki, aŋ piyiki hlai zi simni zi kaŋ. War duvuk anfu wuzaki warɗi futi gaini ɗugul z'afu aŋ za gaglai wuzaki, war girvudi anfu wuzaki warɗi futi gaini ɗugul z'agiyiŋ.

³⁴EPIƊ-ƊAI a ɵina tuwi na wiini maravaki na ki miɗiŋ. Ni a faka gaiɗi suwar a ha wala mini lai.

³⁵Vunaɗi ɗai na maafanai hanɗa, ɗif ktai arbaɗi aga a tiliti kai zaŋ yai na pɗemi na mu ha wala ma aŋ sitiɗi wiiɗi tamaiɗi.

³⁶Sai Kaleb ahiniYefune: ni aga a tiliti, wiini aga mu sitini, wiiɗi alini lai, yai n’a payasi woɗi hanɗa. Buri a ɵina pa gaini girŋi warɗi agulni kai zaŋ.

³⁷Buriki tiki, EPIƊ-ƊAI lai a faka suwar amai sa. A muɗaŋa: tuku nɵa lai Musus tuku aga ku niya a ha warɗi yai hanɗa kai zaŋ.

³⁸Amma Yosva ahini Nun, ni n’a na aŋ ɵeŋku, aga a niya warɗi, zizinaŋ gdaŋ lai, a ni na aga a kiɗi aliɗi Izrayel aŋ tikiti yai aŋ bulum.

³⁹Amma aliki na ki miɗi ɓa aga e miliɗi aŋ bagakai, aliki na e siɗi ɓraw arbani wala na meefiŋ gaini na pɗem kai, nagai aga e niyi a ha warɗi yai hanɗa. Aga mi sitiɗi yai hanɗa wiiɗi nagai, nagai aga e tikiti aŋ bulum.

⁴⁰Amma tiki ki wiyi dubaki, ki hili edi war basga, ki tikiti futi na te hala tar war yem n’abai na wiini vayai.

⁴¹War yivai ni ki wiyiŋa seŋ ɓa: mi zi tuwur sini EPIƊ-ƊAI, tiyana mi firiyi ɓa mi hili fu aŋ hatam, maini Epiɗ-ɗai Alaw na wiyi a gidiyi nɵa. Ɗif paŋ arbaki a mula wazagaini zi hatam sini, buri hili na mini gaw. Kiini ɓa a wala na gobi, buri tikiɗi yai zi huwaŋai hanɗa.

⁴²Nɵa EPIƊ-ƊAI a muɗaŋa: miɗiɗi buri e hili war hatam kai, buri muta muna marbaɗi kai. Ki ki siki edi wiiɗi gawki kai.

⁴³Mu ziki zaida midini hanɗa, amma ki ɵini seŋ hanɗa kai. Ki fiki amai sini miɗi na wiiniEPIƊ-ƊAI, amma gaini kûlinisi n’abai ki fiki amai ki hili siɗi yai zi huwaŋai.

⁴⁴Nɵa Amoritekai na e ɗa aŋ fuŋ woni, e hisi azumai arki sek. E hitimiki, e riɗi amai miɗiki lai warɗi yai na e yikiti ɓa Seyir, maini ami nɵa e birgikisi haa a Hormo.

⁴⁵War wiyikisi n’a ha, ki tûwi wuzani EPIƊ-ƊAI, amma a ɵinki kai. A zaga ɵimani mini seŋki kai.

⁴⁶Ki simni haa mefeŋ viya war Kades-Barneya.