Read Mousgoum Wiyi na midini gadai 10 Bible Online

Wiyi na midini gadai 10 - Mousgoum bible

Wiyi na midini gadai 10

¹War mefeŋ ni ɗa EPIƊ-ƊAI a muɗaŋa: ku kirha ali-fuŋ na babɗamai sulu maini n’avut ɗa nɵa, niyasi amai sa midiɗi huwuŋ gaini, ku za Zunduk zi luwuŋ ktai lai.

²Aga mu ɗo seŋ n’a naka warni ali-fuŋ na babɗamai n’avut na ku haaɗaŋ edi warni, asakal par ɗa ku mulaŋ warni Zunduk ɗa.

³Mu zizina Zunduk gaini luwuŋ Akasiya, mu kirha ali-fuŋ na babɗamai sulu maini n’avut ɗa nɵa, mu niya amai midiɗi huwuŋ gaini ali-fuŋ na babɗamai war ta.

⁴EPIƊ-ƊAI a ɗo seŋ n’a naka warni ali-fuŋ na babɗamai n’avut, gadai na doogo n’a miɗiŋkisi amai midiɗi huwuŋ par, amlai arni afu par war mefeŋ na wiini diŋgi ɗa, asakal par EPIƊ-ƊAI a saŋŋasi ta.

⁵Mu niyasi azumai midiɗi huwuŋ par, mu mula ali-fuŋ na babɗamai amlai warni Zunduk na mu zaŋ ɗa, a hina warni ɵa maini n’EPIƊ-ƊAI a muɗaŋa nɵa.

⁶Aliɗi Izrayel e fikiɗi a Berot-Bene-Yaakan par aŋ hili a Mosera, Aaron a mra woni, e piŋ woni lai. Eliyazar n’ahini a bunda aŋ pai zi ɓaka war balamni.

⁷E fikiɗi woni par e hili a Gudgoda, a Gudgoda par e hili a Yotbata, afti na arakai woni viya.

⁸War mefeŋ ni ɗa, EPIƊ-ƊAI a viriɗi pinzibani Levi ɗa aŋ libi Zunduk na wiini bonu n’EPIƊ-ƊAI a zaŋ gaiɗi, aŋ ɗiyi wuzani EPIƊ-ƊAI, aŋ zi sdani, aŋ ɓikiɗi ɗai war yikini haa girna.

⁹Pinzibani Levi e hini aftiɗi arbaɗi tawalakiɗi kai na ɗa buri hanɗa. Bulum na wiini ɗa a EPIƊ-ƊAI, maini n’Epiɗ-ɗai Alaw na wiiki a muɗa gaini nɵa.

¹⁰Nɵa mu hinasi amai midiɗi huwuŋ mefeŋ doogo doogo puɗu maini n’avut ɗa nɵa, duvuk gaini girvudi paŋ. EPIƊ-ƊAI a ɵina tûwiŋa pra, a hina hiina na ɓa a vidiki edi ɗa mak.

¹¹EPIƊ-ƊAI a muɗaŋa: faka amai, ɵa wuzaɗi ɗai ɗa, kapai e hili e tiki afti na mu ha wala ma wiiɗi tamaiɗi ɓa aga mu siŋɗi ɗa.

¹²Tiyana ɗa ɗai na Izrayel, wala n’Epiɗ-ɗai Alaw na wiiki a firiya siki par tiɓ ɗa a maɗa? A firiya ɓa ki sini hormo, ki zi pini dirini, ki diriŋ, ki zi ɵeŋni lai gaiɗi agulki paŋ gaini suŋfaɗi agulki paŋ,

¹³A firiya ɓa ki zi pini gadaini gaini gadaini zi ɗû na mu na siŋki girna na ɗa kapai ki simni ɵeɗ.

¹⁴Hlai n’amai gaini hlai n’amai par midini, afti gaini wazagai na warni paŋ a wiini EPIƊ-ƊAI.

¹⁵Ɗipar ɗa, EPIƊ-ƊAI a diriɗi e ɗi tamaiki, asakalɗi nagai par a diriɗi e ɗi pinzibaɗi, arbaɗi pinzibaɗi ɗai paŋ ɗa a viriki ki ɗi tiki maini na ki ɗa tiliŋ girna ɗa nɵa.

¹⁶Ki ɵi gûrgle wiiɗi agulki, ki zi siki hiraŋai kai,

¹⁷buri ɓa Epiɗ-ɗai Alaw na wiiki ɗa a Alaw na wiiɗi alawai, a Epingezaɗi epingezakaiɗi ɗai paŋ, a Alaw n’abai zi spak, na ɗif a ɗiya mini kai, n’a za ɓraw arɗi ɗai kai, a yima katu tini ɗif par kapai a arni sini jre ɗa kai.

¹⁸A ɗiya jre na wiiɗi ɗai huyokai gaiɗi falakai na war greŋ, a diriɗi ɗai zi zak n’e simni arbaki, a siɗi wala zi simi gaini sapa lai.

¹⁹Ki diriɗi ɗai zi zak n’e simni arbaki ɗa, buri ɓa tiki lai ki ɗisi ka aŋ ɗai zi zak war Egipte.

²⁰Aga ki sini hormo wiini Epiɗ-ɗai Alaw na wiiki, ki zi ɗa a ɵeŋ na wiini, ki zi bonuki gaini Ni, ki hi wala miki gaini yikini lai.

²¹Ni ɗa a kol na wiiki a Alaw na wiiki, ni n’a za sda n’abakai zi mili hunai pini ɗif arbaki, na ki tiliŋ gaini arki na ɗa A ni.

²²Tiyakaiki e hili aha war Egipte sek ɗa ɗai doogo doogo muguzak, amma tiyana ɗa Epiɗ-ɗai Alaw na wiiki a bindiki viya maini meeɵek n’arbani Hlai n’amai nɵa.