Read Mousgoum Wiyi na midini gadai 11 Bible Online

Wiyi na midini gadai 11 - Mousgoum bible

Wiyi na midini gadai 11

¹Aga ki diri Epiɗ-ɗai Alaw na wiiki, mefeŋ paŋ ki zi pini wala n’a gidiki gaini, ki yimi gadaini zi ɗû gaini gadaini zi ɗiyi gaini gadaini lai.

²Girna ɗa, mu miɗiɗi na ɗa wiiɗi aliki kai, nagai ɗa e tili wala n’Epiɗ-ɗai Alaw na wiiki a zaŋ ɗa, e sɗiŋ kaalai, Amma mu miɗiki na ɗa wiiki tiki na ki tiliti abaini gdaŋni gaini spakni lai gaini arki.

³Wazagai zi siŋki gaini sda n’a zaŋ aha war Egipte sini Faraw pai n’Egipte, midini aftini paŋ.

⁴Wala n’EPIƊ-ƊAI a zaŋ siɗi askarai na wiiɗi Egipte, sini plasai gaini Saretaiɗi; wiyi n’a wayasi yem na warni yem-ra n’abai na mekele Won hlai n’e ɗa tiki futi piɗi, EPIƊ-ƊAI a vidiɗi edi gamai haa girna.

⁵Wala n’a zaŋ buriki edi war basga na kaɗataŋ haa sini giziki na woni na.

⁶Wala n’a ziŋni wiini Datan gaini Abiram n’alini Eliyaɓ n’ahini Ruben, wuzaɗi aliɗi Izrayel afti a mala mini edi a rɓiɗi gaini pakataiɗi paŋ, gumuɗi paŋ, gaiɗi nagai n’e tiɓi piɗi paŋ lai.

⁷Ki tili sda n’abai na wiini EPIƊ-ƊAI n’a zaŋ ɗa gaini arki mal.

⁸Nɵa aga ki zi pini gadai na mu siŋki girna na ɗa paŋ kapai ki nivi gdaŋ ki hili aŋ tiki afti na ki ɗa hili sini sek aŋ tikiŋ na ɗa,

⁹kapai ki mri gob kai midini afti n’EPIƊ-ƊAI a ha wala mini wiiɗi tamaiki ɓa aga a siŋɗi wiiɗi nagai gaini pinzibaɗi lai, afti na fiyaw gaini emelni ami a ka woni ɗa.

¹⁰Buri afti na ki ɗa hili aŋ tikiŋ na ɗa, a na maini afti n’Egipte na ki hilisi woni par ɗa nɵa kai. Woni, Won hlai na ki bili seyemki li azumai ɗa, ki mi yem pini maini n’e ziŋ warni zardeŋ ɗa ɵa.

¹¹Afti na ki hili aŋ tikiŋ na ɗa, afti zi huwaŋai gaini hudokai, a ɵa midini ɗa a faŋ.

¹²A afti n’Epiɗ-ɗai Alaw na wiiki a tikini hangal, n’arni a na kureɗ midini war pini zi tiki na wiini buza par haa sini dibini.

¹³Na ɓa ki zi li jre jre pini gadai na mu na siŋki girna ɗa, na ɓa ki diri Epiɗ-ɗai Alaw na wiiki, ki zi ɵaŋni lai gaiɗi agulki, gaini suŋfaɗi agulki paŋ lai ɗa,

¹⁴EPIƊ-ƊAI aga a hina faŋ a ɵa midini aftiki war sartini, faŋ na guɵur gaini faŋ na awal, nɵa aga ki hiɗi algama gaini futini, ki nivi vin na hehe gaini futini, emel gaini futini lai.

¹⁵Aga a hina kuzum a diya amai kapai faraiki a suma pɗem, tiki ɗe ki simi maini na ki diri nɵa lai.

¹⁶Ki zi hangal, ki hini ɗif a dûliki haa ki hiniti futi na wiini EPIƊ-ƊAI edi kai, ki zi ɵeŋni alaw zamai kai, ki hûrgi azumai wuzaɗi kaalai

¹⁷Na ɓa ki zi li maini hanɗa ɵa ɗa, EPIƊ-ƊAI aga a za hiy siki, aga a mini Hlai n’amai faŋ aga a ɵa kir kai, afti aga a sa seyemni kir kai, tiki aga ki vidi edi midini afti na pɗem n’EPIƊ-ƊAI aga a siŋki par witaw tar.

¹⁸Seŋ na mu na miɗiŋki na ɗa ki yimiŋ warɗi agulki, sini suŋfaɗi agulki lai, ki rgiŋ wulani tiki, ki rgiŋ amai midini arki aŋ wala zi siŋki.

¹⁹Aga ki hitriŋɗi wiiɗi aliki. Ki hitriŋɗi Won hlai na ki ɗi aha sa, Won hlai na ki ɗi warɗi futi yaw, Won hlai na ki fini azumai sek, Won hlai na ki ɵiyisi azumai par lai.

²⁰Aga ki ɗûŋ sini luwuŋ n’e pi porte sini ɗa, sini porte na wiini magala na mini fuŋ n’abakai ɗa lai.

²¹Nɵa mefeŋki gaini mefeŋ na wiiɗi aliki midini afti n’EPIƊ-ƊAI a ha wala mini ɓa aga a siŋɗi wiiɗi tamaiki, aga a za viya. Na ɓa Hlai n’amai ɗa a vada kai ɗi, mefeŋki tiki aga a vada kaalai.

²²Buri ɓa, na ɓa ki yimi gadai na mu siŋki hanɗa paŋ jre jre, ki zi pini lai, ki diri Epiɗ-ɗai Alaw na wiiki, ki zi pini wala n’a miɗiki gaini paŋ, ki zi bonu gaini alaw zamai kaalai ɗa,

²³nɵa EPIƊ-ƊAI aga a birgiɗi pinziba hanɗa paŋ edi wuzaki, aga ki tiki aftiɗi na wiiɗi pinzibaɗi ɗai na viya e sûwiiki, na spak e sûwiiki lai.

²⁴Hlai paŋ na buburni eziki a tetemaŋ li ɗa, aga a sa siki, aftiki aga a tikasi pini amai par sini basga na kaɗataŋ haa a Liban war gal n’azumai sek, sini ra n’abai Öfrata piɗi futi dawai par, haa sini yem-ra n’abai Mediteraneya piɗi futi na koskoi sek lai.

²⁵Ɗif aga a ɗiya miki kai, Epiɗ-ɗai Alaw na wiiki aga a hina hunai gaini hunai n’abai a yimiɗi ɗai wuzaki midini afti paŋ n’aga ki vigi maini n’a miɗiŋki ɗa nɵa.

²⁶Slini pɗem, girna mu na tika ɓiki gaini tusa wuzaki, ki viri arbani,

²⁷na ɓa gadai na wiini Epiɗ-ɗai Alaw na wiiki na mu na siŋki girna na ɗa, ki zi li pini ɗa, ɓiki aga a sumna miɗiki,

²⁸amma na ɓa ki zi pini gadai na wiini Epiɗ-ɗai Alaw na wiiki kai, na ɓa ki hiniti futi na mu na siŋkitiki girna na ɗa edi li, ki tiki futi pini alawai na zamai na ki siɗiŋ kai ɗa, tusa aga a sumna miɗiki lai.

²⁹Won hlai n’Epiɗ-ɗai Alaw na wiiki a kiki li aha midini afti n’aga ki tikiŋ aŋ wiiki ɗa, aga ki ɓikisi amai par midiɗi huwuŋ Garizim, ki tûsisi amai par midiɗi huwuŋ Ebal lai.

³⁰Huwoŋai hanɗa aŋsi anene par duɓani Yurdaŋ piɗi futi na koskoi sek, midini afti na wiiɗi Kananiyakai n’e simni midini hlai na plas na Araba wuzaɗi Gilgal gobi gaini luwoŋai n’abakai na More.

³¹Tiyana aga ki vigi Yurdaŋ ɗa, ki hili aŋ tiki afti n’Epiɗ-ɗai Alaw na wiiki a siŋki ɗa, aga ki tikiŋ, ki simni warni lai.

³²Aga ki fiɗi was aŋ zi pini gadai zi ɗû gaini gadai zi ɗiyi na mu na siŋki girna na ɗa.