Read Mousgoum Wiyi na midini gadai 12 Bible Online

Wiyi na midini gadai 12 - Mousgoum bible

Wiyi na midini gadai 12

¹Gadai zi ɗû gaini zi ɗiyi n’aga ki fiɗi was aŋ zi pini midini afti n’Epiɗ-ɗai Alaw na wiiki aga a siŋki ki tikiŋ aŋ wiiki, haa sini dibini suŋfaki na midiɗi yai ɗa ta a na maini nɵa:

²Hlai na pinziba aga ki birgiɗi edi e siiwi alawai na wiiɗi woni, ki tûriŋ edi marwai, hlai n’amai midini huwoŋai, na midini boŋorai gaini n’azumai pini luwoŋai n’a guɗa paŋ lai.

³Ki hû gûwiŋ zi ɓaka na wiiɗi azumai, ki gɵi ali-fuŋ n’e ɗiyiŋ amai zaw zaw aŋ alawai edi, ki yi luwuŋ z'alaw na wiiɗi edi, alawai zi rgi na wiiɗi ki hiɗiŋ edi, ki hizi yikini alawai ni ɗa edi war hlai ni par.

⁴Tiki aga ki zi sini Epiɗ-ɗai Alaw na wiiki maini na nagai e zi ɗa nɵa kai.

⁵Tiki aga ki hûrgi azumai wuzani Epiɗ-ɗai Alaw na wiiki ɗa sai woni hlai n’aga a varaŋ arbani pinzibaki paŋ, kapai yikini a yika warni Ni a sumna warni lai ɗa, ki hili ɗa war hlai ni ɗa;

⁶Aga ki ki ɓaka zi yi na wiiki gaini ɓakaki, gaini doogono wazagaiki, gaini wazagai na ki siŋ pini diriki, gaini ɓaka na ɗif a zaŋ pini ɵinini-ha, zaw na pini dirini tizaw, gaini alini ɵaakaiki n’a wa avut gaini alini adumai gaini haakaiki n’a wa avut ɗa lai woni.

⁷Aga ki simi simi na sɗik hanɗa war Hlai na sɗik na wiini Epiɗ-ɗai Alaw na wiiki aŋ bonu gaiɗi pakataiki war firiyi buri Epiɗ-ɗai Alaw na wiiki a ɓikiki war sdaki na ki ziŋ ɗa paŋ.

⁸Aga ki zi maini na girna mu ɗuma zuŋmu, na ɗif paŋ a za pini dirini na ɵa kai.

⁹Buri tiki ki sû midini afti zi si'amla n’Epiɗ-ɗai Alaw na wiiki a siŋki aŋ bulum kai hai.

¹⁰Won hlai na li vigi ra na Yurdan ɗa li, ki simni li midini afti n’EPIƊ-ƊAI na wiiki a siŋki aŋ bulum, a piliki li edi tiɗi gawki n’gûniki azumai ɗa paŋ par, a siki si n’amla, ki simni li ɵeɗ lai ɗa,

¹¹Aga ki kisi wazagai na mu zilbaŋ tiki Won hlai n’Epiɗ-ɗai Alaw na wiiki a varaŋ kapai e yiki yikini warni ɗa, maini: ɓaka zi yi, zaw ɓaka, zaw doogoni wazagaiki, gaini wazagai na ki siŋ pini diriki, gaini wazagai n’a rga warki aŋ siŋ sini EPIƊ-ƊAI pini ɵinini-ha na ki ziŋ.

¹²Aga ki firiyi wuzani Epiɗ-ɗai Alaw na wiiki: tiki gaiɗi aliki na maɵagai gaiɗi na falakai, bagakaiki na maɵagai gaiɗi na falakai, gaini Levitekai n’e ɗa arbaki lai buri nagai ɗa afti na wiiɗi zi bulum a na arbaki kai.

¹³Ki zi hangal kapai ki zi ɓakaki zi yi won hlai zi ɓaka paŋ na ki niviŋ ɗa kai.

¹⁴Aga ki zi ɓaka zi yi hanɗa, sai woni hlai n’EPIƊ-ƊAI aga a varaŋ midini afti wiini pinziba ktai arbaki; wala paŋ na mu miɗiki gaini ɗa, ki ziŋ ɗa warni.

¹⁵Gaini hanɗa paŋ na ɓa ki firiyi ki limi neŋ ɗa, ki kiɗi ki fiɗi wala n’ezini puɗu warni hlai na ki ɗa woni, pini ɓiki n’Epiɗ-ɗai Alaw na wiiki a saŋ siki ɗa, ɗif na hi-hir gaini na sɗik paŋ a luma paŋ maini na ɓa e limi na ɗa a Widre zaw Bariyam ɵa.

¹⁶Amma aga ki simi felni wala kai, ki miŋ azumai midini afti maini yem nɵa.

¹⁷Aga ki simi doogoni algamaki gaini na wiini vin na hehe, gaini na wiini emel, gaini ali ɵaakaiki n’a wa avut, gaini adumaiki, gaini haakaiki war fuŋki n’abakai kai. Aga ki simi ɓaka paŋ n’a za pini ɵinini-ha, zaw ɓaka na tizaw pini dirini ɗif gaini wazagai n’a sa sini Alaw pini dirini ɗif ɗa kaalai.

¹⁸Amma aga ki simiŋ ɗa wuzani Epiɗ-ɗai Alaw na wiiki, war hlai n’a varaŋ ɗa, aga ki simiŋ gaiɗi aliki na maɵagai gaiɗi na falakai, gaiɗi bagakaiki na maɵagai gaiɗi na falakai gaiɗi levitekai n’e ɗa war fuŋki n’abakai lai, aga ki firiyi wuzani Epiɗ-ɗai Alaw na wiiki gaini derki n’aŋ tiki paŋ.

¹⁹Ki zi hangal, ki wili miɗiki gaini miɗiki gaini Levitekai ɗa kai, haa mri a yimiki midini aftiki par.

²⁰Won hlai n’Epiɗ-ɗai Alaw na wiiki a riya aftiki edi li maini n’a miɗiŋki nɵa ɗa, na ɓa sunani neŋ zi limi a yimiki li lai, aga ki limi neŋ maini na ki diri nɵa.

²¹Na ɓa hlai n’Epiɗ-ɗai Alaw na wiiki a varaŋ kapai e yiki yikini warni ɗa a na gaigai ɗa, ki kiɗi ki fiɗi ɵaakaiki gaini adumaiki gaini haakaiki n’Epiɗ-ɗai Alaw a siŋki ɗa maini na mu miɗiŋki nɵa. Ki kiɗi ki limiŋ warni fuŋki n’abakai maini na ki diri nɵa.

²²Ɗif paŋ a luma paŋ, koo ɓa a wala na hi-hir, koo ɓa a na hilu aga ki limiŋ maini na ɓa e limi na ɗa a Widre, zaw Bariyam ɗi nɵa.

²³Amma ki zi hangal ki simi fel ɗa kai, buri ɓa fel ɗa a suŋfa, aga ki simi suŋfa gaini neŋ kai.

²⁴Aga ki simiŋ kai, ki miŋ azumai midini afti maini yem nɵa.

²⁵Aga ki simiŋ kai, kapai ki simni ɵeɗ, tiki gaiɗi aliki na duɓaki sek, buri ɓa ki zi wala n’a sa firiyi EPIƊ-ƊAI.

²⁶Wazagai n’aga ki kiŋsi war hlai n’EPIƊ-ƊAI a varaŋ ɗa, a wazagai na ki siŋ edi aŋ wiini EPIƊ-ƊAI gaini ɓaka n’a za pini ɵinini-ha ɗa lai.

²⁷Na ɓa a ɓaka zi yi ɗa, ki zi ɓaka gaini neŋ gaini fel lai midini Gûwiŋ zi ɓaka na wiini Epiɗ-ɗai Alaw na wiiki. Amma fel na wiini wala zi ɓaka zi ɵeɗ ɗa, ki miŋ midini Gûwiŋ zi ɓaka na wiini EPIƊ-ƊAI, neŋni ki limiŋ.

²⁸Ki yimi seŋ na mu miɗiŋki hanɗa pɗem, ki zi pini lai, nɵa aga ki simni ɵeɗ, tiki gaiɗi aliki na duɓaki sek haa kureɗ, buri ki zi wala n’a tala wala n’arni Epiɗ-ɗai Alaw na wiiki pɗem, n’a firiya burini lai.

²⁹Won hlai n’Epiɗ-ɗai Alaw na wiiki a vidiɗi pinziba n’aga a birgiɗi edi wuzaku li, won n’a birgiɗi li edi, tiki ki simni li midini aftiɗi ɗa,

³⁰Won hlai na mu vidiɗi li edi wuzaki ɗa, ki zi hangal kapai ki kɵi warni azaw na wiiɗi, ki zi maiɗi nɵa kai, aga ki yimi labar midini alawai na wiiɗi kai, aga ki zilbi siki ɓa pinziba hanɗa e ɗika e zi ɵeŋni alawai na wiiɗi na ɗa maɵa maɵa ɗa, tiyi lai mi firiyi mi zi maiɗi nagai nɵa, ki zi hanɗa kai.

³¹Tiki aga ki zi sini Epiɗ-ɗai Alaw na wiiki maini nɵa kai, buri nagai e zi wazagai na haharai viya n’EPIƊ-ƊAI a daraŋ kai haa e yiɗi aliɗi na maɵagai gaiɗi na falakai edi wiiɗi alawaiɗi aŋ ɓaka.