Read Mousgoum Wiyi na midini gadai 13 Bible Online

Wiyi na midini gadai 13 - Mousgoum bible

Wiyi na midini gadai 13

¹Wazagai na mu gidiki gaini paŋ, fiɗi was aŋ zi pini, ki tiki amlai mini kaalai, ki tiki edi warni par kaalai.

²Na ɓa mefeŋ ktai, ɗif na mini Alaw, zaw ɗif na wala a siŋka arni warni weseŋ, a luɓasi arbaki, na ɓa a miɗiki midini wala zi siŋki, zaw zi hiila n’a bunda ɗif hiyak,

³na ɓa wala n’a muɗa gaini a za maini n’a muɗaŋ ɗa nɵa, amma na ɓa a miɗiki ɓa: tukumu futi pini alawai na zamai, alawai na tiki ki siɗiŋkai, zumu ɵeŋni lai ɗa.

⁴Aga ki yimi seŋni ɗif na mini Alaw ni ɗa gaini ɗif na wala a siŋka sini arni war weseŋ ɗa kai. A titimiki na ɗa a Epiɗ-ɗai Alaw na wiiki ɗa, kapai a tiliki haw na ki diriŋ gaiɗi agulki paŋ, gaini suŋfaɗi agulki paŋ tiɓ zaw, ki diriŋ kai ɗi ɗa.

⁵Ki tiki futi ɗa pini Epiɗ-ɗai Alaw na wiiki ɗa, ki sini hormo wiini Ni, ki yimi ɗa a gadai na wiini Ni ɗa, ki ɵini ɗa pini Ni lai. Ki zi ɗa a ɵeŋ na wiini, ki zi bonuki gaini Ni lai.

⁶Ɗif na mini Alaw hanɗa, zaw ɗif na wala a siŋka arni war weseŋ hanɗa a nava fiɗi n’edi, buri a faka ɗai amai sini Epiɗ-ɗai Alaw na wiiki n’a milikisi edi war Egipte par, n’a plikisi edi war bege par lai, ɗif hanɗa a firiya tiɓ a wiliki edi warɗi futi n’Epiɗ-ɗai Alaw na wiiki a miɗiki buri ki tikiti ɗa par. Gaini hanɗa aga ki tiki meefeŋ edi arbaki par.

⁷Na ɓa tawalku n’ahiɗi amuku, zaw ahiku na wus, zaw na muni, zaw muniku na te fana amlai dedikku, zaw marmaiku na ku daraŋ maini suku ɵa ɗi, a tunuku war kuɗuhai ɓa: hulumu zumu ɵeŋni alawai na zamai, alawai na tuku kaalai, tamaiku kaalai ki siɗiŋ kai,

⁸arbaɗi alawai na wiiɗi pinziba n’a gunuku azumai, n’e ɗa suku gobi, zaw na gaigai, sini koŋni afti ktai par haa sini na zamai.

⁹Ku yima seŋni kai, ku zaga ɵimaku mini kai, ku hiina haw burini kai, ku zina pini kaalai.

¹⁰Ku fuɗaŋ edi, tuku te tika amai sini avut, ɗai hanɗa paŋ asakalku par.

¹¹Aga ku bulaŋ gaini kriyit a mra edi, buri a firiya a tunuku edi sini Epiɗ-ɗai Alaw na wiiku n’a yumukusi edi warɗi Egipte par war bege na ku nasi ka warni par.

¹²Ɗai na Izrayel paŋ aga e ɵini labarni seŋ hanɗa, hunai aga te yimiɗi, aga e zi wala na meefeŋ maini hanɗa nɵa arbaki kir kai.

¹³Na ɓa mefeŋ ktai war fuŋki n’abakai n’Epiɗ-ɗai Alaw na wiiki a siŋki buri ki simni warni, ki ɵini li ɓa:

¹⁴Ɗai na hangalɗi meefeŋ n’e niyisi edi arbaki par, n’e ɗa tiniɗi ɗai edi gaini miɗi na ɓa: hulumu zumu ɵeŋɗi alawai zamai, alawai na tiki ki siɗiŋ kai,

¹⁵ki piyi fitiɗi ɗa, ki yimi labar, ki zilbiɗi gaini futini, na ɓa seŋ na ki ɵiniŋ ɗa a jre, a na ɵa ɗa, pini wala na hi-hir n’a za arbaki hanɗa,

¹⁶aga ki fiɗiɗi ɗai na war fuŋ hanɗa paŋ edi gaini kaɵkar, ki vidi fuŋ n’abai hanɗa edi marwai gaini wazagai na warni paŋ, farai maa a hina kai, koo wazagai n’ezini puɗu puɗu paŋ ki vidiŋ edi gaini kaɵkar.

¹⁷Ki tipisi wazagai zi der na warni paŋ edi war hlai na baŋa tap, ki ɵi afu pini, ki ɵi afu pini fuŋ n’abai ɗa su lai. Ki yiŋ edi nɵa burini Epiɗ-ɗai Alaw na wiiki, fuŋ hanɗa aga a hina aŋ greŋ ɵa gamai, ɗif a rgaŋ amai kir kai.

¹⁸Wazagai n’a na buri tûûri n’edi ɗa, ki miliŋ kai, kapai hiy n’abai na wiini EPIƊ-ƊAI a ɵaɗasi azumai, a siki yumni, a sisɗiki viya lai, maini n’a miɗiŋɗi wiiɗi tamaiki nɵa.

¹⁹A suwa paŋ ɓa ki ɵini pini EPIƊ-ƊAI, Alaw na wiiki, ki yimi gadaini na mu na siŋki girna na ɗa, ki zi ɗa a wazagai n’a sini firiyi wiini EPIƊ-ƊAI na wiiki lai.