Read Mousgoum Wiyi na midini gadai 14 Bible Online

Wiyi na midini gadai 14 - Mousgoum bible

Wiyi na midini gadai 14

¹Burini Epiɗ-ɗai Alaw na wiiki ɗa, tiki ki ɗi alini, aga ki ɓisi siki kai, ki fiɗi ayir na midini arki edi kaalai.

²Buri tiki ki ɗi ɗai na gaini viri edi ɗaw burini Epiɗ-ɗai Alaw na wiiki, EPIƊ-ƊAI a viriki edi arbaɗi ɗai na midiɗi yai paŋ ki ɗi tiki, kapai ki bindi aŋ godai na wiini kiini.

³Aga ki limi wala na hi-hir kai.

⁴Wazagai n’ezini puɗu puɗu na ki kiɗi ki limiŋ ɗa a hanɗa: ɵaakai, adumai, haakai,

⁵bariyamai, wudrakai, wazagai na buza n’e yikiŋ ɓa: dem gaini haakai n’edi buza, gaini adumai n’edi buza, azar gaini ambor.

⁶Ki kiɗi ki limi wazagai n’ezini puɗu puɗu na tetrekni ezini gaini ɓisi ca ca, n’a hiŋɗa simi.

⁷Amma wazagai n’ezini puɗu puɗu n’a hiŋɗa, zaw wazagai na tetrekni ezini gaini ɓisi ca ca lai, n’aga ki limiŋ kai ɗa a hanɗa: ɵigini, meneve, meneve na sini huwuŋ, wazagai ni ɗa a hiŋɗa, amma tetrek ezini gaini ɓisi kai, a haharai buriki.

⁸Hoho ɗa ki limiŋ kaalai, buri ɓa ezini gaini ɓisi ca, amma a hiŋɗa kai, a hi-hir buriki, ki limi neŋni kai, ki tiki tiki kopoŋni kaalai.

⁹Arbani wazagai n’arni yem paŋ ɗa, n’aga ki limi ɗa a hanɗa: ki limi wazagai na zezer gaini fokorok aŋ sini.

¹⁰Amma wazagai na zezer sini kaalai, fotorok sini kaalai ɗa, ki limiŋ kai, a hi-hir buriki.

¹¹Wazagai zi ɗufli na hilu paŋ ki kiɗi ki limiŋ.

¹²Amma wazagai zi ɗufli hanɗa aga ki limiŋ kai: beges, ketriŋ, muka na agoɗom,

¹³mugûwe, magaw, pinzibani egûs paŋ,

¹⁴pinzibani zeleke paŋ,

¹⁵elket, huktruk, sasakaiaw, gaini pinzibani mugûwe paŋ,

¹⁶miɵibir, koklo, abukobukum,

¹⁷dram, tetekem, akele kele,

¹⁸sahaw, pinzibani helim paŋ, begeɗi maguwai, gaini kirfe-kirfe.

¹⁹Aŋoyek zi baada paŋ a hi-hir buriki, aga ki limiŋ kai.

²⁰Wala zi ɗufli na hilu paŋ ɗa ki kiɗi ki limiŋ.

²¹Wala n’a mra kiini ɗa ki limiŋ kai, ki siŋni wiini ɗif zi zak n’a na war fuŋki n’abai, zaw ki cikiliŋni edi wiini ɗif na morkoi na gaini ezini blaŋ, buri tiki ki ɗi ɗai na gaini viri edi ɗaw burini Epiɗ-ɗai Alaw na wiiki. Ki di ahini hek arni fiyaw na wiiɗi emini kai.

²²Buza buza paŋ ki kisi doogoni seyemki na ki niviŋsi warni vuwaiki par.

²³Aga ki simi doogoni algamaki gaini dimeki gaini viŋki gaini emelki gaini ali ɵaakaiki gaini adumaiki gaini haakaiki lai n’a wa avut paŋ wuzani Epiɗ-ɗai Alaw na wiiki war hlai n’a varaŋ kapai e yiki yikini warni, kapai ki hitri aŋ sini hormo wiini Epiɗ-ɗai Alaw na wiiki kûreɗ-kûreɗ.

²⁴Ablaŋtaŋkai hlai n’Epiɗ-ɗai Alaw na wiiki a varaŋ edi kapai e yiki yikini warni a za sini hlai na ki simni warni n’a ɓikiki warni lai par gaigai, libini doogoni wazagaiki a sɗa aŋ za kai,

²⁵nɵa ɗa ki wiriŋ edi, ki hili gaini farai hanɗa warni hlai n’Epiɗ-ɗai Alaw na wiiki a varaŋ edi ɗa.

²⁶War hlai ni ɗa aga ki wûri wala na agulki a daraŋ paŋ, ɵaakai, adumai, haakai, vin, sul na ɗewek, wala paŋ n’a firiya agulki paŋ. Ki simiŋ war hlai ni ɗa wuzani Epiɗ-ɗai Alaw na wiiki, ki firiyi gaiɗi pakataiki paŋ.

²⁷War mefeŋ hanɗa, miɗiki aga a wula gaini Levit n’aŋ war fuŋki n’abai ɗa kai, buri ni ɗa, bulum na wiini arbaki kai.

²⁸Buza a za li hu paŋ ɗa, doogoni wazagaiki na war buza hanɗa ki yimiŋ edi, ki miliŋ war vrekai, war fuŋki n’abakai ɗa.

²⁹Nɵa Levit na bulumni arbaki kai ɗa, gaini ɗif zi zak, gaini aliyagwi na huyuk gaini muni na war greŋ n’e ɗa war fuŋki n’abakai ɗa, aga e simi haa e vi, kapai Epiɗ-ɗai Alaw na wiiki a ɓikiki war sdaki na ki ziŋ ɗa paŋ.