Read Mousgoum Wiyi na midini gadai 15 Bible Online

Wiyi na midini gadai 15 - Mousgoum bible

Wiyi na midini gadai 15

¹Buza a za li muguzak paŋ ɗa, ki fiɗi tumuŋki n’aŋ midiɗi ɗai ɗa edi.

²Tumuŋ hanɗa aga a fuɗa edi maini nɵa: ɗif paŋ n’a tifini farai wiini maini ɗa, na ɓa buza na wiini hinini tumuŋ na buri kol na sini EPIƊ-ƊAI a cosi li ɗa, a hinini tumuŋ hanɗa, a zini dewele midini tawalni zaw maini aŋ vurgaŋ kai.

³Morkoi na gaini ezini blaŋ ɗa, ki kiɗi ki zini dewele midini buri a vurgaŋ, amma tumuŋki n’aŋ tini tawalki ɗa ki hiniŋni.

⁴Kadai tiɓ ɗa ɗai na murgakai aga e zi arbaki kai buri Epiɗ-ɗai Alaw na wiiki aga ɓikiki midini afti n’aga a siŋki aŋ bulum ɗa,

⁵amma sai tiki ki ɵini mini EPIƊ-ƊAI ALaw na wiiki, ki zi pini gadaini na mu na siŋki girna na ɗa war jre lai.

⁶Epiɗ-ɗai Alaw na wiiki aga a ɓikiki maini n’a miɗiŋki nɵa. Tiki aga ki tifi farai edi wiiɗi ɗai viya, amma aga ki tifisi tiɗi par kai; Aga ki ŋi midiɗi ɗai viya, amma ɗai aga e ŋi miɗiki tiki kai.

⁷Na ɓa tawal ktai arbaki war fuŋ n’abai zaw midini afti n’EPIƊ-ƊAI Alaw na wiiki a siŋki a na murga ɗa, ki dûgûti agulki sini kai, ki bili edi sini tawalki na murga kai,

⁸amma aga ki zini pini gaini firiyi, ki tifini wala paŋ na jaani aŋ sini.

⁹Ki zi hangal, ki hini hiini na meefeŋ warɗi agulki kai ɓa: buza n’ag'aŋ muguzak na wiini fiɗini tumuŋ n’edi a ŋasi ya, ki divi sini kai, ki bili edi sini kaalai, ɵa kai ɗa aga e yiki EPIƊ-ƊAI miɗiki, a bunda aŋ tuwur buriki.

¹⁰Ki si sini, Won hlai na ki ɗa siŋni ɗa ki hini agulki a tuura kai, gaini hanɗa Epiɗ-ɗai Alaw na wiiki aga a ɓikiki war sdaki na ki ziŋ gaini na ki hiiniŋ paŋ.

¹¹Ɗai na murgakai na midini afti ɗa aga e vidi kai, e siɗi ɵa, mu sukui gadai hanɗa na ɗa buri hanɗa: aga ki zini piɗi tawalakaiki na murgakai gaiɗi na haw n’e ɗa midini aftiki.

¹²Na ɓa tawal na hebre na wus zaw na muni, a wura sini li edi tiki ɗa, aga a ziki sda haa buza ɵaara, war buza n’ag'aŋ muguzak ɗa, ki ɵiŋ su a hala wiini.

¹³Amma Won hlai na ki ɵiŋ li ɗa, ki hiniŋ a hala gaini tini pini ca kai.

¹⁴Aga ki sini katu war der n’Epiɗ-ɗai Alaw na wiiki a ɓikiki gaini par maini: adumai gaini haakai gaini algama gaini vin lai nɵa.

¹⁵Midiki aga a wula kai ɓa ki ɗisi ka aŋ bagakai war Egipte, Epiɗ-ɗai Alaw na wiiki a plikisi edi, mu siki gadai hanɗa girna na ɗa buri hanɗa.

¹⁶Amma na ɓa bege ɗa a miɗiki ɓa: mu firiya mu ɓurwa gaiki kai, buri ɓa a diriki tiki gaini pakataiki paŋ, a tala sini huwiyi sini kai,

¹⁷nɵa ki tiki kawai ktai ɗaw na mini suweɗ, ki ɓili ɵimani amai sini mini porte, a hina aŋ begeki ɵa gamai, ki zi siɗi bagaiki nɵa lai.

¹⁸Bege n’a za sda li haa buza ɵaara ɗa, ɵini ɗa aga a fiɗiki siki kai, buri ɓa a ziki sda buza ɵaara ya, sda n’a ziŋki buza ɵaara ɗa a suwa sda na wiini ɗif n’a za sda buri vrak ɗa azi sulu. Epiɗ-ɗai Alaw na wiiki aga a ɓikiki war sdaki na ki ziŋ ɗa paŋ.

¹⁹Ahi n’avut na wus na wiini ɵaakaiki, zaw na wiini adumaiki gaini haakaiki a wiini Epiɗ-ɗai Alaw na wiiki, aga ki zi sda gaini ahini gari n’a wa avut ɗa kai, aga ki ɵi ayirni adime zaw hek n’a wa avut ɗa kaalai.

²⁰Buza buza paŋ ɗa aga ki limiŋ gaini pakataiki Won hlai n’Epiɗ-ɗai Alaw na wiiki aga a varaŋ ɗa.

²¹Na ɓa tirki aŋ sini, a na danlaŋ zaw na melveŋ, zaw na ɓa a tirki zamai na maɵaɗi, aga ki zi ɓaka gaini wiini Epiɗ-ɗai Alaw na wiiki kai.

²²Ki yimiŋsi ɗa war fuŋki n’abakai ɗa, ɗif na hi-hir gaini na hilu paŋ e kiɗi e limiŋ maini n’e limi wudre zaw bariyam nɵa.

²³Amma aga ki simi felni kai, ki miŋ azumai midini afti maini yem nɵa.