Read Mousgoum Wiyi na midini gadai 17 Bible Online

Wiyi na midini gadai 17 - Mousgoum bible

Wiyi na midini gadai 17

¹Aga ki zi ɓaka wiini Epiɗ-ɗai Alaw na wiiki gaini ɵeŋ, zaw gaini adime, zaw hek na tirki sini, zaw n’a wameefeŋ kai, a wala na hi-hir burini Epiɗ-ɗai Alaw na wiiki.

²Na ɓa arbaki war fuŋki n’abakai n’Epiɗ-ɗai Alaw na wiiki a siŋki, ɗif na wus zaw muni a za wala n’Epiɗ-ɗai Alaw na wiiki a firiya burini kai, a za pini bonu n’a zaŋ gaiki kaalai,

³a hala a za ɵeŋni alawai zamai a hurga azumai wuzani, a hurga azumai wuzaɗi futi gaini tile gaini meeɵek n’arbani hlai n’amai ɗa, a za maini na mu muɗaŋ ɗa nɵa kai,

⁴na e kukusi ɗa a labarni, zaw ku ɵinaŋ gaini ɵimaku sai ku tikini ezini gaini futini, na ɓa seŋ ni ɗa a jre, a na ɵa lai ɗa, wala na hi-hir hanɗa a za war Izrayel ya lai ɗa,

⁵ɗif zaw muni n’a za hanɗa, ki kiŋsi anene war faada na wiini fuŋ n’abai ɗa, ki biliŋ gaini kriyit, a mra edi.

⁶Ɗif hanɗa a nava fiɗi n’edi pini zaida na wiini ɗif ktai kai, sai zaidakai e zi sulu zaw hu.

⁷Kapai a nava fiɗi n’edi ɗa, zaidakai e biliŋ avut ɗa e ɗi nagai, ɗai na doogo paŋ asakal par. Nɵa meefeŋ n’a na arbaki aga a vada edi.

⁸Na ɓa seŋ a za li arbaki, na sariyani a tala gir maini: fiɗini-humok, zaw sispai, zaw ɵiɓi zaw huruk, zaw seŋ ktai na maɵa ɗi war faada na mini fuŋ n’abai na wiiki ɗa, ki hili warni hlai n’Epiɗ-ɗai Alaw na wiiki a varaŋ ɗa.

⁹Ki hili siɗi paakai zi ɓaka na levitekai gaini ɗif n’a ɗûklûti sariya n’a na war sda war mefeŋ ni ɗa, ki zilbi hiiniɗi ɗa, nagai aga e miɗiki wala na ki ziŋ ɗa.

¹⁰Tiki aga ki zi pini wala na e miɗiki war hlai n’EPIƊ-ƊAI a varaŋ ɗa, ki ziŋ kal kal maini na nagai e miɗiŋki ɗa nɵa.

¹¹Aga ki zi ɗa pini na e hitriŋki gaiɗi sariyai zi zi n’e muɗuku gaiɗi lai. Seŋ na e miɗiŋki ɗa, ki zigi edi sini na zaw kaalai, na zaw kaalai.

¹²Ɗif n’a za wala war kûlini-si, n’a ɵini mini pai zi ɓaka n’a na za sda wuzani Epiɗ-ɗai Alaw na wiiki kai, a ɵina mini ɗif n’a ɗûklûti sariya kaalai ɗa, ɗif ni a nava mri. Nɵa aga ki vidi meefeŋ edi arbaɗi Izrayel par.

¹³Ɗai paŋ aga e ɵini labar hanɗa, hunai aga te yimiɗi, aga e piyi war kûlini-si kir kai.

¹⁴Won hlai na ki cû li midini afti n’Epiɗ-ɗai Alaw na wiiki aga a siŋki, Won hlai na ki tiki afti hanɗa li, ki simni li woni aŋ wiiki; ki hiini li ɓa: mi firiyi mi tiki pai midiyi maiɗi pinziba n’e ɗa ɵemaii na ɗa ɵa.

¹⁵Ki kiɗi ki tiki pai miɗiki, ni n’Epiɗ-ɗai Alaw na wiiki aga a varaŋ, ki tiki miɗiki aŋ pai ɗa a ktai arbaɗi tawalakaiki na Izrayel, ɗif na morkoi na gaini ezini blaŋ na pinzibaki kai ɗa, ki tikiŋ miɗiki aŋ pai kai.

¹⁶Paiki ɗa plasai na wiini aga a za viya kai aga a ɵiniɗi ɗai war Egipte aŋ wûrinisi plasai zamai sini marni kaalai, buri EPIƊ-ƊAI a miɗiki ya ɓa: aga ki wiyi midini afti hanɗa kir kai.

¹⁷Falakaini aga e zi viya kai, kapai agulni te sala edi kai. Arzaŋni gaini orni aga a za viya kaalai.

¹⁸Won hlai n’a sumna li midiɗi paramaini zi pai ɗa, gadai n’aŋ tiɗi paakai zi ɓaka na levitekai ɗa e ɗûŋni edi war maktuɓ zamai ɗaw lai.

¹⁹A tikaŋ ɵimani ta, a ŋaŋ mefeŋ paŋ, kapai a hitra aŋ sini hormo wiini Epiɗ-ɗai Alaw na wiini, aŋ yima seŋ n’aŋ warni ɗû gaini gadai zi ɗûpaŋ aŋ zi pini lai.

²⁰Kapai a sɗa sini abai a sûwiɗi ɗaini na pini ɗa kai, aŋ sala edi sini gadai ɗa par na zaw kaalai, na zaw kaalai, kapai ni gaiɗi alini e fini warɗi pai viya midiɗi ɗai na Izrayel.