Read Mousgoum Wiyi na midini gadai 18 Bible Online

Wiyi na midini gadai 18 - Mousgoum bible

Wiyi na midini gadai 18

¹Paakai zi ɓaka na Levitekai, gaiɗi ɗai zamai na war pinzibani levite ɗa lai aga e nivi afti aŋ bulum arbaɗi aliɗi Izrayel na zamai ɗa kai, simi na wiiɗi ɗa a na war ɓaka n’e yiŋ edi gaini afu burini EPIƊ-ƊAI, gaini wazagai zamai zamai na wiini lai.

²Aga e nivi afti aŋ bulum arbaɗi tawalakaiɗi kai, EPIƊ-ƊAI a bulum na wiiɗi maini n’a miɗiŋɗi nɵa.

³Wazagai n’aga a sa siɗi paakai zi ɓaka war wazagai na ɗai na Izrayel e fiɗiŋ aŋ ɓaka maini ɵeŋ, zaw adime, zaw hek ɗi ɗa a hanɗa: kirpeɵi, galai, gaini bizim.

⁴Ki siɗi merfeŋni seyemki n’arni afti par lai maini: algama, vin na hehe gaini emel gaini ayirni adumai zaw haakai n’e ɵiŋ avut ɗa lai.

⁵Buri ɓa, Epiɗ-ɗai Alaw na wiiki a vara ɗa a Levit gaiɗi alini arbaɗi pinziba na wiiki paŋ kapai e ɗiyi wuzani aŋ zi ɵeŋni haa kureɗ.

⁶Na ɓa ɗif na war pinzibani Levi ktai, a zogosi war fuŋ n’abai ktai na war Izrayel par aŋ sumna war hlai n’EPIƊ-ƊAI a varaŋ edi pini dirini ɗa,

⁷aga a za sdani na wuzani Epiɗ-ɗai Alaw na wiini maiɗi marni na Levitekai n’e ɗa woni wuzani EPIƊ-ƊAI ɗa nɵa.

⁸Buri simini ɗa, wazagai n’a sa sini ɗa kal kal gaini na wiiɗi na zamai ɗa nɵa lai, n’a navaŋsi gaini wazagaini zi bulum n’a wuraŋ edi ɗa a pɵa arbani kai.

⁹Won hlai na ki cû li aha midini afti n’Epiɗ-ɗai Alaw na wiiki aga a siŋki ɗa, aga ki tiɓi pini sdakai na haharai na wiiɗi pinziba hanɗa kai.

¹⁰Ɗif n’a ya ahini na wus, zaw na muni edi aŋ ɓaka, zaw n’a za wazagai zi hiila, n’a sɗa wuti, n’a za evek,

¹¹n’a za ɗai gaini evek, n’a zilba sezeɗi ɗai zi mri a haɗa kalaŋ gaiɗi lai.

¹²Buri ɓa ɗif paŋ n’a za wazagai hanɗa a hi-hir arni EPIƊ-ƊAI, Epiɗ-ɗai Alaw na wiiki a birgiɗi pinziba hanɗa edi wuzaki burini hi-hir hanɗa.

¹³Tiki aga ki simni hilu wuzani Epiɗ-ɗai Alaw na wiiki.

¹⁴Pinziba n’aga ki birgiɗi edi na ɗa e ɵini ɗa a miiɗi ɗai zi siɗi wuti gaiɗi nagai n’e tili wazagai na wuze. Amma Epiɗ-ɗai Alaw na wiiki a firiya wazagai na maini hanɗa nɵa kai.

¹⁵Epiɗ-ɗai Alaw na wiiki aga a sa ɗif na mini Alaw na maya ta nɵa arbaki, arbaɗi tawalakaiki par, aga ki ɵini pini.

¹⁶Hanɗa a wala na tiki ki zilbiŋ tini Epiɗ-ɗai Alaw na wiiki war Horeɓ war mefeŋ na wiini diŋgi n’abai, Won hlai na ki ɗika ki miɗi ɓa: mi firiyi mi ɵini wulani Epiɗ-ɗai Alaw na wiyi tar kir kai, mi firiyi mi tili afu n’abai hanɗa kir kai, mi firiyi mi mri kai.

¹⁷Nɵa EPIƊ-ƊAI a muɗaŋa: miɗiɗi ɗa a pɗem.

¹⁸Aga mu siɗi ɗa a ɗif na mini Alaw na maiku ɵa, mu siŋɗi arbaɗi tawalakaiɗi par, aga mu wa seŋŋa war mini, aga a miɗiɗi wala paŋ na mu miɗini gaini.

¹⁹Na ɗif a yima seŋŋa kai, seŋŋa na ɗif na mini Alaw a muɗaŋ war yikiŋa ɗa, ta dama aga mu zilbaŋ war tini.

²⁰Amma na ɓa ɗif na mini Alaw ɗa, a muɗa seŋ na ta mu miɗiŋni, zaw a muɗa seŋ war yikini alawai zamai, nɵa ɗif na mini Alaw ɗa aga a mra.

²¹Ablaŋtaŋkai n’aga ki zilbi siki ɓa: aga mi siɗi seŋ hanɗa a muɗa ɗa a EPIƊ-ƊAI kai maɵa maɵa ɗa?

²²Na ɓa ɗif na mini Alaw a muɗa seŋ war yikini EPIƊ-ƊAI, seŋ n’a muɗaŋ ɗa a va amai kai, wala ni ɗa a za kaalai ɗa seŋ hanɗa a muɗaŋ ɗa a EPIƊ-ƊAI kai, a seŋ na ɗif na mini Alaw a muɗaŋ war hiini na wiini, nɵa aga ki hûniŋ kai.