Read Mousgoum Wiyi na midini gadai 19 Bible Online

Wiyi na midini gadai 19 - Mousgoum bible

Wiyi na midini gadai 19

¹Won hlai n’Epiɗ-ɗai Alaw na wiiki a vidiɗi li pinzibaɗi ɗai n’aga a siki aftiɗi aŋ wiiki edi ɗa, won hlai na ki birgiɗi li edi warni fuŋɗi n’abakai par, war dalamɗi par lai ɗa,

²ki viri fuŋ n’abakai edi hu midini afti n’Epiɗ-ɗai Alaw na wiiki aga a siŋki aŋ wiiki ɗa.

³Ki ɓûrwi aftiki n’Epiɗ-ɗai Alaw na wiiki a siŋki ɗa azumai azi hu, midini fuŋ n’abakai na hu ɗa. Ki ɓisi futi su su, kapai ɗif n’a fuɗa li ɗif ɗa a sɗa aŋ nava hlaini zi ŋoyai woni.

⁴A kiɗa a ŋoya warni fuŋ hanɗa, a ɗif n’a fuɗa maini pini dirini kai, na seŋ arbaɗi wuzani hlai par kaalai, ɗif ni ɗa a kiɗa a ŋoya war fuŋ n’abakai ktai arbani hanɗa kapai suŋfani a ɓa kai.

⁵Na ɓa ɗif a hala edi war basga gaini maini aŋ bili luwuŋ, hlai n’a na bula luwuŋ ɗa buŋili te rɗaɗi mini luwuŋ par te pa sini maini ɗa, a mra miɗi lai ɗa, ɗif ni ɗa a kiɗa a ŋoya warni fuŋ n’abai zi ŋoyai ktai arbani hanɗa, suŋfani a kurɗa lai.

⁶Ɗif n’a kiɗa a fuɗaŋ ezini zigelni a tika futi pini war hiyni n’abai aŋ fuɗaŋ buriɗi futi na mugwi ɗa, kadai tiɓ ɗa, ɗif n’a fuɗa maini ɗa a kiɗa a nava mri kai, buri seŋ a nafu arbani gaini maini wuzani hlai par kai.

⁷Buri hanɗa mu miɗiki na ɗa ɓa: Ki viri fuŋ n’abakai zi ŋoyai hu.

⁸Na ɓa Epiɗ-ɗai Alaw na wiiki a riya aftiki edi li, maini n’a ha wala mini wiiɗi tamaiki ɵa, na ɓa a sikili afti n’a miɗiɗi wiiɗi tamaiki gaini lai ɗa,

⁹buri ɓa aga ki yimi gadai na mu siŋki girna ɗa, ki zi pini lai, ki diri EPIƊ-ƊA Alaw na wiiki mefeŋ paŋ, ki ɵini pini mefeŋ paŋ lai ɗa, nɵa aga ki piyi fuŋ n’abakai zi ŋoyai zamai hu pra sini marni na hu n’avut ɗa.

¹⁰Nɵa aga felni ɗif na seŋ midini kai, a ma edi midini aftiki kai, afti Epiɗ-ɗai Alaw na wiiki a siŋki aŋ bulum ɗa. Sla kai ɗa fel hanɗa aga a zilba war tiki.

¹¹Amma na ɓa, gaw a na arbani ɗif gaini maini, a na tika hangalni sini, a ruptaŋ aŋ fuɗaŋ lai ɗa, na ɓa ɗif hanɗa a ŋoya li war fuŋ n’abai ɗa,

¹²ɗai n’abakai n’arbaɗi ɗai na war fuŋni n’abai ɗa, e ɵini ɗif pini e yimiŋsi, e siŋni tini ɗif n’a kiɗa a fuɗaŋ ezini zigelni ɗa aŋ fuɗaŋ edi.

¹³Aga ki hiini haw burini kai, nɵa aga ki fiɗi ɗif n’a fuɗa ɗif na tini war seŋ kai ɗa edi arbaɗi aliɗi Izrayel par. Aga ki simni ɵeɗ.

¹⁴Won hlai na ki cû li midini afti n’Epiɗ-ɗai Alaw na wiiki aga a siŋki aŋ bulum ɗa, aga ki jûgu haga n’arbani hlaiki gainina wiiɗi nagai na ɵimaki kai, na nagai n’e simni avut e ɓisiŋ ka ɗa.

¹⁵Na ɓa ɗif a za li wala na meefeŋ, zaw tuwur, zaw meefeŋ na maɵa maɵa ɗi, zaida na wiini ɗif ktai ɗa a kiɗa a rgaŋ kai, sai zaida na wiiɗi ɗai sulu zaw hu, kapai seŋni ɗa a za aŋ jre.

¹⁶Na ɓa ɗif a pa seŋ midini maini war jre kai,

¹⁷ɗai na sulu na seŋ a za arbaɗi ɗa, e hili war hlai na sɗik na wiini EPIƊ-ƊAI. E miɗi seŋɗi wuzaɗi paakai zi ɓaka gaiɗi ɗai n’e ɗûkliti sariya n’e ɗa war sda war mefeŋ hanɗa.

¹⁸Ɗai n’e ɗûkliti sariya ɗa aga e tiki ezini seŋ ɗa gaini futini na ɓa e niviŋ li ɓa ɗif a za ɗa a eles, a pa ɗa a seŋ midini maini kadai meere ɗa,

¹⁹Nɵa aga ki zini gir na ni a firiya ɓa ki ziŋ sini maini ɗa. Gaini hanɗa, aga ki vidi meefeŋ edi arbaki par.

²⁰Ɗai aga e ɵini hanɗa e hûni e wiyi e zi meefeŋ na maini hanɗa ɵa ɗa kir kai.

²¹Ki hiini haw burini ɗif n’a za meefeŋ ɗa kai, suŋfa burini suŋfa, arai burini arai, sesiyeŋ burini sesiyeŋ, ti burini ti, azi buriɗi azi lai.