Read Mousgoum Wiyi na midini gadai 20 Bible Online

Wiyi na midini gadai 20 - Mousgoum bible

Wiyi na midini gadai 20

¹Won hlai na ki hili aŋ hitimi gaiɗi gawki, na ɓa ki tili li plasai zaw saret zi gaw, zaw vokɗi ɗai zi hatam viya a suwa na wiiki ɗa, aga ki hûni kai buri Epiɗ-ɗai Alaw na wiiki n’a milikisi edi war Egipte par aŋ gaiki.

²Wuzani hlai na ki niyi war hatam sek ɗa, pai zi ɓaka a ɗiya wuzaɗi ɗai zi hatam a muɗa gaiɗi,

³a miɗiɗi maini nɵa: tiki ɗai zi hatam na Izrayel, ɵini pɗem, girna aga ki hili aŋ hitimi gaiɗi gawki, pi arki, ki hûni kai, ki tûrli kai, ki ziriyi wuzaɗi kaalai.

⁴Buri Epiɗ-ɗai Alaw na wiiki a na gaiki su aŋ hitimiɗi gawki buriki kapai a siki rɗi n’amai.

⁵Asakal par askarai n’abakai n’e mili ɗai war askar ɗa e miɗiɗi wiiɗi ɗai ɓa: arbaki ɗa ɗif n’a rgitisi dilimi na hahai, amma a niya warɗi kai hai a na ɗi? Na ɓa a na ɗa, marya a waya aha, ɵa kai ɗa a kiɗa a mrasi miɗi gaw su, a sumna warɗi ɗa a ɗif zamai.

⁶Ɗif n’a zasi zardeŋ zi vin, amma a tika alini mini kai hai a na ɗi, na ɓa a na ɗa mariya a waya aha, ɵa kai a kiɗa a mrasi miɗi gaw ɗa su maini zamai a hina midini dam.

⁷Ɗif n’a giɓiti muni gaŋ, n’a tikiti kai hai a na ɗi, na ɓa a na ɗa, mariya a waya aha, ɵa kai ɗa a kiɗa a mrasi miɗi gaw su, maini zamai a tikiti ɗaw.

⁸Askarai n’abakai e miɗiɗi wiiɗi ɗai ɓa: aga e miɗiɗi wiiɗi ɗai ɓa: ɗif na hunai pini ta na gdaŋ warni kir kai a na ɗi, na ɓa a na ɗa a waya wiini aha kapai marni na zamai ɗa a gulɗi a huna maini ni nɵa kai.

⁹Won hlai n’abakaiɗi askarai ɗa e vidi li gaini seŋɗi zi miɗi paŋ ɗa, e viri ɗai n’abakai midini vokɗi ɗai ɗa ta ta.

¹⁰Won hlai na ki cû li mini fuŋ n’abai aŋ cikiŋ ɗa, ki piyi gaiɗi avut ɗa a ɵeɗ.

¹¹Na ɓa e yimi seŋki li, e miliki mini magalaɗi li edi, ɗai n’aha war fuŋ n’abai ni ɗa, ki tiki sda zi dewele midiɗi, e bindi aŋ bagakaiki.

¹²Na ɓa e firiyi ɵeɗ na gaiki kai, e piyi ɗa a hatam ɗa, ki cikiɗi aha cak.

¹³Epiɗ-ɗai Alaw na wiiki aga a siɗi war tiki, ki fiɗiɗi aliɗi na maɵagai ɗa paŋ edi gaini kaɵkar.

¹⁴Falakaiɗi lai, aliɗi lai, faraiɗi lai, gaini wazagai na war fuŋ n’abai ɗa paŋ, wazagaiɗi gawki paŋ a hina war tiki, ki zi gaini maini na ki diri nɵa, buri Epiɗ-ɗai Alaw na wiiki a siŋki ca.

¹⁵Aga ki zi sini fuŋ n’abakai n’a na edi siki gaigai, n’a na arbani fuŋ n’abakai na wiini pinziba hanɗa kai ɗa maini nɵa.

¹⁶Amma war fuŋ n’abakai na wiini pinziba n’Epiɗ-ɗai Alaw na wiiki a siŋki aŋ bulum ɗa, ki hini ɗif karni kai.

¹⁷Hititekai, Amoritekai, Kananiyakai, Perizzitekai, Hivitekai gaiɗi Yebuzitekai ki vidiɗi edi marwai maini n’Epiɗ-ɗai Alaw na wiiki a miɗiŋki ɗa nɵa,

¹⁸kapai e tiniki aŋ zi wazagai na haharai n’e ɗa ziŋ sini alawai na wiiɗi kai, e kiki aŋ zi tuwur sini Epiɗ-ɗai Alaw na wiiki kaalai.

¹⁹Na ɓa ki ciki fuŋ n’abai li aŋ tikiŋ, amma tikini a za gobi kai ɗa, luwoŋai n’e simi alini ɗa ki fiɗiŋ azumai kai, ki simi alini ɗa. Ki bili luwoŋai n’e simi alini ɗa azumai kai, luwuŋ ɗa a ɗif ɓa kapai ki cikiŋ kai.

²⁰Amma luwoŋai n’e simi alini kai ɗa ki kiɗi ki fiɗiŋ azumai, ki zi wala n’a zina piki war cikini fuŋ n’abai n’a na hitima gaiki ɗa, haa fuŋ n’abai hanɗa a sa sini war tiki.