Read Mousgoum Wiyi na midini gadai 22 Bible Online

Wiyi na midini gadai 22 - Mousgoum bible

Wiyi na midini gadai 22

¹Na ɓa ku nava li ɵai zaw adumi zaw hiiki na wiini maiku aŋ giliŋa blaŋ ɗa, aga ku hinaŋ kai, ku kiŋni ah wiini epin-gezani.

²Na ɓa epin-gezani wala aŋ suku gobi kai, zaw na ɓa ku sɗaŋ kai ɗa, ku nag'aŋ ahaku ɓak, na ɓa epingezabi a na payaŋ ɗa, aga ku siŋni.

³Aga ku za maini nɵa gaini ablehöni gaini sapani, zaw gaini walani maiku paŋ na ɓa ku navaŋ li ɗa, sai ku tika hangalku hangalku sini.

⁴Na ɓa ablehö zaw ɵeŋ na wiini maiku a hurba li warɗi futi ɗa, aga ku zina pini ku yimaŋ amai, ku zaga edi sini kai, ku zina pini aŋ yimaŋ amai.

⁵Muni aga te wa sapa na wiiɗi maɵagai siɗi kai, wus lai aga a wa sapa na wiiɗi falakai kaalai, buri asiya ɗi paŋ n’a za hanɗa li ɗa, a hi-hir arni Epiɗ-ɗai Alaw na wiiki.

⁶Na ɓa war futi yaw ki nivi li gutni wala zi ɗufli amai tini luwuŋ, zaw azumai midini afti, ami gaini fini midini eɵe zaw ali waŋ ɗa, ki yimiti ami gaini aliɗi kai.

⁷Aga ki hiniti ami te hala wiiɗi, ku mula ɓa a aliɗi ɗa, kapai ki nivi pɗem, ku mri gobi kai.

⁸Na ɓa ki rgi li dilimi na hahai, midiɗi n’amai ɗa ki ɵi dalas miɗi suuwa, kapai woni hlai na ɗif a kɵasi li amai midiɗi par a mra li ɗa, felni a zilba war tiki kai.

⁹War zardeŋki zi luwuŋki zi vin ɗa, aga ki bili seyem zamai kai, ɵa kai ɗa seyem na ki hiɗiŋsi warni par paŋ ɗa a wiini EPIƊ-ƊAI, alini luwuŋ zi vin ɗa lai, alini luwoŋai zamai ɗa lai.

¹⁰Ki tipi gari gaini ablehö piɗi hidiki ktai aŋ hirmi gaini kai.

¹¹Aga ki wii sapa na e ziŋ gaini ayirni adumai gaini zilni gaini leŋ lai siki kai.

¹²Sapa na ki biriŋ eiki ɗa, ki zi wazagai na wurliŋ wurliŋ edi mini koŋni na puɗu ca ca.

¹³Na ɓa ɗif a tiki muni li, a yimiti li sini, asakal par a diriti kir kai ɗa,

¹⁴A tika tirki siɗi, a tuura yikiɗi lai ɓa: muni hanɗa mu tikiti ɗaw, mu fana gaiɗi lai, mu niviti te ɓulmi kai.

¹⁵Nɵa tamaiɗi ahiyagoi e kisi wala n’a siŋka ɓa te fanaka gaini wus kai, kapai e siŋkiŋɗi wiiɗi n’abakai n’arbaɗi ɗai na war fuŋ n’abai hanɗa, war faada ɗa.

¹⁶Epiɗi ahiyogoi aga a miɗiɗi wiiɗi n’abakai n’arbaɗi ɗai ɓa: mu sitini ahiya aŋ muni wiini ɗif hanɗa ta, amma tiya n’a diriti kir kai,

¹⁷a tika tirki siɗi ɓa: ahiya ɗa a niviti te ɓulmi kai. Paŋ ktai wala n’a siŋka ɓa a hiya te ɓulmi ɗa an na. E bidi ladra n’e fini warni ɗa edi wuzaɗi n’abakai n’arbaɗi ɗai ɗa.

¹⁸N'abakai n’arbaɗi ɗai na war fuŋ n’abai ɗa e yimi ɗif hanɗa e zini gir midini.

¹⁹E tikini Laman midini, a vurga sulai zi arzaŋ miya ɗaw wiini epiɗi ahiyagoi ɗa, buri ɓa a tuura yikiɗi ɓulmi na Izrayel na te fana gaini wus duk kai. Te hina aŋ munini ɵa, a kiɗa a birgiti kai haa sini mrini.

²⁰Na ɓa seŋ ɗa a jre, wala n’a siŋka ɓa a niviti te ɓulmi aŋ kai ɗa,

²¹E kitisi muni hanɗa mini magala na wiini epiɗi, ɗai na war fuŋɗi n’abai ɗa e biliti gaini kriyit e fiɗiti edi buri ɓa te za wala na hi-hir aha warɗi Izrayel, te fana gaini wus ahani epiɗi par. Nɵa aga ki vidi meefeŋ edi arbaɗi Izrayel par.

²²Na ɓa e yimisi li ɗif piɗi munini ɗif par, nagai sulu paŋ e nivi fiɗi n’edi, ɗif n’a fana gaiɗi muni ɗa lai, muni na lai. Nɵa aga ki vidi meefeŋ edi arbaɗi Izrayel par.

²³Na ɓa war fuŋ n’abai ɗif a niviti ɓulmi na te fana gaini wus kai, na te na gaini giɓi gaŋ a fana gaiɗi ɗa,

²⁴nagai sulu paŋ ki kiɗi anene mini magala, ki biliɗi gaini kriyit, ki fiɗiɗi edi. Ɓulmi te nava fiɗi n’edi buri te ɗuula buri ɗai na war fuŋ e ɵini kai. Ɗif na wus ɗa a nava fiɗi n’edi buri a fana munini maini. Nɵa aga ki vidi meefeŋ edi arbaki par.

²⁵Amma na ɓa ɗif a fana gaiɗi na edi war basga, a yimiti gaini gdaŋ ɗa, e fiɗi edi ɗa a ni kiini.

²⁶Ki zi wala na meefiŋ siɗi ɓulmi ɗa kai, buri na te za tuwur na te kiɗa te nava mri burini kai. A na kal kal maini ɗif na maini a yimaŋ a fuɗaŋ nɵa.

²⁷Buri ɓa a niviti edi war basga, ɓulmi na gaini giɓi gaŋ hanɗa, te ɗuula ya, amma ɗif n’a liwiiɗi ɗuwal aŋ kai.

²⁸Na ɓa ɗif a niviti li ɓulmi na te fana gaini wus kai na gaini giɓi kaalai, a yimiti li gaini gdaŋ a fana li gaiɗi, na ɓa ɗif a niviɗi li ɗa,

²⁹ɗif n’a fana gaiɗi ɗa, a vurga sulai zi arzaŋ doogo doogo ɵim wiini epiɗi ahiyagoi ɗa buri ɓa a fana gaiɗi aŋ gdaŋ, aga a tikiti aŋ muni, a kiɗa aŋ biditi kai haa sini mrini.