Read Mousgoum Wiyi na midini gadai 23 Bible Online

Wiyi na midini gadai 23 - Mousgoum bible

Wiyi na midini gadai 23

¹Ɗif aga a fana gaiɗi munini epini kai, buri te wiini epini.

²Ɗif na moohomni gaini gɵi duk, zaw na pini gaini ɗûkli edi daf, aga a sumna war diŋgi na wiiɗi ɗai na wiini EPIƊ-ƊAI kai.

³Ɗif na gamaw aga a sumna arbaɗi ɗai na wiini EPIƊ-ƊAI kai. Koo pinzibani n’ag'aŋ doogo na asakalni sek e kiɗi e simni arbaɗi ɗai na wiini EPIƊ-ƊAI kai.

⁴Ammonitekai na gaiɗi Moabitekai aga e simni arbaɗi ɗai na wiini EPIƊ-ƊAI kai, koo pinzibaɗi n’ag'aŋ doogo asakal sek kaw, e simni kai, a hina ɵa haa kureɗ.

⁵Buri ɓa nagai e niyisi edi miki gaini wala zi simi gaini yem kai, Won hlai na ki hilisi warɗi Egipte par ki ɗa war futi yaw ɗa; buri ɓa e zini pini Balaam n’ahini Beyor na Petor war Mezopotamiya par buri a tûsiki

⁶Amma Epiɗ-ɗai Alaw na wiiki a firiya a ɵina mini Balaam ɗa kai, Epiɗ-ɗai Alaw na wiiki a bunda tusa ɗa buriki aŋ ɓiki, buri Epiɗ-ɗai Alaw na wiiki a diriki gara.

⁷Na ɓa ki mri ɗa, ki piyi ɵeɗ na wiiɗi kaalai pɗemɗi kaalai.

⁸Pini zibaɗi Edomitekai, aga ki yimiɗi aŋ ɗai na haharai kai buri ɓa e ɗi tawalakaiki. Aga ki yimiɗi ɗai n’Egipte aŋ ɗai na haharai kai buri tiki ki ɗi ka aŋ ɗai zi zak midini aftiɗi.

⁹Aliɗi Edomitekai gaiɗi aliɗi ɗai n’Egipte n’aga e wii midini aftiki ɗa, aga ki pɵiɗi arbaɗi ɗai na wiini EPIƊ-ƊAI sini pinziba n’ag'aŋ hu par ta.

¹⁰Won hlai n’aga ki niyi edi aŋ hatam gaiɗi gawki, ki zi hangal kapai ki zi wala na meefeŋ kai.

¹¹Na ɓa arbaɗi ɗaiki, wala a za sini war duvuk, a bundaŋ li hi-hir ɗa, aga a yima sini edi war kaŋ ɗa par, a wayasi aha tar kai,

¹²koskoi ta ɗa, a ma sini edi gaini yem, hlai na futi te nawa ɗa a kiɗa a wayasi aha war kaŋ.

¹³Ki piyi hlai na ki pirni huŋoi woni anene duɓani kaŋ par kapai askar paŋ a hala woni.

¹⁴Askar paŋ ɗa aŋ gaini wala zi ɓili waŋ arbani zakni ɗa, Won hlai n’a hala li aŋ pirni huŋoini ɗa, a ɓula waŋ ɗa gaini, a vada li paŋ ɗa a pa fulaini azumai tiɓ.

¹⁵Buri Epiɗ-ɗai Alaw na wiiki aga a paya war kaŋ na wiiki aŋ giɗimiki, aŋ siki gawki war tiki, nɵa kaŋ na wiiki aga a za aŋ hlai na sɗik, kapai EPIƊ-ƊAI a tala wala na hi-hir arbaki kai, kapai a yima sini edi siki par kaalai.

¹⁶Na ɓa bege a prasi li edi ahani epin-gezani par, a lawasi li midini aftiki, aga ki wiyiŋni wiini epin-gezani kai.

¹⁷Aga a sumna gaiki, a sumna arbaki, war fuŋ ktai n’abai n’a yima arni li ɗa, maini n’a dara nɵa, ki kiriŋ kai.

¹⁸Ahiɗi Izrayel paŋ na wus zaw na muni aga a za aŋ zawar na burini Alaw kai.

¹⁹Farai na ki niviŋsi gaini zini zawar na burini Alaw ɗa, aga ki kiŋsi amlai warni Dalam na wiini Epiɗ-ɗai Alaw na wiiki pini wala zi hi-mi ɗa kai, koo ɓa a hini-mi na maɵa ɗi kaw, wazagai na sulu hanɗa a tala hi-hir arni Epiɗ-ɗai Alaw na wiiki.

²⁰Na ɓa ki tifini li wala wiini tawalki na Izrayel ɗa, ki zilbi riba pini kai, koo ɓa farai, koo ɓa a wala zi simi, wala paŋ n’a kiɗa a tufa edi gaini riba paŋ.

²¹Ki kiɗi ki zilbi riba pini tini ɗif na morkoi na gaini ezini blaŋ ɗa, amma ki zilbi tini tawalki na Izrayel ɗa kai, kapai Epiɗ-ɗai Alaw na wiiki a ɓikiki war sdaki na ki yimiŋ tiki paŋ, midini na ki ɗa hili aŋ tikiŋ aŋ wiiki na ɗa.

²²Na ɓa ki zi ɵinini-ha li wiini Epiɗ-ɗai Alaw na wiiki ɗa, ki viŋ amai witaw, buri ɓa Epiɗ-ɗai Alaw na wiiki aga a zilbaŋ war tiki. Sla kai ɗa aga a bunda buriki aŋ tuwur.

²³Amma na ɓa ki hi wala miki kai ɗa, aga a za aŋ tuwur buriki kai.

²⁴Wala n’a niyasi edi war miki par ɗa, ki zi pini kal kal maini wala zi hi-mi na ki ziŋ wiini Epiɗ-ɗai Alaw na wiiki pini diriki ɗa nɵa, pini wala na ki miɗiŋ gaini miki mal.

²⁵Na ɓa ki niyi li warni zardeŋ zi luwuŋ zi vin na wiini maiki ɗa, aga ki limi maini na ki diri nɵa haa ki vi, amma aga ki mili zamai tiki war wala kai.

²⁶Na ɓa ki niyi li warni vuwai zi algama na wiini maiki ɗa, ki kiɗi ki ɗûkli midini gaini tiki, ki ɵiŋ gaini maharam kai.