Read Mousgoum Wiyi na midini gadai 24 Bible Online

Wiyi na midini gadai 24 - Mousgoum bible

Wiyi na midini gadai 24

¹Na ɓa ɗif a tikiti muni ɗaw, asakal par te baza arni li, buri ɓa a tala wala ktai n’a firiyaŋ siɗi, a ɗûɗi maktuɓ zi bidi ɗaw, a sitiɗi tiɗi ta, asakal par a birgiti ahani par.

²Won hlai na muni te niyaɗi li ahani par ɗa, te hala wiiɗi, ɗif zamai a kiɗa a tikiti.

³Na ɓa ɗif n’a tikiti aŋ sulu ɗa a diriti kir kai, a ɗûɗi maktuɓ zi bidi ɗaw, a sitiɗi ta a birgiti ahani par, zaw na ɓa ɗif ni ɗa, a mra ɗa a mri ɗa,

⁴nɵa mafaɗi n’avut n’a birgitisi edi ɗa a kiɗa a wiyiti aha kir kai buri ɓa te bunda hi-hiri pla. A wala na hi-hir arni EPIƊ-ƊAI, afti n’Epiɗ-ɗai Alaw na wiiki a siŋki aŋ bulum ɗa aga ki kinisi tuwur midini kai.

⁵Na ɓa ɗif a tikasi li muni ɗa, a hala warni askar kai, e sini sda ktai ma tini kai haa buza dam, kapai a va firyiɗi muni n’a tikiti ɗa amai.

⁶Aga ki yimi aruwafuŋ gaiɗi funi zi siri aŋ raŋ tini ɗif par kai, buri ɓa wazagai hanɗa a suŋfani mal.

⁷Na ɓa ɗif a hala zigelni na Izrayel, a zaŋ aŋ bege zaw a wuraŋ edi ɗa. Ɗif ni ɗa a nava fiɗi n’edi, nɵa aga ki vidi meefeŋ edi arbaki par.

⁸Ki zi hangal gaini veglek na wiini amur-si ɗa, wala na paakai zi ɓaka na Levitekai aga e hitriŋki ɗa ki yimiŋ pɗem, ki zi pini. Aga ki zi pini wala na mu gidiɗi gaini ɗa.

⁹Ki hini miɗiki a kɵa gaini wala n’a za siɗi Miriyam warɗi futi war hlai na ki niyisi edi war Egipte par ɗa.

¹⁰Na ɓa ki tifini li wala wiini maiki ɗa, ki niyi aha war dalamni aŋ tikisi walani zi raŋ kai.

¹¹Ki ɗiyiɗi anene par, ɗif na ki tifini wala ɗa a kikisi walani zi raŋ anene sek.

¹²Na ɓa a ɗif ni ɗa a ɗif na murga ɗa, walani zi raŋ ɗa a fana tiki kai,

¹³futi te nawa li ɗa, ki wiyini walani zi raŋ ɗa wai kapai duvuk ɗa a bara sapani sini, a ɓukuku lai. Hanɗa a sda n’a sini firiyi wiini Epiɗ-ɗai Alaw na wiiki.

¹⁴Aga ki kiri ɗif zi sda na murga, zaw na haw ɗa kai, koo ɓa a tawalki, koo ɓa a ɗif zi zak n’a sumna war fuŋki n’abai zaw midini aftiki.

¹⁵Mefeŋ paŋ ɗa ki sini vrakni na war yuvai ɗa ta ta, wuzani niwiiɗi futi ɗa buri ɓa a na murga, a baiya na ɗa a farai hanɗa. Na ɓa ki siŋni kai ɗa aga a yika sini EPIƊ-ƊAI miɗiki, aga a bunda aŋ tuwur buriki.

¹⁶Aga e fiɗiɗi tamai edi burini tuwur na wiiɗi aliɗi kai, aga e fiɗiɗi ali edi burini tuwur na wiiɗi tamaiɗi kaalai, ɗif paŋ a mra mini tuwurni.

¹⁷Ki zitini sariya wiini ɗif zi zak, zaw wiini ahiyagwi na huyuk war jre kai ɗa kai, ki mili sapaɗi muni na war greŋ aŋ a raŋ kai.

¹⁸Aga ki hini miɗiki a wula kai ɓa tiki ki ɗisi ka aŋ bagakai war Egipte. Epiɗ-ɗai Alaw na wiiki a plikisi edi woni par, mu miɗiki ɓa ki zi nɵa na ɗa burini hanɗa.

¹⁹Na ɓa ki ɗa hiɗi seyemki ɗa, miɗiki a wula vidi li edi war vuwaiki ɗa, ki wiyi midini kai, a wiiɗi ɗai zi zak, gaiɗi aliyagoi na huyakai gaiɗi falakai na war greŋ, kapai Epiɗ-ɗai Alaw na wiiki a ɓikiki war sda na ki yimiŋ tiki paŋ.

²⁰Won hlai na ki gigizi luwuŋ olive kapai alini a yakasi azumai ɗa, n’a hinasi amai ktai ktai ɗa, ki wiyi pini kir kai, a wiiɗi ɗai zi zak gaiɗi aliyagoi na huyakai gaiɗi falakai na war greŋ.

²¹Won hlai na ki riwi alini luwuŋ zi vin ɗa, n’a hinasi amai ktai ktai ɗa ki wiyi pini kai. A wiiɗi ɗai zi zak gaiɗi aliyagoi na huyakai gaiɗi falakai na war greŋ.

²²Ki hini miɗiki a wula kai ɓa tiki ki ɗisi ka aŋ bagakai war Egipte, mu miɗiki ɓa ki zi nɵa na ɗa buri hanɗa.