Read Mousgoum Wiyi na midini gadai 25 Bible Online

Wiyi na midini gadai 25 - Mousgoum bible

Wiyi na midini gadai 25

¹Na ɓa seŋ a za li arbaɗi ɗai, e hilisi li wuzaɗi sariya ɗa, ɗif na seŋ midini kai ɗa e ɵiŋ, ni na seŋ aŋ midini ɗa e rgiŋ lai.

²Na ɓa ɗif n’a za meefeŋ ɗa burini ɗa a ɵiɓi ɗa, ɗif n’a ɗûkliti a miɗiɗi wiiɗi ɗai buri e finiŋ azumai wuzani, e ɵiɓiŋ dai dai midini meefeŋni n’a zaŋ ta ɗa.

³Aga e ɵiɓiŋ a suwa daɓala doogo doogo puɗu kai, na ɓa a suwa li ɗa aga a nava huruk n’abai, hormoni tawalki a kiɗa a ɓa edi wuzani arki lai.

⁴Ki rgi mini ɵeŋ Won hlai n’a na gzila algama ɗa kai.

⁵Na ɓa tawalakai n’e ɗa ktai, ktai a mra li a hina ahi kai ɗa, munini ɗif n’a mra ɗa ɗif n’edi par a tikiti kai. Tawalni mafaɗi a yimiti sini, a tikiti aŋ munini, a za sda zi tawal mafi siɗi.

⁶Ahi na wus na te waŋ avut ɗa a yika aŋ ahini tawalni n’a mra ɗa, kapai yikini tawalni a haza edi arbaɗi Izrayel par kai.

⁷Na ɓa ɗif a firiya a tikiti munini tawalni aŋ munini kai ɗa, munini tawalni te hala war faada na mini magalani fuŋ n’abai siɗi n’abakai n’arbaɗi ɗai, te miɗiɗi ɓa: tawalni mafa ɗa a firiya a hina yikini tawalni amai arbaɗi aliɗi Izrayel ɗa kai, a firiya a za sda zi tawal mafi sa kai.

⁸N'abakai na war fuŋ n’abai ɗa aga e yikiŋ e miɗi gaini. Na ɓa a dara kai ɵa ɗa, a muɗa lai ɓa: mu dara mu tikiti aŋ muniya kai.

⁹Nɵa munini tawalni aga a tora sini gobi wuzani arɗi n’abakai n’arbaɗi ɗai, te wa harabak n’ezini ktai edi, te pûrfini teenek amai arni lai, te muɗa: ɗif n’a firiya a hinini pinziba wiini tawalni kai ɗa, e zi sini maini hanɗa nɵa.

¹⁰Sini mefeŋni par, aha warɗi Izrayel ɗa aga e siɗi yiki wiini pinzibani ɓa: pinzibani ɗif n’e wii harabak n’ezini edi.

¹¹Won hlai na hiy a za li arbaɗi ɗai sulu, na ɓa munini ɗif na ktai ɗa te halasi buri te ɵa mafaɗi tini gawni par, te yima mohom na pini li ɗa,

¹²ki hiini haw buriɗi kai sam, ki ɗûkliti tiɗi edi.

¹³Aga ki mili kilo na gumani kiini kiini sulu na ktai abai na ktai agwi war guɓo ktai burini wala ni ktai kai.

¹⁴Aga ki mili agodo kiini kiini sulu, na ktai amai, na ktai agwi burini wala ni ktai kai.

¹⁵Kiloki ɗa aga a za aŋ kilo na gaini futini, agodoki ɗa a na gaini futini lai kapai mefeŋki a za mogo midini afti n’Epiɗ-ɗai Alaw na wiiki aga a siŋki.

¹⁶Buri ɗif paŋ n’a za maini hanɗa nɵa, ɗif paŋ n’a za war jre kai ɗa, a hi-hir burini Epiɗ-ɗai Alaw na wiiki.

¹⁷Ki hini miɗiki a kɵa gaini wala na Amalesitekai a ziŋki Won hlai na ki ɗisi war futi war hlai na ki niyisi edi war Egipte par ɗa,

¹⁸Nagai e sini hormo wiini Alaw kai, e biyiki ɵimani futi ca ca, tiki ki ɗifu gaini kayai gdaŋ warki kai, e cikiɗi nagai n’e hinisi piki asakal ɗa.

¹⁹Won hlai n’Epiɗ-ɗai Alaw na wiiki a siki si-n’amla li, a piliki li edi tiɗi gawki na ɵimani afti n’Epiɗ-ɗai Alaw na wiiki a siŋki aŋ bulum kapai ki tikiŋ aŋ wiiki par ɗa, aga ki fiɗiɗi Amalesitekai edi midini afti ɗa par kapai midini ɗif a kɵa gaiɗi kai. Ki hini miɗiki a wula gaini hanɗa kai.