Read Mousgoum Wiyi na midini gadai 26 Bible Online

Wiyi na midini gadai 26 - Mousgoum bible

Wiyi na midini gadai 26

¹Won hlai na ki cû li midini afti n’Epiɗ-ɗai Alaw na wiiki a siŋki aŋ bulum ɗa, Won hlai na ki tikiŋ li, ki simni li warni lai ɗa,

²ki mili merfeŋ seyem n’a naiya avut na wiini seyemki na ki biliŋ midini afti n’aga ki hiɗiŋ paŋ, afti n’Epiɗ-ɗai Alaw na wiiki a siŋki ɗa, ki miliŋ warni dologo, ki kiŋ war hlai n’Epiɗ-ɗai Alaw na wiiki a varaŋ kapai yikini a yika woni ɗa.

³Ki hili sini pai zi ɓaka n’a na war sda war mefeŋ ni ɗa, ki midiɗini ɓa: girna ɗa mi miɗi gaini miyi wuzani Epiɗ-ɗai Alaw na wiyi ɓa: mi cûsi li aha midini afti n’Epiɗ-ɗai Alaw na wiyi a ha wala mini wiiɗi tamaiyi ɓa aga a siŋyi ɗa.

⁴Pai zi ɓaka a tika dologo tiɗi par, a tikaŋ azumai wuzani Gûwiŋ zi ɓaka na wiini Epiɗ-ɗai Alaw na wiiki ta.

⁵Tiki aga ki miɗi wuzani Epiɗ-ɗai Alaw na wiiki ɓa: Epiyi ɗa a ɗif na Aram par, n’a zogo blaŋ blaŋ, a hala warɗi Egipte aŋ zak gaiɗi ɗai pini agwi, Woni a bunda aŋ pinziba n’abai zi spak, n’a pɵa kai.

⁶Ɗai n’Egipte e ziyi gir, e kiɓiriyi, e tikiyi sda zi bege midiyi.

⁷Nɵa mi ɗûûli Epiɗ-ɗai Alaw na wiiɗi tamaiyi, EPIƊ-ƊAI a ɵina wulaii, a tala gir n’e ɗa ziŋyi, a tala giryi, gaini bizi n’e ɗa biziyi lai.

⁸EPIƊ-ƊAI a miliyisi edi war Egipte par gaini spak n’abai gara, gaini sda zi spak zi mili hunai pini ɗif, gaini wazagai zi siŋki gaini zi hiila lai.

⁹A kiyisi wr hlai hanɗa, a siyi afti hanɗa, afti na fiyaw gaini emelni ami a ka woni.

¹⁰Tiyana EPIƊ-ƊAI, mi kukusi na ɗa a merfeŋniseyem n’a naiya avut na midini afti na ku siŋyi par ɗa, ki miliŋ azumai wuzani Epiɗ-ɗai Alaw na wiiki, ki hûrgi azumai wuzani Epiɗ-ɗai Alaw na wiiki lai.

¹¹Asakal par ki firiyi gaiɗi Levitekai gaiɗi ɗai zi zak n’e ɗa arbaki lai, burini wazagai na pɗamai n’Epiɗ-ɗai Alaw na wiiki a siŋki wiiki tiki gaiɗi pakataiki ɗa.

¹²Won hlai na ku vada li gaini yimini doogoni wazagaiku paŋ, war buza n’ag'aŋ, buza na wiini yimini doogoni wazagai, ki siŋɗi wiiɗi levitekai gaiɗi ɗai zi zak, na huyokai gaiɗi falakai na war greŋ ɗa lai, e simiŋ war fuŋki n’abakai haa e vi gaini,

¹³Aga ki miɗini wiini Epiɗ-ɗai Alaw na wiiki ɓa: wazagai n’a sa burini Alaw n’aha war dalamyi mi miliŋsi edi yaw, mi siŋɗi wiiɗi levitekai gaiɗi ɗai zi zak, wiiɗi na huyokai, wiiɗi falakai na war greŋ, mi ziŋ kal kal maini na ku gidiyi midini nɵa, mi hi amai midini gadai ktai kaalai, midiyi a wula ktai arbani kaalai.

¹⁴Won hlai na mri a za ahaɗi ɗa, mi simi pini kai, hlai na mi bindi haharai ɗa mi tiki wala kltai pini kai, mi zi ɓaka burini ɗif zi mri gaini kaalai. Mi ɵini mini Epiɗ-ɗai Alaw na wiyi, mi zi kal kal maini na ku gidiyi aŋ zi ɗa nɵa.

¹⁵Mulasi arku azumai amai war hlaiku zi simni na sɗik par, amai war hlai n’amai par ɓikiɗi Izrayel na ɗaiku gaiɗi afti na ku siŋɗi lai maini na ku ha wala muku wiiɗi tamaiɗi nɵa, afti na fiyaw gaini emelni ami a ka warni.

¹⁶Girna ɗa Epiɗ-ɗai Alaw na wiiki a miɗiki na ɗa ɓa ki zi pini gadai zi ɗû gaini gadai zi ɗiyi hanɗa, ki yimiŋ ki zi pini lai gaiɗi agulki paŋ, gaini suŋfaɗi agulki paŋ lai.

¹⁷Girna ɗa ki zi ha wiini EPIƊ-ƊAI ɓa a za aŋ Alaw na wiiki kapai ki tiki futi pini, ki yimi pini gadaini zi ɗû gaini gadaini ɗiyi lai, aga ki ɵini mini lai.

¹⁸Girna ɗa, EPIƊ-ƊAI a ziki ha ta ɓa tiki ki ɗi wiini kiini, ki ɗi godaini maini n’a miɗiŋki nɵa, ki yimi gadai na wiini ɗa.

¹⁹Kapai EPIƊ-ƊAI aga a ziki aŋ ɗai n’e sûwiɗi pinziba zamai n’a rgaŋ paŋ gaini hormo, gaini yiki zi wii gaiɗi abai lai. Aga ki bindi aŋ pinziba na sɗik na wiini Epiɗ-ɗai Alaw na wiiki maini n’a miɗiŋki nɵa.