Read Mousgoum Wiyi na midini gadai 27 Bible Online

Wiyi na midini gadai 27 - Mousgoum bible

Wiyi na midini gadai 27

¹Musus gaiɗi n’abakai n’arbaɗi ɗai na Izrayel e si gadai hanɗa wiiɗi ɗai: ki yimi gadai na mu na siŋki girna hanɗa paŋ.

²Mefeŋ n’aga ki hiwi Yurdan aŋ niyi aha midini afti n’Epiɗ-ɗai Alaw na wiiki a siŋki ɗa, ki ɗiyi alini fuŋ n’abakai amai zaw zaw, ki girdi laso na muɗukwi sini.

³Won hlai na ki vigi Yurdan li aŋ niyi aha midini afti n’Epiɗ-ɗai Alaw na wiiki a siŋki, afti na fiyaw gaini emelni ami a ka warni maini n’Epiɗ-ɗai Alaw na wiiɗi tamaiki a miɗiŋki nɵa ɗa, ki ɗû seŋ paŋ n’aŋ warni gadai zi ɗû hanɗa midini.

⁴Won hlai na ki vigi Yurdan ɗa li, ki ɗiyi alini fuŋ na mu miɗiki gaini girna ɓa ki ɗiyiŋ amai zaw zaw ɗa, amai midiɗi huwuŋ, ki girdi laso na muɗukwi sini sek sek.

⁵Woni, ki rgi Gûwiŋ zi ɓaka wiini Epiɗ-ɗai Alaw na wiiki, a gûwiŋ zi ɓaka z'ali-fuŋ, alifuŋ n’e pi kawai sini kai.

⁶Ki rgi Gûwiŋ zi ɓaka wiini Epiɗ-ɗai Alaw na wiiki gaini ali-fuŋ n’e cirhiŋ kai, ki zi ɓaka zi yi wiini Epiɗ-ɗai Alaw na wiiki midini.

⁷Ki zi ɓaka zi ɵeɗ lai, ki simiŋ gaini firiyi war hlai ni ɗa wuzani Epiɗ-ɗai Alaw na wiiki.

⁸Ki ɗûseŋ n’aŋ warni gadai zi ɗû hanɗa midini, ki ɗûŋ edi gaglai ɗoɗo.

⁹Musus gaiɗi Levitekai na paakai zi ɓaka e miɗiɗi wiiɗi aliɗi Izrayel: Aliɗi Izrayel, simni hiyak, ziɓiri; girna ɗa ki bindi li aŋ ɗai na wiini Epiɗ-ɗai Alaw na wiiki.

¹⁰Aga ki ɵini mini Epiɗ-ɗai Alaw na wiiki, ki zi pini gadaini gaini gadaini zi ɗû lai maini na mu na miɗiŋki girna na ɗa nɵa.

¹¹Mefeŋni dama, Musus a sa miɗi wiiɗi ɗai maini nɵa:

¹²Won hlai na ki vigi Yurdan ɗa li ɗa, Simeyon, Levi, Yuda, Isakar, Yosef gaini Benyamin lai aga e ɗiyi amai midiɗi huwuŋ Garizim aŋ ɓikiɗi ɗai ɗa.

¹³Ruben, Gad, Aser, Zabulon, Dan gaini Neftali lai aga e ɗiyisi amai midiɗi huwuŋ Ebal par aŋ tûsiɗi ɗai lai.

¹⁴Wuzaɗi ɗai na Izrayel ɗa paŋ, levitekai aga e miɗi gaini wulaɗi amai ɓa:

¹⁵Ɗif paŋ n’a zizina wala aŋ alaw na wiini, a kilɗa ɗa a luwuŋ, a yoraŋ gaini yûri, na ɓa a ŋoyoŋ war hlai ktai cok a siiwa tini war kuɗuhai ɗa, tusa aŋ midini. Ɗai paŋ e wiyi seŋ ɓa: A za ɗa ɵa.

¹⁶Ɗif paŋ n’a miisa epini gaiɗi emini ɗa, tusa aŋ midini. Ɗai paŋ e wiyi seŋ ɓa: A za ɗa ɵa.

¹⁷Ɗif n’a zogo hagani hlaini maini ɗa, tusa aŋ midini. Ɗai paŋ e wiyi seŋ ɓa: A za ɗa ɵa.

¹⁸Ɗif paŋ n’a siŋkitini futi na mafuni wiini ɗif na melveŋ, tusa aŋ midini. Ɗai paŋ e wiyi seŋ ɓa: A za ɗa ɵa.

¹⁹Ɗif paŋ n’a tûwiriti sariyani ɗif na morkoi, zaw ahiyagwi na huyuk, zaw na wiiɗi zaw na war greŋ ɗa, tusa aŋ midini. Ɗai paŋ e wiyi seŋ paŋ: A za ɗa ɵa.

²⁰Ɗif paŋ n’a fana gaiɗi munini epini ɗa, tusa aŋ midini, buri ɓa a yima mini sapa na wiini epini amai. Ɗai paŋ e wiyi seŋ ɓa: A za ɗa ɵa.

²¹Ɗif paŋ n’a fana gaini wala n’ezini puɗu, tusa aŋ midini. Ɗai paŋ e wiyi seŋ: A za ɗa ɵa.

²²Ɗif paŋ n’a fana gaiɗi tawalni, koo ɓa t'ahini epini, t'ahiɗi emini, tusa aŋ midini. Ɗai paŋ e wiyi seŋ: A za ɗa ɵa.

²³Ɗif paŋ n’a fana gaiɗi emiɗi munini ɗa, tusa aŋ midini. Ɗai paŋ e wiyi seŋ ɓa: A za ɗa ɵa.

²⁴Ɗif paŋ n’a fuɗa maini war kuɗuhai ɗa, tusa aŋ midini. Ɗai paŋ e wiyi seŋ ɓa: A za ɗa ɵa.

²⁵Ɗif paŋ n’a yima farai tini ɗif par kapai a fiɗini ɗif na tini war seŋ kai edi ɗa, tusa aŋ midini. Ɗai paŋ e wiyi seŋ ɓa: A za ɗa ɵa.

²⁶Ɗif paŋ n’a va seŋ n’aŋ war gadai zi ɗû hanɗa amai kai, a za pini kaalai ɗa, tusa aŋ midini. Ɗai paŋ e wiyi seŋ ɓa: A za ɗa ɵa.