Read Mousgoum Wiyi na midini gadai 28 Bible Online

Wiyi na midini gadai 28 - Mousgoum bible

Wiyi na midini gadai 28

¹Na ɓa ki ɵini mini Epiɗ-ɗai Alaw na wiiki ɗa, na ɓa ki ɗa zi pini gadaini paŋ maini na mu siŋki girna ɗa ɵa ɗa, Epiɗ-ɗai Alaw na wiiki aga a bindiki ki sûwiɗi pinziba zamai na midini afti ɗa paŋ;

²Ɓiki n’aga a halasi miɗiki n’aga a sa siki lai buri ɓa ki ɵini mini Epiɗ-ɗai Alaw na wiiki a hanɗa:

³Ɓiki aga a sumna midiɗi nagai n’aha war fuŋ n’abakai gaiɗi nagai n’edi war basga ɗa lai.

⁴Aga ki wii ali viya, aga ki hiɗi seyem viya, farani ɵaakaiki gaini adumaiki gaini haakaiki lai aga a sisɗa viya.

⁵Ɓiki aga a sumna midini dologoki gaini wazagai na ki giɗimi avudi warni ɗa.

⁶Ɓiki aga a sumna midini niyiki n’edi gaini wiyiki n’aha lai.

⁷EPIƊ-ƊAI aga a siki rɗi n’amai midiɗi gawki n’aga e fikisi amai siki paŋ, e hilisi aŋ hitimiki sek ɗa futiɗi ktai, e ɵiriɗi wuzaki par ɗa futiɗi kiini kiini muguzak.

⁸EPIƊ-ƊAI aga a ɓaka vreki gaini sda na ki yimiŋ tiki paŋ, aga a ɓiki midini afti n’aga a siŋki ɗa.

⁹Na ɓa ki yimi li pini gadai na wiini Epiɗ-ɗai Alaw na wiiki, na ɓa ki ɗa piyi maini n’a firiya nɵa lai ɗa, EPIƊ-ƊAI aga a yimiki aŋ ɗaini na sɗik maini n’a hiki wala mini ɗa nɵa.

¹⁰Nɵa ɗai na midini afti paŋ aga e siɗi ɓa ki ɗi ɗai na gaini viri edi ɗaw aŋ wiini EPIƊ-ƊAI, aga e hûniki lai.

¹¹EPIƊ-ƊAI aga a ɓikiki gaini der viya midini afti n’a ha wala mini wiiɗi tamaiki ɓa aga a siŋki ɗa. Aga ki wii ali viya, farani faraiki aga a za viya, aga ki hiɗi seyem gaini futini lai.

¹²EPIƊ-ƊAI aga a mala mini hlai n’amai edi buriki, hlai n’a giɗima faŋ warni maini godaini nɵa, a hinasi faŋ a ɵa midini aftiki war hlaini aŋ ɓaka sda na ki yimiŋ tiki paŋ, aga ki tifi edi wiiɗi ɗai viya, tiki aga ki tifisi edi tiɗi par kai.

¹³EPIƊ-ƊAI aga a ziki aŋ ɗai na wuzaɗi marki, aga a hiniki asakal piɗi marki kai, aga a tikiki amai midiɗi marki, a hiniki azumai piɗi marki kai, na ɓa ki tiki hangalki li sini gadai na wiini Epiɗ-ɗai Alaw na wiiki na mu na siŋki girna na ɗa, ki yimiŋ li, ki zi li pini lai ɗa,

¹⁴tiki aga ki viiɗi edi siɗi futi na mu na siŋkitiki girna na ɗa par nzaw kaalai nzaw kaalai, aga ki tiki futi pini alawai na zamai aŋ zi ɵeŋni kaalai.

¹⁵Na ɓa ki ɵini mini Epiɗ-ɗai Alaw na wiiki kai, na ɓa ki fiɗi was aŋ zi pini gadaini gaini gadaini zi ɗû na mu na siŋki girna na ɗa paŋ kai, tusa n’aga a halasi miɗiki, n’aga a sumna miɗiki lai ɗa a hanɗa.

¹⁶Tusa aga a sumna midiɗi nagai n’aha war fuŋ n’abakai gaiɗi nagai n’edi war basga ɗa lai.

¹⁷Tusa aga a sumna midini dologoki gaini wazagai na ki giɗimi avudi warni.

¹⁸Aga ki wii ali viya kai, ki hiɗi seyem viya kai, ɵaakaiki gaini adumaiki gaini haakaiki lai aga a sisɗa viya kai.

¹⁹Tusa aga a sumna midini niyiki n’edi gaini wiyiki n’aha lai.

²⁰EPIƊ-ƊAI aga a ɵinasi tusa miɗiki, aga a hinasi hunai a yimiki, gaini hiwiyi zamai zamai lai war sda n’aga ki yimiŋ tiki paŋ haa ki tûûri edi, ki vidi edi marwai, burini sdaki na meefeŋ na ki ziŋ ɗa, buri ɓa ki hini EPIƊ-ƊAI edi.

²¹EPIƊ-ƊAI aga a taɓa vlak piki teɓ haa a vidiki edi midini afti n’aga ki tikiŋ aŋ wiiki ɗa par.

²²EPIƊ-ƊAI aga a ɵinasi veglek miɗiki, gaini si zi sawai, gaini si zi hiliwi. Aga a kasi koɓro midini afti, seyem ɗa aga a hula, ɵa ɗa a hofa lai. Gir hanɗa aga a za siki haa ki vidi edi.

²³Hlai n’amai par miɗiki aga a bunda gdaŋ maini kiya nɵa, afti n’azumai pini eziki par a bunda gdaŋ maini kawai ɵa lai.

²⁴War sarti na wiini faŋ ɗa, faŋ aga a ɵa kai, EPIƊ-ƊAI aga a hinasi war balamni faŋ ɗa, a logodo gaini kai kai haa ki vidi edi.

²⁵EPIƊ-ƊAI aga a hiniɗi gawki e rɗi amai miɗiki, ki hili aŋ hitimiɗi sek ɗa futiki ktai, ki ɵiri ɗi wuzaɗi par futiki kiini kiini muguzak, aftiɗi paakai na midiɗi yai ɗa paŋ hunai aga te yimiɗi burini wala n’e tiliŋ a za siki ɗa.

²⁶Kopoŋki aga a bunda aŋ wala zi simi na wiini wazagai zi ɗufli n’arbani hlai n’amai gaini wazagai n’ezini puɗi puɗu na midini afti, ɗif n’aga a huwuyaŋ aŋ kai.

²⁷EPIƊ-ƊAI aga a ɵinasi veglek zi ɵiɓi si n’abakai z'alu miɗiki maini n’a zaŋ siɗi ɗai n’Egipte ɗa nɵa, aga a ɵinasi wala zi diyi-pi, hurdai, gaini si zi viygû na ki kiɗi ki zûûli mini par kai.

²⁸EPIƊ-ƊAI aga a ɗûliki, a ŋûlviki, aga a turma miɗiki lai.

²⁹Girvudi n’arba ɗa, aga e tipiki maiɗi ɗai na malva nai nɵa, aga ki nivi war sdaki na ki yimiŋ tiki ɗa kai, ɗai aga e kiriki, e virmiki, ɗif n’aga a lûwiiki ɗuwal aŋ kai.

³⁰Muni na ɗif a giɓiti li gaŋ ɗa, maini aga a fana gaiɗi, dilimi na ɗif a rgiti li ɗa, aga a sumna warɗi kai, ɗif n’a za zardeŋ zi vin li ɗa aga a tika alini mini kai.

³¹Aga e fiɗi ɵaakaiki wuzani arki, amma neŋni aga a guna miki kai, aga e yimi ablehökaiki wuzani arki, aga e wiyiŋki kai, adumaiki gaini haakaiki aga a sa war tiɗi gawki, amma ɗif ktai ma aga a lûwiiki ɗuwal aŋ kai.

³²Aliki na maɵagai gaiɗi na falakai aga e si war tiɗi pinziba zamai aŋ bagakai wuzani arki, aga ki biyiɗi haa ki kiyi, aga e wiyisi kai. Aga ki kiɗi ki zi wala ktai kaalai.

³³Pinziba zamai na ki sɗiŋ kai aga a suma seyemki na ki hiɗiŋ ɗa, gaini derki na ki niviŋ paŋ. Ɗai aga e kiriki, e pipiɗiki ɵa kureɗ.

³⁴Wala n’aga ki tiliŋ a za wuzani arki ɗa, aga a ɗûliki.

³⁵EPIƊ-ƊAI aga a hinasi veglek zi ɵiɓi si n’abakai z'alu, a siki sini kurnaiki gaini ɓalakki n’a kiɗa a zuula kai. Asakal par aga a ɵara edi siki paŋ, azumai war buburni azi par haa amai miɗiki.

³⁶EPIƊ-ƊAI aga a hinasi pinziba zamai na tiki gaiɗi tamaiki paŋ ki siɗiɗi kai, e hilisi e miliki aŋ kiki midini afti zamai tiki gaini pai na ki tikiŋ miɗiki paŋ, woni aga ki hûrgi azumai wuzani alawai zamai n’e ziŋ gaini luwuŋ zaw ali-fuŋ lai.

³⁷Pinziba n’EPIƊ-ƊAI aga a kiki arbaɗi paŋ ɗa, aga e bindi hiyak burini wala n’a za siki ɗa, aga e ziki yewere, e riyi piki lai.

³⁸Aga ki bili seyem war vuwaiki viya, amma aga ki hiɗi agwi, buri ayuwi aga a lumaŋ edi.

³⁹Aga ki zi zardeŋ zi vin, aga ki ziziniŋ lai, amma aga ki ci viŋni kai. Aga ki riwi alini kai, buri ɓa atla aga a lumaŋ.

⁴⁰Aga ki pi luwuŋ olive midini aftiki paŋ, amma aga ki nivi emelni aŋ girdi siki kai, buri ɓa olive ɗa aga a yaka azumai wuzani hlai.

⁴¹Aga ki wii ali na maɵagai gaiɗi na falakai, aga e simni gaiki kai buri gawki aga a miliɗi aŋ bagakai midini afti zamai.

⁴²Luwoŋaiki gaini seyemki paŋ ayuwi aga a lumaŋ.

⁴³Ɗai zi zak n’e ɗa arbaki ɗa spakɗi aga a riya amai sek sek, amma tiki ɗa aga ki hûsi azumai sek sek.

⁴⁴Nagai aga e tûfiki wala, amma tiki aga ki tûfiɗi wiiɗi nagai kai, nagai aga e bindi wuzaki, tiki aga ki wiyipiɗi asakal.

⁴⁵Tusa hanɗa paŋ aga a halasi miɗiki, a taɓa piki a yimiki lai haa ki vidi edi buri ɓa ki ɵini mini Epiɗ-ɗai Alaw na wiiki kai, buri ki yimi gadaini gaini gadaini zi ɗûmaini n’a siŋki ɗa nɵa kai.

⁴⁶Aga a hina miɗiki gaini pinzibaki lai aŋ wala zi siŋki gaini wala zi hiila haa kureɗ.

⁴⁷Won hlai na der a naka tiki viya ɗa, tiki ki zi ɵeŋ na wiini Epiɗ-ɗai Alaw na wiiki war firiyi gaiɗi agulki paŋ kai,

⁴⁸Aga ki zi ɵeŋɗi gawki n’EPIƊ-ƊAI aga a ɵiniɗisi miɗiki war wiyamai gaini sai, war ganala, war kiɗi kai na war wala paŋ. Aga e wiiki juk zi kawai wulaki haa ki vidiki edi.

⁴⁹EPIƊ-ƊAI aga a fakasi pinziba na ki ɵini seŋni, edi war koŋni afti par amai siki, aga a yorosi miɗiki maini Muka n’a yora midini walani zi simi nɵa.

⁵⁰E ɗi pinziba na maswarai gara, na hiinini haw warɗi burini ɗif na wel kai, burini ahiyagwi kaalai.

⁵¹Aga e mili faraiki gaini seyemki lai haa ki vidi edi, aga e hiniki algama kai, vin kai, emel kai, alini ɵaakai kai, alini adumaiki gaini haakaiki kaalai haa e vidiki edi.

⁵²Aga e cikiki aha war fuŋki n’abakai haa ɵaga n’amai mogokai na midini aftiki na ki tiki hiiniki midini ɗa a haɗa azumai. Aga e cikiki aha war fuŋ n’abakai midini aftiki n’Epiɗ-ɗai Alaw na wiiki a siŋki paŋ.

⁵³War mefeŋ n’e ciki fuŋki li, na ki ɗa war gir na gawki e tikiŋki miɗiki ɗa, aga ki limi ɗa e ɗi aliki na warki, aga ki limi neŋɗi aliki na maɵagai gaiɗi na falakai n’Epiɗ-ɗai Alaw na wiiki a sɗiki ɗa.

⁵⁴Ɗif na gaini yel midini na hiinini haw warni gara ma, hangalni aga a bunda meefeŋ siɗi tawalakaini gaiɗi munini na amlai siɗi agulni gaiɗi alini n’e hini tini lai.

⁵⁵Buri aga a ɓurwa neŋni ahini n’a fuɗaŋ li aŋ limi ɗa gaiɗi haa wala a hina tini kai, buri gir na wiini cikini fuŋ na gawɗi e tikiŋɗi midiɗi warni fuŋɗi n’abakai ɗa.

⁵⁶Muni na yilli na hiinini haw warɗi gara lai aga te za maini nɵa lai. Na te naka eziɗi a tika azumai kai buri yelɗi gaini hiinini haw na wiiɗi, hangalɗi aga a bunda meefeŋ sini mafaɗi na siŋi agulɗi gaiɗi aliɗi na maɵagai gaiɗi na falakai lai.

⁵⁷Sini ahiɗi n’a niyasi piɗi par, siɗi aliɗi na te wiiɗi paŋ buri ɓa war kiɗi kai na wiiɗi na war wala paŋ ɗa aga te limiɗi war ŋoyai war mefeŋ na wiini cikini fuŋɗi na gawɗi e tikiŋɗi midiɗi war fuŋɗi n’abakai ɗa.

⁵⁸Nɵa ki fiɗi was aŋ zi pini gadai n’aŋ warni ɗû hanɗa, n’aŋ gaini ɗû war maktuɓ ɗa, ki sini hormo wiini ni na yikini kol gara, n’a mula hunai piɗi ɗai ɗa, Epiɗ-ɗai Alaw na wiiki.

⁵⁹Sla kai ɗa EPIƊ-ƊAI gaini midini dama aga a ɵinasi pinzibani gir paŋ gaini veglek lai miɗiki tiki gaini pinzibaki paŋ, a veglek na maafanai n’a zuula kai zaŋ.

⁶⁰Aga a kasi gir paŋ n’a nasi ka a miliki hunai piki war Egipte par miɗiki, aga a taɓa piki.

⁶¹Maa, EPIƊ-ƊAI aga a kasi pinzibani veglek gaini gir paŋ n’aŋ gaini ɗû warni maktuɓ zi gadai hanɗa kai miɗiki haa ki vidi edi kafa.

⁶²Tiki na ki ɗa viya maini meeɵek na war hlai n’amai nɵa, war mefeŋ ni ɗa aga a hina piki ɗa a vok n’agwi kadai buri ki ɵini mini Epiɗ-ɗai Alaw na wiiki kai.

⁶³Maini na firyini EPIƊ-ƊAI a na buri a siki simni na ɵeɗ, a bindiki viya lai, nɵa lai firyini aga a za buri a vidiki edi, a hiziki edi lai, nɵa aga a yimiki edi midini afti n’aga ki niyi aha warni aŋ tikiŋ aŋ wiiki lai.

⁶⁴EPIƊ-ƊAI aga a ɵiriki edi arbani pinziba paŋ, sini koŋɗi yai ktai par haa sini na zamai. Woni aga ki hûrgi azumai wuzani alwai na zamai na tiki kaalai, tamaiki kaalai, ki siɗiŋka duk kai, a alawai zi luwuŋ gaini z'ali-fuŋ.

⁶⁵Edi arbaɗi pinziba hanɗa, hangalki aga a tika azumai kai, aga ki nivi hlai ktai na ki tiki eziki warni aŋ nivi si'n’amla kai, woni EPIƊ-ƊAI aga a hiniti agulki te ɓiriki, arki aga a yima amai kir kai, sirdaiki aga a mula lai.

⁶⁶Sunfaki aga a za aŋ wala n’aga ki siɗi dibini kai, duvuk gaini girvudi paŋ aga ki ziriyi tini hunai, aga ki tiki hiiniki midiɗi dawai kaalai.

⁶⁷Won hlai n’aga ki tili wala n’aga a za wuzani arki ɗa, hunai aga a niya warki, gorof par aga ki miɗi ɓa: futi te nawa na ɗa kaswa ta ɗa, koskoi aga ki miɗi ɓa: futi te diyasi na ɗa kaswa ta ɗa?

⁶⁸EPIƊ-ƊAI a wiyiki war Egipte gaini hulum n’abakai, aga ki wiyisika warɗi futi na mu miɗiki gaiɗi ɓa aga ki wiyisi warɗi kir kai ɗa? Woni aga ki piyi aŋ wûri siki edi tiɗi gawki aŋ bagakai na maɵagai gaiɗi na falakai, amma ɗif ktai n’a wiriki aŋ kai.

⁶⁹Hanɗa a seŋ na war bonu n’EPIƊ-ƊAI a miɗiŋni wiini Musus buri a zaŋ gaiɗi aliɗi Izrayel midini afti na Mowab, asakal bonu n’a zaŋ gaiɗi war Horeɓ ɗa par.