Read Mousgoum Wiyi na midini gadai 29 Bible Online

Wiyi na midini gadai 29 - Mousgoum bible

Wiyi na midini gadai 29

¹Musus a tipiɗi aliɗi Izrayel paŋ a miɗiɗi: won hlai na ki ɗisi ka war Egipte ɗa, ki tili wala n’EPIƊ-ƊAI a zaŋ sini pai gaiɗi ɗaini n’abakai gaini aftini paŋ lai gaini arki.

²Ki tili gir n’abakai n’a ɵinaŋsi midiɗi gaini arki, wazagai n’a bunda ɗif hiyak gaini wazagai zi hiila n’abakai n’a zaŋ,

³paŋ ktai haa girna EPIƊ-ƊAI a sitiki agul na te kiɗa aŋ sɗa wala n’a vuga ɗa kai, a siki arai aŋ tala kai, ɵime aŋ ɵina kaalai.

⁴Buza doogo doogo puɗu, mu ɵa wuzaɗi edi war basga na kaɗataŋ, sapa na siki a ɓasa edi kai, harabak n’eziki a tuura kaalai.

⁵Ki limi peŋ kai, ki ci vin kai, ki ci sul kaala; A za nɵa ɓa kapai a yima miɗiki ɓa Ta m’Epiɗ-ɗai Alaw na wiiki.

⁶Asakal par mu sumusi woni na, Sihon pai na Hesbon gaini Og pai na Basan, e niyisi edi munu aŋ hutumumu, tumu mu rɗumu amai midiɗi.

⁷Mu mulumu aftiɗi ɗa, mu suŋmu wiini pinzibani Ruben, wiini pinzibani Gad gaini galni pinzibani Manase lai.

⁸Buri nɵa ki yimi seŋ na wiini bonu hanɗa pɗem, ki zi pini lai kapai ki nivi war wazagai n’aga ki ziŋ ɗa paŋ.

⁹Musus a muɗa: Aliɗi Izrayel, girna ɗa ki ɗiyi amai gaini hlaiki paŋ wuzani Epiɗ-ɗai Alaw na wiiki, gaiɗi paakaiki, gaini pinzibaki, gaiɗi n’abakaiki n’arbaɗi, gaiɗi sekretaraiki, gaiɗi ɗai na Izrayel ɗa paŋ:

¹⁰aliki, falakaiki gaiɗi ɗai zi zak n’e ɗa arbaki n’e biliki luwuŋ, n’e miki yem lai;

¹¹Epiɗ-ɗai Alaw na wiiki a za bonu gaiki girna buri nɵa ki siŋkiŋni edi gaini wala zi himi.

¹²Kapai girna ɗa a ziki aŋ ɗai na wiini, ni dama a za aŋ Alaw na wiiki, maini n’a miɗiŋki nɵa lai, a ha wala mini wiiɗi tamaiki: Abraham, Isak gaini Yakob.

¹³Bonu na mu zaŋ gaiki gaini wala zi hi-mi hanɗa, mu zaŋ na ɗa gaiki tiki ktai kai,

¹⁴amma gaini asiya ɗi paŋ n’a na tiyana war hlai hanɗa wuzani Epiɗ-ɗai Alaw na wiiki gaiɗi nagai paŋ n’e ɗa gaimu woni kai.

¹⁵Tiki ki siɗi simnimu na mu sumunumusi midini afti n’Egipte ɗa, ki siɗi vigi na mu vugumusi gaini arbaɗi pinzibaɗi ɗai, hlai na ki vigisi woni ɗaw ɗa.

¹⁶Tiki ki tili wazagai na haharai gaini alawai zamai n’a na ahaɗi ɗa: luwuŋ, ali-fuŋ, arzaŋ gaini or lai.

¹⁷Arbaki ɗ a, wus kaalai, munin kaalai, pakatai ktai kaalai, pinziba ktai kaalai, ɗif nɵa a bunda arni edi aŋ hina Epiɗ-ɗai Alaw na wiiki buri a hurga azumai wuzani alawai na wiiɗi pinziba hanɗa kai. A juva ɓa sirdaini luwuŋ na ɗewek zi fiɗi ɗai a diya arbaki kai.

¹⁸Na ɓa ɗif a ɵina seŋ hanɗa li, aga a hiina warɗi agulni kai ɓa: ta aga mu nava ɓiki, mu za na agula a firiyaŋ, koo mu ɵina pini seŋ kai ɗa kal, seŋ a muɗa ɓa afti n’a ca yem li sai mini kir kai.

¹⁹Ɗif n’a za li hanɗa EPIƊ-ƊAI aga a hinini tuwurni kai, hiyni gaini sileni aga a yuvuga midini ɗif hanɗa. Tusa paŋ n’aŋ gaini ɗû war maktuɓ hanɗa aga a kɵa midini, EPIƊ-ƊAI aga a haza yikini edi midini afti par.

²⁰EPIƊ-ƊAI aga a yimaŋ edi arbaɗi pinzibaɗi Izrayel paŋ par buri a zini gir pini tusa na pini bonu n’aŋ gaini ɗû war maktuɓ na wiini gadai hanɗa.

²¹Pinziba n’asakal sek, aliki n’asakal sek, morkokai n’aga e hilisi gaigai par midini aftiki lai, Won hlai n’e tili gir na sini aftiki li, e tili veglek n’EPIƊ-ƊAI a kaŋsi miɗiki li lai ɗa, aga e miɗi:

²²Afti ɗa a bunda aŋ sufre, aŋ manta aŋ afu lai, e bili seyem woni kai, e pi luwuŋ woni kai, evek kaw a diya woni kaalai maini na war Sodoma gaiɗi Gomora nɵa, maini na Adma gaini na Keboyim nɵa lai, fuŋ n’abakai n’EPIƊ-ƊAI a tuuraŋ edi gaini hiyni n’abai.

²³Pini zibaɗi ɗai na zamai ɗa paŋ aga e zilbi siɗi ɓa: EPIƊ-ƊAI a za sini afti hanɗa nɵa buri maɗa? Hiy n’abai hanɗa nɵa buri maɗa? Hiy na gdaŋ na maini hanɗa nɵa buri maɗa?

²⁴Ɗai aga e wiyi seŋ ɓa: a za nɵa buri ɓa e hini bonu na wiini Epiɗ-ɗai Alaw na wiiɗi tamaiɗi edi, bonu n’a zaŋ gaiɗi Won hlai n’a miliɗisi aha war Egipte par.

²⁵E hili aŋ zi ɵeŋni alawai na zamai, aŋ hûrgi azumai wuzani lai, alawai na nagai e siɗiŋ kai, n’e si aŋ alawai na wiiɗi kaalai.

²⁶Nɵa EPIƊ-ƊAI a za hiy sini afti hanɗa, a kasi tusa paŋ n’aŋ gaini ɗû war maktuɓ hanɗa midiɗi.

²⁷EPIƊ-ƊAI a hûrɗiɗisi amai midini aftiɗi par gaini hiy n’abai gaini suwar n’abai lai, a birgiɗisi edi midini afti zamai maini na mu ɗa tuluɗumu girna na ɗa nɵa.

²⁸Wazagai n’aŋ gaini ŋûyi ɗa a wiini EPIƊ-ƊAI, wazagai n’a siŋkasi edi ɗa, a wiimu gaiɗi alimu haa kureɗ, kapai tumu mu zumu pini seŋ paŋ n’aŋ war gadai zi ɗû hanɗa.