Read Mousgoum Wiyi na midini gadai 3 Bible Online

Wiyi na midini gadai 3 - Mousgoum bible

Wiyi na midini gadai 3

¹Asakal par mi bindi aryi, mi hili ɗikat war Bazan, amma Og pai na wiiɗi Bazan a niyasi anene aryi gaiɗi askarini paŋ buri aŋ hitimiyi war Edre.

²EPIƊ-ƊAI a muɗaŋa ku huna kai, buri mu saŋ war tuku ta, gaiɗi ɗai paŋ gaiɗi yaini paŋ lai, aga ku za sini maini ku za sini Shon pai na wiiɗi Amoritekai na sumna war Hesbon.

³Nɵa Epiɗ-ɗai Alaw na wiimu a sa war tumu pra OG pai na wiiɗi Bazan gaiɗi ɗaini paŋ na mu hutumu ɗi ha ɗif ktai kaw a hina piɗi karni kai zaŋ.

⁴Nɵa haa mu tukumu vilkaiɗi kafa, fuŋn’abakai ktai na te hina pumu na te tika kai t'aŋ kai. Piɵini vilkai paŋ doogo doogo-ɵaara, gaini hlai na Argov war Bazan, na Og a ŋiti paini midiɗi woni.

⁵Vilkai hanɗa a nafu gdaŋai, gaini hiri amlai gaini zalagakai na mogokai, gaini mini magala gaini taprakai sulusulu, gaini ɵi ka ka gaini kawakai fuŋai zamai zamai viya lai.

⁶Mu vuduɗumu edi kafa, maini na mu zuŋmu wiini Sihon pai na wiiɗi Hesbon, fuŋn’abakai paŋ mu viditimu edi gaiɗi ɗai ɗi na maɵagai, falakai, aliogoi lai.

⁷Amma aga mu giɗimumu aŋ wiimu pini wala zi vram na pini gaw par a farai na zini puɗu puɗu gain der zamai na mu kiɗumu warni vilkai.

⁸Nɵa mu tikitumu yai na wiiɗi paakai na sulu na wiiɗi Amorite kai na te na war gal hlai na piɗi futi na dawai par na wiini Yurdan, arbani yem zi ki na wiiɗi Arno gaiɗi huwuŋ na Hermon.

⁹Sidoniya kai e yikiti huwuŋ hanɗa ɓa Siriyon, Amoritekai e yikiti ɓa Senir.

¹⁰Mu tukumu vilkai na amai midini hlai na boŋor, zi kalɓas paŋ. Mu tikitumu yai na wiiɗi Galaad paŋ, gaiɗi na wiiɗi Bazan paŋ haa war Salka gaiɗi Edre, hanɗa a vilkai na Bazan na Og a ŋa woni.

¹¹Og pai na wiiɗi Bazan a ni n’a hina ktai war piŋ-zibani Refaiitekai, anrawa na wiini anrawa zi kawai maini e tili hanɗa nɵa war fuŋ n’abai n’amai na wiiɗi aliɗi Amoritekai nɵa piɵini mogoni a na metre sulu.

¹²Yai hanɗa lai mu tikitumu aŋ wiimu. Galni hlainawiini huwaŋai na wiiɗi Galaad, haa warɗi Arower par haa sini hudukzi ki yemna wiiɗiArno. Mu siŋɗi wiiɗi ɗai na war pini-zibani Ruben gaini Gad.

¹³Pini galni hlai na hina na wiiɗi Galaad gaini hlai na wiiɗi Bazan kafa, afti na wiini Og, mu siŋɗi wiiɗi gal na wiini ziba na wiini Manase. Hlai na wiiɗi Argov gaini Bazan gaini abaini, e yikiŋ ɓa yaiɗi Rafaiitekai.

¹⁴Piŋ-zibani Yayir ahini Ma nasse e tiki aŋ wiiɗi hlai na wiiɗi Argov kafa haa warɗi yai na wiiɗi Gersonite kai gaiɗi yai na wiiɗi Maka titekai. Asa yikini wiini hlai na wiiɗi Bazan hanɗa girna lai e yikiŋ pra ɓa, yai na wiiɗi Yayir.

¹⁵Wiiɗi zibani Makir, ahini Ma nasse, mu sitini yai na Galaad.

¹⁶Wiiɗi ɗai na war piŋ-zibani Ruben gaini Gad par a hala haa war Arno. Yem zi ki na war hodokai na wiiɗi Arno, a na aŋ haga haa a Yabok, hagani hlai na wiiɗi alini Ammon.

¹⁷Piɗi futi na koskoi sek, hagani hlai a tika pini gaini meɵew na wiini Yurdan, arbani Lak na wiiɗi Genezaret gaini yem n’abai zi mri, haa azumai aziɗi huwuŋ Pisga, piɗi futi na dawai par.

¹⁸Nɵa mu miɗi siɗi pinziba n’e nivi hlai zi simni ya, nɵa tiyana Epiɗ-ɗai Alaw na wiiki a siki aŋ bulum hlai zi ɓraw na piɗi futi na dawai par na wiini ra na Yurdan. Tiyana askarai zi hatam na marbaki paŋ aga e mili wazagai zi hatam siɗi, aŋ hili aŋ hiwi yem na Yurdan wuzaɗi tawalakaiki na zamai na Izrayel a kai.

¹⁹Sai falakaiki gaiɗi aliki, gaini faraiki aga e hini ka anene won hlai na, warni fuŋ n’abakai na mu siŋki. Mu siɗa ya ɓa, kiɗa gaini farai viya.

²⁰Aga ki zini piɗi tawalakai ki, haa won hlai na Epiɗ-ɗai Alaw na wiiki a siɗi hlai zi simni maini tiki ki niviŋ azumai na nɵa. Nagai lai a dara ɓa e nivi hlai haw warɗi yai na Epiɗ-ɗai Alaw na wiiki a za ɵinini ha aŋ sitiɗi war piɗi futi na koskoi na wiini Yurdan. Asakal par asiya kai arbaki, aga a waya aha warni aftini, warɗi yai na mu sitiki.

²¹War mefeŋ ni ɗa mu sini gadai wiini Yosva, mu miɗini, ku siɗali gaini arku wala paŋ na Epiɗ-ɗai Alaw na wiiku a ziŋɗi wiiɗi paakai na sulu na wiiɗi Amoritekai. Aga a za wala hanɗa lai siɗi paakai zamai n’aga ku niviɗi anene a kata tini Yurdan.

²²Ki hûniɗi kai buri Epiɗ-ɗai Alaw na wiiki aga a hitima buriki.

²³Musus a muɗa: mu siiwa EPIƊ-ƊAI maini nɵa.

²⁴Epiɗ-ɗai Alaw na, ku siŋka siŋki n’abakai gaini spak arni ɗifku zi ɵeŋ, azumai midiɗi yai, amai warni fuŋ n’Alaw lai Alaw na maiku tuku nɵa aŋ kai zaŋ, na kiɗa aŋ za wazagai n’abakai gaini wazagai zi siŋki, maini na ku zaŋ hanɗa nɵa.

²⁵Saŋa futi aŋ vuga anene kata, aŋ tiliti yai na pɗemi na te n’anene kata tini ra na Yurdan, hlai zi huwaŋai na wiiɗi Liban.

²⁶Amma EPIƊ-ƊAI a faka suwar sa buriki a ɵina seŋŋa kai, EPIƊ-ƊAI a muɗaŋa, ɗiya seŋ hanɗa, ku muɗaŋa kir kai.

²⁷Hasi amai midiɗi huwuŋ na e yikiti ɓa Pisga, tala arku war gal hlai na piɗi futi na koskoi sek, war gal hlai na azumai sek lai war hlai n’amai sek lai, piɗi futi na dawai par sek lai, talaŋ paŋ gaini. Yurdan hanɗa aga ku hawaŋ anene kata kai.

²⁸Sa miɗiku paŋ edi wiini Yosva, gdaŋ, zizinaŋ aŋ ɗiya gdaŋ lai buri a ni n’aga a vuga Yurdan wuzaɗi aliɗi Izrayel, a ni n’aga a ɓûrwiɗi afti edi aŋ bulum lai, warɗi yai na ku tiliti hanɗa.

²⁹War mefeŋ ni par lai, mi simni warni huduk zi meɵew hanɗa sa, wuzaɗi Bet-Peyor.